អង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch = HRW) មានមូលដ្ឋាននៅទីក្រុងញីវយ៉ក (New York) សហរដ្ឋអាមេរិក ជំរុញឲ្យសហរដ្ឋអាមេរិក ដាក់សម្ពាធលើប្រមុខរដ្ឋាភិបាលកម្ពុជា លោក ហ៊ុន សែន ឲ្យគោរពសិទ្ធិសេរីភាពនៃការជួបប្រជុំ។ យូមែន រ៉ៃត៍ វ៉ច្ឆ ចង់ឲ្យរដ្ឋាភិបាលសហរដ្ឋអាមេរិក ដាក់សម្ពាធនៅពេលដែលលោកនាយករដ្ឋមន្ត្រី ហ៊ុន សែន ទៅចូលរួមកិច្ចប្រជុំកំពូលអាស៊ាន-អាមេរិក នៅថ្ងៃទី១៥-១៦ កុម្ភៈ នៅសាន់នីឡេនដ៍ (Sunnylands) ទីក្រុងរ៉េនចូមីរ៉េច (Rancho Mirage) រដ្ឋកាលីហ្វ័រញ៉ា (California)។
មន្ត្រីរដ្ឋាភិបាលលើកឡើងថា រដ្ឋាភិបាលពុំចាំបាច់យកចិត្តទុកដាក់នឹងការទាមទារនេះឡើយ ដ្បិត យូមែន រ៉ៃត៍ វ៉ច្ឆ គឺគ្រាន់តែជាអង្គការមួយ។
ក្នុងសេចក្ដីថ្លែងការណ៍ដែលចេញដោយ យូមែន រ៉ៃត៍ វ៉ច្ឆ លើកឡើងថា សហរដ្ឋអាមេរិក គួរតែទាមទារជាសាធារណៈទៅរដ្ឋាភិបាលកម្ពុជា ឲ្យបញ្ឈប់ការគំរាមទៅលើអ្នកនយោបាយប្រឆាំងករណីមានបាតុកម្មប្រឆាំងលោកនាយករដ្ឋមន្ត្រី ហ៊ុន សែន នៅសហរដ្ឋអាមេរិក នៅសប្ដាហ៍ក្រោយ។
នាយកប្រចាំតំបន់អាស៊ីនៃអង្គការ យូមែន រ៉ៃត៍ វ៉ច្ឆ លោក ប៊្រែដ អាដាម (Brad Adams) លើកឡើងក្នុងសេចក្ដីថ្លែងការណ៍នោះថា កងកម្លាំងរបស់ លោក ហ៊ុន សែន ធ្លាប់វាយ និងបាញ់សម្លាប់អ្នកតវ៉ានាពេលកន្លងទៅ។ ហេតុនេះ ការគំរាមអ្នកប្រឆាំងជារឿងដែលអាចជឿទុកចិត្ត និងព្រួយបារម្ភ។ សេចក្ដីថ្លែងការណ៍របស់ យូមែន រ៉ៃត៍ វ៉ច្ឆ ដែលចេញកាលពីថ្ងៃទី៩ ខែកុម្ភៈ នោះបន្តថា ប្រធានាធិបតីសហរដ្ឋអាមេរិក លោក បារ៉ាក់ អូបាម៉ា (Barack Obama) ក៏គួរតែដាក់សម្ពាធទៅ លោក ហ៊ុន សែន ឲ្យបញ្ចប់រាល់អំពើហិង្សា និងការរំលោភបំពានទៅលើអ្នកគាំទ្រគណបក្សប្រឆាំង និងទម្លាក់ចោលការចោទប្រកាន់ពីបទព្រហ្មទណ្ឌចំពោះអ្នកតវ៉ាដោយសន្តិវិធី និងដោះលែងអ្នកទោសនយោបាយ។
ប្រសាសន៍របស់ លោក ប៊្រែដ អាដាម ត្រូវបានប្រែសម្រួលដូច្នេះ៖ «មនុស្សដែលមានចរិតហិង្សាយ៉ាងកំរោលដូច លោក ហ៊ុន សែន ពលរដ្ឋរស់នៅក្នុងសហរដ្ឋអាមេរិក មិនអាចទទួលយកបានទេ ពីព្រោះអំពើអាក្រក់ដែលគាត់ប្រព្រឹត្តនៅក្នុងប្រទេសរបស់គាត់ វាអាក្រក់គ្រប់គ្រាន់ហើយ ប៉ុន្តែការដែលគាត់បញ្ចេញសារគំរាមបំភិតបំភ័យពលរដ្ឋនៅសហរដ្ឋអាមេរិក ដើម្បីមិនឲ្យពួកគេចូលរួមក្នុងបាតុកម្មអហិង្សាណាមួយ បណ្ដាលឲ្យមានការភ័យបារម្ភអំពីសុវត្ថិភាពបងប្អូនញាតិមិត្តរបស់ខ្លួននៅកម្ពុជា ហើយមិនហ៊ានចូលរួមនោះ វាគឺជាអំពើមួយអាក្រក់ហួសនិស្ស័យ និងមិនអាចទទួលយកបាន»។
ឆ្លើយតបនឹងការលើកឡើងនេះ រដ្ឋលេខាធិការ និងជាអ្នកនាំពាក្យនៃទីស្ដីការគណៈរដ្ឋមន្ត្រី លោក ផៃ ស៊ីផាន មានប្រសាសន៍ថា រដ្ឋាភិបាលស្វាគមន៍ចំពោះបាតុកម្មនានា តែលោកថា សហរដ្ឋអាមេរិក ក៏មានតួនាទីរក្សាសុវត្ថិភាព និងមុខមាត់សម្រាប់ប្រមុខរដ្ឋាភិបាលកម្ពុជា ដែរ៖ «រាជរដ្ឋាភិបាលមានបុព្វសិទ្ធិដែលជាភ្ញៀវជាផ្លូវការរបស់សហរដ្ឋអាមេរិក ក្នុងកិច្ចការពារសុវត្ថិភាពរបស់សម្ដេចអគ្គមហាសេនាបតីតេជោ ហ៊ុន សែន ក៏ដូចជាគណៈប្រតិភូចូលរួម។ ដូច្នេះ ខ្ញុំមិនគិតថា សេតវិមាន (White House) ជាអ្នកប្រតិបត្តិរបស់ យូមែន រ៉ៃត៍ វ៉ច្ឆ។ អ្វីដែលស្ដែងចេញតាមរយៈឯកឧត្ដម ចន ឃែរី (Jonh Kerry) គាត់បានមានប្រសាសន៍ថា ចង់ទំនាក់ទំនងល្អ ធ្វើការល្អជាមួយកម្ពុជា ហើយចំណុចទី២ អ្វីដែលជារបៀបវារៈ (កិច្ចប្រជុំ) ជាផ្លូវការ គឺអត់មានច្របូកច្របល់នៅក្នុងរឿងសិទ្ធិមនុស្ស ឬរឿងដទៃទៀតទេ»។
លោកនាយករដ្ឋមន្ត្រី ហ៊ុន សែន កាលពីថ្ងៃទី២៤ ខែមករា បានព្រមានតាមទំព័រហ្វេសប៊ុក (Facebook) នៅពេលឆ្លើយតបនឹងមតិរបស់សកម្មជនគណបក្សសង្គ្រោះជាតិ ម្នាក់ថា អ្វីដែលសកម្មជនបក្សប្រឆាំងត្រូវចាំនោះ គឺត្រូវទទួលស្គាល់សិទ្ធិធ្វើបាតុកម្មនៃអ្នកគាំទ្រ លោក ហ៊ុន សែន ប្រឆាំងមេដឹកនាំបក្សប្រឆាំងនៅក្នុងប្រទេសវិញ។
អ្នកគាំទ្រគណបក្សប្រជាជនកម្ពុជា ម្នាក់ដែលប្រើប្រាស់គណនេយ្យហ្វេសប៊ុកឈ្មោះ Khan Chansophal បានសរសេរថា គម្រោងធ្វើបាតុកម្មប្រឆាំងលោកនាយករដ្ឋមន្ត្រី ហ៊ុន សែន នឹងធ្វើឲ្យ លោក កឹម សុខា លែងហ៊ាននៅស្រុកដែរ ដោយខ្លាចក្រុមអ្នកគាំទ្រគណបក្សប្រជាជនកម្ពុជា ធ្វើបាតុកម្មដុតផ្ទះ ឬចាប់អូស លោក កឹម សុខា ចេញពីឡានវាយដូចតំណាងរាស្ត្រ ២នាក់នោះណាស់ ដែលនេះសំដៅទៅលើ លោក ញ៉យ ចំរើន និងលោក គង់ សភា។
ចំណែកកូនប្រុសរបស់លោកនាយករដ្ឋមន្ត្រី ហ៊ុន សែន គឺលោក ហ៊ុន ម៉ានិត បានប្រាប់សារព័ត៌មានក្នុងស្រុកថា គណបក្សប្រជាជនកម្ពុជា នឹងប្រឹងប្រែងគ្រប់គ្រងអ្នកគាំទ្រខ្លួន ប៉ុន្តែលោកមិនធានាឡើយ។
បើទោះជាយ៉ាងណា យូមែន រ៉ៃត៍ វ៉ច្ឆ លើកឡើងថា រដ្ឋាភិបាលកម្ពុជា គួរបញ្ចប់រាល់ការគំរាមទាំងនេះ ហើយប្រធានាធិបតីសហរដ្ឋអាមេរិក លោក អូបាម៉ា គួរតែបញ្ជាក់ឲ្យច្បាស់ថា ទំនាក់ទំនងរវាងសហរដ្ឋអាមេរិក និងកម្ពុជា នឹងមានផលប៉ះពាល់ លើកលែងតែសិទ្ធិនៃអ្នកតវ៉ាដោយសន្តិវិធីត្រូវបានគោរពពេញលេញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។