ប្រធានគណៈកម្មការមហាផ្ទៃ ការពារជាតិ និងមុខងារសាធារណៈនៃរដ្ឋសភា លោក ហ៊ុន ណេង គ្រោងដឹកនាំប្រតិភូទៅចូលរួមកិច្ចប្រជុំប្រចាំឆ្នាំលើកទី៣ របស់គណៈកម្មការទទួលបន្ទុកការពារជាតិ សន្តិសុខនៃរដ្ឋសភាប្រទេសកម្ពុជា ឡាវ និងវៀតណាម នៅទីក្រុងញ៉ាត្រាង (Nha Trang) ខេត្តខាញ់វ៉ា (Khanh Hoa) ប្រទេសវៀតណាម ចាប់ពីថ្ងៃទី២០ ដល់ថ្ងៃទី២២ ខែកញ្ញា។
សេចក្តីជូនដំណឹងរបស់រដ្ឋសភា ចេញផ្សាយនៅថ្ងៃទី១៤ កញ្ញា ឲ្យដឹងថា គោលបំណងនៃកិច្ចប្រជុំនេះ គឺដើម្បីតាមដាន ត្រួតពិនិត្យ វាយតម្លៃវឌ្ឍនភាព និងជំរុញការអភិវឌ្ឍសេដ្ឋកិច្ច សង្គម និងសន្តិសុខ ដើម្បីគាំទ្រដល់ការអភិវឌ្ឍតំបន់ត្រីកោណនៃប្រទេសទាំង៣ គឺកម្ពុជា ឡាវ និងវៀតណាម ព្រមទាំងរួមចំណែកអភិវឌ្ឍសហគមន៍អាស៊ានឲ្យរឹងមាំ។
រដ្ឋាភិបាលប្រទេសកម្ពុជា ឡាវ និងវៀតណាម បានបង្កើតតំបន់អភិវឌ្ឍន៍ត្រីកោណនៅឆ្នាំ១៩៩៩ ដោយភ្ជាប់ខេត្តចំនួន១៣ ក្នុងនោះប្រទេសកម្ពុជា មានចំនួន ៤ខេត្ត ប្រទេសឡាវ មាន ៤ខេត្ត និងប្រទេសវៀតណាម មាន ៥ខេត្ត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។