ក្រសួងមហាផ្ទៃ បានតែងតាំងកូនប្រសាលោកនាយករដ្ឋមន្ត្រី ហ៊ុន សែន គឺលោកឧត្តមសេនីយ៍ទោ ឌី វិជ្ជា ទទួលតំណែងជាប្រធាននាយកដ្ឋានកណ្ដាលសន្តិសុខ។ ការតែងតាំងតំណែងនេះ ធ្វើឡើងប៉ុន្មានថ្ងៃ ក្រោយពេលលោកនាយករដ្ឋមន្ត្រី ហ៊ុន សែន ប្រកាសជាសាធារណៈថា លោកមានការលំបាកក្នុងការរកការងារឲ្យកូនចៅធ្វើឲ្យមានបុណ្យស័ក្ដិនឹងគេ ដោយសារតែលោកមានតំណែងខ្ពស់ពេក ហើយមិនចង់ឮពាក្យថា លោកជាអ្នកដឹកនាំគ្រួសារនិយម។
លោក ខៀវ សុភ័គ អ្នកនាំពាក្យក្រសួងមហាផ្ទៃ កាលពីថ្ងៃទី៨ សីហា មានប្រសាសន៍ថា លោកឧត្តមសេនីយ៍ទោ ឌី វិជ្ជា ជាកូនរបស់អតីតអគ្គស្នងការនគរបាលជាតិ ហុក ឡង់ឌី និងជាស្វាមីរបស់បុត្រី លោក ហ៊ុន សែន មានបទពិសោធន៍គ្រប់គ្រាន់សម្រាប់តំណែងថ្មី។
ការអះអាងរបស់ លោក ខៀវ សុភ័គ ធ្វើឡើងបន្ទាប់ពីលោកនាយឧត្តមសេនីយ៍ នេត សាវឿន អគ្គស្នងការនគរបាលជាតិ បានប្រកាសពិធីចូលកាន់តំណាងរបស់លោកឧត្តមសេនីយ៍ទោ ឌី វិជ្ជា កាលពីថ្ងៃទី៨ មេសា។
ការតែងតាំងឧត្តមសេនីយ៍ទោ ឌី វិជ្ជា មានតួនាទីសំខាន់នៅក្រសួងមហាផ្ទៃ នេះ ធ្វើឡើងហាក់ផ្ទុយទៅនឹងការអះអាងរបស់ លោក ហ៊ុន សែន ដែលបានអះអាងថា តំណែងជានាយករដ្ឋមន្ត្រីរបស់លោក បានរារាំងក្រុមគ្រួសារមិនឲ្យឡើងធ្វើធំបាន ពីព្រោះលោកមិនចង់ឲ្យមានមតិរិះគន់ថា លោកជាថ្នាក់ដឹកនាំគ្រួសារនិយម។
លោកនាយករដ្ឋមន្ត្រីបន្ថែមទៀតថា លោកមានការលំបាកក្នុងការរកការងារឲ្យកូនចៅធ្វើមានបុណ្យស័ក្ដិនឹងគេ ដោយសារតែលោកមានតំណែងខ្ពស់ពេក ហើយមិនចង់ឮពាក្យថា លោកជាអ្នកដឹកនាំគ្រួសារនិយម។ លោកក៏បានរិះគន់ថ្នាក់ដឹកនាំបក្សប្រឆាំង ដែលកំពុងរៀបចំសាច់ញាតិរបស់ខ្លួន អោយធ្វើជាបេក្ខជនគណៈកម្មាធិការជាតិរៀបចំការបោះឆ្នោតផងដែរ។
លោកឧត្តមសេនីយ៍ទោ ឌី វិជ្ជា បានរៀបអាពាហ៍ពិពាហ៍នឹងនាយិកាវិទ្យុ និងទូរទស្សន៍បាយ័ន ជាកូនស្រីរបស់ លោក ហ៊ុន សែន គឺអ្នកស្រី ហ៊ុន ម៉ាណា។ កន្លងមក លោកជានាយកក្រុមហ៊ុនឧទ្ធម្ភាគចក្រទេសចរណ៍ឈ្មោះថា សុខា ហេលីខបធឺ (Sokha Helicopter)។ ការតែងតាំងក្រុមគ្រួសាររបស់មេដឹកនាំរដ្ឋាភិបាល ឲ្យមានតួនាទីសំខាន់ៗក្នុងក្រសួង ប៉ូលិស និងយោធា បណ្ដាលឲ្យក្តីបារម្ភពីការកើនឡើងនៃអំពើនិទ្ទណ្ឌភាពនៅកម្ពុជា។
នាយករងប្រចាំតំបន់អាស៊ី នៃអង្គការឃ្លាំមើលសិទ្ធិមនុស្ស យូមែន រ៉ៃត៍ វច្ឆ៍ (Human Rights Watch) ប្រចាំទីក្រុងបាងកក លោក ហ្វីល រ៉ូប៊ើតសុន (Phil Robertson) សម្ដែងក្តីបារម្ភថា ការតែងតាំងសាច់ញាតិ និងក្រុមគ្រួសារឲ្យមានតួនាទី និងអំណាចក្នុងរដ្ឋាភិបាលនេះ អាចបង្កើតឲ្យមានការការពារក្រុមគ្រួសារពួកគេក្នុងរដ្ឋាភិបាល និងស្ថាប័នផ្សេងៗទៀត ហើយជំរុញឲ្យអ្នកទាំងនោះមិនអនុវត្តច្បាប់។ លោកបន្តថា អតីតអគ្គស្នងការនគរបាលជាតិ លោក ហុក ឡង់ឌី ដែលធ្លាប់បានរំលោភសិទ្ធិមនុស្សធ្ងន់ធ្ងរ មិនដែលត្រូវបានកាត់ទោស រហូតដល់លោកធ្លាក់យន្តហោះស្លាប់។
លោក ហ្វីល រ៉ូប៊ើតសុន៖ «អ្វីដែលខ្ញុំចាប់អារម្មណ៍នោះ មិនមែនដោយសារតែបុគ្គលនេះត្រូវបានតែងតាំងតំណែងមួយនោះទេ ប៉ុន្តែក្តីបារម្ភរបស់យើង គឺការបង្កើតឲ្យមានអំពើនិទ្ទណ្ឌភាព ដើម្បីធ្វើការរំលោភសិទ្ធិមនុស្ស។ មន្ត្រីជាន់ខ្ពស់រដ្ឋាភិបាលជាច្រើន ក៏បានជាប់ពាក់ព័ន្ធការរំលោភសិទ្ធិមនុស្សដែរ មិនទាន់ត្រូវបាននាំខ្លួនមកផ្ដន្ទាទោសនៅឡើយទេ។ ការតែងតាំងបង្ហាញថា កម្ពុជា មិនទាន់មានអ្វីផ្លាស់ប្ដូរនៅឡើយទេ គឺបន្តតែងតាំងមនុស្សដែលស្គាល់គ្នា មិនមែនផ្អែកទៅសមត្ថភាព ឬក៏ដោយសារតែពួកគេមានបំណងចង់ការពារសិទ្ធិមនុស្សឡើយ»។
ពាក់ព័ន្ធនឹងការលើកឡើងរបស់មន្ត្រីសិទ្ធិមនុស្សនេះ លោក ខៀវ សុភ័គ បដិសេធមិនធ្វើអត្ថាធិប្បាយជុំវិញការតែងតាំងកូនប្រសា លោក ហ៊ុន សែន ឲ្យមានតួនាទីខ្ពស់ក្នុងស្នងការនគរបាលជាតិទេ។ បច្ចុប្បន្ននេះ លោក ហ៊ុន សែន មានកូនប្រុសពីរនាក់ មានតួនាទីសំខាន់ៗក្នុងវិស័យយោធា និងម្នាក់ទៀតជាសមាជិករដ្ឋសភា។
លោក ហ៊ុន សែន កាលពីថ្ងៃទី៦ សីហា ក៏បានបដិសេធការចុះផ្សាយរបស់សារព័ត៌មានបរទេសថា កូនប្រុសច្បងលោក គឺលោក ហ៊ុន ម៉ាណែត នឹងស្នងតំណែងរបស់លោកជានាយករដ្ឋមន្ត្រី។ លោកអះអាងថា កម្ពុជា ជាប្រទេសប្រកាន់លទ្ធិប្រជាធិបតេយ្យ គឺលោកមិនអាចផ្ទេរតំណែងទៅឲ្យកូនបានតាមចិត្តឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។