គណបក្ស​អំណាច​ខ្មែរ​នឹង​ធ្វើ​សមាជ​ជ្រើសរើស​អ្នក​ដឹកនាំ​ថ្មី​នៅ​ខែ​កញ្ញា

0:00 / 0:00

មន្ត្រី​គណបក្ស​អំណាច​ខ្មែរ ប្រកាស​នៅ​ព្រឹក​ថ្ងៃ​ទី​២៨ សីហា ថា នឹង​រៀបចំ​ធ្វើ​សមាជ​ជ្រើសរើស​អ្នក ដឹកនាំ​ថ្មី​នៅ​ខែ​កញ្ញា ខាង​មុខ​នេះ។ សមាជ​នេះ គឺ​ក្រោយ​ពេល​ដែល​លោក សួន សេរីរដ្ឋា អតីត ប្រធាន​បក្ស ត្រូវ​បាន​តុលាការ​សម្រេច​ឃុំ​ខ្លួន​នៅ​ពន្ធនាគារ។

ប្រធាន​ស្ដីទី​គណបក្ស​អំណាច​ខ្មែរ លោក សួង សុភ័ណ្ឌ ប្រកាស​ក្នុង​សន្និសីទ​កាសែត​នៅ​ព្រឹក​ថ្ងៃ​ទី​២៨ សីហា ថា ដើម្បី​រក្សា​បក្ស​នេះ​ឲ្យ​នៅ​គង់វង្ស កុំ​ឲ្យ​ប៉ះពាល់​ដោយសារ​តែ​ច្បាប់​ថ្មី​នោះ លោក និង​សមាជិក​បក្ស នឹង​ធ្វើ​សមាជ​បក្ស​មួយ​ដើម្បី​ជ្រើសរើស​ថ្នាក់​ដឹកនាំ​បក្ស​ថ្មី​នៅ​ថ្ងៃ​ទី​១០ ខែ​កញ្ញា៖ «យើង​នឹង​រៀបចំ​សមាជ ដើម្បី​បោះឆ្នោត​ជ្រើសរើស​ប្រធាន​គណបក្ស អនុ​ប្រធាន​គណបក្ស ហើយ​និង​គណៈកម្មការ​មួយ​ចំនួន​ទៀត​នៅ​ក្នុង​គណបក្ស។ ដូច្នេះ យើង​បាន​បំពេញ​បែបបទ​គ្រប់គ្រាន់​ដើម្បី​ឆ្លើយ​តប​ទៅ​នឹង​ច្បាប់​វិសោធនកម្ម​ស្ដីពី​ច្បាប់​នយោបាយ ហើយ​មួយ​ទៀត យើង​បាន​ត្រៀម​លុយ ១​ម៉ឺន ៥​ពាន់​ដុល្លារ ដើម្បី​ប្ដូរ​ផ្លាស់​ផ្លាក​គណបក្ស​អំណាច​ខ្មែរ​ទូទាំង​ប្រទេស»

អតីត​ប្រធាន និង​ជា​ស្ថាបនិក​គណបក្ស​អំណាច​ខ្មែរ លោក សួន សេរីរដ្ឋា ត្រូវ​បាន​សាលា​ដំបូង​រាជធានី​ភ្នំពេញ សម្រេច​ឲ្យ​ជាប់​ពន្ធនាគារ ៥​ឆ្នាំ និង​ពិន័យ​ជា​ប្រាក់ ១០​លាន​រៀល ពី​បទ​ចោទ​ថា បាន​ប្រមាថ​កងទ័ព តាម​ច្បាប់​ស្ដីពី​គណបក្ស​នយោបាយ​ដែល​ត្រូវ​បាន​ធ្វើ​វិសោធនកម្ម​ថ្មី។ គណបក្ស​អំណាច​ខ្មែរ របស់​លោក ប្រឈម​នឹង​រំលាយ ពេល​ដែល​ប្រធាន​បក្ស​ក្លាយ​ជា​ទណ្ឌិត។

ទោះ​ជា​យ៉ាង​នេះ​ក្ដី លោក សួង សុភ័ណ្ឌ ថ្លែង​ថា អតីត​ប្រធាន​បក្ស លោក សួន សេរីរដ្ឋា បាន​លាលែង​ពី​តួនាទី និង​សមាជិកភាព​ពី​គណបក្ស​អំណាច​ខ្មែរ ហើយ។ ដូច្នេះ គណបក្ស​នេះ​នឹង​មិន​ត្រូវ​រំលាយ​ដោយ​ច្បាប់​ស្ដីពី​គណបក្ស​នយោបាយ ដែល​ធ្វើ​វិសោធនកម្ម​ថ្មី​ទេ ទោះ​ជា​លោក សួន សេរីរដ្ឋា ក្លាយ​ជា​ទណ្ឌិត​ក៏ដោយ។ ម្យ៉ាង​ទៀត សារ​ដែល​លោក សួន សេរីរដ្ឋា សរសេរ​ដែល​នាំ​ឲ្យ​មាន​ការ​ចាប់​ខ្លួន​នោះ គឺ​ជា​សារ​នៅ​លើ​ហ្វេសប៊ុក (facebook) ផ្ទាល់​ខ្លួន មិន​មែន​ជា​របស់​គណបក្ស​អំណាច​ខ្មែរ ដែរ។ លោក​ថា សារ​នោះ​មិន​បាន​បង្ក​ការ​ខូចខាត​នៅ​ឡើយ​ទេ ហើយ​ដូច​គ្នា​នឹង​ប្រសាសន៍​របស់​លោក​នាយក​រដ្ឋមន្ត្រី ហ៊ុន សែន អំពី​សង្គ្រាម លោក ទៀ បាញ់ អំពី​ការ​វាយ​បាក់​ធ្មេញ និង​លោក វង សូត ព្រមាន​វាយ​អ្នក​តវ៉ា​នឹង​គល់​ឫស្សី​ដែរ។

ទន្ទឹម​គ្នា​នឹង​គម្រោង​ផ្លាស់ប្ដូរ​ថ្នាក់​ដឹកនាំ​គណបក្ស លោក សួង សុភ័ណ្ឌ បញ្ជាក់​ថា ស្លាក​សញ្ញា​របស់​គណបក្ស​ក៏​នឹង​សម្រេច​ផ្លាស់ប្ដូរ​នៅ​ក្នុង​សមាជ​ខាង​មុខ​នេះ​ដែរ ព្រោះ​លោក​ទទួល​ព័ត៌មាន​ពី​ក្រសួង​មហាផ្ទៃ ថា​រូប​សញ្ញា​គណបក្ស​អំណាច​ខ្មែរ បច្ចុប្បន្ន ស្រដៀង​រូប​សញ្ញា​របស់​ក្រសួង​សាធារណការ​របស់​រដ្ឋ៖ «ប្រសិន​បើ​ផ្លាស់​ប្ដូរ​ឥឡូវ មិន​ដូរ​ឡូហ្គោ មាន​ន័យ​ថា​យ៉ាង​ម៉េច? នៅ​ពេល​ដែល​ផ្លាស់​ប្ដូរ​ផ្លាក​ហើយ ស្រាប់​តែ​គេ​តម្រូវ​ឲ្យ​ផ្លាស់​ប្ដូរ​ឡូហ្គោ​ទៀត អ៊ីចឹង​យើង​ត្រូវ​អស់​លុយ​មួយ​សា​ទៀត។ ដូច្នេះ សម្រេច​ថា រូប​លោក សួន សេរីរដ្ឋា ក៏​ត្រូវ​ដក​ចេញ ព្រោះ​អត់​មាន​ពាក់ព័ន្ធ​អី​ជា​មួយ​លោក សួន សេរីរដ្ឋា ទៀត​ទេ។ លោក សួន សេរីរដ្ឋា ពេល​នេះ គ្រាន់​តែ​ជា​វីរបុរស​ជាតិ ចំពោះ​គណបក្ស​អំណាច​ខ្មែរ​តែ​ប៉ុណ្ណោះ អតីត​ស្ថាបនិក​គណបក្ស​អំណាច​ខ្មែរ អតីត​ប្រធាន​គណបក្ស​អំណាច​ខ្មែរ»

កាលពី​ថ្ងៃ​ទី​១៤ ខែ​សីហា លោក​នាយករដ្ឋមន្ត្រី ហ៊ុន សែន បាន​បន្ទោស​ក្រសួង​មហាផ្ទៃ ម្ដង​ហើយ ទាក់ទង​នឹង​ស្លាក​គណបក្ស​អំណាច​ខ្មែរ៖ «គ្រាន់​តែ​ផ្លាក​គណបក្ស​នេះ ក្រសួង​មហាផ្ទៃ​ក៏​ធ្វើការ​មិន​បាន​ដិតដល់​ដែរ... ចុះ​បញ្ជី​គណបក្ស​ផ្ទុយ​នឹង​រដ្ឋធម្មនុញ្ញ អា​ហ្នឹង​ខ្ញុំ​និយាយ​ឲ្យ​ច្បាស់។ ថ្ងៃ​មុន​ក្រុម​ប្រឹក្សា​ធម្មនុញ្ញ​បាន​ធ្វើការ​ដាស់​តឿន គណបក្ស​ឈ្មោះ​សាធារណរដ្ឋ ក៏​អនុញ្ញាត​ឲ្យ​គេ​ជុំ​ឈ្មោះ។ វា​ខុស​ជា​មួយ​នឹង​របប​រាជា​និយម​អាស្រ័យ​ធម្មនុញ្ញ ដែល​សូម្បី​តែ​រដ្ឋសភា​ខ្លួន​ឯង​ក៏​អត់​មាន​សិទ្ធិ​ជាមួយ​ការ​កែ​ចំណុច​នេះ​ទេ។ ចំណុច​ពីរ ដែល​គេ​ហាម​កែ​នៅ​ក្នុង​រដ្ឋធម្មនុញ្ញ គឺ​ទី​មួយ របប​រាជា​និយម​អាស្រ័យ​ធម្មនុញ្ញ ទី​ពីរ របប​ប្រជាធិបតេយ្យ​សេរី​ពហុ​បក្ស។ ពីរ​ហ្នឹង​អត់​មាន​សិទ្ធិ​កែ»

លោក​ សួង សុភ័ណ្ឌ មាន​ប្រសាសន៍​បន្ត​ថា ក្រោយ​ពី​សមាជ សមាជិក​បក្ស​នឹង​ត្រៀម​ខ្លួន​ដាច់​អហង្ការ​ក្នុង​ការ​រិះគន់​ដើម្បី​ស្ថាបនា ដោយ​មិន​លាប​ពណ៌ មិន​វាយ​ប្រហារ និង​មិន​ទម្លាក់​កំហុស។ ទោះ​ជា​យ៉ាង​នេះ​ក្ដី លោក​នៅ​មិន​ទាន់​អាច​បញ្ជាក់​បាន​ទេ​ថា គណបក្ស​អំណាច​ខ្មែរ នឹង​ចូលរួម​ការ​បោះឆ្នោត​ជាតិ​ខាង​មុខ​នេះ ឬ​យ៉ាង​ណា​ទេ គឺ​ត្រូវ​រង់ចាំ​មើល​ការ​រៀបចំ​ការ​បោះឆ្នោត​របស់​គណៈកម្មាធិការ​ជាតិ​រៀបចំ​ការ​បោះឆ្នោត (គ.ជ.ប)ជា​មុន​សិន៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖

ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។