តំណាងរាស្ត្រស្ត្រីរបស់គណបក្សសង្គ្រោះជាតិ មណ្ឌលបាត់ដំបង អ្នកស្រី មូរ សុខហួរ នឹងវិលត្រឡប់មកប្រទេសកម្ពុជា វិញបន្ទាប់ពីអ្នកស្រីចំណាយពេលវេលាជាង ៩ខែនៅសហរដ្ឋអាមេរិក ដើម្បីថែរក្សាជំងឺស្វាមីរបស់អ្នកស្រី ដែលធ្លាក់ខ្លួនឈឺដោយសារជំងឺមហារីក។
អ្នកស្រីនឹងមកដល់អាកាសយានដ្ឋានអន្តរជាតិភ្នំពេញ នៅយប់ថ្ងៃពុធ ទី២០ មេសា នេះ តាមជើងហោះហើររបស់ក្រុមហ៊ុនអេស៊ានណា អ៊ែឡាញ (Asiana Airlines)។
អ្នកស្រីឲ្យដឹងថា ការវិលត្រឡប់មកកាន់មាតុភូមិកំណើតវិញនេះ ជាការចូលរួមបម្រើប្រទេសជាតិក្នុងនាមអ្នកស្រីជាអ្នកតំណាងរាស្ត្រ និងបង្កើតជាមូលនិធិសប្បុរសធម៌មួយ ដើម្បីជួយដល់អ្នកកើតជំងឺមហារីកនៅមន្ទីរពេទ្យរុស្ស៊ី តាមបំណងរបស់ស្វាមីអ្នកស្រីមុនពេលលោកស្លាប់។
លោក ស្កត់ លីពឺរ៍ (Scott Leiper) ដែលជាស្វាមីរបស់អ្នកស្រី មូរ សុខហួរ ទទួលមរណភាពកាលពីខែមីនា នៅមន្ទីរពេទ្យមួយក្នុងទីក្រុងញីវយ៉ក (New York) ក្នុងអាយុ ៦១ឆ្នាំ។ ស្ទើរមួយជីវិតរបស់ លោក ស្កត់ លីពឺរ៍ តែងមានភាពជិតស្និទ្ធជាមួយពលរដ្ឋខ្មែរតាមរយៈការងាររបស់លោកជាមន្ត្រីអង្គការសហប្រជាជាតិ ដូចជាធ្លាប់បម្រើការជាមន្ត្រីនៃក្រុមប្រតិបត្តិការអង្គការសហប្រជាជាតិដើម្បីជួយសង្គ្រោះនៅតាមព្រំដែន (UNBRO) អង្គការ យូ.អិន.ឌី.ភី (UNDP) និងអង្គការស្បៀងអាហារ និងកសិកម្ម (FAO) ជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។