សមាជិកក្រុមប្រឹក្សាស្រុកមេមត់នៃគណបក្សសង្គ្រោះជាតិ លោក គង់ សំអាន ត្រូវបានតុលាការក្រុងភ្នំពេញបញ្ជូនទៅឃុំខ្លួននៅពន្ធនាគារព្រៃស នៅថ្ងៃទី៧ ខែកញ្ញា បន្ទាប់ពីរូបលោកត្រូវអាជ្ញាធរស្រុកមេមត់ ខេត្តត្បូងឃ្មុំ បានទៅគោះទ្វារផ្ទះ ហើយចាប់ខ្លួនសមាជិកបក្សប្រឆាំងរូបនេះភ្លាមៗ កាលពីព្រឹកព្រលឹមថ្ងៃទី៦ កញ្ញាទាំងមិនបានបង្ហាញដីកា។ សង្គមស៊ីវិលយល់ថា ការចាប់ខ្លួនលោក គង់ សំអាន គឺជារឿងនយោបាយ ហើយថា អាជ្ញាធរត្រូវតែបង្ហាញដីកា ឬប្រាប់មូលហេតុនៃការចាប់ខ្លួនពលរដ្ឋខ្មែរណាម្នាក់។
អ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន ប្រាប់អាស៊ីសេរីថា សាលាដំបូងរាជធានីភ្នំពេញ ចោទប្រកាន់លោក គង់ សំអាន ពីបទញុះញង់បង្កឲ្យមានភាពវឹកវរប៉ះពាល់ដល់សន្តិសុខសង្គម ហើយត្រូវបានអាជ្ញាធរបញ្ជូនទៅឃុំខ្លួននៅពន្ធនាគារព្រៃស។ ទោះយ៉ាងណាលោក ឆាយ គឺមខឿន មិនបានបញ្ជាក់លំអិតថា សកម្មភាពអ្វីខ្លះ ដែលលោក គង់ សំអាន ប្រព្រឹត្តហើយត្រូវប្រឈមនឹងការចោទប្រកាន់បែបនេះនោះទេ៖ « បញ្ជូន យកទៅ ដាក់គុក បាត់ ហើយ ! ពី បទ ញុះញង់ បង្ក ភាព វឹកវរ ប៉ះពាល់ ធ្ងន់ធ្ងរ ដល់ សន្តិសុខ សង្គម ហើយ ជម្រាប ផង មុននឹង បិទ ណា៎ នៅ ព្រះរាជាណាចក្រកម្ពុជា រាល់ថ្ងៃ នេះ អត់មាន បក្ស សង្គ្រោះ ជាតិ ទេ បើ សួរ អ៊ីចឹង ក្រោយ ខ្ញុំ អត់ ឆ្លើយ ទេ ណា៎។ គង់ សំអាន នេះ ឃាត់ ដោយសារ គាត់ ធ្វើសកម្មភាព ខុសច្បាប់ មិនមែន ដោយសារ គាត់ សមាជិក គណបក្ស ទេ។ គាត់ ជា ប្រជាពលរដ្ឋ គាត់ ធ្វើសកម្មភាព ខុសច្បាប់ » ។
ភរិយាលោក គង់ សំអាន គឺលោកស្រី ឆៃ ឆាយអ៊ាង លើកឡើងថា បន្ទាប់ពីប្តីលោកស្រីត្រូវអាជ្ញាធរចាប់ខ្លួនដល់ផ្ទះ កាលពីព្រឹកថ្ងៃទី៦ កញ្ញានោះ លោកស្រីមិនបានដឹងដំណឹងសោះ ថាប្តីលោកស្រីត្រូវអាជ្ញាធរទាំងនោះនាំខ្លួនប្ដីលោកស្រីទៅណានោះទេ។ លោកស្រីកំពុងបារម្ភជាខ្លាំងអំពីសុវត្ថិភាព និងសុខភាពរបស់ប្ដី ព្រោះលោក គង់ សំអានមានអាយុច្រើនណាស់ទៅហើយ។ លោកស្រីប្រាប់ថា លោកស្រីមិនអាចទទួលយកបានទេ ចំពោះការចោទប្រកាន់របស់តុលាការនេះ ព្រោះប្តីលោកស្រីមិនមានកំហុសអ្វីនោះទេ៖ « ខ្ញុំ ទទួលយក មិនបាន ទេ បើ កាលមុន យូរហើយ ណា ខ្ញុំ ក៏ មិន ដឹង ដែរ ឥឡូវនេះ កន្លងមក គេ រំលាយ គណបក្ស អស់ហើយ គាត់ ក៏ នៅផ្ទះ គាត់ ឈប់ រវីរវល់ ហើយ ហើយ ខ្ញុំ មិនអស់ចិត្ត ហ្នឹង ណាស់ វា ហួសចិត្ត ហួសចិត្ត ខ្លួនឯង តែ ខ្ញុំ មិន ដឹង ធ្វើ យ៉ាងម៉េច ទេ ហួសចិត្ត ថា រឿង អី បាន គេ ទៅ ចោទប្រកាន់ គាត់ អ៊ីចឹង គាត់ គ្មាន រឿង អី ទេ។ គាត់ មិនដែល ទៅ ប៉ះពាល់ អ្នកណា ឡើយ » ។
ភរិយាសមាជិកបក្សប្រឆាំងរូបនេះឲ្យដឹងថា សមត្ថកិច្ចបាននាំខ្លួន លោក គង់ សំអាន ពីផ្ទះរបស់លោក ក្នុងស្រុកមេមត់ ខេត្តត្បូងឃ្មុំចូលក្នុងឡានមួយគ្រឿង លុះមកដល់ផ្លូវបំបែក នៅចំណុចស្រុកពញាក្រែក ដែលជាផ្លូវបំបែកទៅភ្នំពេញ និងព្រៃវែង សមត្ថកិច្ចបានប្ដូរឡាន និងដឹក លោក គង់ សំអាន ទៅបាត់ដោយគ្មានដំណឹងអ្វីទាំងអស់។
តុលាការខែត្រត្បូងឃ្មុំធ្លាប់បានចោទប្រកាន់ លោក គង់ សំអាន ពីបទ រួមគំនិតក្បត់ និងញុះញង់ កាលពីឆ្នាំ២០១៩។ ក៏ប៉ុន្តែក្រោយមក លោក ហ៊ុន សែន បានប្រកាសឲ្យតុលាការឈប់ចាប់ខ្លួនសកម្មជនបក្សប្រឆាំង ដែលរបបលោកចោទថា រួមគំនិតក្បត់ ជាមួយលោក សម រង្ស៊ី អំពីផែនការវិលចូលស្រុកវិញ កាលពីថ្ងៃទី៩ វិច្ឆិកា។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា ថ្លែងថា អាជ្ញាធរត្រូវតែបង្ហាញដីកា ឬប្រាប់សមាជិកគ្រួសារឲ្យបានដឹងថា ការចាប់ ឬនាំខ្លួន លោក គង់ សំអាន ទៅណាដោយសារមូលហេតុអ្វី។ លោកបន្ថែមថា ថ្មីៗនេះអ្នកនយោបាយ សកម្មជនបរិស្ថានសកម្មសិទ្ធិមនុស្ស និងអ្នកធ្វើការងាររឿងព្រំដែន ត្រូវរងការចោទប្រកាន់ក្រោមបទចោទញុះញង់ជាវបន្តបន្ទាប់ ដែលទាំងអស់នេះ លោកចាត់ទុកថា គឺជារឿងនយោបាយប៉ុណ្ណោះ៖ « បើ យើង និយាយ ពិ នីតិវិធី ច្បាប់ កាលណា យើង ចាប់ខ្លួន ជន ណា ដែល មិនមែន ជា បទល្មើស ជាក់ស្ដែង អា ហ្នឹង ត្រូវ មាន ដីកា អាន ឲ្យ គេ ដឹង ហើយ ជូនដំណឹង ដល់ ក្រុម គ្រួសារ គេ អំពី វត្តមាន របស់ ជន ដែល គាត់ ត្រូវ បាន គេ ចាប់ខ្លួន។ ការចោទប្រកាន់ ទៅលើ បទ ញុះញង់ អី ជាបន្តបន្ទាប់ នា ពេល ថ្មីៗ ហ្នឹង យើង ឃើញ ហើយ ក្នុង ទិដ្ឋភាព ទាំង អស់ហ្នឹង ខាង អង្គការសង្គម ស៊ីវិល យើង ចាត់ទុកថា វា មិនមែន ជា រឿង ខុសច្បាប់ អី ទេ រឿង ដែល សំខាន់ គឺ បញ្ហានយោបាយ ទៅវិញ ទេ » ។
មន្ត្រីការពារសិទ្ធិមនុស្សរូបនេះ បន្តថា សង្គមស៊ីវិលមានការស្ដាយ ចំពោះរដ្ឋាភិបាលដែលបន្តធ្វើឲ្យស្ថានភាពនយោបាយកាន់តែអាក្រក់ ហើយលោកអះអាងថា ការរិះគន់ការបញ្ចេញមតិរបស់ពលរដ្ឋទៅលើសកម្មភាពមិនល្អរបស់រដ្ឋាភិបាល គឺជាសិទ្ធិសេរីភាពរបស់ពលរដ្ឋក្នុងប្រទេសដែលប្រកាន់ប្រជាធិបតេយ្យ និងគោរពសិទ្ធិមនុស្ស ដែលមានចែងក្នុងរដ្ឋធម្មនុញ្ញរបស់ប្រទេស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។