សកម្មជនគណបក្សប្រឆាំងម្នាក់រស់នៅសង្កាត់ទឹកថ្លា ខណ្ឌសែនសុខ រាជធានីភ្នំពេញ ត្រូវជនមិនស្គាល់មុខវាយធ្វើបាប បណ្ដាលឱ្យរងរបួសបែកក្បាលនៅថ្ងៃទី២៨ ខែសីហានេះ។ សង្គមស៊ីវិល និងមន្ត្រីបក្សប្រឆាំង ស្នើទៅសមត្ថកិច្ចស្រាវជ្រាវករណីនេះ ដោយកុំប្រកាន់និន្នាការនយោបាយ។
សកម្មជនគណបក្សសង្គ្រោះជាតិ លោក ស្រី ច័ន្ទតារា ដែលត្រូវជនមិនស្គាល់មុខវាយធ្វើបាបនោះ ឱ្យអាស៊ីសេរីដឹងថា ជនសង្ស័យជាបុរសមានគ្នាពីរនាក់ដេញវាយធ្វើបាបលោកពេល កំពុងធ្វើដំណើរ។ លោកបន្តថា ពេលនេះលោកបានដាក់ពាក្យប្តឹងទៅសមត្ថកិច្ចមូលដ្ឋានរួចហើយ នៅសង្កាត់ទឹកថ្លា ហើយសមត្ថកិច្ចក៏បាននាំលោកទៅកន្លែងកើត ដើម្បីរៀបរាប់ប្រាប់ពីហេតុការណ៍នោះដែរ៖ «ពេលគេវ៉ៃទៅខ្ញុំឈប់ម៉ូតូហើយរត់ឡើងម៉ូតូគេវាតាមរកវ៉ៃខ្ញុំទៀត ប៉ុន្តែខ្ញុំរត់ចេញពីម៉ូតូបានប្រហែលប្រាំម៉ែត្រហើយខ្ញុំស្រែកថាចោៗទៅបានពួកវាត្រឡប់ទៅវិញ»។
លោក ស្រី ច័ន្ទតារា គឺជាសមាជិកគណៈកម្មាធិការប្រតិបត្តិគណបក្សសង្គ្រោះជាតិប្រចាំ រាជធានីភ្នំពេញ។ លោកសង្ស័យថា ករណីហិង្សានេះ មានជាប់ពាក់ព័ន្ធនឹងរឿងនយោបាយ។
អ្នកនាំពាក្យអគ្គស្នងការនគរបាលជាតិលោក ឆាយ គឹមខឿន ប្រាប់អាស៊ីសេរីថា សមត្ថកិច្ចកំពុងស្រាវជ្រាវលើករណីនេះហើយ។ លោកអះអាង សមត្ថកិច្ចនឹងនាំជនប្រព្រឹត្តយកមកផ្ដន្ទាទោស ប៉ុន្តែលោកថា សមត្ថកិច្ចត្រូវការពេលវេលាស៊ើបអង្កេតសិន៖ «ករណីនេះកើតឡើងសមត្ថកិច្ចកើតឡើងកំពុងស្រាវជ្រាវរកជនល្មើស។ គេចាប់បានមនុស្សដាក់គុករាប់ម៉ឺននាក់តែមានបន្តិចបន្តួចដែលរកមិនឃើញ»។
ទោះមានការអះអាងបែបនេះពីមេប៉ូលិសជាន់ខ្ពស់ក្តី ក៏កន្លងមក នៅពេលមានករណីហិង្សាលើមន្ត្រីគណបក្សសង្គ្រោះជាតិសមត្ថកិច្ចមិនដែលចាប់បានជនប្រព្រឹត្តយកមកផ្ដន្ទាទោសនោះទេ។
ប្រធានគណៈកម្មាធិការប្រតិបត្តិគណបក្សសង្គ្រោះជាតិ រាជធានីភ្នំពេញ លោក ម៉ន ផល្លា ចាត់ទុកករណីហិង្សានេះ ជាការគំរាមកំហែងផ្នែកនយោបាយលើមន្ត្រីគណបក្សសង្គ្រោះជាតិនៅក្នុងស្រុកក្នុងបំណងរារាំងមិនឱ្យពួកគេហ៊ានចេញមុខទទួលលោក សម រង្ស៊ី វិលចូលស្រុកវិញ។ លោកស្នើឱ្យអាជ្ញាធរក្រុងភ្នំពេញ ស្រាវជ្រាវ និងស៊ើបអង្កេតករណីនេះដោយយកចិត្តទុកដាក់ និងកុំប្រកាន់និន្នាការនយោបាយ៖ «អ៊ីចឹងហើយខ្ញុំគ្រាន់តែចង់ឱ្យអាជ្ញាធរក្រុងភ្នំពេញចាត់វិធានការវែកមុខជនដៃដល់មកផ្ដន្ទាទោសមុខចំពោះផ្លូវច្បាប់កុំឱ្យជនល្មើសប្រព្រឹត្តអំពើហិង្សារំលោភសិទ្ធិជាពិសេសរំលោភសិទ្ធិសកម្មជនគណបក្សសង្គ្រោះជាតិតទៅទៀត»។
អ្នកនាំពាក្យសមាគមអាដហុក (ADHOC) លោក ស៊ឹង សែនករុណា យល់ថា ប្រសិនបើករណីហិង្សានេះជាប់ព័ន្ធរឿងនយោបាយ នោះគឺជារឿងអាក្រក់បំផុតនៅក្នុងសង្គមប្រជាធិបតេយ្យ។ មន្ត្រីសិទ្ធិមនុស្សរូបនេះ ជំរុញឱ្យ សមត្ថកិច្ចស្រាវជ្រាវ និងចាប់ខ្លួនជនប្រព្រឹត្តយកមកផ្ដន្ទាទោស ដើម្បីជៀសវាងការចោទប្រកាន់ និងសង្ស័យថា ជាប់ពាក់ព័ន្ធរឿងនយោបាយ៖ «ករណីនេះបើសិនជាសមត្ថកិច្ចលោកមិនចាត់វិធានការឱ្យបានត្រឹមត្រូវទេវាកាន់តែធ្វើឱ្យសាធារណៈមតិទាំងជាតិនិងអន្តរជាតិគេធ្វើការរិះគន់យ៉ាងខ្លាំង»។
កាលពីពេលកន្លងទៅ មេដឹកនាំរបបក្រុងភ្នំពេញ លោក ហ៊ុន សែន ធ្លាប់ព្រមានតាមកម្ទេចគណបក្សប្រឆាំងបន្ថែមទៀតដោយមិនទុកឱ្យមានជីវិតឡើយ ប្រសិនបើអន្តរជាតិដាក់គំនាបសេដ្ឋកិច្ចលើកម្ពុជាមែននោះ។ យុទ្ធនាការកម្ទេចបក្សប្រឆាំងរបស់លោក ហ៊ុន សែន នេះ បានធ្វើឱ្យមន្ត្រីគណបក្សប្រឆាំងរាប់រយនាក់ត្រូវរត់ភៀសខ្លួន និងគេចខ្លួនទៅប្រទេសទីបី ដើម្បីសុវត្ថិភាពផ្ទាល់ខ្លួន។
លោក ម៉ន ផល្លា ឱ្យដឹងថា នៅរយៈពេលចុងក្រោយនេះ សកម្មជនគណបក្សសង្គ្រោះជាតិជាច្រើនរូបនៅរាជធានីភ្នំពេញ បានរងអំពើហិង្សា និងការតាមធ្វើបាបជាហូរហែ។ ករណីទាំងនោះ មានជាអាទិ ចៅសង្កាត់បាក់ខែង លោក មាស ម៉ារី មានអ្នកជិះរថយន្តដេញ វាយឱ្យរងរបួសជាដំណំ ប្រធានស្ដីទីគណបក្សសង្គ្រោះជាតិនៅខណ្ឌចំការមន លោក ឡាំ សឿន និងចៅសង្កាត់បឹងទំពុន លោក ជា ម៉ន ត្រូវគេគំរាមវាយ និងករណីវាយដំប្រធានចលនាស្ត្រីរាជធានីភ្នំពេញ អ្នកស្រី សរ ចាន់ឌី កាលពី ៤ ខែមុនជាដើម៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។