មេធាវីការពារក្ដីឱ្យមេឃុំគណបក្សប្រឆាំងបញ្ជាក់ថា លោកស្រី ឡាញ់ ថាវរី ដែលអាជ្ញាធរថៃបានចាប់បញ្ជូនតាមការសំណើរបស់រដ្ឋាភិបាលលោក ហ៊ុន សែន នោះ បច្ចុប្បន្នត្រូវបានតុលាការសម្រេចឃុំខ្លួនបណ្ដោះអាសន្ននៅពន្ធនាគារព្រៃស (ម២) ហើយ កាលពីរសៀលថ្ងៃទី២១ វិច្ឆិកា។ មន្រ្តីសង្គមស៊ីវិលសោកស្ដាយ និងថ្កោលទោស ចំពោះទង្វើរបស់រដ្ឋាភិបាលថៃ និងកម្ពុជាដែលកំពុងរំលោភសិទ្ធិមនុស្សធ្ងន់ធ្ងរ និងមិនអាចទទួលយកបានឡើយ។
តុលាការក្រុងភ្នំពេញ បានសម្រេចឃុំខ្លួនមេឃុំជាប់ឆ្នោតគណបក្សសង្គ្រោះជាតិនៅឃុំឫស្សីក្រោក ស្រុកមង្គលបុរី ខេត្តបន្ទាយមានជ័យ នៅក្នុងពន្ធនាគារព្រៃស (ម២) ជាបណ្ដោះអាសន្ន ដោយពុំទាន់បានជួបគ្រួសារ និងមេធាវីនៅឡើយ បន្ទាប់ពីអាជ្ញាធរថៃចាប់បញ្ជូនជាប្រញាប់ឱ្យអាជ្ញាធរខ្មែរតាមច្រកព្រំដែនអន្តរជាតិប៉ោយប៉ែត កាលថ្ងៃទី២០ វិច្ឆិកា។
មេធាវីការពារក្ដីឱ្យលោកស្រី ឡាញ់ ថាវរី គឺលោក សំ សុគង់ ប្រាប់វិទ្យុអាស៊ីសេរីថា តុលាការក្រុងភ្នំពេញបានចោទប្រកាន់កូនក្តីរបស់លោកពីបទ "ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម" តាមមាត្រា៤៩៤ និង៤៩៥ នៃក្រមព្រហ្មទណ្ឌ និងបានបញ្ជូនឃុំខ្លួននៅពន្ធនាគារព្រៃស (ម២) កាលពីរសៀលពីថ្ងៃទី២១ ខែវិច្ឆិកា។ លោកគ្រោងជួបកូនក្តីក្នុងពន្ធនាគារនៅថ្ងៃទី២៣ ឬ ២៤ វិច្ឆិកា ខាងមុខនេះ ដើម្បីជជែកជុំវិញករណីអាជ្ញាធរថៃចាប់បញ្ជូនខ្លួនឱ្យអាជ្ញាធរកម្ពុជាវិញ និងអង្គហេតុមួយចំនួនទៀតផងដែរ។ លើសពីនេះ លោកនឹងដាក់លិខិតការពារសិទ្ធិកូនក្តីទៅតុលាការ និងដាក់ពាក្យសុំនៅក្រៅឃុំបណ្ដោះអាសន្ន ពីព្រោះលោកយល់ថា បទចោទប្រកាន់នេះ តុលាការគួរឱ្យលោកស្រី ឡាញ់ ថាវរី នៅក្រៅឃុំជាបណ្ដោះអាសន្ន៖ «លោកស្រី ឡាញ់ ថាវរី ត្រូវបានតុលាការកាលពីថ្ងៃទី២១ ខែវិច្ឆិកា ឆ្នាំ២០២១នេះ កាលពីម្សិលមិញបញ្ជូនពីថៃចូលខេត្តបន្ទាយមានជ័យ ហើយរុញមកដល់ភ្នំពេញ មានបុណ្យច្រើនអ៊ីចឹងកាលពីម្សិលមិញបានទៅដល់ពន្ធនាគារព្រៃស ម២ ហើយគ្រោងដាក់សុំឱ្យនៅក្រៅឃុំបណ្ដោះអាសន្ន ដោយសារបទចោទរបស់គាត់ជាបទមជ្ឈិមដែរ»។
លោកស្រី ឡាញ់ ថាវរី គឺជាមេឃុំជាប់ឆ្នោតគណបក្សប្រឆាំងនៅឃុំឫស្សីក្រោក ស្រុកមង្គលបុរី ខេត្តបន្ទាយមានជ័យ កាលពីឆ្នាំ២០១៧ ហើយលោកស្រីបានរស់នៅភៀសខ្លួនក្នុងប្រទេសថៃជាង ៤ឆ្នាំ និងត្រូវបានទទួលស្គាល់ឋានៈជាជនភៀសខ្លួនដោយឧត្ដមស្នងការអង្គការសហប្រជាជាតិទទួលបន្ទុកជនភៀសខ្លួន (UNHCR) ប្រចាំនៅប្រទេសថៃ។ អាជ្ញាធរថៃចាប់ខ្លួនលោកស្រីកាលពីថ្ងៃទី ១៩ វិច្ឆិកា និងបញ្ជូនទៅកម្ពុជាវិញចក្រព្រំដែនអន្តរជាតិប៉ោយប៉ែតកាលពីព្រឹកថ្ងៃទី២០ វិច្ឆិកា។
ប្ដីរបស់លោកស្រី ឡាញ់ ថាវរី គឺលោក ភិន រ៉ាដង់ រៀបរាប់ថា លោកព្រួយបារម្ភអំពីសុខទុក្ខប្រពន្ធក្នុងពន្ធនាគារជាខ្លាំង ជាពិសេស សុខភាពគាត់ ដែលកើតជំងឺរលាកសួតរាំរ៉ៃ ដោយត្រូវការយកចិត្តទុកដាក់ព្យាបាលពីគ្រូពេទ្យជាប្រចាំ។ លោកចាត់ទុកការសម្រេចរបស់តុលាការ គឺជារឿងអយុត្តិធម៌បំផុត។ លោកស្នើឱ្យតុលាការទម្លាក់ចោលការចោទប្រកាន់ និងដោះលែងឱ្យមានសេរីភាពឡើងវិញ ព្រោះប្រពន្ធរបស់លោកមិនបានប្រព្រឹត្តិដូចការចោទរបស់តុលាការនោះឡើយ៖ «មានការសោកស្ដាយវាអយុត្តិធម៌ណាស់ មិនដឹងធ្វើយ៉ាងមិច មិនដឹងជួយយ៉ាងមិច នៅខ្មែរសុំឱ្យគេជួយមើលផងលុយក៏មិនមានចាយមានតែមួយរយបាតជាប់ខ្លួន សុខភាពគ្នានៅថៃនេះលេបថ្នាំព្រឹកល្ងាចព្រឹកល្ងាច»។
ជុំវិញរឿងនេះ នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ (LICADHO) លោក អំ សំអាត ថ្លែងថា សង្គមស៊ីវិលសោកស្ដាយ ដែលតុលាការសម្រេចឃុំខ្លួនលើស្ត្រីសកម្មជនគណបក្សប្រឆាំងពេលនេះ។ លោកថា សហគមន៍ជាតិ-អន្តរជាតិនៅតែចាត់ទុកការចាប់ និងឃុំខ្លួនសកម្មជនបក្សប្រឆាំងជាបន្តបន្ទាប់ គឺជាសារគំរាមកំហែង និងរឹតត្បិតលើសេរីភាពផ្នែកនយោបាយដែលធានាដោយរដ្ឋធម្មនុញ្ញ និងបទដ្ឋានសិទ្ធិមនុស្សអន្តរជាតិ៖ «បញ្ហាសិទ្ធិមនុស្សនៅក្នុងប្រទេសកម្ពុជាយើងជាអង្គការសង្គមស៊ីវិលដែលធ្វើការផ្នែកសិទ្ធិមនុស្ស ក៏ដូចជាអង្គការអន្តរជាតិ និងក្រុមប្រឹក្សាសិទ្ធិមនុស្ស អ្នកជំនាញសិទ្ធិមនុស្សរបស់អង្គការសហប្រជាជាតិ គេវាយតម្លៃថាស្ថានភាពសិទ្ធិមនុស្សនៅកម្ពុជាហ្នឹងវាមានការធ្លាក់ចុះរួចទៅហើយ ជាពិសេស សិទ្ធិពលរដ្ឋនិងសិទ្ធិនយោបាយតែម្ដងដែលមានការធ្លាក់ចុះខ្លាំង»។
ក្រៅពីលោកស្រី ឡាញ់ ថាវរី កាលពីថ្មីៗ នេះ អាជ្ញាធរថៃ ក៏បានចាប់ខ្លួនសកម្មជនបក្សប្រឆាំងពីរនាក់ ដែលមានឋានៈជាជនភៀសខ្លួន គឺលោក វឿង សំណាង និងលោក វឿន វាសនា ហៅគ្រញូងព្រៃឡង់ បញ្ជូនអាជ្ញាធររដ្ឋាភិបាលលោក ហ៊ុន សែន ហើយតុលាការបានចោទប្រកាន់ពួកគេទាំងពីរ អំពីបទ រួមគំនិតក្បត់ ដោយដាក់ពន្ធនាគារព្រៃសផ្នែកបុរស។
ការចាប់បញ្ជូនជនភៀសខ្លួន ដែលជាសកម្មជនបក្សប្រឆាំងទៅកាន់ប្រទេសកម្ពុជាវិញជាបន្តបន្ទាប់នេះ អង្គការឃ្លាំមើលសិទ្ធិមនុស្សអន្តរជាតិ (Human Right watch) និងឧត្ដមស្នងការអង្គការសហប្រជាជាតិទទួលបន្ទុកជនភៀសខ្លួន (UNHCR) ប្រចាំប្រទេសថៃ សោកស្ដាយ និងថ្កោលទោសចំពោះរដ្ឋាភិបាលថៃ និងកម្ពុជាថា កំពុងរំលោភសិទ្ធិមនុស្សធ្ងន់ធ្ងរ និងមិនអាចទទួលយកបានឡើយ។ ពួកគេចាត់ទុកការបញ្ជូនជនភៀសខ្លួននយោបាយត្រឡប់ទៅវិញក្នុងទម្រង់ជាការដោះដូរទំនិញបែបនេះ គឺបង្កគ្រោះថ្នាក់ដល់អាយុជីវិតរបស់ពលរដ្ឋខ្មែររាប់រាយនាក់ ដែលរត់គេចពីការបង្ក្រាបរបស់លោកនាយករដ្ឋមន្ត្រី ហ៊ុន សែន។ ក្រុមអង្គការសិទ្ធិមនុស្ស ទាមទារឱ្យអាជ្ញាធរថៃ ត្រូវតែលើកកម្ពស់កិច្ចការពារជនភៀសខ្លួន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។