សម្ព័ន្ធភាពឆ្ពោះទៅអនាគតរបស់គណបក្សនយោបាយក្រៅរដ្ឋាភិបាលចំនួន៥ រួមមានគណបក្សភ្លើងទៀន គណបក្សឆន្ទៈខ្មែរ គណបក្សប្រជាធិបតេយ្យមូលដ្ឋាន គណបក្សកែទម្រង់កម្ពុជា និងគណបក្សកម្ពុជានិយម បានសម្រេចជ្រើសយកគណបក្សឆន្ទៈខ្មែរ ជាតំណាងដើម្បីចូលរួមក្នុងការបោះឆ្នោតនាពេលអនាគត។
ការជ្រើសរើសតំណាងសម្ព័ន្ធភាពនេះ ធ្វើឡើងនៅក្នុងសេចក្ដីថ្លែងការណ៍រួមរបស់គណបក្សនយោបាយទាំងប្រាំ នៅថ្ងៃទី១៣ ខែតុលា ក្រោយពីគណបក្សកម្ពុជានិយមបានប្រកាសចូលរួមក្នុងសម្ព័ន្ធភាពឆ្ពោះទៅអនាគត កាលពីសប្ដាហ៍មុន។
នៅថ្ងៃទី១៣ ខែតុលានេះ ក៏ជាថ្ងៃគម្រប់ខួប១ឆ្នាំ នៃការបង្កើត «សម្ព័ន្ធភាពឆ្ពោះទៅអនាគត» ហើយគណបក្សនយោបាយទាំងអស់ក្នុងសម្ព័ន្ធភាព បានធ្វើសន្និសីទកាសែតបង្ហាញពីសកម្មភាពរយៈពេល ១ឆ្នាំ ដូចជា ការជ្រើសរើសគណបក្សឆន្ទៈខ្មែរជាយានចម្លងក្រោយពីគណបក្សភ្លើងទៀន ត្រូវបានដកសិទ្ធិមិនឲ្យចូលរួមការបោះឆ្នោតជ្រើសតាំងសមាជិកព្រឹទ្ធសភា និងការបោះឆ្នោតជ្រើសរើសសមាជិកក្រុមប្រឹក្សារាជធានី ខេត្ត ក្រុង ស្រុក ខណ្ឌ ជាដើម និងស្វាគមន៍សមាជិកថ្មី គឺគណបក្សកម្ពុជានិយម។
«សម្ព័ន្ធភាពឆ្ពោះទៅអនាគត» គឺជាចំណងនយោបាយថ្មីមួយ ដែលបង្កើតឡើងដោយគណបក្សនយោបាយចំនួន៤ មានគណបក្សភ្លៀងទៀន គណបក្សឆន្ទៈខ្មែរ គណបក្សប្រជាធិបតេយ្យមូលដ្ឋាន និងគណបក្សកែទម្រង់កម្ពុជា ក្នុងគោលដៅប្រមូលផ្ដុំសំឡេងអ្នកនិយមប្រជាធិបតេយ្យ ដើម្បីចូលរួមប្រកួតប្រជែងគោលនយោបាយដឹកនាំប្រទេស ក្នុងការបោះឆ្នោតជាមួយគណបក្សប្រជាជនកម្ពុជា និងលើកស្ទួយការគោរពសិទ្ធិមនុស្ស និងដំណើរការប្រជាធិបតេយ្យ ។ លុះដល់ថ្ងៃទី៧ ខែតុលាកន្លងទៅ ប្រធានគណបក្សកម្ពុជានិយម របស់លោក យ៉ែម បុញ្ញឫទ្ធិ ក៏បានប្រកាសចូលរួមក្នុងសម្ព័ន្ធភាពឆ្ពោះទៅអនាគតនេះដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។