អ្នកឃ្លាំមើលស្ថានភាពសង្គមលើកឡើងថា លោក នេត សាវឿន មិនអាចដោះស្រាយបញ្ហានៅតាមព្រំដែនជូនពលករបានទេ។ ការលើកឡើងនេះគឺបន្ទាប់ពី លោក ហ៊ុន ម៉ាណែត តែងតាំង លោក នេត សាវឿន ជាប្រធានគណៈកម្មការចំពោះកិច្ចត្រួតពិនិត្យ និងដោះស្រាយបញ្ហាដំណើរច្រកចេញចូលរបស់ពលករខ្មែរនៅតាមព្រំដែន។
មន្ត្រីសង្គមស៊ីវិល និងអ្នកឃ្លាំមើលស្ថានការណ៍សង្គមរិះគន់រឿងដែល លោក ហ៊ុន ម៉ាណែត តែងតាំងតែសែស្រឡាយខ្លួនឯងឱ្យកាន់តួនាទីសំខាន់ៗនៅក្នុងស្ថាប័នរដ្ឋនឹងបង្កឱ្យមានអំពើពុករលួយកាន់តែធ្ងន់ធ្ងរ។
អ្នកសិក្សាកិច្ចការសង្គម និងនយោបាយលោក ប៉ោ មករា ប្រាប់វិទ្យុអាស៊ីសេរីនៅថ្ងៃទី១៥ កញ្ញា ថា គឺជារឿងគ្មានប្រយោជន៍នោះទេ ចំពោះការតែងតាំងគណៈកម្មការដោះស្រាយបញ្ហាពលរដ្ឋនៅតាមព្រំដែន ពីព្រោះមន្ត្រីភាគច្រើនសុទ្ធតែឡើងតាមសែស្រឡាយបក្ខពួក។ លោកបារម្ភថា ការតែងតាំងមន្ត្រីដែលមានតួនាទីច្រើននៅក្នុងស្ថាប័នរដ្ឋ ធ្វើឱ្យបាត់បង់ប្រសិទ្ធភាពក្នុងការអនុវត្តច្បាប់ជាពិសេសយុវជនបាត់បង់ឱកាសបញ្ចេញសមត្ថភាពរបស់ខ្លួន។
លោក ប៉ោ មករា៖ «និយាយរួមខ្ញុំមើលឃើញការតែងតាំងគួរបែងចែកឱ្យមានតួនាទីម្នាក់មួយច្បាស់លាស់ទៅ ប្រសិនមានចេតនាដោះស្រាយបញ្ហា ព្រោះបញ្ហាត្រូវរត់រកមេដឹកនាំព្រោះយើងយោងទៅតាមបណ្ដាញសង្គមប្រព័ន្ធផ្សព្វផ្សាយមួយចំនួនបញ្ហានឹងវាមកដល់មេដឹកនាំអ្នកនយោបាយ និងក្រសួងអីទាំងអស់ពលរដ្ឋមួយចំនួនបានដាក់បញ្ហាតាមបណ្ដាញសង្គមដើម្បីស្វែងរកដំណោះស្រាយ»។
ប្រតិកម្មរបស់អ្នកឃ្លាំមើលសង្គមរូបនេះគឺបន្ទាប់ពីលោក ហ៊ុន ម៉ាណែត កាលពីថ្ងៃទី១៣ កញ្ញា តែងតាំងឧបនាយករដ្ឋមន្ត្រី លោក នេត សាវឿន ដែលត្រូវជាបងថ្លៃជីដូនមួយរបស់លោក ជាប្រធានគណៈកម្មការចំពោះកិច្ចត្រួតពិនិត្យ និងដោះស្រាយបញ្ហាដំណើរច្រកចេញចូលរបស់ពលករខ្មែរនៅតាមព្រំដែន ខណៈលោក នេត សាវឿន ក៏ទើបតែងតាំងតួនាទីមួយទៀត គឺជាប្រធានអាជ្ញាធរជាតិប្រយុទ្ធប្រឆាំងគ្រឿងញៀន ។ ក្រៅពីលោក នេត សាវឿន នៅមាន លោក គៀត ច័ន្ទថារិទ្ធ បច្ចុប្បន្នជារដ្ឋលេខាធិការក្រសួងមហាផ្ទៃឱ្យទៅជា អនុប្រធានប្រចាំការព្រំដែន លោក សំរិទ្ធ ឌី រដ្ឋលេខាធិការក្រសួងមហាផ្ទៃឱ្យទៅជា អនុប្រធាន និងអ្នកមួយចំនួនទៀតជាសមាជិក។ នៅក្នុងអាណត្តិថ្មីនេះ លោក នេត សាវឿន កំពុងត្រូវប៉ាន់ ដោយត្រូវបានប្អូនថ្លៃ ជានាយករដ្ឋមន្ត្រី តែងតាំងតួនាទីសំខាន់ៗដល់លោកជាបន្តបន្ទាប់ជាពិសេស លោក នឹងក្លាយជានាយករដ្ឋមន្ត្រីស្ដីទីនៅពេលអវត្តមានលោក ហ៊ុន ម៉ាណែត។ អ្នកឃ្លាំមើល យល់ថា ការតែងតាំងតួនាទីច្រើនដល់ លោក នេត សាវឿន បែបនេះ នឹងធ្វើឱ្យប៉ះពាល់ដល់ប្រសិទ្ធភាពការងារ ព្រោះតួនាទីស្នួលតែមួយមុខនោះ លោកមិនអាចបំពេញតួនាទីបានត្រឹមត្រូវផង ទម្រាំកាន់តួនាទីជាច្រើនថែមទៀត នឹងកាន់តែស្មុគស្មាញ។
វិទ្យុអាស៊ីសេរីមិនអាចទាក់ទង លោក នេត សាវឿន ដើម្បីសុំការបកស្រាយជុំវិញបញ្ហានេះបានទេនៅថ្ងៃទី១៥ កញ្ញា។
ជុំវិញបញ្ហានេះប្រធានសមាគមសម្ព័ន្ធនិស្សិតបញ្ញវន្តខ្មែរ លោក កើត សារ៉ាយ មិនរំពឹងខ្ពស់ថា លោក នេត សាវឿន អាចជួយដោះស្រាយបញ្ហាជូនពលករនៅតាមព្រំដែននោះទេ ព្រោះកន្លងទៅមន្ត្រីនៅក្នុងស្ថាប័នរដ្ឋភាគច្រើនអសកម្មក្នុងការជួយអន្តរាគមន៍ដល់ពលរដ្ឋដែលកំពុងជួបទុក្ខលំបាក។ លោកបន្តថា ដរាបណាគ្មានកំណែទម្រង់លុបបំបាត់អំពើពុករលួយនៅក្នុងជួររដ្ឋាភិបាលទេ បើទោះជាដកអ្នកចាស់តែងតាំងអ្នកថ្មីក៏នៅតែពុំទទួលក៏ការអនុវត្តច្បាប់នៅតែគ្មានប្រសិទ្ធភាព។
លោក កើត សារ៉ាយ៖ «ប្រសិទ្ធភាពឬលទ្ធភាពក្នុងការដោះស្រាយកិច្ចការងារហ្នឹងថា តើវាបានជំរុញដោយមានវិធីសាស្ត្រយុទ្ធសាស្ត្រ ឬលក្ខណសម្បត្តិមួយចំនួនដើម្បីធានាថា ការដាក់លោក នេត សាវឿន គឺពិតជាអាចសម្រួលមួយផ្នែកធំដល់កិច្ចការងារកម្មករនៅតាមព្រំដែន»។
កន្លងទៅ អង្គការឃ្លាំមើលសិទ្ធិមនុស្សអន្តរជាតិ យូមែន រ៉ៃត៍ វ៉ច្ឆ (Human Rights Watch) រកឃើញថា លោក នេត សាវឿន មានប្រវត្តិបាតដៃកខ្វក់ពូកែខាងធ្វើទារុណកម្មជនសង្ស័យ អ្នកទោសនយោបាយ និងការបាញ់សម្លាប់ ក្រុមអ្នកតវ៉ាដោយសន្តិវិធីសាហាវព្រៃផ្សៃ។ ជាងនេះទៅទៀត លោក នេត សាវឿន ក៏ជាប់ពាក់ព័ន្ធនឹងអំពើពុករលួយទិញសញ្ជាតិពីប្រទេសស៊ីប (Cyprus) ដែរ។
មន្ត្រីសង្គមស៊ីវិលយល់ឃើញថា ប្រសិនបើរដ្ឋាភិបាលពិតជាមានឆន្ទៈជួយដោះស្រាយបញ្ហាជូនប្រជាពលរដ្ឋពិតប្រាកដមែន ជាដំបូងរដ្ឋាភិបាលគួរតែមានកំណែទម្រង់លុបបំបាត់អំពើពុករលួយនៅក្នុងស្ថាប័នរដ្ឋ និងបញ្ឈប់ការតែងតាំងសែស្រឡាយ សាច់ញាតិរបស់ខ្លួននៅក្នុងស្ថាប័នរដ្ឋជាមុនសិន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។