ក្រោយបោះឆ្នោតជ្រើសតាំងតំណាងរាស្ត្ររួច លោក ហ៊ុន សែន និងគ្រួសារអតីតមេដឹកនាំថៃ លោកថាក់ស៊ីនស៊ីណាវ៉ាត្រា (Thaksin Shinawatra) បានជួបគ្នាជាថ្មីនៅលើទឹកដីកម្ពុជានៅក្នុងថ្ងៃខួបកំណើតរបស់ លោក ហ៊ុន សែន។ ក្នុងជំនួបនោះពួកគេបានបង្ហាញពីភាពស្និទ្ធស្នាលរវាងគ្រួសារទាំងពីរ។ទោះជាយ៉ាងណាជំនួបនេះត្រូវបានអ្នកឃ្លាំមើលយល់ថាអតីតមេដឹកនាំថៃកំពុងតែខ្ចីដៃកម្ពុជាដើម្បីជំរុញទៅមេដឹកនាំយោធាថៃបើកផ្លូវឲ្យខ្លួនបានចូលប្រទេសថៃវិញតែប៉ុណ្ណោះប៉ុន្តែមិនបានជួយលទ្ធិប្រជាធិបតេយ្យនៅកម្ពុជាដែលកំពុងធ្លាក់ចុះឲ្យមានភាពប្រសើរឡើងវិញឡើយ។
ការលើកឡើងរបស់អ្នកវិភាគនិងមន្ត្រីបក្សនេះបន្ទាប់ពីលោក ថាក់ស៊ីន ស៊ីណាវ៉ាត្រា និងប្អូនស្រីរបស់លោកបានមកចូលរួមកម្មវិធីខួបកំណើតលោកនាយករដ្ឋមន្ត្រី ហ៊ុន សែន នៅប្រទេសកម្ពុជាកាលពីថ្ងៃទី៥ សីហា។
តំណាងរាស្ត្រគណបក្សប្រឆាំង លោក អ៊ុំ សំអាន ប្រាប់វិទ្យុអាស៊ីសេរីនៅថ្ងៃទី៦ សីហា ថាមេដឹកនាំកម្ពុជាលោក ហ៊ុន សែន ជួបជាមួយលោក ថាក់ស៊ីនស៊ីណាវ៉ាត្រា និងលោកស្រី យ៊ីងលាក់ ស៊ីណាវ៉ាត្រា (Yingluck Shinawatra)នាពេលនេះដើម្បីទំនាក់ទំនងរវាងមេដឹកនាំនៃប្រទេសទាំងស្របដែលលោក ហ៊ុន សែន ត្រៀមផ្ទេរអំណាចឲ្យកូនប្រុសច្បងរបស់លោកនៅពេលខាងមុខ។
មួយវិញទៀត លោក ហ៊ុន សែន ជួបលោក ថាក់ស៊ីន ស៊ីណាវ៉ាត្រា ដើម្បីធានាថានៅពេលគណបក្សកូនស្រីរបស់លោក ថាក់ស៊ីន ស៊ីណាវ៉ាត្រា នឹងបង្កើតរដ្ឋាភិបាលថ្មីដឹកនាំប្រទេសមួយនេះក្នុងពេលឆាប់ៗខាងមុខនេះឲ្យជួយបិទផ្លូវប្រធានស្ដីទីគណបក្សសង្គ្រោះជាតិ គឺ លោក សម រង្ស៊ី កុំឲ្យយកដីទឹកថៃ ធ្វើជាមធ្យោបាយវិលចូលប្រទេសកម្ពុជាវិញ។
តែលោកជំនឿថា បើគណបក្សកូនស្រីរបស់លោក ថាក់ស៊ីន ដឹកនាំរដ្ឋាភិបាលនាពេលខាងមុខនោះវាប្រាកដជាមិនដូចរដ្ឋាភិបាលចាស់របស់លោក ប្រាយុទ្ធ ចាន់អូចា (Prayut Chan-o-cha)នោះទេដោយសារជាគណបក្សដែល ស្រឡាញ់យុត្តិធម៌គោរពសិទ្ធិមនុស្សនិងមិនធ្វើទុក្ខបុកម្នេញមិនចាប់សកម្មជនគណបក្សប្រឆាំងបញ្ជូនទៅកម្ពុជាវិញឡើយ។
លោក អ៊ុំ សំអាន «លោក ប្រាយុទ្ធ ចាន់អូចា គាត់ថា មិនកាន់អំណាចទៀតទេដូច្នេះហើយ ស្ថានភាពនៅថៃមិនអាក្រក់ទេ នឹងល្អទៅមុខទៀត ព្រោះលោក ប្រាយុទ្ធ មិនព្យាយាមកាន់អំណាចទៀត នឹងផ្ទេរអំណាចទៅដល់គណបក្សដែលឈ្នះឆ្នោតអ៊ីចឹងខ្ញុំយល់ថា ប្រហែលគណបក្សកូនស្រីលោក ថាក់ស៊ីន នឹងបានដឹកនាំប្រទេសអ៊ីចឹងស្ថានភាពគោរពសិទ្ធិមនុស្សនៅថៃ និងលទ្ធិប្រជាធិបតេយ្យនៅថៃប្រាកដជាល្អជាងនៅកម្ពុជា»។
ចំណែកអ្នកវិភាគនយោបាយនិងសង្គមលោក គឹម សុខ យល់ឃើញថាអតីតមេដឹកនាំថៃលោកថាក់ស៊ីនកំពុងប្រើប្រាស់លោក ហ៊ុន សែនដើម្បីបន្ទន់ចិត្តពួកយោធាថៃឲ្យជឿជាក់ទៅរូបលោកក្នុងគោលដៅដើម្បីរកស៊ីជាមួយរដ្ឋាភិបាលកម្ពុជានាពេលខាងមុខខណៈកន្លងមកលោក ថាក់ស៊ីនក៏ធ្លាប់មានគម្រោងបើកទីក្រុងមួយលើទឹកនៅខេត្តកោះកុង ជាមួយលោក ហ៊ុន សែន ផងដែរ ។
លោកយល់ថាជំនួបរវៀងគ្រួសារទាំងពីរនេះវាល្អប្រសើរសម្រាប់តែទំនាក់ទំនងគ្រួសារនៃមេដឹកនាំទាំងពីរប៉ុណ្ណោះប៉ុន្តែវាមិនបានធ្វើឲ្យលទ្ធិប្រជាធិបតេយ្យនៅកម្ពុជាមានភាពល្អប្រសើរឡើយ។
លោក គឹម សុខ៖ «ថៃបានផលប្រយោជន៍ផ្សេងទៀតគួរសមដែរពីទំនាក់ទំនងលោក ថាក់ ស៊ីន និង លោក ហ៊ុន សែន ចំណែកឯកម្ពុជាវិញប្រជាធិបតេយ្យក៏រីកលូតលាស់ពិបាកហើយចំណែកផលប្រយោជន៍ផ្សេងៗទៀតក៏មិនបាន ហើយអាចខាតផលប្រយោជន៍ធំពីទំនាក់ទំនងលោក ថាក់ស៊ីន និងលោក ហ៊ុន សែន នេះទៀតផង»។
វិទ្យុអាស៊ីសេរីមិនអាចទាក់ទងអ្នកនាំពាក្យរដ្ឋាភិបាល លោក ផៃ ស៊ីផាន និងអ្នកនាំពាក្យគណបក្សប្រជាជនកម្ពុជា លោក សុខ ឥសាន បានទេនៅថ្ងៃទី៦ ខែសីហា នេះដោយទូរស័ព្ទចូលគ្មានអ្នកទទួល។
លោកស្រីយីងឡាក់ស៊ីណាវ៉ាត្រា ធ្លាប់ប្រើប្រាស់ទឹកដី និងលិខិតឆ្លងដែនកម្ពុជាដើម្បីរត់ភៀសខ្លួនទៅប្រទេសទី៣ បន្ទាប់ពីលោក ប្រាយុទ្ធ ចាន់អូចារ ឡើងគ្រប់គ្រងអំណាចពីពេលកន្លងទៅខណៈលោកថាក់ស៊ីនស៊ីណាវ៉ាត្រា បានភៀសខ្លួនទៅក្រៅប្រទេសកាលពីឆ្នាំ២០០៨៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។