អាជ្ញាធរខេត្តឧត្តរមានជ័យចាប់ខ្លួនសកម្មជនគណបក្សប្រឆាំងម្នាក់ទៀតដោយគ្មានបង្ហាញដីកា។មន្ត្រីសិទ្ធិមនុស្សនិងមន្ត្រីគណបក្សប្រឆាំងរិះគន់ថា សមត្ថកិច្ចចាប់ខ្លួនមន្ត្រីគណបក្សប្រឆាំងទាំងបំពានច្បាប់។
អាជ្ញាធរខេត្តឧត្តរមានជ័យនៅថ្ងៃទី៩ វិច្ឆិកានេះ បានចាប់ខ្លួនសកម្មជនគណបក្សសង្គ្រោះជាតិម្នាក់ទៀត នៅថ្ងៃទី៩ វិច្ឆិកានេះ ស្របពេល លោក សម រង្ស៊ី បានមកប្រទេសម៉ាឡេស៊ី។
តុលាការបានចេញដីកាបញ្ជាឱ្យចូលខ្លួនរបស់តុលាការខេត្តឧត្តរមានជ័យបានបង្គាប់ឱ្យចាប់ខ្លួនលោក លោក ធួក ធឿយ អាយុ៤៨ ឆ្នាំ សកម្មជនគណបក្សសង្គ្រោះជាតិនៅភូមិភ្នៅ ឃុំតាសោម ស្រុកអង្គរជុំ ខេត្តសៀមរាប ដែលមានទីលំនៅបច្ចុប្បន្ននៅស្រុកសំរោងខេត្តឧត្តរមានជ័យ ត្រូវតុលាការចោទប្រកាន់មន្ត្រីគណបក្សប្រឆាំង ពីបទរួមគំនិតក្បត់ដូចសកម្មជនគណបក្សសង្គ្រោះជាតិលើកមុនៗដែរ គឺបានប្រមូលប្រជាពលរដ្ឋមកចាំទទួលលោក សម រង្ស៊ី។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការ លីកាដូ (LICADHO) លោក អំ សំអាតមានប្រសាសន៍ថា ការចាប់ខ្លួនមនុស្សជាបន្តបន្ទាប់នេះដោយសារតែស្ថានភាពនយោបាយឡើងកម្ដៅ រវាងបក្សកាន់អំណាច និងគណបក្សប្រឆាំង។ លោកបញ្ជាក់ថា អ្នកនយោបាយគួរតែគិតគូរពីផលប្រយោជន៍ជាតិកុំយកប្រជាពលរដ្ឋជាចំណាប់ខ្មាំងនយោបាយ៖ «ការឡើងកម្ដៅនយោបាយចុងក្រោយនេះ យើងជាសង្គមស៊ីវិលមួយដែរ យើងមានការបារម្ភពាក់ព័ន្ធជាមួយនឹងការបាត់បង់ EBA ឬក៏ GSP នៅខាងមុខទៀត។ អ៊ីចឹងរយៈពេលនេះតទៅគួរតែគិតគូរហើយគួរតែធ្វើយ៉ាងណាដើម្បីដោះស្រាយវិបត្តិនយោបាយ ដើម្បីរក្សាបាននូវប្រទេសយើងដែលជាប្រទេសដែលប្រកាន់គោលការលទ្ធិប្រជាធិបតេយ្យ សេរីពហុបក្ស ហើយនឹងការគោរពសិទ្ធិមនុស្ស»។
ការចាប់ខ្លួនសកម្មជនគណបក្សប្រឆាំងម្នាក់ទៀតនៅក្នុងឧត្តរមានជ័យនេះ បានធ្វើឡើងក្រោយពីលោក ហ៊ុន សែន បានព្រមានចាប់ខ្លួនសកម្មជនគណបក្សសង្គ្រោះជាតិបន្ថែមទៀត ប្រសិនបើពួកគេមិនចូលសារភាព។
អ្នកនាំពាក្យក្រសួងយុត្តិធម៌លោក ជិន ម៉ាលីន បញ្ជាក់ថា ការចាប់ខ្លួននេះគឺអនុវត្តទៅតាមច្បាប់ចំពោះអ្នកទាំងឡាយណាដែលមានគម្រោងផ្ដួលរំលំរដ្ឋាភិបាលប៉ុណ្ណោះ៖ «រដ្ឋាភិបាលមិនមានវិធានការចាប់ខ្លួនអ្នកគាំទ្របក្សប្រឆាំងអ្វីទេ។ ក៏ប៉ុន្តែវិធានការនេះធ្វើឡើងចំពោះអ្នកប្រព្រឹត្តបទល្មើសគឺដែលបានធ្វើសកម្មភាពក្នុងការគាំទ្រផែនការទុច្ចរិតក្នុងការផ្ដួលរំលំរដ្ឋាភិបាល។ អ៊ីចឹងបើកាលណាមានបទល្មើសកើតឡើងសមត្ថកិច្ចត្រូវមានវិធានការច្បាប់ជារឿងធម្មតា»។
គិតត្រឹមថ្ងៃទី៨ វិច្ឆិកានេះ សកម្មជនបក្សសង្គ្រោះជាតិចំនួន ៨៣នាក់ហើយ ត្រូវបានរបបក្រុងភ្នំពេញចាប់ខ្លួន និងចំនួន ២០០នាក់ផ្សេងទៀត មានឈ្មោះក្នុងដីកាបង្គាប់ឱ្យចាប់ខ្លួនពីបទសង្ស័យ ថា បានចូលរួមអមដំណើរជាមួយលោក សម រង្ស៊ី ចំនួន ១០៤នាក់បង្ខំឱ្យចូលសារភាព ៥៨នាក់មានដីកាចាប់ខ្លួនក្រោមបទរួមគំនិតក្បត់ និង ១២នាក់រងគ្រោះដោយសារការវាយប្រហារដោយអំពើហិង្សាពីរបបក្រុងភ្នំពេញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។