ក្រុមគ្រួសារ និងមន្ត្រីសិទ្ធិមនុស្សចាត់ទុកការសម្រេចរបស់សាលាឧទ្ធរណ៍ត្បូងឃ្មុំលើសំណុំរឿងមន្ត្រីបក្សសង្គ្រោះជាតិលោក គង់ សំអាន ថា ជារឿងអយុត្តិធម៌ និងជាការធ្វើទុក្ខបុកម្នេញខាងនយោបាយ។ ការរិះគន់នេះ ធ្វើឡើងបន្ទាប់ពីតុលាការជាន់ខ្ពស់មួយនេះ បានតម្កល់សាលក្រមផ្ដន្ទាទោសមន្ត្រីបក្សប្រឆាំងរូបនេះ ទុកជាបានការដដែល នៅព្រឹកថ្ងៃទី៤ សីហា។
គ្រួសាររបស់សមាជិកបក្សប្រឆាំង លោក គង់ សំអាន ចាត់ទុកការសម្រេចរបស់សាលាឧទ្ធរណ៍ត្បូងឃ្មុំថា ជារឿងមិនត្រឹមត្រូវ និងមិនអាចទទួលយកបាន។
ប្រពន្ធរបស់លោក គង់ សំអាន គឺលោកស្រី អៀប សួគ៌ សោកស្ដាយជាខ្លាំងចំពោះការតម្កល់សាលក្រមផ្ដន្ទាទោសប្តីលោកស្រីនេះ ព្រោះគាត់ជាមនុស្សស្អាតស្អំ និងបានធ្វើការងារជាប្រយោជន៍សង្គមរាប់សិបឆ្នាំមកហើយ។ លោកស្រីបញ្ជាក់ថា នឹងប្ដឹងសាទុក្ខករណីនេះទៅតុលាការកំពូលបន្តទៀត ដើម្បីជួយរកយុត្តិធម៌ជូនប្តីរបស់លោកស្រីវិញ៖ « តាំងពីដំបូងខែ៩ រហូតដល់ថ្ងៃនេះ ប្ដីខ្ញុំនៅជាប់ ៧ឆ្នាំដដែល ព្រោះតុលាការថ្ងៃនេះអត់មានកាត់អ្វីទេ យកតែសំណុំបែបបទពីមុន។ ដូច្នេះខ្ញុំសោកស្ដាយណាស់ ដែលគ្រូបង្រៀនមួយដែលមានភាពតស៊ូ មិនគួរណាគេដាក់កំហុសឱ្យគាត់សោះ។ សោកស្ដាយមែនទែនដែលតុលាការអត់ចេះកាត់ក្ដី » ។
ប្រធានក្រុមប្រឹក្សាជំនុំជម្រះសាលាឧទ្ធរណ៍ត្បូងឃ្មុំ លោក ទី សំណាង បានប្រកាសសាលដីកានៅព្រឹកថ្ងៃទី ០៤សីហា ដោយតម្កល់សាលក្រមផ្ដន្ទាទោសលោក គង់ សំអាន ទុកជាបានការដដែល។ តុលាការជាន់ខ្ពស់មួយនេះ បានបើកផ្លូវឱ្យលោក គង់ សំអាន អាចប្ដឹងសាទុក្ខទៅតុលាការកំពូលតាមនីតិវិធីបន្តទៀត។
វិទ្យុអាស៊ីសេរីមិនអាចទាក់ទងមេធាវីការពារក្ដីឱ្យលោក គង់ សំអាន គឺលោក សំ សុគង់ ដើម្បីសុំប្រតិកម្មរឿងនេះបានទេនៅថ្ងៃទី៤ សីហា។ ប៉ុន្តែលោកធ្លាប់បញ្ជាក់ថា សកម្មភាពរបស់កូនក្ដីលោកនាពេលកន្លងទៅនោះ ជាការអនុវត្តសិទ្ធិបញ្ចេញមតិ ការជួបជុំ និងការប្រមូលផ្តុំដោយសន្តិវិធី មិនមែនជាអំពើល្មើសច្បាប់អ្វីឡើយ។
លោក គង់ សំអាន អាយុ ៦៩ឆ្នាំ គឺជាសមាជិកក្រុមប្រឹក្សាស្រុកមេមត់នៃគណបក្សសង្គ្រោះជាតិ។ លោកត្រូវបានអាជ្ញាធរចាប់ខ្លួនកាលពីដើមខែកញ្ញា ឆ្នាំ២០២០។ តុលាការខេត្តត្បូងឃ្មុំបានផ្ដន្ទាទោសលោកឱ្យជាប់ពន្ធនាគារចំនួន ៧ឆ្នាំ ពីបទរួមគំនិតក្បត់ ដោយសារលោកបានគាំទ្រនយោបាយរបស់ថ្នាក់ដឹកនាំបក្សប្រឆាំង និងហូបនំបញ្ចុកជុំគ្នាជាមួយសមាជិកដទៃទៀតនៃគណបក្សសង្គ្រោះជាតិ ជាពិសេសលោកបានគាំទ្រដំណើរវិលចូលស្រុកវិញរបស់លោក សម រង្ស៊ី កាលពីខែវិច្ឆិកា ឆ្នាំ២០១៩។ គិតត្រឹមពេលនេះ លោកជាប់ឃុំជិត ១ឆ្នាំមកហើយ។
នាយករងទទួលបន្ទុកផ្នែកឃ្លាំមើលសិទ្ធិមនុស្សនៃអង្គការលីកាដូ (LICADHO) លោក អំ សំអាត សោកស្ដាយចំពោះការតម្កល់សាលក្រមផ្ដន្ទាទោសនេះ។ លោកបញ្ជាក់ថា សំណុំរឿងលោក គង់ សំអាន ក៏ដូចជាសំណុំរឿងមន្ត្រីបក្សសង្គ្រោះជាតិផ្សេងទៀតដែរ គឺត្រូវបានអ្នកជំនាញជាតិ និងអន្តរជាតិចាត់ទុកថា ជារឿងនយោបាយ មិនមែនជាការអនុវត្តច្បាប់ដោយត្រឹមត្រូវនោះទេ៖« ជាទូទៅយើងមើលឃើញហើយថា ការអនុវត្តកន្លងមកនេះ វាហាក់ដូចជារឿងនយោបាយច្រើនជាងការអនុវត្តច្បាប់។ អ៊ីចឹងហើយសិទ្ធិរបស់គាត់តទៅទៀត បើតាមផ្លូវច្បាប់ គឺមានតែប្ដឹងសាទុក្ខហ្នឹង ដើម្បីតុលាការកំពូលធ្វើការវិនិច្ឆ័យឡើងវិញ។ ហើយទីពីរ បើយើងមើលទៅ ជាបទពិសោធន៍ត្រូវពឹងផ្អែកលើការចរចាផ្នែកនយោបាយឡើងវិញ » ។
គិតមកដល់ដើមខែសីហានេះ តុលាការរបបលោក ហ៊ុន សែន បានផ្ដន្ទាទោសសមាជិកគណបក្សសង្គ្រោះជាតិ យ៉ាងហោចណាស់ ២០នាក់ឱ្យជាប់ពន្ធនាគារពី ៥ឆ្នាំ ទៅ ៧ឆ្នាំ ក្រោមបទចោទ «រួមគំនិតក្បត់» ខណៈសកម្មជនជាង ១រយនាក់ផ្សេងទៀត កំពុងរង់ចាំសវនាការ។ ក្នុងចំណោមអ្នកដែលត្រូវបានផ្ដន្ទាទោសទាំងនោះ មួយចំនួនកំពុងជាប់ឃុំក្នុងពន្ធនាគារ ដូចជាលោក គង់ សំអាន និងអ្នកស្រី ប៉ែន មុំ ជាដើម ខណៈមនុស្សមួយចំនួនទៀតកំពុងភៀសខ្លួននៅក្រៅប្រទេស។
សហគមន៍ជាតិ និងអន្តរជាតិ រួមទាំងទីភ្នាក់ងាររបស់អង្គការសហប្រជាជាតិផង បានថ្កោលទោសរបបលោក ហ៊ុន សែន ជាបន្តបន្ទាប់ចំពោះការប្រើប្រាស់ប្រព័ន្ធតុលាការដើម្បីបង្ក្រាបសំឡេងគណបក្សប្រឆាំងបែបនេះ។ ពួកគេនៅតែទាមទារឱ្យរបបនេះទម្លាក់ចោលបទចោទប្រកាន់ខុសឆ្គងទាំងនេះ ព្រមទាំងដោះលែងអ្នកជាប់ឃុំក្នុងសំណុំរឿងនយោបាយ និងអ្នកទោសមនសិការទាំងអស់ឱ្យមានសេរីភាពវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។