សកម្មជន​បក្ស​ភ្លើងទៀន​នៅ​ខេត្ត​កំពង់ស្ពឺ​ ២​នាក់​ទៀត​ត្រូវ​អាជ្ញាធរ​ចាប់ខ្លួន

0:00 / 0:00

តុលាការ​ក្រុង​ភ្នំពេញ​សម្រេច​ឃុំខ្លួន​មន្ត្រី​បក្សភ្លើងទៀន​នៅ​ខេត្ត​កំពង់ស្ពឺ​ពីរ​រូប គឺ​លោក ប៉ាង ប៊ុនស៊ន និង​លោក ប្រាក់ ឆន ពី​បទ​ញុះញង់​លើ​បណ្តា​សង្គម​ហ្វេសប៊ុក។ មន្ត្រី​សិទ្ធិមនុស្ស និង​គណបក្ស​ភ្លើងទៀន​ចាត់ទុក​ការ​ចាប់​ឃុំខ្លួន​សកម្មជន​នយោបាយ​ទាំងនេះ គឺ​ជា​ការ​គំរាមកំហែង​ផ្នែក​នយោបាយ ហើយ​ទាមទារ​ឱ្យ​ដោះលែង​ពួកគាត់​ឱ្យ​មាន​សេរីភាព​ឡើងវិញ។

ចៅក្រម​ស៊ើបសួរ​នៃ​សាលាដំបូង​រាជធានី​ភ្នំពេញ បាន​ចេញដីកា​បង្គាប់​ឱ្យ​នាំខ្លួន​លោក ប៉ាង ប៊ុនស៊ន និង​លោក ប្រាក់ ឆន យក​ទៅ​ឃុំ​បណ្ដោះអាសន្ន​ហើយ​នៅថ្ងៃទី១៨ ខែ​វិច្ឆិកា។ ប៉ុន្តែ​ក្រុម​គ្រួសារ​ពុំ​ទាន់​ដឹង​ថា សមត្ថកិច្ច​បញ្ជូន​ពួកគេ​ទៅ​ឃុំ​នៅ​ពន្ធនាគារ​ណាមួយ​នៅឡើយ​ទេ។

តុលាការ​ចោទ​ប្រកាន់​សមាជិក​របស់​គណបក្ស​ភ្លើងទៀន​នៅ​ខេត្តកំពង់ស្ពឺ​ទាំងពីរ​រូប​នេះ ពី​បទ​«ញុះញង់​បង្ក​ឲ្យ​មាន​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម» ទាក់ទង​រឿង​ពួក​លោក​បង្ហោះ​សារ​នៅ​លើ​ហ្វេសប៊ុក និង​មាន​ទំនាក់ទំនង​តាម​ឆាត​(Messenger) ជាមួយ​មន្ត្រី​គណបក្សប្រឆាំង​នៅ​ក្រៅ​ប្រទេស កាល​ពី​ឆ្នាំ២០២៣។

អ្នកនាំពាក្យ​សាលាដំបូង​រាជធានីភ្នំពេញ​លោក អ៊ី រិន្ទ មិន​ទាន់​ឆ្លើយតប​នឹង​សំណួរ​របស់​វិទ្យុ​អាស៊ីសេរី​នៅ​ឡើយ​ទេ គិត​ត្រឹម​ម៉ោង​ផ្សាយ​នេះ។

ប៉ុន្តែ អ្នកនាំពាក្យ​អគ្គនាយកដ្ឋាន​ពន្ធនាគារ​នៃ​ក្រសួងមហាផ្ទៃ លោក ឃៀង សុណាឌីន ប្រាប់​វិទ្យុ​អាស៊ីសេ​រីនៅ​យប់​ថ្ងៃ​ទី១៨ ខែវិច្ឆិកា​​ថា តុលាការ​បាន​បង្គាប់​ឱ្យ​សមត្ថកិច្ច​ឃុំ​លោក ប៉ាង ប៊ុនស៊ន នៅ​ពន្ធនាគារ​ខេត្ត​កណ្តាល ដោយ​ឡែក​លោក ប្រាក់ ឆន បញ្ជូន​​ទៅ​​ឃុំ​​នៅ​ពន្ធនាគារ​​ម១ រាជធានី​ភ្នំពេញ។

ជុំវិញ​រឿង​នេះ អគ្គលេខាធិការ​គណបក្ស​ភ្លើងទៀន​លោក លី សុធារ៉ាយុត្តិ ចាត់ទុក​ការ​ចាប់ខ្លួន​នេះ គឺ​ជា​សញ្ញា​នៃ​ការ​ធ្វើ​ទុក្ខបុកម្នេញ និង​ការ​គំរាមកំហែង ដែល​ធ្វើ​ឲ្យ​សកម្មជន​គណបក្ស​មាន​ការ​ភ័យខ្លាច។ លោក​ទាមទារ​ឱ្យ​សមត្ថកិច្ច​ដោះលែង​លោក ប៉ាង ប៊ុនស៊ន និង​លោក ប្រាក់ ឆន ដើម្បី​ឱ្យ​ពួកគាត់​ត្រឡប់​ទៅ​ជួបជុំ​គ្រួសារ និង​បម្រើ​ពលរដ្ឋ​វិញ ព្រមទាំង​បញ្ឈប់​ការ​ធ្វើ​ទុក្ខបុកម្នេញ និង​ការ​ចាប់ខ្លួន​សកម្មជន​គណបក្ស​ភ្លើងទៀន​ដែល​គ្មាន​កំហុស។

លោក លី សុធារ៉ាយុត្តិ៖ «យើង​តែងតែ​គោរព និង​អនុវត្ត​យ៉ាង​ខ្ជាប់ខ្ជួន​នូវ​រដ្ឋធម្មនុញ្ញ ច្បាប់​ស្ដីពី​គណបក្ស​នយោបាយ ច្បាប់​ជាធរមាន​របស់​ប្រទេស​ផ្សេងទៀត ដូច្នេះ​យើង​ស្នើ​ឱ្យ​ដោះលែង​សកម្មជន​របស់​យើង ហើយ​បញ្ឈប់​ការ​ធ្វើ​ទុក្ខបុកម្នេញ និង​ការ​ចាប់ខ្លួន​សកម្មជន​របស់​បក្ស​ភ្លើងទៀន»។

កាល​ពី​ព្រឹក​ថ្ងៃ​ទី១៧ ខែ​វិច្ឆិកា សមត្ថកិច្ច​នៃ​ស្នងការដ្ឋាន​នគរបាល​ជាតិ សហការ​ជាមួយ​សមត្ថកិច្ច​ស្នងការដ្ឋាន​នគរបាល​ខេត្ត​កំពង់ស្ពឺ ចាប់ខ្លួន​ជំទប់ទី២​ ឃុំ​ស្វាយរំពារ ស្រុក​បរសេដ្ឋ គឺ​លោក ប៉ាង ប៊ុនស៊ន និង​សកម្មជន​បក្ស​ភ្លើងទៀន​ម្នាក់​ទៀត​លោក ប្រាក់ ឆន ហើយ​បញ្ជូន​ពួកគាត់​ទៅ​ឃុំ​នៅ​ស្នងការដ្ឋាន​នគរបាល​ជាតិ​មួយ​យប់​មុន​នាំ​ខ្លួន​មក​សាកសួរ​នៅ​តុលាការ​ក្រុង​ភ្នំពេញ នៅ​ថ្ងៃ​ទី១៨ ខែ​វិច្ឆិកា។

កន្លង​មក​លោក ប៉ាង ប៊ុនស៊ន ធ្លាប់​រត់​គេច​ពី​ការប៉ុនប៉ង​ចាប់ខ្លួន ពី​សំណាក់​សមត្ថកិច្ច​ខេត្ត​កំពង់ស្ពឺ​ម្តង​ហើយ អំឡុង​ពេល​ដែល​សមត្ថកិច្ច​សម្រុក​ចាប់ខ្លួន និង​បញ្ជូន​សកម្មជន គណបក្សប្រឆាំង​ច្រើន​នាក់​នៅ​ស្រុក​បរសេដ្ឋ ដាក់​ពន្ធនាគារ​ខេត្ត​ជាបន្តបន្ទាប់ ពី​បទ​ញុះញង់ និង​បរិហារកេរ្តិ៍​ជា​សាធារណៈ កាល​ពី​ចុង​ខែ​កក្កដា។ ទោះជាយ៉ាងណា តុលាការ​ខេត្តកំពង់ស្ពឺ បាន​សម្រេច​ដោះលែង​សកម្មជន​ទាំងនោះ​ឱ្យ​នៅ​ក្រៅ​ឃុំ​វិញ ដោយសារ​ពួកគាត់​ប្រកាស​ចុះចូល​ជាមួយ​គណបក្ស​កាន់អំណាច។ ចំណែក​លោក ប៉ាង ប៊ុនស៊ន ក៏​បាន​បង្ខំចិត្ត ប្រកាស​ចុះចូល ដូច​សមាជិក​ផ្សេងទៀត ដើម្បី​ជា​ថ្នូរ​រក្សា​សុវត្ថិភាព វិល​ត្រឡប់​មក​ផ្ទះសម្បែង​វិញ។ ប៉ុន្តែ​ដោយសារ​លោក​រក្សា​ភាព​ស្ងប់ស្ងត់ ដោយ​មិន​បាន​ធ្វើ​សកម្មភាព​ដើរ​អូសទាញ​សកម្មជន​នៅ​មូលដ្ឋាន​ តាម​បញ្ជា​មន្ត្រី​គណបក្ស​ប្រជាជន​កម្ពុជា​នោះ លោក​ត្រូវ​បាន​សមត្ថកិច្ច​ចាប់ខ្លួន​នៅ​ពេល​នេះ។

មន្រ្តី​ជាន់ខ្ពស់​នៃ​សមាគម​ការពារ​សិទ្ធិមនុស្ស​អាដហុក​(Adhoc) លោក យី សុខសាន្ត មើលឃើញ​ថា​ករណី​ចាប់ខ្លួន​សកម្មជន និង​មន្ត្រី​គណបក្ស​ប្រឆាំង​នៅ​ខេត្តកំពង់ស្ពឺ​បាន​កើនឡើង​ខ្លាំង ប៉ុន្តែ​សកម្មជន​ទាំងនោះ​ទទួល​បាន​សេរីភាព​ឡើងវិញ ក្រោយ​ពួកគាត់​ធ្វើ​វីដេអូ​សុំទោស ឬ​ប្តូរ​ជំហរ​នយោបាយ​របស់​ខ្លួន ដែល​បង្ហាញ​ឱ្យ​មតិ​ទូទៅ​មើលឃើញ​ក្ដីក្តាំ​នេះ​ជា​រឿង​នយោបាយ។ លោក​បារម្ភ​ថា បញ្ហា​នេះ​បាន​ធ្វើ​ឱ្យ​បរិយាកាស​នយោបាយ​អាប់អួ ហើយ​កម្ពុជា​ទទួលរង​ការរិះគន់ ជាពិសេស​ទណ្ឌកម្ម​ពី​សហគមន៍​អន្តរជាតិ​បន្ថែម​ទៀត។

លោក យី សុខសាន្ត៖ «អ្វី​ដែល​ពួកគាត់​ធ្វើ​កន្លងមក​ក្នុងនាម​ជា​គណបក្ស​នយោបាយ​ដែល​ស្របច្បាប់ ចុះបញ្ជី​នៅក្នុង​ក្រសួង​មហាផ្ទៃ ក៏​ដូច​ជា​បក្សនយោបាយ​ដែល​រដ្ឋាភិបាល​ទទួលស្គាល់​ដែរ ហើយ​បើ​គ្រាន់តែ​រិះគន់​បន្តិចបន្តួច ហើយ​គ្រាន់តែ​សេពគប់​អ្នក​នេះ​អ្នក​នោះ ដោយ​ពួកគាត់​ខ្លះ​អត់​បាន​ប្រព្រឹត្ត​ដូច​ការចោទប្រកាន់​ទេ ប៉ុន្តែ​គាត់​ត្រូវ​រង​ការចោទប្រកាន់​ចាប់​ខ្លួន។ យើង​មើល​ទៅ​សីលធម៌​ស្រុក​យើង​ដូច​ធ្លាក់ចុះ ពាក់ព័ន្ធ​នឹង​សេរីភាព​បញ្ចេញមតិ និង​អ្នក​នយោបាយ​បាទ»។

មក​ទល់​ពេល​នេះ រដ្ឋាភិបាល​បាន​ចាប់ខ្លួន​សកម្មជន​បរិស្ថាន អ្នករិះគន់ និង​មន្ត្រី​គណបក្សប្រឆាំង ជិត​១០០នាក់​ហើយ។ ក្រុម​អង្គការ​ជាតិ និង​អន្តរជាតិ ចាត់ទុក​ការ​ចាប់ខ្លួន​ទាំងនេះ​ជា​រូបភាព​នយោបាយ ដើម្បី​បង្ក្រាប​លើ​សំឡេង​ប្រឆាំង និង​អ្នករិះគន់។ គណបក្សជំទាស់ និង​មន្ត្រី​សិទ្ធិមនុស្ស​ទាមទារ​ឱ្យ​រដ្ឋាភិបាល​លោក ហ៊ុន ម៉ាណែត បញ្ឈប់​ការ​យក​ប្រព័ន្ធ​តុលាការ​មក​គាបសង្កត់​លើ​សំឡេង​ប្រឆាំង ហើយ​ទាមទារ​ឱ្យ​ដោះលែង​ពួកគេ​វិញ​ជាបន្ទាន់ និង​ឥតលក្ខខណ្ឌ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។