សមត្ថកិច្ចខេត្តត្បូងឃ្មុំ កោះហៅគ្រួសារអ្នកគាំទ្របក្សភ្លើងទៀន ដែលត្រូវឃាតកបាញ់សម្លាប់ក្នុងស្រែមក សម្របសម្រួលក្រៅប្រព័ន្ធតុលាការ ដើម្បីបិទបញ្ចប់សំណុំរឿង។ សង្គមស៊ីវិលយល់ថា ស្ថាប័នពាក់ព័ន្ធគួរពន្លឿនស្វែងរកជនដៃដល់មកផ្ដន្ទាទោសតាមច្បាប់ ដើម្បីផ្ដល់យុត្តិធម៌ដល់ជនរងគ្រោះ ដែលស្លាប់ និងពង្រឹងការអនុវត្តច្បាប់ ដើម្បីកាត់បន្ថយបទល្មើស។
គ្រួសារជនរងគ្រោះដែលឃាតកបាញ់សម្លាប់នៅកណ្ដាលវាលស្រែនៅខេត្តត្បូងឃ្មុំ លើកឡើងថា សមត្ថកិច្ចបានឱ្យលោកស្រី ទៅជួបនៅសាលាឃុំ ដើម្បីដោះស្រាយសំណុំរឿង ដែលប្រជាការពារភូមិបាញ់សម្លាប់ប្តីរបស់លោកស្រី កាលពីថ្ងៃ១៦ តុលា យ៉ាងអាណោចអាធ័មក្នុងវាលស្រែ។ ពួកគាត់យល់ថា បទល្មើសឆក់ត្រីក្នុងស្រែ មិនអាចឈានដល់ការបាញ់សម្លាប់មនុស្សនោះឡើយ។
ប្រពន្ធជនរងគ្រោះ លោកស្រី វេន គឹមយី ប្រាប់វិទ្យុអាស៊ីសេរី កាលពីល្ងាចថ្ងៃទី១៨ ខែតុលា ថា លោកស្រីទើបត្រឡប់ពីប៉ុស្តិ៍នគរបាលរដ្ឋបាលឃុំចក ស្រុកអូររាំងឪ ហើយសមត្ថកិច្ច កំណត់ឱ្យលោកស្រី ទៅជួបនៅសាលាឃុំ នារសៀលថ្ងៃដដែលនេះ ដើម្បីចរចាលុយបញ្ចប់សំណុំរឿងនេះក្រៅប្រព័ន្ធតុលាការ។ លោកស្រីបន្តថា ប្រសិនបើអាជ្ញាធរនៅតែមិនទាន់ចាប់ឃាតក ដែល បាញ់សម្លាប់ប្តី មកផ្ដន្ទាទោសតាមច្បាប់ទេនោះ លោកស្រីនឹងមិនសុខចិត្តឡើយ។ លោកស្រីថា សមត្ថកិច្ចមិនបកស្រាយពី ប្រជាការពារភូមិឈ្មោះ លោក វេត បានកាំភ្លើងមកពីណា ដើម្បីប្រើប្រាស់ និងបញ្ជាក់ពីមូលហេតុ ដែលឃាតក បាញ់សម្លាប់ប្ដីលោកស្រីនោះទេ។ លោកស្រីបញ្ជាក់ថា អាជ្ញាធរ និងសមត្ថកិច្ច ទាក់ទងលោកស្រី ដើម្បីសម្របសម្រួលជាមួយជនដៃដល់៖ « គេថា គាត់ចង់ជូនខ្ញុំ ៧ពាន់ ( ៧ , ០០០ $) អ៊ីចឹងបង ហ្នឹងហើយអ្នកសម្លាប់ហ្នឹងហើយ ដែលថាជូន៧ពាន់ហ្នឹង។ គេថា ២នាក់ ឮគេថាអ៊ីចឹង។ ២នាក់ ម្នាក់មានកាំភ្លើង ម្នាក់សម្លាប់ ខាងប៉ុស្តិ៍ប៉ូលិសបង។ អត់ទាន់បានជួប។ ដល់អ៊ីចឹង ពិបាកសួរគាត់ទៀត ព្រោះអីអត់ទាន់បានជួបឃាតកនោះផងបង។ ចា៎ ខ្ញុំថា ខ្ញុំទទួលយកសំណងបង ព្រោះខ្ញុំវាខ្វះថវិកាច្រើនណាស់បង ខ្ញុំចាត់ចែងខ្មោចហ្នឹង ៧លានរៀល ( ៧ , ០០០ , ០០០៛ ) ៨លានរៀល ( ៨ , ០០០ , ០០០៛ ) ហើយ នៅ ៧ថ្ងៃទៀត មិនដឹងអស់ប៉ុន្មានបងឯងមើល។ អ៊ីចេះបង ថា អា ៧ពាន់ហ្នឹងខ្ញុំអត់យកទេ ខ្ញុំចង់ថា ខ្ញុំសុំ ១ម៉ឺន ៥ពាន់ដុល្លារ ( ១៥ , ០០០ $) បង » ។
ប្រពន្ធជនរងគ្រោះបន្តថា លោកស្រី ព្រមទាំងសាច់ញាតិ និងក្រុមគ្រួសារកំពុងរង់ចាំយុត្តិធម៌ពីអាជ្ញាធរ ដើម្បីឱ្យវិញ្ញាណក្ខន្ធប្ដីបានស្ងប់ចិត្ត។
វិទ្យុអាស៊ីសេរីមិនអាចទាក់ទងអធិការស្រុកអូរាំងឪ លោក វង់ សុភី និងមេប៉ុស្តិ៍ឃុំចក លោក អន សំអុន ដើម្បីសុំអត្ថាធិប្បាយជុំវិញរឿងនេះបាននៅឡើយទេ កាលពីល្ងាចថ្ងៃទី១៨ ខែតុលា។ រីឯ ស្នងការនគរបាលខេត្តត្បូងឃ្មុំ លោក ម៉ុន មាគ៌ា បានចុចផ្ដាច់ទូរស័ព្ទ នៅល្ងាចថ្ងៃដដែល។ ប៉ុន្តែសាច់ញាតិជនរងគ្រោះបានបញ្ជាក់ថា អាជ្ញាធរឃុំបាននាំពាក្យជនដៃដល់ ដើម្បីចរចាជាមួយលោកស្រី ដោយថា បើទាមទារគេច្រើនពេក នោះគេនឹងសុខចិត្តជាប់គុក ហើយឆាប់ចេញមកវិញ ប៉ុន្តែក្រុមគ្រួសារសព និងគ្មានទទួលបានប្រាក់សំណងអ្វីបន្តិចឡើយ។
ពាក់ព័ន្ធនឹងករណីឃាតកម្មនេះ ប្រធានគណបក្សភ្លើងទៀនខេត្តត្បូងឃ្មុំ លោក អេង ស្រូយ ប្រាប់ វិទ្យុអាស៊ីសេរីថា ឃាតកម្មនេះ ជារឿងដែលគួរឱ្យសោកស្ដាយ ហើយមិនគួរកើតឡើងក្នុងខេត្តត្បូងឃ្មុំឡើយ។ លោកបន្តថា សមត្ថកិច្ចមិនទាន់បង្ហាញពីការស៊ើបអង្កេត និងចាប់ឃាតកមកផ្ដន្ទាទោសបាននៅឡើយទេ។ លោក អេង ស្រួយ ទទូចរដ្ឋាភិបាល និងអាជ្ញាធរមានសមត្ថកិច្ច ត្រូវមានតម្លាភាពក្នុងការ ស្វែងរកឃាតកមកផ្ដន្ទាទោសតាមច្បាប់ ដើម្បីឱ្យភូមិឃុំមានសុខសុវត្ថិភាព៖ «ប្រសិនបើករណីមួយកើតឡើងហើយ រកជនល្មើសឃើញ កើតឡើងហើយរកជនដៃដល់មិនឃើញ កើតឡើងហើយរកអ្នកប្រព្រឹត្តបទល្មើសមិនឃើញ អាហ្នឹងវាជាភាពអាម៉ាស់មួយរបស់សមត្ថកិច្ចហើយ។ ក្នុងនាមជាសមត្ថកិច្ច គួរតែចាត់ចែងវិធានការទៅ រកឃើញឱ្យវាច្បាស់លាស់ ឱ្យសខ្មៅទៅ វាជារឿងអ្វីឱ្យពិតប្រាកដ ដើម្បីឱ្យអស់មន្ទិលទាំងអស់គ្នា រវាងសមត្ថកិច្ច និងប្រជាពលរដ្ឋ។ អ៊ីចឹង មានតែសមត្ថកិច្ចមានជំហរលើអព្យាក្រឹត្យ ក្នុងការស៊ើបអង្កេតស្រាវជ្រាវឱ្យបានច្បាស់លាស់តែប៉ុណ្ណឹង»។
ស្រដៀងគ្នានេះដែរ មន្ត្រីឃ្លាំមើលការរំលោភសិទ្ធិមនុស្ស និងដីធ្លីនៃសមាគមការពារសិទ្ធិមនុស្សអាដហុក ប្រចាំខេត្តត្បូងឃ្មុំ និងខេត្តកំពង់ចាម លោក ឡេង សេងហាន ទទូចឱ្យអាជ្ញាធរមានសមត្ថកិច្ចស្វែងរកចាប់ជនល្មើសមកផ្តន្ទាទោសតាមច្បាប់ និងផ្តល់សំណងទៅឲ្យសាច់ញាតិជនរងគ្រោះប្រកបដោយយុត្តិធម៌។ លោកបន្តបារម្ភថា នៅពេលបទល្មើសកើតឡើង ហើយសមត្ថកិច្ចបណ្ដោយឱ្យជនល្មើសរួចខ្លួន ប្រៀបដូចលើកទឹកចិត្តដល់អ្នកប្រព្រឹត្ត ដែលនាំបទល្មើសកាន់តែកើនឡើង ផ្ទុយពីគោលការណ៍នៃច្បាប់។ លោក ឡេង សេងហាន បញ្ជាក់ថា សំណុំរឿងនេះ សមត្ថកិច្ចមិនអាចសម្រួលក្រៅប្រព័ន្ធច្បាប់ ហើយ ឱ្យជនដៃដល់រួចផុតពីការទទួលខុសត្រូវ តាមច្បាប់បានឡើយ៖ « យើងឃើញថា ករណីសម្លាប់មនុស្សបែបហ្នឹង គឺជាអំពើមួយផ្ទុយទៅហ្នឹងគោលការណ៍ច្បាប់បានចែង ព្រោះអំពើសម្លាប់មនុស្សវាជាអំពើមួយ ដែលសាហាវពេកហាស។ បើសិនជាគាត់ខុសអ្វីយ៉ាងណា គួរតែហៅគាត់មកសួរនាំកន្លែងរដ្ឋបាលទៅ។ កម្ពុជាយើងការផ្ដន្ទាទោសប្រហារជីវិតអត់មានទេ តែទោស ១ជីវិតវាមាន អ៊ីចឹងការសម្លាប់ក្រៅប្រព័ន្ធច្បាប់ខុស១ ហើយ ហើយទៅសម្រុះសម្រួលដោយប្រការណាមួយ ដោយករណីណាមួយទៀត ក៏ជាកំហុសរបស់អ្នកពាក់ព័ន្ធដែរ » ។
ជនរងគ្រោះលោក ប៉ូ ហ៊ីនលាន អាយុ ៤៧ឆ្នាំ ជាអ្នកភូមិព្រីង ឃុំចក ស្រុកអូរាំងឪ មានប្រពន្ធ និងកូន ៣នាក់ក្នុងបន្ទុក។ លោកត្រូវបានឃាតកបាញ់ពីក្រោយខ្នងចំនួន ៣គ្រាប់ បណ្ដាលឱ្យស្លាប់ភ្លាមៗ នៅកន្លែងកើតហេតុ ខណៈលោកចេញទៅរកត្រីនៅតាមវាលស្រែចម្ងាយពីផ្ទះប្រមាណ ២គីឡូម៉ែត្រ កាលពីយប់ថ្ងៃទី១៦ ខែតុលា។
កន្លងមកមានករណីហិង្សាជាច្រើន បានកើតឡើងជាបន្តបន្ទាប់ទៅលើសកម្មជន និងអ្នកគាំទ្រអតីតគណបក្សសង្គ្រោះជាតិ ព្រមទាំងគណបក្សភ្លើងទៀន ជាពិសេស នៅមុន និងក្រោយរដូវកាលបោះឆ្នោតម្តងៗ។ ជនរងគ្រោះខ្លះបានធ្លាក់ខ្លួនពិការអស់មួយជីវិត ខ្លះទៀត ត្រូវបានគេលួចវាយធ្វើបាប រួចត្រូវអាជ្ញាធរចាប់ដាក់គុក ហើយខ្លះទៀត ត្រូវបានជនល្មើសកាប់សម្លាប់ជាដើម។ អាជ្ញាធរតែងតែបដិសេធករណីឃាតកម្មទាំងនោះថា មិនជាប់ពាក់ព័ន្ធនឹងរឿងនយោបាយ និងថា សមត្ថកិច្ចមិនអាចចាប់ជនដៃដល់បាន ដោយសារតែគ្មានព័ត៌មានគ្រប់គ្រាន់។
កាលពីថ្ងៃទី១៤ ខែតុលា អ្នកនាំពាក្យអគ្គស្នងការនគរបាលជាតិ លោក ឆាយ គឹមខឿន អះអាងថា ខ្លួនមិនទាន់មានតម្រុយណាមួយឈានទៅចាប់ខ្លួនជនល្មើស ដើម្បីឱ្យតុលាការផ្ដន្ទាទោស ពាក់ព័ន្ធករណីប្រើហិង្សាលើអតីតសកម្មជនគណបក្សប្រឆាំងទាំងនោះឡើយ ចាប់តាំងពីចុងឆ្នាំ២០១៧ មកដល់ពេលថ្មីៗ នេះ។
យោងតាមមាត្រា ២២៤ នៃក្រមព្រហ្មទណ្ឌនៃកម្ពុជាចែងថា អំពើហិង្សាដោយចេតនា ត្រូវផ្ដន្ទាទោសដាក់ពន្ធនាគារពី ៧ (ប្រាំពីរ)ឆ្នាំ ទៅ ១៥ (ដប់ប្រាំ) ឆ្នាំ កាលបើអំពើនេះ បណ្ដាលឲ្យជនរងគ្រោះស្លាប់ដោយគ្មានចេតនាសម្លាប់។
មាត្រា២០៧ នៃក្រមព្រហ្មទណ្ឌចែងថា "បទមនុស្សឃាតដោយអចេតនា គឺជាអំពើបណ្ដាលឱ្យស្លាប់អ្នកដទៃ ដោយការធ្វេសប្រហែស ការមិនប្រុងប្រយ័ត្ន ឬការខ្ជីខ្ជា ត្រូវផ្ដន្ទាទោសដាក់ពន្ធនាគារពី ១ឆ្នាំ ទៅ ៣ឆ្នាំ និងពិន័យជាប្រាក់ពី ២លានរៀល ទៅ ៦លានរៀល។
គ្រួសារជនរងគ្រោះ មន្ត្រីគណបក្សភ្លើងទៀន និងសង្គមស៊ីវិល ទទូចដល់រដ្ឋាភិបាល និងសមត្ថកិច្ចពាក់ព័ន្ធ អនុវត្តការងារដោយឈរលើអព្យាក្រឹតភាព ផ្ដល់យុត្តិធម៌ដល់ជនរងគ្រោះ ដើម្បីពង្រឹងការអនុវត្តច្បាប់កម្ពុជា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។