សមត្ថកិច្ចបញ្ជូនកញ្ញា សេង ធារី ត្រឡប់ទៅពន្ធនាគារព្រៃសវិញ កាលពីយប់ថ្ងៃទី១៣ ធ្នូ ក្រោយពេលបញ្ជូនកញ្ញាទៅមន្ទីរពេទ្យរុស្សីក្នុងរាជធានីភ្នំពេញអស់រយៈពេលជាង ១០ម៉ោង។ ទោះជាយ៉ាងណាក្ដី មន្ត្រីសង្គមស៊ីវិលនៅតែព្រួយបារម្ភពីសុខភាពរបស់កញ្ញាដោយខ្លាចមានបញ្ហាសុខភាពធ្ងន់ធ្ងរ ខណៈមេធាវីខ្មែរអាម៉េរិកាំងរូបនេះបន្តធ្វើកូដកម្មបង្អត់អាហារមិនទាន់ឈប់នៅឡើយ។
សុខភាពរបស់កញ្ញា សេង ធារី មិនទាន់បានប្រសើរឡើងវិញនៅឡើយទេ ដោយស្ថិតក្នុងការតាមដានពីគ្រូពេទ្យនៅពន្ធនាគារព្រៃសនៅឡើយ។
អគ្គនាយករង នៃអគ្គនាយកដ្ឋានពន្ធនាគារក្រសួងមហាផ្ទៃ លោក នុត សវនា ប្រាប់វិទ្យុអាស៊ីសេរីនៅថ្ងៃទី១៤ ធ្នូថា សមត្ថកិច្ចបានដឹកកញ្ញា សេង ធារី ត្រឡប់ទៅពន្ធនាគារព្រៃសវិញ នៅយប់ថ្ងៃទី១៣ ធ្នូ បន្ទាប់ពីគ្រូពេទ្យបានតាមដានសុខភាពរបស់កញ្ញារកឃើញថា សុខភាពគ្រាន់តែចុះខ្សោយជាងមុន ក៏ប៉ុន្តែមិនធ្ងន់ធ្ងរដល់អាយុជីវិតនោះទេ។ លោកបញ្ជាក់ថា រហូតមកដល់ពេលនេះកញ្ញា សេង ធារី នៅតែមិនព្រមហូបអាហារអ្វីទាំងអស់លើកលែងតែទឹក និងទឹកក្រូចឆ្មារប៉ុណ្ណោះ។
លោក នុត សវនា៖ «អាហារយើងដាក់ឱ្យគាត់អត់ហូបទេ យើងរៀបចំឱ្យគាត់ជាប្រចាំទេ។ ទេ... បើប៉ះពាល់ធ្ងន់ធ្ងរ ម៉េចពេទ្យគេឱ្យគាត់ចេញមកវិញ? សុខភាពគាត់ទូទៅវាគ្រាន់តែខ្សោយ ហើយយើងត្រៀមថ្នាំសង្កូវត្រៀមអី ដើម្បីសង្គ្រោះក្នុងហេតុការណ៍ណាមួយ អីចឹងបើគាត់ប្រឈមនឹងបញ្ហាធ្ងន់ធ្ងរ គេមិនឱ្យគាត់ចេញពីពេទ្យទេ»។
កញ្ញា សេង ធារី កំពុងធ្វើកូដកម្មអត់អាហាររយៈពេល ១០ថ្ងៃក្នុងពន្ធនាគារព្រៃស ចាប់ពីថ្ងៃទី៧ ដល់ថ្ងៃទី១៦ ធ្នូ ដើម្បីទាមទារឱ្យសាលាឧទ្ធរណ៍ភ្នំពេញផ្ដល់សេរីភាពដល់កញ្ញាវិញ ហើយរហូតមកដល់ពេលនេះមានរយៈពេល ៨ថ្ងៃហើយ ដោយកញ្ញាមិនទាន់ទទួលយកអាហារឡើងវិញនៅឡើយទេ។
វិទ្យុអាស៊ីសេរីមិនអាចទាក់ទងប្រធានមន្ទីរពេទ្យរុស្សី លោក ងី ម៉េង ដើម្បីសាកសួរបន្ថែមពីសុខភាពរបស់កញ្ញា សេង ធារី បានទេ នៅថ្ងៃទី១៤ ធ្នូ។
ជុំវិញរឿងនេះ ប្រធានសមាគមការពារសិទ្ធិមនុស្សអាដហុក (Adhoc) លោក នី សុខា មានប្រសាសន៍ថា បើទោះបីជាគ្រូពេទ្យអនុញ្ញាតឱ្យសមត្ថកិច្ចបញ្ជូនកញ្ញាត្រឡប់ទៅមន្ទីរឃុំឃាំងវិញក៏ដោយ ក៏លោកនៅតែព្រួយបារម្ភពីសុខភាពរបស់មេធាវីខ្មែរអាម៉េរិករូបនេះដដែល ព្រោះការបង្អត់អាហារច្រើនថ្ងៃបែបនេះ ប៉ះពាល់ដល់សុខភាពធ្ងន់ធ្ងរ។ លោកបន្ថែមថា តុលាការគួរតែដោះលែងកញ្ញាឱ្យមានសេរីភាពវិញតាមការស្នើសុំ។
លោក នី សុខា៖ «ពីព្រោះការបង្អត់អាហារនេះ វាធ្វើឱ្យប៉ះពាល់ដល់សុខភាពធ្ងន់ធ្ងរណាស់ អាចបារម្ភពីអាយុជីវិត ក៏ថាបាន ពីព្រោះថា ការបង្អត់អាហារវាធ្វើឱ្យមនុស្សបាក់កម្លាំង។ យើងឃើញហើយខាងនាយកដ្ឋានពន្ធនាគារបានបញ្ជាក់ហើយថា បើសិនមានបញ្ហាធ្ងន់អី គេអាចមានពេទ្យអីសង្គ្រោះអីចឹងមែន ប៉ុន្តែគ្រាន់តែថា បើសិនមានបញ្ហាឈឺធ្លាក់ខ្លួនធ្ងន់នេះ វាអាចនឹងប៉ះពាល់ដល់អាយុជីវិតដែរ។ អានេះជាការព្រួយបារម្ភរបស់យើងធំណាស់ ហើយបើសិនមានការប៉ះពាល់ដល់អាយុជីវិតទៀត អានោះកាន់តែជះឥទ្ធិពលមិនល្អខ្លាំងណាស់ ចំពោះប្រទេសយើង»។
សមត្ថកិច្ចក្រុងភ្នំពេញ បានចាប់ខ្លួនកញ្ញា សេង ធារី កាលពីថ្ងៃទី១៤ ខែមិថុនា ឆ្នាំ២០២២ នៅខាងមុខតុលាការក្រុងភ្នំពេញ ក្រោយតុលាការប្រកាសសាលក្រមកាត់ទោសកញ្ញាឱ្យជាប់ពន្ធនាគារ ៦ឆ្នាំ ដោយចោទពីបទ "រួមគំនិតក្បត់" ក្នុងសំណុំរឿងវិលចូលស្រុករបស់លោក សម រង្ស៊ី កាលពីឆ្នាំ២០១៩។
មេធាវីការពារក្ដីឱ្យកញ្ញា សេង ធារីបានប្ដឹងទាស់នឹងសម្រេចរបស់តុលាការថ្នាក់ក្រោមនេះទៅសាលាឧទ្ធរណ៍ភ្នំពេញ។ ប៉ុន្តែ កាលពីថ្ងៃទី១៣ ធ្នូ ប្រធានក្រុមប្រឹក្សាជំនុំជម្រះនៃតុលាការជាន់ខ្ពស់មួយនេះគឺលោក យ៉ុន ណារ៉ុង បានលើកពេលជំនុំជម្រះក្ដីលើសំណុំរឿងរបស់កញ្ញា សេង ធារី ទៅពេលក្រោយដោយគ្មានថ្ងៃកំណត់ ក្រោមហេតុថា ដោយសារសកម្មជនសិទ្ធិមនុស្ស និងជាអ្នកជំនាញវិទ្យាសាស្ត្រនយោបាយអន្តរជាតិរូបនេះ មានសុខភាពទ្រុឌទ្រោមមិនអាចជំនុំជម្រះបាន។
កាលពីពេលកន្លងទៅ សហគមន៍ជាតិ និងអន្តរជាតិចាត់ទុកការចាប់ខ្លួនកញ្ញា សេង ធារី ថា ជាការធ្វើទុក្ខបុកម្នេញផ្នែកនយោបាយ និងស្នើឱ្យតុលាការដោះលែងកញ្ញាឱ្យមានសេរីភាពវិញដោយឥតលក្ខខណ្ឌ។
មន្ត្រីសង្គមស៊ីវិលលើកឡើងថា ការបន្តឃុំខ្លួនកញ្ញា សេង ធារី នឹងមិនបានផ្ដល់ផលចំណេញអ្វីដល់សង្គមជាតិឡើយ។ ផ្ទុយទៅវិញ កាន់តែធ្វើឱ្យរដ្ឋាភិបាលរងភាពអាម៉ាស់ផ្នែកការរំលោភសិទ្ធិមនុស្សធ្ងន់ធ្ងរនៅលើឆាកអន្តរជាតិ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។