តំណាងរាស្ត្រ​ខ្មែរ-​អាមេរិកាំង​រង​ការ​រិះគន់​រឿង​មើល​រំលង​បញ្ហា​រំលោភ​សិទ្ធិមនុស្ស​និង​ភាព​ក្រីក្រ​នៅ​កម្ពុជា

0:00 / 0:00

ជនជាតិ​ខ្មែរ-​អាមេរិកាំង មួយ​រូប ដែល​ជា​មន្ត្រី​ជាប់​ឆ្នោត​នៅ​ទីក្រុង​ឡូវែល (Lowell) រដ្ឋ​ម៉ាសាឈូសេត (Massachusetts) រង​ការ​រិះគន់​យ៉ាង​ខ្លាំង​ពី​សំណាក់​ពលរដ្ឋ​ខ្មែរ​ដែល​រស់​នៅ​ក្រៅ​ប្រទេស ដោយសារ​ពួកគាត់​ចោទ​ថា លោក​មាន​ឈាមជ័រ​ជា​ខ្មែរ​ដែរ តែ​មិន​ចេះ​ជួយ​ឈឺឆ្អាល​រឿង​រំលោភ​សិទ្ធិមនុស្ស​នៅ​កម្ពុជា និង​ស្ថានភាព​លំបាក​របស់​ពលរដ្ឋ​ខ្មែរ​ដូច​គ្នា។ តំណាង​រដ្ឋាភិបាល​ចាត់​ទុក​ការ​រិះគន់​បែប​នេះ​ថា មក​ពី​ចាញ់​ឃោសនា​អកុសល​ដែល​ខុស​ពី​ការពិត​នៅ​កម្ពុជា សព្វថ្ងៃ។

មិន​ខុស​ពី​ទស្សនកិច្ច​កាល​ពី​ឆ្នាំ​២០១៤ ទេ លើក​នេះ​ពលរដ្ឋ​ខ្មែរ-​អាមេរិកាំង​ម្នាក់ គឺ​លោក ម៉ុម រ៉ាឌី ដែល​ជា​តំណាងរាស្ត្រ​នៅ​សង្កាត់​ទី​១៨ នៃ​ខណ្ឌ​មីតដលសិច (Middlesex) ក្នុង​ក្រុង​ឡូវែល នៃ​រដ្ឋ​ម៉ាសាឈូសេត បាន​ថ្លែង​តាម​ទូរទស្សន៍​ក្នុង​ស្រុក លើក​សរសើរ និង​ពេញចិត្ត​រដ្ឋាភិបាល​កម្ពុជា យ៉ាង​ខ្លាំង បន្ទាប់​ពី​លោក​ធ្វើ​ទស្សនកិច្ច​នៅ​កម្ពុជា កាល​ពី​ចុង​ខែ​មីនា៖ «សុំ​ជម្រាប​ត្រង់ អ្វី​ដែល​ខ្ញុំ​បាន​ឃើញ​តាំង​ពី​ឆ្នាំ​២០១៤ រហូត​មក​ដល់​ឥឡូវ​ហ្នឹង ដែល​ខ្ញុំ​បើក​បាន​ពីរ​ថ្ងៃ​ជាប់។ អស់​រយៈពេល​ពីរ​ថ្ងៃ​ហ្នឹង ខ្ញុំ​បាន​ដើរ​ប្រាំ​ខេត្ត ប៉ុន្តែ​គ្រាន់​តែ​បើក (ឡាន) ទេ! ខ្ញុំ​មើល​ឃើញ​រីកចម្រើន​មែន​ទែន។ ផ្លូវ​ល្អ សន្តិសុខ​ក៏​មាន​ទៀត។ ខ្ញុំ​ថា​អស្ចារ្យ​មែន! ខ្ញុំ​សប្បាយចិត្ត​ណាស់! ខ្ញុំ​ជឿ​ថា មាន​ការ​រីក​ចម្រើន»

ប៉ុន្តែ​ការ​អួត​សរសើរ​ស្ថានភាព​ប្រទេស​កម្ពុជា ដោយ​គ្រាន់តែ​ធ្វើ​ដំណើរ​មួយ​ត្រួស​តាម​រថយន្ត ដូច្នេះ​ត្រូវ​បាន​ប្រជាពលរដ្ឋ​ខ្មែរ-​អាមេរិកាំង​ដូច​គ្នា បង្ហាញ​ការ​ហួស​ចិត្ត និង​សោកស្ដាយ​ដែល​លោក ម៉ុម រ៉ាឌី មិន​បាន​យក​តួនាទី​ជា​តំណាងរាស្ត្រ​ខ្មែរ-​អាមេរិកាំង ដើម្បី​ពាំនាំ​នូវ​ក្ដី​កង្វល់​របស់​សហគមន៍​ខ្មែរ-​អាមេរិកាំង នៅ​ក្រៅ​ប្រទេស​ទៅ​ឲ្យ​រដ្ឋាភិបាល​កម្ពុជា ជួយ​ដោះស្រាយ។

អតីត​ក្រុមប្រឹក្សា​ក្រុង​ឡូវែល លោក នួន វាសនា លើក​ឡើង​ថា លោក ម៉ុម រ៉ាឌី មិន​មែន​មិន​ដឹង​ពី​ទុក្ខ កង្វល់​ទាំង​នេះ​នោះ​ទេ៖ «ប្អូន រ៉ាឌី ក៏​ប្អូន​បាន​ដឹង​ដែរ​នូវ​កង្វល់​ខ្វល់ខ្វាយ​ទាំង​នោះ។ ការ​ខ្វាយខ្វល់​ពី​រឿង​សិទ្ធិមនុស្ស ពាក់ព័ន្ធ​នឹង​រឿង​ព្រៃឈើ ដែល​កាប់​ខ្ទេចខ្ទី​ហ្នឹង ហើយ​ការ​វាយ​ដំ​សកម្មជន ធ្វើ​បាប​សកម្មជន​សិទ្ធិមនុស្ស​មួយ​ចំនួន ព្រមទាំង​វាយដំ​តំណាងរាស្ត្រ​គណបក្ស​ប្រឆាំង​ហ្នឹង។ ការ​ខ្វាយខ្វល់​ទាំង​អស់​ហ្នឹង​ហើយ​ដែល​ជា​ឱកាស​ប្អូន រ៉ាឌី ហ្នឹង ជួប​អ្នក​មុខ​អ្នក​ការ​នៅ​ក្រសួង​ការបរទេស​ហ្នឹង សួរ​នាំ​នូវ​កិច្ចការ​ហ្នឹង»

លោក នួន វាសនា ឆ្ងល់​មិន​ដឹង​ថា លោក ម៉ុម រ៉ាឌី យក​អ្វី​ជា​សម្អាង​ដែល​ហ៊ាន​អះអាង​ថា ស្រុក​ខ្មែរ​មាន​សន្តិសុខ និង​អភិវឌ្ឍ​អស្ចារ្យ « អស្ចារ្យ​ត្រង់​ណា ? បើ​យើង​មើល​របាយការណ៍​របស់​សហរដ្ឋ​អាមេរិក របាយការណ៍​របស់​អង្គការ​សហព័ន្ធ​អន្តរជាតិ​ស្ដីពី​សិទ្ធិ​មនុស្ស ហើយ​និង​អង្គការ​មួយ​ចំនួន​ទៀត ហើយ​គេ​ចុះ​ទៅ​ហ្នឹង​អត់​មាន​ចុះ​ទៅ​មួយ​អាទិត្យ​ពីរ​អាទិត្យ​ទេ ! ក្នុង​ការ​ស្រាវជ្រាវ​របស់​គេ​ហ្នឹង គេ​នៅ​ប្រចាំ​ស្រុក​យើង​ហ្នឹង​រាប់​ឆ្នាំ។ គេ​និយាយ​ថា តាំង​ពី​ដប់ប្រាំ​ឆ្នាំ​កន្លង មួយ​រយៈពេល​ដប់ប្រាំ​ឆ្នាំ​ហ្នឹង ប្រជាពលរដ្ឋ​ខ្មែរ ៨៣០ . ០០០​នាក់​ដែល​ទទួល​រងគ្រោះ​ដោយសារ​ការ​រឹប​អូស​ដីធ្លី។ល។ និង ។ល។ ធ្វើ​ឲ្យ​ពួក​គាត់​ហ្នឹង​ក្រ​កាន់​តែ​ក្រ ធ្វើ​ឲ្យ​សង្គម​ហ្នឹង​ខ្វះ​ស្ថិរភាព »

ការ​មិន​ពេញចិត្ត​នឹង​ឥរិយាបថ​របស់​លោក ម៉ុម រ៉ាឌី នេះ​បាន​រាលដាល​ដល់​សហគមន៍​ខ្មែរ​នៅ​ប្រទេស​អូស្ត្រាលី ផង​ដែរ។ ពលរដ្ឋ​ខ្មែរ-​អូស្ត្រាលី និង​ជា​តំណាងរាស្ត្រ​នៅ​ក្នុង​រដ្ឋ​វ៉ិកតូរីយ៉ា ប្រទេស​អូស្ត្រាលី លោក ហុង លីម ចាត់​ទុក​លោក ម៉ុម រ៉ាឌី ថា​ជា​តំណាងរាស្ត្រ​ដែល​ជាប់​ខ្សែ​ខាង​គណបក្ស​ប្រជាជន និង​ធ្វើ​ឲ្យ​អ្នក​ដែល​បាន​បោះឆ្នោត​ឲ្យ​គាត់​អស់សង្ឃឹម ព្រោះ​ធ្វើ​ក្បត់​តួនាទី​ក្នុង​នាម​ជា​អ្នកតំណាង​ក្នុង​គណបក្ស​ប្រជាធិបតេយ្យ ដែល​ត្រូវ​យក​ចិត្ត​ទុក​ដាក់​ពី​សុខុមាលភាព​របស់​ប្រជាពលរដ្ឋ​ក្នុង​សហគមន៍​របស់​ខ្លួន « គាត់​ដើរ​តាម​សែស្រឡាយ​របស់​គេ​ហ្នឹង។ បាន​សេចក្តី​ថា ជា​សំណូក​របស់​គេ ឬ​ការ​ស្អី​ដែល​គេ​ផ្ចង់​ផ្ដើម​ឲ្យ​គាត់​ហ្នឹង រហូត​បាន​ដល់​កម្រិត​មួយ​ដែល​ថា​គាត់​ហ៊ាន​លះបង់​កិត្តិយស លះបង់​ស្អីៗ​ទាំងអស់​ដែល​ជា​តំណាង​ពិសេស ដែល​គាត់​ចេញ​មក​ពី​គណបក្ស​ប្រជាធិបតេយ្យ ហើយ​គាត់​សុខ​ចិត្ត​លក់​ចោល​អស់​ហ្នឹង។ គឺ​ជា​ការ​ទី​មួយ​គួរ​ឲ្យ​ខ្មាស​អៀន។ ទី​ពីរ គឺ​ជា​ការ​ទះ​កំផ្លៀង​របស់​ខ្មែរ​យើង​ទាំង​នៅ​ក្នុង​ស្រុក​អាមេរិក​ហ្នឹង​ផង ហើយ​ជា​ការ​ប្រមាថ​មើលងាយ​បង​ប្អូន​ខ្មែរ​ដែល​កំពុង​តែ​វេទនា និង​ទទួល​រង​ភាព​អយុត្តិធម៌​ក្នុង​ស្រុក​យើង​ទាំងមូល​ខ្លាំង​ណាស់ »

តប​ទៅ​នឹង​ការ​លើក​ឡើង​បែប​នេះ លោក ម៉ុម រ៉ាឌី បាន​អះអាង​ថា ការ​លើក​សរសើរ​រដ្ឋាភិបាល​កម្ពុជា នេះ គឺ​ផ្អែក​លើ​ការ​មើល​ឃើញ​ផ្ទាល់​ភ្នែក​របស់​គាត់ និង​ថា​ដំណើរ​ទស្សនកិច្ច​លើក​នេះ គឺ​តប​តាម​ការ​អញ្ជើញ​របស់​ឯកអគ្គរដ្ឋទូត​សហរដ្ឋអាមេរិក​ប្រចាំ​កម្ពុជា លោក វីល្លៀម ហៃដ្ដ៍ (William A. Heidt) ដើម្បី​ចូលរួម​ក្នុង​កម្មវិធី​អន្តរ​វប្បធម៌ អំពី​បទពិសោធន៍​របស់​ពលរដ្ឋ​ខ្មែរ-​អាមេរិកាំង និង​ផ្សារភ្ជាប់​ទំនាក់ទំនង​ល្អ​រវាង​ប្រទេស​ទាំង​ពីរ។

លោក ម៉ុម រ៉ាឌី បញ្ជាក់​ថា ជំនួប​លើក​នេះ គឺ​ជួយ​ឲ្យ​គាត់​លើក​ពី​បញ្ហា​ចង់​ជួយ​ពង្រឹង​វិស័យ​កីឡា​បាល់បោះ (Basketball) នៅ​កម្ពុជា។ លោក​បញ្ជាក់​ថា លោក​មិន​បម្រើ​ឲ្យ​បក្ស​នយោបាយ​ណា​មួយ​នៅ​កម្ពុជា នោះ​ទេ « ខ្ញុំ​អត់​មាន​ទៅ​លើក​គណបក្ស​ណា​មួយ​ទេ។ ហេតុ​អ្វី​ខ្ញុំ​និយាយ​អ៊ីចឹង ? ព្រោះ​ខ្ញុំ​ជា​តំណាងរាស្ត្រ​នៅ​សហរដ្ឋ​អាមេរិក អត់​មាន​នៅ​ប្រទេស​កម្ពុជា នោះ​ទេ »

ពាក់ព័ន្ធ​នឹង​ការ​មិន​ឈឺ​ឆ្អាល​រឿង​សិទ្ធិមនុស្ស និង​អ្នក​ជាប់​ឃុំ លោក ម៉ុម រ៉ាឌី លើក​ឡើង​ថា លោក​មាន​ពេល​វេលា​គ្រប់គ្រាន់​នឹង​ធ្វើ​រឿង​នេះ​ទេ និង​ក្ដាប់​បញ្ហា​ស្រុក​ខ្មែរ​មិន​ជុំ​ទេ។ ម្យ៉ាង​ទៀត​កិច្ចការ​នេះ​ស្ថិត​ក្រៅ​ដែន​សមត្ថកិច្ច​នៃ​ការងារ​របស់​គាត់ និង​គ្មាន​នរណា​ទាក់ទង​គាត់​ឲ្យ​ទៅ​សួរ​សុខទុក្ខ​អ្នក​ជាប់​ឃុំ​ទាំង​នោះ​ផង « អ៊ីចឹង​ពេលវេលា​ខ្ញុំ​ត្រូវ​ច្រៀក រួច​ពី​នោះ​គឺ​ខ្ញុំ​អត់​មាន​ពេល ហើយ​អ្វី​ដែល​កើត​ឡើង​ក្នុង​ស្រុក​ប្រទេស​ជាតិ​យើង ខ្ញុំ​សុំ​ទោស។ ខ្ញុំ​អត់​បាន​ទៅ ថា​ដឹង​នយោបាយ​យ៉ាង​ណា​ទេ ពីព្រោះ​ទី​មួយ អា​ហ្នឹង​មិន​មែន​កិច្ចការ​របស់​ខ្ញុំ និយាយ​ឲ្យ​ខ្លី​ទៅ​ណា៎

ទោះ​ជា​យ៉ាង​ណា អ្នក​នាំ​ពាក្យ​គណបក្ស​ប្រជាជន​កម្ពុជា លោក សុខ ឥសាន ចាត់​ទុក​ការ​មិន​ទៅ​សួរ​សុខ​ទុក្ខ​អ្នក​ទោស​ដែល​ជា​សកម្មជន​គណបក្ស​ប្រឆាំង និង​សកម្មជន​ដីធ្លី​ទាំង​នោះ ថា​ជា​ការ​​ត្រឹមត្រូវ និង​ចេះ​ច្បាប់ « អស់​លោក​មួយ​ចំនួន​ដែល​កំពុង​ជាប់​ឃុំឃាំង​នេះ ដោយសារ​ថា​អស់​លោក​ទាំងអស់​នោះ​ខុស​ច្បាប់ មិន​មែន​គេ​ចាប់​ដោយសារ​គាត់​អត់​មាន​ប្រព្រឹត្ត​ល្មើស​ច្បាប់​អី ហើយ​គេ​ទៅ​ចាប់​ពួក​គាត់​ទៅ​ឃុំឃាំង​គាត់​សុខៗ​នោះ​ទេ។ អា​ហ្នឹង​គឺ​ជា​ការ​ទទួល​ខុស​ត្រូវ​របស់​គាត់ ក្នុង​ទង្វើ​ដែល​ពួក​គាត់​បាន​ប្រព្រឹត្ត​ល្មើស​ច្បាប់។ គាត់​ជា​អ្នក​អនុវត្ត​ច្បាប់។ ដូច្នេះ លោក ម៉ុម រ៉ាឌី មិន​ទៅ​សួរ​សុខ​ទុក្ខ​ពួក​គាត់ គឺ​ជា​ការ​ត្រឹមត្រូវ​ហើយ »

លោក សុខ ឥសាន យល់​ថា ការ​រិះគន់​របស់​ពលរដ្ឋ​ខ្មែរ​នៅ​ក្រៅ​ប្រទេស​គឺ​មិន​មែន​មាន​ចេតនា​សំដៅ​លើ​លោក ម៉ុម រ៉ាឌី ទេ ប៉ុន្តែ​ចង់​វាយ​ប្រហារ​លើ​រដ្ឋាភិបាល​កម្ពុជា ឯ​ណោះ​ទេ។ លោក សុខ ឥសាន អះអាង​ថា ទាល់​តែ​អ្នក​ក្រៅ​ស្រុក​មក​លេង​ស្រុក​ខ្មែរ​ផ្ទាល់ ដូច​លោក ម៉ុម រ៉ាឌី ទើប​ដឹង​ការពិត​អំពី​ការ​អភិវឌ្ឍ​ពិត​ប្រាកដ « អស់​លោក​នៅ​ខាង​ក្រៅ ដែល​ថ្នាំងថ្នាក់​នោះ គឺ​គាត់​មិន​មែន​ថ្នាំងថ្នាក់​ជាមួយ​លោក ម៉ុម រ៉ាឌី ហ្នឹង​ទេ។ គាត់​ថ្នាំងថ្នាក់​ជាមួយ​រដ្ឋាភិបាល​កម្ពុជា នៅ​ភ្នំពេញ​ឯណេះ​ទេ។ ក៏ប៉ុន្តែ​ឲ្យ​តែ​នរណា​និយាយ​កាន់​ជើង និយាយ​គាំទ្រ និយាយ​ការពិត អា​ហ្នឹង​គាត់​ខឹង​ដល់​អ្នក​នោះ​ហើយ »

កាល​ពី​ឆ្នាំ​២០១៥ អភិបាល​ក្រុង​ឡូវែល ដែល​ជា​​ជនជាតិ​អាមេរិកាំង លោក រ៉ដនី អ៊ីលៀត (Rodney Elliot) ក៏​បាន​ធ្វើ​ទស្សនកិច្ច​ទៅ​ប្រទេស​កម្ពុជា និង​បាន​ជួប​មន្ត្រី​ជាន់​ខ្ពស់​ក្នុង​ជួរ​រដ្ឋាភិបាល ព្រមទាំង​បាន​ទៅ​សួរ​សុខ​ទុក្ខ​អ្នក​ជាប់​ឃុំ រួម​មាន​សកម្មជន​គណបក្ស​ប្រឆាំង និង​សកម្មជន​ដីធ្លី​ផង​ដែរ។

លោក រ៉ដនី ថែម​ទាំង​បាន​សរសេរ​លិខិត​ស្នើ​សុំ​អន្តរាគមន៍​ឲ្យ​រដ្ឋាភិបាល​កម្ពុជា ដោះលែង​អ្នក​ជាប់​ឃុំ​ទាំង​នោះ​ឲ្យ​មាន​សេរីភាព​ឡើង​វិញ ដោយ​លោក​ចាត់​ទុក​ថា ពួកគាត់​ជាប់​ឃុំឃាំង​ដោយសារ​ការ​អនុវត្ត​សិទ្ធិ​ក្នុង​ការ​បញ្ចេញ​មតិ។ លោក រ៉ដនី ទទួល​រង​ការ​ស្ដីបន្ទោស​ពី​មន្ត្រី​រដ្ឋាភិបាល​កម្ពុជា ផង​ដែរ ដែល​ហ៊ាន​សរសេរ​លិខិត​ស្នើ​ឲ្យ​មាន​ការ​ដោះលែង​នេះ។ ថ្មីៗ​នេះ លោក​ក៏​បាន​ទៅ​លេង​ប្រទេស​កម្ពុជា ៩​ថ្ងៃ និង​បាន​ចុះ​សួរ​សុខទុក្ខ​ពលរដ្ឋ​ខ្មែរ​តាម​ជនបទ។

លោក​នៅ​ប្រកាន់​ជំហរ​ថា ប្រទេស​កម្ពុជា នៅ​តែ​មាន​ការ​រឹតត្បិត​សិទ្ធិ​សេរីភាព​ក្នុង​ការ​បញ្ចេញ​មតិ និង​ពលរដ្ឋ​ខ្មែរ​ទូទៅ​នៅ​តែ​មាន​ភាព​ក្រីក្រ​ក្នុង​ជីវភាព « ទ្រព្យ​ធន​ក្នុង​ប្រទេស​កម្ពុជា ស្ថិត​ក្នុង​កណ្ដាប់ដៃ​របស់​អ្នក​មាន និង​មន្ត្រី​បក្ស​កាន់​អំណាច​មួយ​ក្តាប់​តូច។ រដ្ឋាភិបាល​កម្ពុជា មិន​បាន​យក​ចិត្ត​ទុក​ដាក់​ផ្តល់​សេវា​សាធារណៈ​ដែល​ចាំបាច់​សម្រាប់​ជីវភាព​ប្រចាំ​ថ្ងៃ​ឲ្យ​បាន​សមស្រប និង​មិន​បាន​ជួយ​គិតគូរ​ការ​អភិវឌ្ឍ​សេដ្ឋកិច្ច និង​ការ​រក​ការងារ​ធ្វើ​ដល់​ពលរដ្ឋ​ខ្មែរ​ទូទៅ​ឲ្យ​បាន​ត្រឹមត្រូវ​នោះ​ទេ »

ពលរដ្ឋ​ខ្មែរ​ក្រុង​ឡូវែល គ្រោង​កោះ​ហៅ​លោក ម៉ុម រ៉ាឌី ដើម្បី​បំភ្លឺ​ជា​សាធារណៈ​ជុំវិញ​ជំហរ​គាំទ្រ​រដ្ឋាភិបាល​កម្ពុជា។ លោក កៃ ខេមរា ជា​ពលរដ្ឋ​ខ្មែរ-​អាមេរិកាំង នៅ​ទីក្រុង​ឡូវែល បញ្ជាក់​ថា ពលរដ្ឋ​ខ្មែរ​នៅ​ក្រុង​ឡូវែល និង​រូប​លោក​ចង់​ដឹង​អំពី​គោលបំណង​ពិត​ដែល​លោក ម៉ុម រ៉ាឌី ទៅ​ស្រុក​ខ្មែរ « បង​ប្អូន​យើង​នៅ​ក្នុង​ទីក្រុង​ឡូវែល ហ្នឹង ចង់​ឲ្យ​លោក រ៉ាឌី ម៉ុម នេះ​ជា​តំណាង​សង្កាត់​ទី​១៨ នៅ​ក្នុង​ទីក្រុង​ឡូវែល ហ្នឹង បើក​អង្គ​ប្រជុំ​មួយ​ដើម្បី​ឲ្យ​បង​ប្អូន​យើង​ហ្នឹង​ទៅ​ស្តាប់​គាត់។ តើ​គាត់​បាន​អញ្ជើញ​ទៅ​ស្រុក​ខ្មែរ​ហ្នឹង​ជា​ឋានៈ​អ្វី​ខ្លះ ? តើ​មាន​ផល​អ្វី​ខ្លះ ? រឿង​អ្វីៗ​ខ្លះ ? ដើម្បី​ឲ្យ​គាត់​ឆ្លើយ​សំណួរ​នឹង​បង​ប្អូន​យើង »

លោក ម៉ុម រ៉ាឌី ជា​ពលរដ្ឋ​ខ្មែរ-​អាមេរិកាំង ដំបូង​គេ​ដែល​ជាប់​ឆ្នោត​អាណត្តិ​ទី​២ ជា​តំណាង​ពលរដ្ឋ​ក្នុង​សង្កាត់​ទី​១៨ នៅ​រដ្ឋ​ម៉ាសាឈូសេត។ សង្កាត់​ទី​១៨ មាន​ប្រជាជន​ជិត ៤​ម៉ឺន​នាក់ (៣៩.៦២៧) ក្នុង​នោះ​មាន​ខ្មែរ​ជិត​បួន​ពាន់​នាក់ (៣.៦៨៨​នាក់) ជា​សង្កាត់​មួយ​ក្នុង​ចំណោម​សង្កាត់ ៣៧ ក្នុង​ខណ្ឌ​មីតដលសិច៕

កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖

ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។