រដ្ឋសភានឹងបើកិច្ចប្រជុំនៅថ្ងៃសុក្រ ទី៨ ខែវិច្ឆិកា ខាងមុខនេះ ដើម្បីពិភាក្សាសេចក្ដីព្រាងច្បាប់ស្ដីពីការអនុម័តលុបចោលកិច្ចព្រមព្រៀងស្ដីពីការជំរុញ និងសម្រួលពាណិជ្ជកម្មតំបន់ត្រីកោណអភិវឌ្ឍន៍ កម្ពុជា ឡាវ វៀតណាម ឬហៅកាត់ថា CLV-DTA នៅថ្ងៃទី៨ វិច្ឆិកា។
សម័យប្រជុំរដ្ឋសភាលើកទី៣ នីតិកាលទី៧ នៅថ្ងៃទី៨ ខែវិច្ឆិកា និងចាប់ផ្ដើមពីម៉ោង ៨ព្រឹក ហើយដឹកនាំដោយប្រធានព្រឹទ្ធសភា អ្នកស្រី ឃួន សុដារី ។
រដ្ឋសភាសម្រេចបើកកិច្ចប្រជុំពិភាក្សាបញ្ចប់កិច្ចព្រមព្រៀងCLV-DTA នេះ ធ្វើឡើងបន្ទាប់ពីមានចលនាធ្វើបាតុកម្មតវ៉ាជាបន្តបន្ទាប់របស់ពលរដ្ឋខ្មែរនៅក្រៅប្រទេស ជុំវិញពិភពលោក ទាមទារឱ្យរដ្ឋាភិបាល លោក ហ៊ុន ម៉ាណែត ឱ្យបញ្ចប់គម្រោង CLV-DTA ជាផ្លូវការ និងមានការអនុម័តសម្រេចពីរដ្ឋសភា គឺមិនមែនគ្រាន់តែមានការអះអាងត្រឹមពាក្យសម្ដីរបស់ឪពុកនាយករដ្ឋមន្ត្រី និងជាប្រធានព្រឹទ្ធសភា លោក ហ៊ុន សែន ទេ។ ក្រុមបាតុករក៏ទាមទារឱ្យរដ្ឋាភិបាលដោះលែងសកម្មជនសង្គម នយោបាយ និងបរិស្ថាន ដែលត្រូវអាជ្ញាធរចាប់ដាក់ពន្ធនាគារទាំងគ្មានកំហុស។
ការទាមទារនេះធ្វើឡើងបន្ទាប់ពីលោក ហ៊ុន សែន បានចេញមុខប្រកាសថា កម្ពុជាបញ្ចប់ការចូលរួម ក្នុងកិច្ចសហប្រតិបត្តិការតំបន់ត្រីកោណអភិវឌ្ឍន៍ CLV-DTA ចាប់ពីថ្ងៃទី២០ ខែកញ្ញា ឆ្នាំ២០២៤។ ជាមួយគ្នានោះ មន្ត្រីរដ្ឋាភិបាលទាំងឡាយ ក៏ចេញមកបន្ទរថា ការបញ្ចប់គម្រោង CLV-DTA នេះ មិនចាំបាច់ឆ្លងកាត់យន្តការរដ្ឋសភា។
បើទោះជាបែបណាក្ដី ក្រុមខ្មែរនៅក្រៅប្រទេសអះអាងថា ពួកគាត់នឹងបន្តការតវ៉ាតទៅទៀត ដើម្បីឱ្យរដ្ឋាភិបាលគោរពកិច្ចព្រមព្រៀងសន្តិភាពទីក្រុងប៉ារីស ដែលជាបទដ្ឋានអន្តរជាតិ ដែលអាចឱ្យរដ្ឋាភិបាលកម្ពុជាសើរើបញ្ហាជាច្រើន ពាក់ព័ន្ធនឹងអធិបតេយ្យកម្ពុជាជាមួយប្រទេសជិតខាង៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។