ក្រសួងការបរទេសកម្ពុជា បញ្ជាក់ជំហរចូលរួមជាមួយប្រទេសជាសមាជិកអាស៊ានផ្សេងទៀត ដើម្បីចូលរួមជួយឲ្យប្រទេសភូមា ឬមីយ៉ាន់ម៉ា(Myanmar) វិលទៅរកភាពប្រក្រតីឡើងវិញ ទោះជាតាមរយៈតួនាទី និងទម្រង់ណាមួយកី្ត ដែលស្របតាមគោលការណ៍អាស៊ាន។ នេះបើតាមសេចក្តីថ្លែងការណ៍របស់អ្នកនាំពាក្យក្រសួង ការបរទេស ចុះថ្ងៃទៅ៩ ខែមីនា។
ក្រសួងការបរទេសកម្ពុជា អះអាងថា កម្ពុជា មិនខុសពីរដ្ឋជាសមាជិកអាស៊ានផ្សេងទៀតនោះទេ គឺកំពុងតាមដានយ៉ាងជិតដិននៅស្ថានការណ៍ក្នុងប្រទេស មីយ៉ាន់ម៉ា និង សោកសៅដោយបានឃើញការកើនឡើងនូវអំពើហិង្សាដែលបានបណ្តាលឲ្យមានការបាត់បង់ជីវិតមនុស្ស។
ការបញ្ជាក់ជំហររបស់ក្រសួងការបរទេសនៅពេលនេះ គឺផ្ទុយស្រឡះពីការប្រកាសរបស់លោកនាយករដ្ឋមន្ត្រី ហ៊ុន សែន កន្លងមក ដែលចាត់ទុកថា រដ្ឋប្រហារ នៅមី យ៉ាន់ម៉ា គឺជាបញ្ហាផ្ទៃក្នុងហើយកម្ពុជាមិនធ្វើអត្ថាធិប្បាយលើកិច្ចការផ្ទៃក្នុងរបស់ប្រទេសណាទាំងអស់ ៕