ក្រុមយុវជនខ្មែរនៅប្រទេសកូរ៉េខាងត្បូង (South Korea ) និងជប៉ុន (Japan) នៅថ្ងៃទី២០ សីហា ប្រមូលផ្តុំគ្នាធ្វើបាតុកម្មប្រឆាំងការផ្ទេរអំណាចខុសច្បាប់របស់គ្រួសារ លោក ហ៊ុន សែន ដែលពួកគាត់អះអាងថា ជាការដឹកនាំប្រទេសឆ្ពោះទៅរបបផ្ដាច់ការ និងធ្វើឱ្យអន្តរាយដល់ប្រទេសជាតិ។
យុវជនខ្មែរភាពច្រើនជាពលករធ្វើនៅប្រទេសកូរ៉េខាងត្បូង និងជប៉ុនប្រមាណជិត ១ពាន់ (៩៥០) នាំគ្នាធ្វើបាតុកម្មមិនទទួលស្គាល់ លោក ហ៊ុន ម៉ាណែត ធ្វើជានាយករដ្ឋមន្ត្រីថ្មី។ ក្រុមបាតុករអំពាវនាវដល់ប្រទេសជាម្ចាស់ហត្ថលេខីនៃកិច្ចព្រមព្រៀងសន្តិភាពទីក្រុងប៉ារីស ឱ្យពិនិត្យឡើងវិញនូវទង្វើផ្ទុយពីលទ្ធិប្រជាធិបតេយ្យនៅកម្ពុជា និងដាក់ទណ្ឌកម្មលើការផ្ទេរអំណាចដឹកនាំប្រទេសតពូជ។
ពលរដ្ឋខ្មែររស់នៅប្រទេសកូរ៉េខាងត្បូង លោក ឃ្លោក លាភ ប្រាប់វិទ្យុអាស៊ីសេរី នៅថ្ងៃទី២០ សីហា ថា លោកចំណាយពេលជិះរថភ្លើង ២ម៉ោងដើម្បីមកធ្វើបាតុកម្មនេះដោយសារ លោកឈឺចាប់នៅពេលឃើញពលរដ្ឋខ្មែររងទុក្ខវេទនាក្រោមការដឹកនាំរបស់លោក ហ៊ុន សែន។ លោកបន្តថា លោក ហ៊ុន សែន ជាមេដឹកនាំដែលគិតតែពីគ្រួសារនិយម មិនខ្វាយខ្វល់ពីសុខទុក្ខរបស់ប្រជាពលរដ្ឋ បើទោះបីជា ការផ្ទេរអំណាចពីឪពុកទៅកូននេះធ្វើឱ្យកម្ពុជារងទណ្ឌកម្មសេដ្ឋកិច្ចធ្ងន់ធ្ងរក៏ដោយ។
លោកឃ្លោក លាភ៖ «ពីព្រោះពួកយើងធ្វើដើម្បីទាមទារឱ្យអន្តរជាតិជួយកម្ពុជាផង ព្រោះកម្ពុជាយើងឃើញហើយទណ្ឌកម្មធ្លាក់មកជាបន្តបន្ទាប់ សេដ្ឋកិច្ចចាប់ផ្ដើមធ្លាក់ចុះដាំក្បាលចុះវិស័យអចលនទ្រព្យចាប់ផ្ដើមលក់លេងដាច់ ហើយប្រជាពលរដ្ឋចាប់ផ្ដើមរងគ្រោះ ខ្ញុំធ្វើនេះមិនមែនធ្វើដើម្បីខ្ញុំនៅកូរ៉េនេះទេ ខ្ញុំនៅកូរ៉េប្រាក់ខែសមរម្យខ្ញុំអាចរស់បានហើយ អ៊ីចឹងខ្ញុំមើលឃើញប្រជាពលរដ្ឋដែលរងផលប៉ះពាល់អត់លុយបង់ធនាគារដោយសារតែការបោះឆ្នោតបង្គ្រប់កិច្ចហ្នឹងអន្តរជាតិគេដាក់ទណ្ឌកម្ម»។
ក្រុមបាតុករប្រមាណ ៧០០នាក់បានប្រមូលផ្ដុំនៅទីលានជុងកាក់ (Jonggak) ក្នុងទីក្រុងសេអ៊ូល (Seoul) ដើម្បីសម្ដែងមតិអំពីការមិនគាំទ្រលោក ហ៊ុន ម៉ាណែត ជានាយករដ្ឋមន្ត្រីថ្មី អ្នកខ្លះកាន់បដា និងលើកឡើងពីការឈឺចាប់ ការរឹតត្បិតសិទ្ធិសេរីភាព ការធ្វើទុក្ខបុកម្នេញលើសកម្មជនសិទ្ធិ សកម្មជននយោបាយ តាមរយៈការកាន់អំណាចតពូជដែលយកស្ថាប័នតុលាការជាឧបករណ៍ធ្វើបាបពលរដ្ឋ។ នៅថ្ងៃទី២១ សីហា ក្រុមបាតុករនឹងដាក់ញត្តិ ទៅក្រសួងការបរទេសកូរ៉េ និងស្ថានទូតជាម្ចាស់ហត្ថលេខីនៃកិច្ចព្រមព្រៀងសន្តិភាពទីក្រុងប៉ារីសចំនួន១៩ប្រទេសដើម្បីស្នើសុំកិច្ចអន្តរាគមន៍ជំរុញឱ្យរដ្ឋាភិបាលឯកបក្យ គោរពសិទ្ធិមនុស្ស និងបើកលំហសិទ្ធិនយោបាយឡើងវិញ។
ក្រៅពីពលរដ្ឋខ្មែរនៅប្រទេសកូរ៉េខាងត្បូង ក្រុមយុវជនខ្មែរនៅប្រទេសជប៉ុន ប្រមាណជាង២០០នាក់ (២៥០) ក៏ធ្វើបាតុកម្មនៅថ្ងៃនេះដែរ ក្នុងបរិវេណសួន អូអិណុ (Ueno) ទីក្រុងតូក្យូ (Tokyo) ប្រឆាំងនឹងការផ្ទេរអំណាចតពូជរបស់គ្រួសារ លោក ហ៊ុន សែន ដែលប្រាសចាកពីរដ្ឋធម្មនុញ្ញ។
ពលរដ្ឋខ្មែរនៅជប៉ុន លោក ខ្លូត វីរៈ ថ្លែងថា ការផ្ទេរអំណាចពីឪពុកទៅកូនរបស់ក្រុមគ្រួសារ លោក ហ៊ុន សែន គឺជាការបំពានរដ្ឋធម្មនុញ្ញ។ លោក ខ្លូត វីរៈ ប្រៀបប្រដូចការផ្ទេរអំណាចរបស់លោក ហ៊ុន សែន នេះ គឺដូចទៅនឹងរបបផ្ដាច់ការប្រទេសកូរ៉េខាងជើងដែលពលរដ្ឋគ្មានសិទ្ធិសម្រេចលើវាសនារបស់ខ្លួន។
លោក ខ្លូត វីរៈ៖ «ក្នុងថ្ងៃនេះខ្ញុំផ្ញើសារនេះទៅរបប ហ៊ុន សែន ក៏ដូចជារដ្ឋាភិបាលក្រុងភ្នំពេញសូមឱ្យងាកមកស្ដារប្រជាធិបតេយ្យឡើងវិញ ខ្ញុំមិនចង់ឱ្យពួកគាត់នៅបន្តតដំណែងតកូនតចៅបែបនេះទៀតទេប្រជាពលរដ្ឋខ្មែរនៅប្រទេសជប៉ុននេះ ហើយក៏ដូចជាពលរដ្ឋទូទៅនៅក្រៅប្រទេសអត់ពេញសប្បាយចិត្តទេ នឹងរបបបន្តត្រកូលហ្នឹងទេ សូមឱ្យគាត់វិលមកប្រជាធិបតេយ្យវិញ» ។
ស្រដៀងគ្នានេះដែរ ពលរដ្ឋខ្មែររស់នៅជប៉ុនម្នាក់ទៀត គឺ លោក សោម សុជាតិ លើកឡើងថា លោកមិនទទួលយកការបោះឆ្នោតបង្គ្រប់កិច្ច និងតែងតាំងលោក ហ៊ុន ម៉ាណែត ជានាយករដ្ឋមន្ត្រីថ្មីនោះទេ ពីព្រោះជាការរំលោភសិទ្ធិពលរដ្ឋម្ចាស់ឆ្នោត។ លោកព្រួយបារម្ភថា ពលរដ្ឋខ្មែរនឹងរស់នៅក្រោមការបំបិទសេរីភាព និងការរំលោភសិទ្ធិកាន់តែធ្ងន់ធ្ងរ។
លោក សោម សុជាតិ៖ «តាមពិតយើងក្នុងនាមជាពលរដ្ឋក្នុងនាមជាម្ចាស់ឆ្នោតហើយក្នុងនាមជាម្ចាស់ប្រទេសគឺពួកយើងមានការមិនសប្បាយចិត្តនិងខឹងសម្បារ ចំពោះការបោះឆ្នោតនៅក្នុងឆ្នាំ២០២៣ នេះយើងខ្ញុំទាំងអស់គ្នាជាប្រជាពលរដ្ឋខ្មែរមិនទទួលស្គាល់ការបោះឆ្នោត២០២៣នេះទេគឺបោះឆ្នោតផ្ទេរអំណាចពីឪពុកទៅកូនតែប៉ុណ្ណោះ ហើយទាំងអស់គ្នាគឺជាប្រជាពលរដ្ឋអ្នកស្រលាញ់ប្រជាធិបតេយ្យយើងមិនទទួលការបោះឆ្នោត ហើយរដ្ឋាភិបាលកើតចេញពីការបោះឆ្នោតក្លែងក្លាយនេះទេ» ។
បាតុកម្មនេះមានការចូលរួមឃ្លាំមើលពីសំណាក់អាជ្ញាធរជប៉ុន មន្ត្រីអង្គការសិទ្ធិមនុស្ស អ្នកកាសែត និងកងសន្តិសុខដើម្បីការពារសុវត្ថិភាពដល់ក្រុមបាតុករ។ ក្រុមបាតុករអះអាងថា សមាជិកគណបក្សកាន់អំណាចមួយចំនួនបានបំភិតបំភ័យពលរដ្ឋខ្មែរដែលគ្មានទិដ្ឋាការឆ្លងដែននឹងមិនអាចរស់នៅប្រទេសជប៉ុនបាននោះទេ ប្រសិនបើពួកគេចូលរួមធ្វើបាតុកម្មប្រឆាំងរដ្ឋាភិបាលកម្ពុជានោះ។
មិនខុសគ្នានេះដែរ សហគមន៍ខ្មែរនៅសហរដ្ឋអាមេរិកក៏ធ្វើបាតុកម្មនៅថ្ងៃដដែលនេះក្នុងទីក្រុងឡូវែល (Lowell) រដ្ឋម៉ាស្សាឈូសែត (Massachusetts) នៅ២ម៉ោងរសៀល ដើម្បីរួមគ្នាក្រោកឈរប្រឆាំងការផ្ទេរអំណាចដឹកនាំប្រទេសតពូជ និងប្រឆាំងអំពើអយុត្តិធម៌នៅក្នុងសង្គម។
ឆ្លើយតបបញ្ហានេះអ្នកនាំពាក្យគណបក្សប្រជាជនកម្ពុជា លោក សុខ ឥសាន ចាត់ទុកការធ្វើបាតុកម្មរបស់ពលរដ្ឋខ្មែរនៅក្រៅប្រទេសនេះមិនឆ្លុះបញ្ចាំងពីការពិត និងមិនអាចរារាំង ដល់ការឡើងកាន់តំណែងជានាយករដ្ឋមន្ត្រីរបស់ លោក ហ៊ុន ម៉ាណែត បាននោះទេ។
លោក សុខ ឥសាន៖ «ខ្ញុំយល់ថាបងប្អូនដែលធ្វើបាតុកម្មប្រឆាំងនឹងតែងតាំងរដ្ឋាភិបាលថ្មីក៏ដូចជាការរៀបចំរចនាសម្ព័ន្ធក្បាលម៉ាស៊ីនរដ្ឋសភានីតិកាលថ្មីនេះ គឺថាទៅដំណើរការដោយរលូន ស្របទៅតាមឆន្ទៈរបស់ប្រជាពលរដ្ឋដែលឆ្លងកាត់តាមការបោះឆ្នោត កាលពីថ្ងៃទី២៣ ខែកក្កដា ដូច្នេះទោះបងប្អូនស្រែកដល់ស្លាប់ខ្លួនទៀតក៏មិនអាចរារាំងបានដែរ» ។
ទោះជាយ៉ាងណាការបោះឆ្នោតជ្រើសតាំងតំណាងរាស្ត្រអាណត្តិទី៧កន្លងទៅ បណ្ដាប្រទេសលោកសេរីមួយចំនួនចាត់ទុកថាជាការបោះឆ្នោតក្លែងក្លាយ និងជាការបោះឆ្នោតបង្គ្រប់កិច្ចដើម្បីឱ្យលោក ហ៊ុន សែន អាចបន្តក្ដោបក្ដាប់អំណាច និងផ្ទេរអំណាចទៅឱ្យកូនប្រុសច្បងរបស់លោក គឺលោក ហ៊ុន ម៉ាណែត តែប៉ុណ្ណោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។