ចៅសង្កាត់រងទី២ គណបក្សភ្លើងទៀន គ្រោងដាក់លិខិតសុំអន្តរាគមន៍ ទៅសាលាខេត្តបាត់ដំបង ករណីស្មៀនសង្កាត់អូរចារ អនុវត្តការងាររើសអើងនយោបាយ។ ការរៀបចំដាក់លិខិតនេះកើតឡើង ដោយសារតែចៅសង្កាត់មកពីគណបក្សកាន់អំណាចគ្មាន វិធានការសម្របសម្រួលការរើសអើង។ សង្គមស៊ីវិលយល់ថា មន្ត្រីគណបក្សកាន់អំណាច គួរបញ្ឈប់វប្បធម៌រើសអើងនយោបាយ។
ចៅសង្កាត់រងទី២ សង្កាត់អូរចារ មកពីគណបក្សភ្លើងទៀន អ្នកស្រី ស៊ិន ចាន់ពៅរ៉ូហ្ស៊េត លើកឡើងថា ស្មៀនមកពីបក្សកាន់អំណាចមានអាកប្បកិរិយាខ្វះក្រមសីលធម៌ និងធ្វើការងារលើសតួនាទី ដោយមិនគោរពទៅតាមឋានានុក្រម ដែលច្បាប់កំណត់ និងគោលការណ៍បម្រើប្រជាពលរដ្ឋ ដែលមកទទួលសេវាសាធារណៈ។
ចៅសង្កាត់រងទី២ អ្នកស្រី ស៊ិន ចាន់ពៅរ៉ូហ្ស៊េត ប្រាប់វិទ្យុអាស៊ីសេរី នៅថ្ងៃទី២៥ សីហា ថា លោកចៅសង្កាត់ ដែលជាប្រធានក្រុមប្រឹក្សាមកពីគណបក្សកាន់អំណាច នៅមិនទាន់ណែនាំ ឬដោះស្រាយបញ្ហាស្មៀនឃុំនេះនៅឡើយ ។ អ្នកស្រី យល់ថាជារឿងដែលមិនអាចទទួលយកបាន ចំពោះអាកប្បកិរិយារបស់ស្មៀនឃុំ ដែលធ្វើមកលើអ្នកស្រី។ តែទោះជាយ៉ាងណាក្ដី អ្នកស្រីគិតថា រឿងនេះនឹងគ្មានដំណោះស្រាយទេ ព្រោះស្មៀន និងចៅសង្កាត់ គឺជាមនុស្សមកពីបក្សកាន់អំណាចដូចគ្នា។ អ្នកស្រី ស៊ិន ចាន់ពៅរ៉ូហ្ស៊េត ចាត់ទុកថា នេះជាការរើសអើង រឹតត្បិតសិទ្ធិ និងប្រមាថមើលងាយអ្នកស្រី ក្នុងការអនុវត្តការងារ៖ « ខ្ញុំកំពុងរៀបចំបែបបទឯកសារ ដាក់ទៅសាលាក្រុង និងសាលាខេត្ត ដើម្បីឱ្យមានការអន្តរាគមន៍ ករណីដែលស្មៀន ប្រើចរិតច្រឡោងខាម ចរិតពាល ដែលយើងមានពលរដ្ឋគាត់ធ្វើសាក្សីបាន ដែលគាត់ឃើញព្រឹត្តិការណ៍ហ្នឹង ពេលដែលគាត់មកទទួលសេវា។ ក៏ប៉ុន្តែសម្រាប់ខ្ញុំយល់ថា ទោះបីខ្ញុំដាក់ទៅមិនមានយុត្តិធម៌សម្រាប់ខ្ញុំក៏ដោយ ប៉ុន្តែយើងត្រូវតែដាក់ យើងនឹងប្រឹងប្រែងតស៊ូអត់ធ្មត់បន្តទៅទៀត ដើម្បីធ្វើយ៉ាងណា ដើម្បីឱ្យមានភាពកក់ក្ដៅសម្រាប់ប្រជាពលរដ្ឋយ៉ាងហោចណាស់ ក៏ខ្ញុំនៅទីហ្នឹង បានជួយការពារប្រជាពលរដ្ឋ។ ប្រជាពលរដ្ឋថា គាត់មើលឃើញអាកប្បកិរិយារបស់ស្មៀន គឺយកខ្ញុំធ្វើជាសត្រូវតែម្ដង គឺប្រើពាក្យសម្ដីទ្រគោះបោះបោក មកលើរូបនាងខ្ញុំដែលជាស្ត្រី ដែលជាមន្ត្រីជាប់ឆ្នោត » ។
កាលពីថ្ងៃទី២៤ សីហា អ្នកស្រី ស៊ិន ចាន់ពៅរ៉ូហ្ស៊េត បានសួរនាំពលរដ្ឋមានបញ្ហាក្នុងការធ្វើសំបុត្រកំណើត ដោយសារជំនួយការរដ្ឋបាលឃុំ បានប្រាប់ឱ្យពលរដ្ឋទៅបញ្ជាក់នៅភូមិ ប៉ុន្តែមេភូមិតម្រូវឱ្យធ្វើលិខិតបញ្ជាក់កំណើតនៅឯស្រុកកំណើតក្នុងខេត្តកំពត ដែលអ្នកស្រីមើលឃើញថា ខុសពីនីតិវិធី និងមិនបានជួយសម្រួលដល់ការផ្ដល់សេវាសាធារណៈជូនពលរដ្ឋតាមការណែនាំរបស់ក្រសួងមហាផ្ទៃ។ ពេលនោះស្មៀនសង្កាត់អូរចារ បានចេញពីបន្ទប់ ដោយបង្ហាញអាកប្បកិរិយាមិនសមរម្យ ច្រឡើសបើស និងប្រមាថមាក់ងាយ ចៅសង្កាត់រងទី២ អ្នកស្រី ស៊ិន ចាន់ពៅរ៉ូហ្ស៊េត នៅចំពោះមុខពលរដ្ឋ។ ពលរដ្ឋឃើញ ដែលនៅក្នុងហេតុការណ៍នោះលើកឡើងថា មន្ត្រីស្មៀនហាក់មិនសូវគោរព និងឱ្យតម្លៃចៅសង្កាត់រងទី២ សោះឡើយ។ ចំណែកស្មៀនឃុំ ដែលរងការចោទប្រកាន់ លោក សឿន ចំរ៉ុង អះអាងយ៉ាងខ្លីថា រឿងនេះនឹងគ្មានការពិត ប្រសិនបើស្ដាប់ភាគីតែម្ខាង។
ពាក់ព័ន្ធករណីនេះ ចៅសង្កាត់អូរចារ លោក ឯម សុផល លើកឡើងថា រឿងនេះពុំមានអ្វីត្រូវប្រជុំដោះស្រាយឡើយ ព្រោះលោកមើលឃើញថា ទាំងស្មៀន និងចៅសង្កាត់រងទី២ ពុំមានទំនាស់នឹងគ្នាទៀតទេ គឺពួកគេនៅនិយាយគ្នាធម្មតានៅក្រោយហេតុការណ៍នោះ។ លោកបន្តថា លោកក៏មិនឃើញមានប្រតិកម្មអ្វីរបស់ភាគីទាំងសង្ខាង ពីការមិនសុខចិត្តណាមួយឡើយ។ លោកបន្តថា បញ្ហាកើតឡើងដោយសារស្មៀន និងចៅសង្កាត់រងទី២ ទាមទារសម្របសម្រួលជូនពលរដ្ឋ តែរៀងៗ ខ្លួន៖ « ពេលប្រជុំវិសាមញ្ញខាងមុខនេះ នឹងជម្រាបជូនពួកគាត់បន្ថែមទៀត។ ខ្ញុំធ្លាប់ណែនាំពួកគាត់ហើយ ឱ្យធ្វើការរួមគ្នា សាមគ្គីគ្នា ព្រោះបងប្អូនប្រជាពលរដ្ឋ គាត់បោះឆ្នោតឱ្យយើង ឱ្យបម្រើគាត់ អ៊ីចឹងមានការឱ្យឱ្យពិភាក្សាគ្នា។ ខ្ញុំបានជម្រាបជូនគាត់ពេលប្រជុំពេលអីហើយបាទ ប៉ុន្តែខ្ញុំមើលស្ថានភាពនេះមិនអីទេ គ្រាន់តែគាត់ប្រកែកគ្នាបន្តិចបន្តួច ហើយក៏បានសម្របសម្រួលជូនប្រជាពលរដ្ឋរួចហើយ ។ ល្ងាចមិញខ្ញុំមកដល់សង្កាត់ឃើញគាត់អង្គុយនិយាយលេងធម្មតា អត់មានអីផង » ។
ជុំវិញរឿងនេះ មន្ត្រីសម្របសម្រួលសមាគមការពារសិទ្ធិមនុស្សអាដហុកប្រចាំខេត្តបាត់ដំបង លោក យិន ម៉េងលី ប្រាប់វិទ្យុអាស៊ីសេរីថា មេឃុំ ឬប្រធានក្រុមប្រឹក្សាឃុំសង្កាត់ ត្រូវមានវិធានការរដ្ឋបាល ឬវិធានការវិន័យ ក្នុងការដោះស្រាយបញ្ហាប្រទាំងប្រទើសគ្នានេះ។ លោកបន្តថា ប្រសិនបើបញ្ហានេះអូសបន្លាយ នឹងធ្វើឱ្យមានទម្លាប់អាក្រក់ ក្នុងការងាររដ្ឋបាលឃុំសង្កាត់ ដែលតម្រូវឱ្យធ្វើការរួមគ្នា បម្រើសេវាជូនពលរដ្ឋ៖ « ការដាក់របាយការណ៍ទៅខាងស្រុក ឬក៏ទៅអាជ្ញាធរខេត្ត ជាចំណុចមួយ ដើម្បីឱ្យស្រុក និងខេត្តលោកបានដឹង។ ស្រុក និងខេត្តអាចជួយជំរុញបញ្ហានេះមកឃុំវិញ ឱ្យមានដំណោះស្រាយឱ្យបានឆាប់។ រឿងតូចរឿងធំ វាអត់សំខាន់ទេ សំខាន់ថា វាពិតជាមានរឿងកើតឡើង ឬក៏អត់ ? ដូចអ្វីដែលភាគីអះអាងអត់ ? ។ ខ្ញុំមិនចង់ឱ្យមានវប្បធម៌របៀបហ្នឹងនៅតទៅទៀត ក្នុងការងាររដ្ឋបាលរបស់ឃុំសង្កាត់ទេ យើងត្រូវតែរួមគ្នា ដើម្បីបម្រើសេវារបស់ប្រជាពលរដ្ឋ ទើបជារឿងល្អ។ រឿងនាំគ្នាឈ្លោះគ្នា លាបពណ៌គ្នា ចេះតែប្រើក្រុមនេះក្រុមនោះ ហើយសុទ្ធតែខ្មែរទាំងអស់គ្នា វាមិនមែនជារឿងល្អទេ » ។
ក្រោយការបោះឆ្នោត ថ្ងៃទី៥ មិថុនា អ្នកស្រី ស៊ិន ចាន់ពៅរ៉ូហ្ស៊េត បានជាប់ចៅសង្កាត់រងទី២ សង្កាត់អូរចារ មកពីគណបក្សភ្លើងទៀន និងបានចូលធ្វើការរយៈពេលជិត ២ខែមកហើយ។ អ្នកស្រីតែងតែលើកឡើងជាបន្តបន្ទាប់អំពីបញ្ហាស្មៀនរបស់ក្រសួងមហាផ្ទៃ ដែលតែងរើសអើងនិន្នាការនយោបាយ ពេលអនុវត្តការងារ និងមិនបានការគោរពតាមឋានានុក្រម ដែលច្បាប់កំណត់។
ទាក់ទងនឹងរឿងនេះ មេដឹកនាំគណបក្សភ្លើងទៀនអះអាងថា ក្រុមប្រឹក្សាឃុំប្រមាណ ៣០ភាគរយកំពុងរងការរើសអើងផ្នែកនយោបាយ ដោយសារតែមន្ត្រីគណបក្សកាន់អំណាចមិនបែងចែកការងារឲ្យធ្វើ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។