មន្ត្រីអង្គការសង្គមស៊ីវិល និងមន្ត្រីបក្សប្រឆាំងលើកឡើងថា ការតែងតាំងលោក ជា ចាន់តូ ជាអគ្គទេសាភិបាលកិត្តិយសធនាគារជាតិ ជាការខ្ជះខ្ជាយថវិកាជាតិ និងដើម្បីការពារអំណាចឱ្យកូនស្រីរបស់លោក ដែលទើបឡើងស្នងតំណែងពីលោក កាលពីពេលថ្មីៗនេះ។ អ្នករិះគន់ ចាត់ទុកថា នេះគឺជាគំរូអាក្រក់ និងហាក់ចាត់ទុកស្ថាប័នជាតិ គឺជាក្រុមហ៊ុនផ្ទាល់ខ្លួន។
មន្ត្រីអង្គការសង្គមស៊ីវិល និងមន្ត្រីបក្សប្រឆាំង ហួសចិត្តចំពោះមន្ត្រីជាន់ខ្ពស់របស់លោក ហ៊ុន សែន គឺលោក ជា ចាន់តូ ដែលផ្ទេរតំណែងអគ្គទេសាភិបាលធនាគារជាតិឲ្យកូនស្រីរបស់លោក គឺអ្នកស្រី ជា សិរី ហើយ ប៉ុន្តែលោកបែរជានៅបន្តតួនាទីជាអគ្គទេសាភិបាលកិត្តិយសធនាគារជាតិថែមទៀត ដោយមិនព្រមលាឈប់ឲ្យដាច់ស្រឡះពីកន្លែងឃ្លាំងលុយជាតិនោះទេ។
ប្រធានមជ្ឈមណ្ឌលប្រជាពលរដ្ឋដើម្បីអភិវឌ្ឍ និងសន្តិភាព លោក យង់ គិមអេង យល់ឃើញថា ការតែងតាំងតួនាទីអគ្គទេសាភិបាលកិត្តិយស នឹងមិនផ្ដល់ផលប្រយោជន៍ដល់សង្គមជាតិនោះឡើយ ព្រោះមន្ត្រីដែលត្រូវបានតែងតាំងជាទីប្រឹក្សាក្រសួង ឬប្រធានកិត្តិយសផ្សេងៗភាគច្រើនមិនបានជួយដោះស្រាយបញ្ហាផ្សេងៗក្នុងស្ថាប័នសាមីនោះទេ។ លោកបន្ថែមថា កន្លងមករដ្ឋាភិបាលក៏បានតែងតាំងមន្ត្រីរាជការជាច្រើននៅតាមក្រសួង និងស្ថាប័នរដ្ឋ ហើយការតែងតាំងទាំងនេះក៏ជាបន្ទុករបស់ប្រជាពលរដ្ឋផងដែរ ព្រោះប្រាក់បៀវត្សដែលរដ្ឋាភិបាលផ្ដល់ទៅឱ្យពួកគេគឺបានមកពីការបង់ពន្ធរបស់ប្រជាពលរដ្ឋ។
លោក យង់ គិមអេង៖ «អ្វីដែលសំខាន់ដែលយើងឃើញថា តួនាទីកិត្តិយសគឺមានច្រើន ក៏ប៉ុន្តែបើតួនាទីកិត្តិយសទាំងឡាយណាប៉ះពាល់ទៅដល់ថវិកាជាតិ ខ្ញុំគិតថាវានឹងអាចនាំឱ្យមានផលអវិជ្ជមានផងដែរ»។
ប្រតិកម្មរបស់មន្ត្រីអង្គការសង្គមស៊ីវិលបែបនេះ ធ្វើឡើងបន្ទាប់ពីព្រះមហាក្សត្រ នរោត្តម សីហមុនី នៅថ្ងៃទី២៩ ខែកក្កដា បានចេញព្រះរាជក្រឹត្យតែងតាំងលោក ជា ចាន់ តូ ជាអគ្គទេសាភិបាលកិត្តិយសធនាគារជាតិនៃកម្ពុជា ដែលមានឋានៈស្មើទេសរដ្ឋមន្ត្រី កាលពីថ្ងៃទី២៩ ខែកក្កដា។ លោក ជា ចាន់តូ បានកាន់តំណែងជាអគ្គទេសាភិបាលធនាគារជាតិ នៃកម្ពុជា តាំងពីឆ្នាំ១៩៩៨មក ពោលគឺមានរយៈពេល២៥ឆ្នាំហើយ។ បន្ទាប់ពីគ្រប់គ្រងឃ្លាំងលុយជាតិយូរជាងគេក្នុងប្រវត្តិសាស្ត្រនោះ លោក ជា ចាន់តូ ក៏បានប្រគល់តំណែងរបស់លោកឲ្យកូនស្រីរបស់លោក គឺអ្នកស្រី ជា សិរី គ្រប់គ្រងបន្តពីលោកដែរ កាលពីថ្ងៃទី២៩ កក្កដា ប៉ុន្តែលោកមិនទៅណាឆ្ងាយនោះទេ។
មន្ត្រីបក្សប្រឆាំងនិងមន្ត្រីអង្គការសង្គមស៊ីវិល ក៏បានរិះគន់ការតែងតាំងអ្នកស្រី ជា សិរី ធ្វើជាអគ្គទេសាភិបាល នៃធនាគារជាតិជំនួសតំណែងឪពុកផងដែរ។ ពួកគេចាត់ទុកការតែងតាំងដោយសារសែស្រឡាយបក្ខពួកនិយមនេះថា កំពុងនាំឱ្យប្រទេសកម្ពុជាដើរទៅរកសម័យអតីតកាលដ៏អន់ថយ។
វិទ្យុអាស៊ីសេរីមិនអាចទាក់ទងអ្នកស្រី ជា សិរី ដើម្បីសុំការបកស្រាយជុំវិញរឿងនេះបានឡើយ នៅថ្ងៃទី៤ ខែសីហា ដោយទូរស័ព្ទចូលប៉ុន្តែមិនមានអ្នកទទួល។
ទោះជាយ៉ាងណា អ្នកនាំពាក្យគណបក្សប្រជាជនកម្ពុជា លោក សុខ ឥសាន យល់ស្របចំពោះការលើកឡើងថា ការតែងតាំងលោក ជា ចាន់តូ ជាប្រធានអគ្គទេសាភិបាលកិត្តិយសធនាគារជាតិនៃកម្ពុជា គឺដើម្បីនៅជួយការងារកូនស្រីរបស់លោក ដែលមិនទាន់មានបទពិសោធន៍ការងារគ្រប់គ្រាន់។
លោក សុខ ឥសាន៖ «ពីព្រោះជំទាវ ជា សិរី នេះ គាត់នៅវ័យក្មេង អ៊ីចឹងគាត់មិនទាន់មានពិសោធន៍ជ្រៅជ្រះនៅឡើយទេ ព្រោះទោះបីជាគាត់ធ្វើការនៅធនាគារជាតិយូរឆ្នាំពិតមែន ក៏ប៉ុន្តែថ្នាក់ដឹកនាំវ័យចាស់ហ្នឹង មិនអាចបណ្ដែតបណ្ដោយបានទេ ព្រោះរឿងហ្នឹងពាក់ព័ន្ធនឹងរឿងលុយកាក់ ត្រូវតែប្រយ័ត្នប្រយែង»។
ជុំវិញរឿងនេះដែរ អតីតមន្ត្រីជាន់ខ្ពស់គណបក្សប្រឆាំងលោក អ៊ុំ សំអាន បានលើកឡើងក្នុងទំព័រហ្វេសប៊ុកផ្ទាល់ខ្លួនថា លោកហួសចិត្ត និងចាត់ទុកការតែងតាំងអគ្គទេសាភិបាលកិត្តិយសធនាគារជាតិនៃកម្ពុជា គឺជារឿងដែលគួរឱ្យអស់សំណើច ព្រោះតំណែងនេះគឺជាការតែងតាំងលើកទី១ ក្នុងប្រវត្តិសាស្ត្រធនាគារជាតិនៃកម្ពុជា។ លោកបន្ថែមក្នុងន័យចំអកថា លោក ហ៊ុន សែន ប្រហែលចង់ក្លាយជានាយករដ្ឋមន្ត្រីកិត្តិយសដែរហើយ បានជាលោកតែងតាំងលោក ជា ចាន់តូ ដែលជាឪពុកទៅជាអគ្គទេសាភិបាលកិត្តិយស ខណៈកូនស្រីត្រូវបានតែងតាំងជាអគ្គទេសាភិបាលធនាគារជាតិនៃកម្ពុជាហើយនោះ។
អ្នកវិភាគនយោបាយលើកឡើងថា ការតែងតាំងឪពុកឱ្យនៅចាំជួយកូនរបស់ខ្លួនបែបនេះ ឆ្លុះបញ្ចាំងកាន់តែច្បាស់ថា កូនៗរបស់មន្ត្រីគ្រាក់ៗដែលត្រូវបានតែងតាំងជំនួសឪពុកម្ដាយរបស់ពួកគេនោះ មិនមានសមត្ថភាពគ្រប់គ្រាន់ ដើម្បីគ្រប់គ្រងស្ថាប័ន និងតួនាទីដែលត្រូវបានតែងតាំងនោះឡើយ។ មន្ត្រីអង្គការសង្គមស៊ីវិលលើកឡើងថា ការតែងតាំងឪពុកម្ដាយឱ្យនៅកាងការពារអំណាចកូនៗរបស់ខ្លួនបែបនេះ មិនត្រឹមតែនាំឱ្យខ្ជះខ្ជាយថវិកាជាតិ ដែលបានមកពីការបង់ពន្ធរបស់ប្រជាពលរដ្ឋតែប៉ុណ្ណោះទេ ប៉ុន្តែក៏ធ្វើឱ្យមន្ត្រីដែលមានសមត្ថភាពពិតប្រាកដបាត់បង់ឱកាស ទទួលបានតំណែងកំពូលៗដើម្បីដឹកនាំស្ថាប័នជាតិផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។