ពលរដ្ឋស្នើរដ្ឋាភិបាលកម្ពុជា ឲ្យគិតគូរអំពីសុខទុក្ខពលរដ្ឋខ្មែរក្រោម ឲ្យដូចភាគីវៀតណាម ដែលតែងតែស្នើសុំរដ្ឋាភិបាលកម្ពុជា ឲ្យមើលថែពលរដ្ឋរបស់ពួកគេ ដែលកំពុងរស់នៅលើទឹកដីប្រទេសកម្ពុជា។ ការស្នើសុំនេះ ធ្វើឡើងនៅមុនពេលប្រធានសភាជាតិវៀតណាម លោក ជិន ថាញ់មិន (Tran Thanh Man) នឹងធ្វើទស្សនកិច្ចមកកម្ពុជា ចាប់ពីថ្ងៃទី២១ ដល់ថ្ងៃទី២៤ ខែវិច្ឆិកាខាងមុខនេះ។
ពលរដ្ឋលើកឡើងថា រដ្ឋាភិបាលត្រកូល «ហ៊ុន» គួរតែខ្វល់ខ្វាយពីសុខទុក្ខពលរដ្ឋខ្មែរក្រោម ក្នុងនាមជាឈាមជ័រខ្មែរតែមួយ ដែលកំពុងរស់នៅក្រោមអាណានិគមវៀតណាម និងរងការរឹតត្បិតសិទ្ធិសេរីភាពស្ទើរគ្រប់រូបភាព។
យុវជនសិក្សាអំពីកិច្ចព្រមព្រៀងទីក្រុងប៉ារីស លោក វិន វិចិត្រ ប្រាប់វិទ្យុអាស៊ីសេរី នៅថ្ងៃទី២០ ខែវិច្ឆិកាថា កាលពីពេលកន្លងទៅ ភាគីវៀតណាមតែងតែស្នើរដ្ឋាភិបាលកម្ពុជាឲ្យមើលថែប្រជាពលរដ្ឋរបស់ពួកគេ ដែលកំពុងរស់នៅប្រទេសកម្ពុជា។ យុវជនរូបនេះលើកឡើងថា ក្នុងនាមជាប្រទេសជិតខាងគ្នា ដែលមានកិច្ចសហប្រតិបត្តិការល្អនឹងគ្នា រដ្ឋាភិបាលកម្ពុជា ក៏អាចស្នើសុំរដ្ឋាភិបាលវៀតណាម ឲ្យគិតគូរអំពីសុខទុក្ខពលរដ្ឋខ្មែរក្រោម ដែលកំពុងស្ថិតក្រោមការគ្រប់គ្រងរបស់វៀតណាមបានដូចគ្នាដែរ។
លោក វិន វិចិត្រ៖«ខ្ញុំកត់សម្គាល់ឃើញថា ខ្មែរក្រោមនៅតែរក្សាអត្តសញ្ញាណខ្មែរ ហើយខ្មែរក្រោម ក៏នៅតែនិយាយថា ខ្លួនឯងជាខ្មែរក្រោមដែរ អ៊ីចឹងគាត់នៅតែជាខ្មែរ រដ្ឋាភិបាលខ្មែរគួរតែមានការស្នើសុំដូចខ្ញុំបានបញ្ជាក់ពីខាងដើមថា បើសិនវៀតណាមជាមិត្តល្អរបស់កម្ពុជា គួរតែកម្ពុជាអាចនិយាយរឿងហ្នឹងបាន ហើយវៀតណាមគួរតែស្ដាប់រឿងហ្នឹងដែរ បើសិនជាមិត្តល្អមែន»។
សេចក្ដីជូនដំណឹងរបស់រដ្ឋសភាកម្ពុជា កាលពីថ្ងៃទី១៨ ខែវិច្ឆិកា ឲ្យដឹងថា គោលបំណងនៃទស្សនកិច្ចរបស់ប្រធានរដ្ឋសភាវៀតណាម លោក ជិន ថាញ់មិន (Tran Thanh Man) មកកាន់កម្ពុជា គឺដើម្បីពង្រឹងកិច្ចសហប្រតិបត្តិការប្រទេសទាំងពីរ ស្របតាមស្មារតីជាអ្នកជិតខាងល្អ ដោយតម្កល់ផលប្រយោជន៍ប្រជាជន និងប្រទេសទាំងពីរ។
រដ្ឋសភាឲ្យដឹងទៀតថា ក្នុងដំណើរទស្សនកិច្ចនេះ ប្រធានរដ្ឋសភាវៀតណាម នឹងចូលគាល់ព្រះមហាក្សត្រព្រះបាទសម្ដេច ព្រះបរមនាថ នរោត្តម សីហមុនី និងមន្ត្រីជាន់ខ្ពស់មួយចំនួនទៀតដូចជា ប្រធានរដ្ឋសភា អ្នកស្រី ឃួន សុដារី ប្រធានព្រឹទ្ធសភា លោក ហ៊ុន សែន នាយករដ្ឋមន្ត្រី លោក ហ៊ុន ម៉ាណែត ប្រធានកិត្តិយសនៃក្រុមប្រឹក្សាព្រះមហាក្សត្រ លោក ហេង សំរិន និងប្រធានសមាគមមិត្តភាពកម្ពុជា-វៀតណាម អ្នកស្រី ម៉ែន សំអន ជាដើម។
ជុំវិញបញ្ហានេះ អនុប្រធានសមាគមខ្មែរកម្ពុជាក្រោម ដើម្បីសិទ្ធិមនុស្ស និងអភិវឌ្ឍន៍ បណ្ឌិត សឺន ជុំជួន មានប្រសាសន៍ថា ដំណើរទស្សនកិច្ចរបស់ប្រធានរដ្ឋសភាវៀតណាម មកកាន់ប្រទេសកម្ពុជា ពិតជាមានសារសំខាន់ណាស់ ដើម្បីពង្រឹងកិច្ចសហប្រតិបត្តិការរវាងប្រទេសទាំងពីរ។ លោក រំពឹងថា រដ្ឋាភិបាលកម្ពុជា នឹងលើកយកបញ្ហារបស់ពលរដ្ឋខ្មែរក្រោម ទៅជជែកជាមួយប្រធានសភាវៀតណាម។
បណ្ឌិត សឺន ជុំជួន៖«តុលាការវៀតណាមនឹងលើកយកសំណុំរឿងពាក់ព័ន្ធទៅនឹងករណីព្រះសង្ឃ និងពុទ្ធបរិស័ទនៅខេត្តលង់ហោ(ដែលវៀតណាមហៅថា ខេត្ត វិញ ឡុង(Vinh Long))ហ្នឹង យកមកជំនុំជម្រះ ហើយសង្ឃឹមថា ការពិភាក្សារវាងរាជរដ្ឋាភិបាលកម្ពុជាយើងជាមួយនឹងប្រធានរដ្ឋសភាវៀតណាម នឹងលើកយកបញ្ហាហ្នឹង ដើម្បីឲ្យមានការជជែកពិភាក្សាជាមួយខាងរដ្ឋាភិបាលវៀតណាមបន្ធូរបន្ថយ ឬក៏ដោះលែង បងប្អូនព្រះសង្ឃពុទ្ធបរិស័ទ ដែលជាសកម្មជនខ្មែរក្រោម ត្រូវបានចាប់ឃុំខ្លួនកន្លងមកនេះ»។
ស្ទើររាល់ជំនួបរវាងថ្នាក់ដឹកនាំរដ្ឋាភិបាលកម្ពុជា-វៀតណាម ភាគីវៀតណាម តែងតែស្នើដល់ភាគីកម្ពុជា ឱ្យយកចិត្តទុកដាក់ដល់សុខទុក្ខរបស់ជនជាតិវៀតណាមនៅកម្ពុជា។ ក៏ប៉ុន្តែ រដ្ឋាភិបាលកម្ពុជា ក្រោមការដឹកនាំដោយគណបក្សប្រជាជនកម្ពុជា ហាក់ពុំសូវយកចិត្តទុកដាក់ឡើយ ចំពោះការធ្វើទុក្ខបុកម្នេញពីសំណាក់រដ្ឋាភិបាលវៀតណាម លើពលរដ្ឋខ្មែរ និងខ្មែរក្រោម បើទោះជាអាជ្ញាធរវៀតណាមធ្លាប់បានធ្វើទុក្ខបុកម្នេញ ដោយឃាត់រថយន្តក្រុងដឹកអ្នកទេសចរខ្មែរ ដែលធ្វើដំណើរទៅលេងនៅដែនដីកម្ពុជាក្រោម និងបានចាប់ខ្លួនសកម្មជន និងព្រះសង្ឃខ្មែរក្រោមចំនួន ១៣អង្គ/នាក់ ដាក់ឃុំក្នុងពន្ធនាគារ ដោយសារតែការផ្សព្វផ្សាយពីសិទ្ធិមនុស្ស សិទ្ធិជនជាតិដើម និងទាមទារសិទ្ធិស្វ័យសម្រេចដោយខ្លួនឯង សម្រាប់ពលរដ្ឋខ្មែរក្រោមជាដើម។
វិទ្យុអាស៊ីសេរី នៅមិនទាន់អាចទាក់ទងប្រធានអង្គភាពអ្នកនាំពាក្យរដ្ឋាភិបាល លោក ប៉ែន បូណា ដើម្បីសុំការឆ្លើយតបបញ្ហានេះ បាននៅឡើយទេ នៅថ្ងៃទី២០ ខែវិច្ឆិកា។
សេចក្ដីថ្លែងការណ៍របស់ សហព័ន្ធខ្មែរកម្ពុជាក្រោមកាលពីថ្ងៃទី១៩ ខែវិច្ឆិកា ឲ្យដឹងថា តុលាការរបស់វៀតណាម នឹងបើកសវនាការជំនុំជម្រះក្ដីសំណុំរឿងព្រះសង្ឃ និងសកម្មជនខ្មែរក្រោមចំនួន ៩នាក់ នៅថ្ងៃទី២៦ និង ២៧ ខែវិច្ឆិកាខាងមុខនេះ។
ពលរដ្ឋ ស្នើដល់រដ្ឋាភិបាលកម្ពុជា ឲ្យលើកយកបញ្ហាប្រឈមរបស់ពលរដ្ឋខ្មែរក្រោម ទៅជាជជែកជាមួយប្រធានរដ្ឋសភាប្រទេសវៀតណាម ដើម្បីឱ្យអាជ្ញាធរវៀតណាមឈប់ធ្វើទុក្ខបុកម្នេញលើព្រះសង្ឃ និងពលរដ្ឋខ្មែរក្រោមបន្តទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។