មន្ត្រី​សង្គម​ស៊ីវិល ជំរុញ​ឲ្យ​រដ្ឋាភិបាល​បញ្ចេញ​ព័ត៌មាន​លម្អិត​រឿង​ជួល​ដី​ឲ្យ​ក្រុមហ៊ុន​ចិន UDG ដែល​រង​ទណ្ឌកម្ម​អាមេរិក

0:00 / 0:00

មន្ត្រី​សង្គមស៊ីវិល​ជំរុញ​ឲ្យ​រដ្ឋាភិបាល បញ្ចេញ​ព័ត៌មាន​លម្អិត​នៃ​ឯកសារ​ពាក់ព័ន្ធ​នឹង​កិច្ចសន្យា​ជួល​ដី​ឲ្យ​ក្រុមហ៊ុន​ចិន UDG ដែល​ទើប​ត្រូវ​សហរដ្ឋ​អាមេរិក​ដាក់​ទណ្ឌកម្ម​ចូល​ក្នុង​បញ្ជី​ខ្មៅ។ ការ​ជំរុញ​ឲ្យ​រដ្ឋាភិបាល​បង្ហាញ​តម្លាភាព​ជុំវិញ​ករណី​វិនិយោគ​របស់​ក្រុមហ៊ុន​មួយ​នេះ កើតមាន​ឡើង ក្រោយ​ក្រុមប្រឹក្សា​អភិវឌ្ឍន៍​កម្ពុជា ឬ CDC និង​ប្រមុខ​ការពារ​ជាតិ បាន​ចេញ​មុខ​ការពារ​គម្រោង​វិនិយោគ​របស់​ក្រុមហ៊ុន​ចិន​នេះ ថា​ធ្វើ​ឡើង​ត្រឹមត្រូវ​ស្របតាម​ច្បាប់​នៅ​កម្ពុជា។

អ្នកគ្រប់គ្រង​គម្រោង​ធុរកិច្ច និង​សិទ្ធិ​មនុស្ស​នៃ​មជ្ឈមណ្ឌល​សិទ្ធិ​មនុស្ស​កម្ពុជា CCHR លោក វណ្ណ សូផាត ចាត់​ទុក​ទង្វើ​របស់​រដ្ឋាភិបាល​កម្ពុជា ការពារ​​គម្រោង​វិនិយោគ​របស់​ក្រុមហ៊ុន​ចិន UDG ថា​គ្រាន់តែ​ជា​ការ​ដោះស្រាយ​មួយ​ឲ្យ​រួចផុត​ពី​ការពិត។ លោក​ថា សង្គម​ស៊ីវិល និង​សហរដ្ឋអាមេរិក បាន​រក​ឃើញ​ថា ក្រុមហ៊ុន​ចិន​មួយ​នេះ ទទួល​បាន​ដី​សម្បទាន​​ពី​រដ្ឋាភិបាល​លើស​ពី​ទំហំ​ច្បាប់​អនុញ្ញាត។ លោក​ស្នើ​ឲ្យ​ស្ថាប័ន​រដ្ឋ​ពាក់ព័ន្ធ​ ជាពិសេស​ក្រុមប្រឹក្សា​អភិវឌ្ឍន៍​កម្ពុជា CDC បញ្ចេញ​ព័ត៌មាន​លម្អិត​ពាក់​ព័ន្ធ​នឹង​រឿងរ៉ាវ​ជួល​ដី​ឲ្យ​ក្រុមហ៊ុន​នេះ ដែល​រដ្ឋាភិបាល​ថា មិនមែន​ជា​លក្ខណៈ​ដី​សម្បទាន​នោះ រួច​បង្ហោះ​នៅ​លើ​គេហទំព័រ និង​បណ្ដាញ​សង្គម ដើម្បី​ឲ្យ​សាធារណជន​បាន​ដឹង៖ « យើង​សង្កេត​ឃើញ​ថា រឿង​ទាំងអស់​នេះ សុទ្ធតែ​ស្ថិត​ក្នុង​ភាព​មួយ​ដែល​មិន​ច្បាស់លាស់​ទាំងអស់។​វា​អត់​មាន​តម្លាភាព ... ថា​ឥឡូវ​នេះ​ត្រូវ​បញ្ចេញ​ថា កិច្ចសន្យា​ជួល​នេះ សូម​ឲ្យ​បញ្ចេញ​ជា​សាធារណៈ​មក​ថា កិច្ចសន្យា​ជួល​នេះ ជា​កិច្ចសន្យា​របៀប​យ៉ាងម៉េច ហើយ​ទំហំ​ដី​ប៉ុន្មាន រយៈពេល​ប៉ុន្មាន​ឆ្នាំ។ បើ​សិន​ជា​យើង​ដោះស្រាយ​រៀងៗខ្លួន​តាម​ដែល​ក្រុមប្រឹក្សា​អភិវឌ្ឍន៍​កម្ពុជា »

ដូចគ្នា​នេះដែរ នាយក​រង​ទទួល​បន្ទុក​ផ្នែក​ឃ្លាំ​មើល​សិទ្ធិ​មនុស្ស​នៃ​អង្គការ​លីកាដូ លោក អំ សំអាត ថ្លែងថា លោក​ក៏​ចង់​ឃើញ​រដ្ឋាភិបាល​បង្ហាញ​ពី​តម្លាភាព​នៅ​ក្នុង​វិនិយោគ​ដ៏​ចម្រូងចម្រាស​របស់​ក្រុមហ៊ុន​ចិន​មួយ​នេះ​ដែរ ដែល​បាន​បង្ក​ផល​ប៉ះពាល់​អវិជ្ជមាន​ច្រើន​ដល់​ប្រជា​កសិករ​ខ្មែរ​នៅ​ខេត្ត​កោះកុង៖ « នៅ​ពេល​ដែល​មាន​បញ្ហា​ហើយ ភាគី​ទាំង​សង្ខាង​តែង​តែ​មាន​ការ​បក​ស្រាយ​រៀងៗ ​ខ្លួន។ ប៉ុន្តែ អ្វី​ដែល​ជា​ការ​កត់សម្គាល់​របស់​ខ្ញុំ ខ្ញុំ​យល់​ឃើញ​ថា ដូចជា​ការ​ផ្តល់​ដី​សម្បទាន​សេដ្ឋកិច្ច​ ឬក៏​ការជួល​ដី​របស់​រដ្ឋ​អី វា​គួរ​តែ​មាន​ព័ត៌មាន​ជា​តម្លាភាព​ដើម្បី​ឲ្យ​សាធារណជន ឬ​ក៏ អង្គការ​សង្គម​ស៊ីវិល ទទួល​ព័ត៌មាន​ជាក់លាក់​អំពី​ការជួល​ដី​របស់​រដ្ឋ ឬ​ក៏​សម្បទាន​ដី​​សេដ្ឋកិច្ច ... ពីព្រោះ​កន្លងមក​គឺ​មិន​មាន​ព័ត៌មាន​ជាក់លាក់​ណាមួយ​នោះ​ទេ ហើយ​ក្រុមហ៊ុន UDG នេះ តាំងពី​ដើម​ឡើយ គឺ​ទាំង​ប្រជាពលរដ្ឋ​នៅ​ទី​នោះ ទាំង​អង្គការ​សង្គម​ស៊ីវិល គឺ​យល់​ថា វា​ជា​ការ​ផ្តល់​ដី​សម្បទាន​សេដ្ឋកិច្ច​នោះ »

សហរដ្ឋអាមេរិក​បាន​ប្រកាស​ដាក់​ទណ្ឌកម្ម​លើ​ក្រុមហ៊ុនចិន UDG ចូល​ក្នុង​បញ្ជី​ខ្មៅ​បង្កក​ទ្រព្យ​សម្បត្តិ និង​ហាម​ប្រាម​មិន​ឲ្យ​ជនជាតិ ឬ​ក្រុមហ៊ុន​អាមេរិកាំង បណ្តាក់ទុន ឬ​រកស៊ី​ជាមួយ កាល​ពី​ថ្ងៃ​ទី១៥ កញ្ញា ក្រោយ​រក​ឃើញ​ថា ក្រុមហ៊ុន​នេះ​ជា​ក្រុមហ៊ុន​របស់​រដ្ឋ​អំណាច​ចិន ហើយ​បាន​ពាក់ព័ន្ធ​នឹង​អំពើ​រំលោភ​សិទ្ធិមនុស្ស​ច្បាម​យក​ដី​ធ្លី​ពី​ប្រជាកសិករ​ខ្មែរ និង​អំពើ​ពុករលួយ ក្នុង​គម្រោង​អភិវឌ្ឍន៍​តំបន់​តារាសាគរ​ ខេត្ត​កោះកុង។ ភ្លាមៗ​ក្រោយ​ពី​ការដាក់​ទណ្ឌកម្ម​នេះ ស្ថាប័ន​ជំនាញ​របស់​រដ្ឋាភិបាល និង​ប្រមុខ​ការពារ​ជាតិ លោក ទៀ បាញ់ ជាជាង​ឈរ​នៅ​ខាង​ពលរដ្ឋ​ខ្មែរ​ជាតិ​សាសន៍​ខ្លួនឯង បាន​ចេញ​មុខ​មក​ការពារ​ឲ្យ​ក្រុមហ៊ុន​ចិន​មួយ​នេះ​ថា​ ក្រុមហ៊ុន​ចិន​នេះ វិនិយោគ​ត្រឹមត្រូវ​ស្របតាម​ច្បាប់​របស់​កម្ពុជា​ទាំង​អស់។ ក្រុមប្រឹក្សា​អភិវឌ្ឍន៍​កម្ពុជា CDC បដិសេធ​រាល់​ការ​រក​ឃើញ​របស់​អាមេរិក​ជុំវិញ​ក្រុមហ៊ុន​មួយ​នេះ ដូចជា​ករណី​ដែល​ថា ការ​ផ្តល់​ទីតាំង​ឲ្យ​ក្រុមហ៊ុន UDG នេះ ធ្វើ​ការអភិវឌ្ឍន៍​មាន​ទំហំ​លើស​ពី​ចំនួន​ដី​សម្បទាន​ដែល​ច្បាប់​កំណត់​ឲ្យ​ត្រឹមតែ ១ម៉ឺន​ហិកតារ។ ក្រុមប្រឹក្សាអភិវឌ្ឍន៍ CDC អះអាង​ថា គម្រោង​វិនិយោគ​របស់​ក្រុមហ៊ុន​ចិន​នេះ មិនមែន​ជា​ករណី​ទទួល​បាន​ដី​សម្បទាន​សេដ្ឋកិច្ច​ឡើយ តែ​ជា​ការជួល​ទីតាំង។ យ៉ាងណា ស្ថាប័ន​នេះ ពុំ​បាន​បញ្ជាក់​លម្អិត​ពី​រយៈពេល​ជួល និង​ចំណូល​បាន​មក​ពី​ការជួល​ដី​ឲ្យ​ក្រុមហ៊ុន​ចិន​នេះ​ឡើយ។

អគ្គលេខាធិការ​ក្រុមប្រឹក្សា​អភិវឌ្ឍន៍​កម្ពុជា CDC លោក សុខ ចិន្តាសោភា ចុច​ផ្ដាច់​ទូរស័ព្ទ​ក្រោយ​អាស៊ីសេរី​ព្យាយាម​សាកសួរ​ពី​រឿង​នេះ​កាលពី​ថ្ងៃ​ទី២៤ កញ្ញា។ មន្ត្រី​ក្រោម​ឱវាទ​របស់​លោក ក៏​សុទ្ធ​តែ​មិន​លើក​ទូរស័ព្ទ។

ដោយឡែក អ្នក​នាំ​ពាក្យ​ក្រសួង​សេដ្ឋកិច្ច និង​ហិរញ្ញវត្ថុ លោក មាស សុខសេនសាន្ត ព្យាយាម​មិនឆ្លើយ ហើយ​រុញ​ឲ្យ​ទៅ​សួរ​ក្រសួង​កសិកម្ម ពាក់ព័ន្ធ​នឹង​ព័ត៌មាន​ពី​ចំណូល​រដ្ឋ​ទទួល​បាន​ពី​ការជួល​ដី និង​រយៈ​ពេល​ពិតប្រាកដ​នៃ​ការជួល​ដី​ឲ្យ​ក្រុមហ៊ុន​ចិន UDG នេះ បើ​ទោះ​បី​ជា​កន្លង​មក​លោក​ធ្លាប់​អះអាង​ថា ក្រសួង​សេដ្ឋកិច្ច​តែង​បង្ហាញ​តម្លាភាព​គ្រប់​បែប​យ៉ាង​នោះ។ រីឯ​អ្នកនាំពាក្យ​ក្រសួង​កសិកម្ម លោក ស្រី វុឌ្ឍី និង​អ្នក​នាំ​ពាក្យ​ក្រសួង​បរិស្ថាន លោក នេត្រ ភត្រា មិន​ឆ្លើយ​តប​សំណួរ​អាស៊ីសេរី ជុំវិញ​បញ្ហា​ផ្តល់​ដី​សម្បទាន​សេដ្ឋកិច្ច​ឲ្យ​ក្រុមហ៊ុន​ចិន​ដ៏​ចម្រូងចម្រាស​មួយ​នេះ។

ក្រុមហ៊ុន​គ្រប់គ្រង​ដោយ​រដ្ឋអំណាច​ចិន ឈ្មោះ UDG នេះ រង​ការសង្ស័យ​ថា កំពុង​ធ្វើ​ការ​ជា​សម្ងាត់​ដើម្បី​បម្រើ​មហិច្ឆតា​យោធា​ឲ្យ​បក្ស​កុម្មុយនិស្ត​ចិន ក្រោម​រូបភាព​ជា​ការ​វិនិយោគ​គម្រោង​បង្កើត​តំបន់​ទេសចរណ៍​តារា​សាគរ នៅ​ខេត្ត​កោះកុង តាមរយៈ​ការសាងសង់​ព្រលាន​យន្តហោះ​ខ្នាត​យក្ស កំពង់ផែ​ទឹកជ្រៅ និង​បន​ល្បែង​កាស៊ីណូ​ជាដើម។ គម្រោង​ខ្នាត​យក្ស​នេះ ចូលរួម​បម្រើ​ឲ្យ​ផ្នែក​មួយ​នៃ​គំនិត​ផ្ដួចផ្ដើម​ខ្សែ​ក្រវាត់ និង​ផ្លូវ ឬ BRI របស់​ចិន។ ទន្ទឹម​នឹង​ការ​ដាក់​ទណ្ឌកម្ម​នេះ​ថ្មីៗ នេះ ក្រសួង​ពាណិជ្ជកម្ម​អាមេរិក ក៏​ទើប​តែ​បាន​ចាត់​វិធានការ​ក្ដៅ​ប្រឆាំង​ក្រុមហ៊ុន​ចិន សរុប​មិន​តិច​ជាង ២០​ក្រុមហ៊ុន​នោះទេ ដែល​ភាគច្រើន​គ្រប់គ្រង​ដោយ​រដ្ឋ​អំណាច​ចិន ដាក់ឈ្មោះ​ថា CCCC ហើយ​លួច​អនុវត្ត​គម្រោងការ​សម្ងាត់​ដើម្បី​ពង្រីក​ឥទ្ធិពល​យោធា​ឲ្យ​មហាយក្ស​ចិន​នៅ​លើ​ឆាក​អន្តរជាតិ។

បើ​ទោះ​ជា​មាន​ព័ត៌មាន​សង្ស័យ​ជា​ច្រើន​ជុំវិញ​មហិច្ឆតា​របស់​មហាយក្ស​ចិន​ប្រើប្រាស់​ក្រុមហ៊ុន​វិនិយោគ​របស់​ខ្លួន​ឲ្យ​លួច​អនុវត្ត​គម្រោងការ​សម្ងាត់​នេះ​តាមរយៈ​គម្រោង​វិនិយោគ​នានា​ក៏​ដោយ ក៏​លោក ទៀ បាញ់ រដ្ឋមន្ត្រី​ការពារ​ជាតិ បញ្ជាក់​ប្រាប់​អាស៊ី​សេរី​ថា លោក​មិន​បារម្ភ ហើយក៏​មិន​ចាត់​វិធានការណ៍​ត្រួតពិនិត្យ​លើ​ក្រុមហ៊ុន​ចិន​ណាមួយ​ដែល​កំពុង​វិនិយោគ​នៅ​កម្ពុជា​ឡើយ៖ « ខ្ញុំ​មិន​ដឹង​ជា​ទៅ​ពិនិត្យ​ធ្វើ​អី​ទេ ពីព្រោះ​ការ​វិនិយោគ​អី គឺ​វា​សុទ្ធ​សឹង​តែ​មាន​នៅ​ក្នុង​ច្បាប់ នៅ​ក្នុង​កិច្ច​ព្រមព្រៀង​ជាមួយ​គេ។ គេ​មាន​ភាព​ច្បាស់លាស់​របស់​គេ គេ​ធ្វើ​អី ធ្វើ​ត្រឹមណា​ ហើយ​ទៅ​បម្រើ​ការងារ​ស្អី​ហ្នុង គឺ​ដូចជា​គ្មាន​ស្អី​ទៅ​ណា​ទេ។ ហើយ​ទៅ​ចោទ​គ្នា​ថា ខ្ញុំ​ថា គឺ​គ្មាន​អី​ក្រៅ​ពី​ការរារាំង​កុំឲ្យ​មាន​ការអភិវឌ្ឍន៍​ រីក​ចម្រើន​របស់​ប្រទេស​ណា​ក៏​ដោយ មិនថា​តែ​នៅ​កម្ពុជា​ទេ »

ផ្ទុយ​ពី​ការ​អះអាង​នេះ សហរដ្ឋ​អាមេរិក ហៅ​សកម្មភាព​វិនិយោគ​របស់​ក្រុមហ៊ុន​ចិន​នេះ​ថា ជា​ការ​វិនិយោគ​ប្រកប​ដោយ​អំពើ​កេង​ប្រវ័ញ្ច ដែល​ខ្លួន​ចាំបាច់​ត្រូវ​តែ​បង្អាក់​សកម្មភាព​បែប​នេះ៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។