សង្គមស៊ីវិល និងអ្នកច្បាប់លើកឡើងថា គម្រោងរបស់មេបក្សប្រឆាំងដែលចង់ស្វែងរកអភ័យឯកសិទ្ធិសភាឲ្យ លោក មាជ សុវណ្ណារ៉ា នោះ នឹងត្រូវជួបឧបសគ្គ។
ប្រតិកម្មបែបនេះ កើតឡើងបន្ទាប់ពីប្រធានគណបក្សសង្គ្រោះជាតិ លោក សម រង្ស៉ី ប្រកាសថា គណបក្សនឹងរកមធ្យោបាយផ្តល់អភ័យឯកសិទ្ធិជាអ្នកតំណាងរាស្ត្រជូន លោក មាជ សុវណ្ណារ៉ា ដែលកំពុងជាប់ពន្ធនាគារនោះ អាចមានសេរីភាពឡើងវិញ។
មន្ត្រីសង្គមស៊ីវិលយល់ថា លោក មាជ សុវណ្ណារ៉ា អាចរួចចេញពីពន្ធនាគារ ឬជាប់ឃុំ មិនមែនដោយសារគណបក្សប្រឆាំងស្វែងរកអភ័យឯកសិទ្ធិសភាឲ្យនោះឡើយ។ មធ្យោបាយតែមួយគត់ដែលអាចឲ្យ លោក មាជ សុវណ្ណារ៉ា រួចខ្លួនបាននោះ គឺការចរចាផ្នែកនយោបាយ។
មន្ត្រីជាន់ខ្ពស់សមាគមការពារសិទ្ធិមនុស្សអាដហុក (adhoc) លោក នី ចរិយា មានប្រសាសន៍ថា តាមច្បាប់ មេធាវីការពារក្តីឲ្យ លោក មាជ សុវណ្ណារ៉ា អាចដាក់ពាក្យសុំឲ្យកូនក្តីនៅក្រៅឃុំបាន ហើយបើសិនជាមន្ត្រីបក្សប្រឆាំងរូបនេះមិនអាចនៅក្រៅឃុំបានទេនោះ ក៏មិនអាចមានអភ័យឯកសិទ្ធិសភាដែរ។ លោកបន្តថា ការសម្រេចឲ្យនៅក្រៅឃុំ ឬមិននៅក្រៅឃុំ ជាសមត្ថកិច្ចរបស់តុលាការមែន តែគ្រប់យ៉ាងនឹងប្រែប្រួល បើសិនអ្នកនយោបាយត្រូវរ៉ូវគ្នា៖ «ខ្ញុំយល់ថារឿងនេះមិនមែនពាក់ព័ន្ធរឿងច្បាប់រឿងទម្លាប់អីទេ រឿងនេះវាពាក់ព័ន្ធនឹងនយោបាយ។ ហេតុនេះត្រូវយកតុលាការជាខែល សម្រាប់ដោះស្រាយប៉ុណ្ណោះ»។
ចំណែកឯមន្ត្រីអ្នកនាំពាក្យគណបក្សសង្គ្រោះជាតិ លោក យឹម សុវណ្ណ បញ្ជាក់ថា លោកមិនទាន់ដឹងថា លោក សម រង្ស៉ី នឹងប្រើមធ្យោបាយបែបណាដើម្បីផ្តល់អភ័យឯកសិទ្ធិឲ្យ លោក មាជ សុវណ្ណារ៉ា ទេ។ ប៉ុន្តែ គណបក្សសង្គ្រោះជាតិ អាចនឹងប្រើវិធីពីរយ៉ាងរួមមាន ការតតាំងផ្លូវច្បាប់ និងការចរចានយោបាយ។
លោក សម រង្ស៉ី បានថ្លែងប្រាប់អ្នកកាសែតកាលពីថ្ងៃទី២១ ខែវិច្ឆិកា ក្នុងពេលធ្វើបុណ្យឧទ្ទិសកុសលជូនអ្នកស្លាប់នៅកោះពេជ្រថា លោកនឹងជួបពិភាក្សាជាមួយ លោក ហ៊ុន សែន ដើម្បីពិភាក្សាបញ្ហាប្រទាំងប្រទើសនយោបាយនៅដំណាក់កាលចុងក្រោយនេះ។ លោកបន្ថែមថា គណបក្សសង្គ្រោះជាតិ នឹងរកមធ្យោបាយផ្តល់អភ័យឯកសិទ្ធិឲ្យ លោក មាជ សុវណ្ណារ៉ា។
ទាក់ទងការផ្តល់អភ័យឯកសិទ្ធិសភាឲ្យ លោក មាជ សុវណ្ណារ៉ា នេះ អគ្គលេខាធិការគណៈកម្មាធិការជាតិរៀបចំការបោះឆ្នោត (គ.ជ.ប) លោក ទេព នីថា លើកឡើងថា គណបក្សសង្គ្រោះជាតិ អាចប្ដូរសមាសភាពតំណាងរាស្ត្រស្របតាមច្បាប់ ដោយគ្រាន់តែបញ្ជូនសំណើប្ដូរសមាសភាពតំណាងរាស្ត្រមកកាន់ គ.ជ.ប ឲ្យ គ.ជ.ប ពិនិត្យ និងសម្រេច។ លោកបន្តថា ចំពោះរឿងបានអភ័យឯកសិទ្ធិសភា ឬអត់នោះ គ.ជ.ប មិនអាចបញ្ជាក់បានទេ៖ «អ្នកណាឈប់អ្នកបន្ទាប់ត្រូវឡើងជំនួស»។
ទន្ទឹមនឹងនេះ លោកមេធាវី សុក សំអឿន បញ្ជាក់ថា លោក មាជ សុវណ្ណារ៉ា អាចនឹងក្លាយជាតំណាងរាស្ត្របានមែន បើសិនជាគណបក្សសង្គ្រោះជាតិ ស្នើប្ដូរបេក្ខជនតំណាងរាស្ត្រ។ លោកបន្តថា ដើម្បីបានអភ័យឯកសិទ្ធិសភា ចាំបាច់អ្នកតំណាងរាស្ត្រត្រូវទៅស្បថក្នុងវាំងជាមុនសិន។ ទោះជាយ៉ាងណាក្តី មិនមានច្បាប់ណាមួយចែងថា អ្នកតំណាងរាស្ត្រអាចបានអភ័យឯកសិទ្ធិសភានៅពេលណានោះទេ។ រដ្ឋធម្មនុញ្ញ ក៏មិនមានចែង បទបញ្ជាផ្ទៃក្នុងរដ្ឋសភា ក៏មិនបានបង្ហាញច្បាស់ដែរ។ ចំណុចដែលនិយាយពីអភ័យឯកសិទ្ធិសភានេះ ក៏ត្រូវបានមន្ត្រីគណបក្សទាំងពីរជជែកគ្នាក្នុងពេលកែទម្រង់បទបញ្ជាផ្ទៃក្នុងសភាដែរ តែមិនទាន់សម្រេចថានឹងកែប្រែបែបណាឡើយ។
លោក មាជ សុវណ្ណារ៉ា កំពុងជាប់ពន្ធនាគារព្រៃស ក្នុងសំណុំរឿងហិង្សានៅទីលានប្រជាធិបតេយ្យ ដែលបណ្ដាលឲ្យសន្តិសុខសាលារាជធានីភ្នំពេញជាច្រើននាក់រងរបួស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។