សកម្មជនបក្សភ្លើងទៀនលេចធ្លោម្នាក់ គឺអ្នកស្រី ប៉ីប៉ីលី ដែលមានឈ្មោះពិតថា ធី សុខា ទាមទារឱ្យសមត្ថកិច្ចបើកការស៊ើបអង្កេតដោយឯករាជ្យ ជុំវិញមូលហេតុដែលជនបង្កគ្រោះថ្នាក់ចរាចរណ៍ កាលពីថ្ងៃទី២២ ខែមេសា ព្រោះអ្នកស្រីសង្ស័យថា ករណីនេះជាប់ពាក់ព័ន្ធរឿងការប៉ុនប៉ងសម្លាប់ និងគំរាមកំហែងផ្នែកនយោបាយ លើអ្នកគាំទ្រគណបក្សប្រឆាំងនៅមុនការបោះឆ្នោត។ មន្ត្រីសិទ្ធិមនុស្សជំរុញឲ្យសមត្ថកិច្ចស្រាវជ្រាវ ករណីគ្រោះថ្នាក់ចរាចរណ៍លើសកម្មជននយោបាយរូបនេះ ឲ្យបានត្រឹមត្រូវតាមច្បាប់ និងអាចជឿទុកចិត្តបាន ដើម្បីជៀសវាងការចោទប្រកាន់ និងការរិះគន់ពីសាធារណជនថា ជារឿងនយោបាយ។
ស្ត្រីសកម្មជនគណបក្សភ្លើងទៀនដែលសកម្មជនលើបណ្ដាញសង្គម ចាត់ទុកករណីបង្កគ្រោះថ្នាក់ចរាចរណ៍ប៉ុនដល់អាយុជីវិតរបស់អ្នកស្រីនោះថា ជាការរៀបចំជាប្រព័ន្ធ ឬរៀបចំទុកជាមុនបានយ៉ាងត្រឹមត្រូវ ដើម្បីបំបាក់ស្មារតី និងធ្វើទុក្ខបុកម្នេញផ្នែកនយោបាយនៅមុនការបោះឆ្នោតជ្រើសតាំងតំណាងរាស្ត្រ នៅខែកក្កដាខាងមុខនេះ ដោយសារសកម្មភាពរបស់ជនល្មើស និងបក្ខពួកទាំងនោះ មិនមែនជាពលរដ្ឋសាមញ្ញធម្មតានោះទេ។
ជនរងគ្រោះ គឺអ្នកស្រី ធី សុខា ហៅ ប៉ីប៉ីលី ប្រាប់វិទ្យុអាស៊ីសេរី នៅថ្ងៃទី២២ ខែមេសាថា ជនបង្កម្នាក់បើករថយន្តទំនើបមួយគ្រឿងម៉ាកឡិចស៊ីស(Lexus) សេរី៤៧០ពណ៌ខ្មៅ ពាក់ស្លាកលេខក្លែងក្លាយភ្នំពេញ 2X-0645 បានជាន់ល្បឿនយ៉ាងលឿនតម្រង់បុកទទឹងរថយន្តរបស់អ្នកស្រីកំពុងធ្វើដំណើរនៅលើដងផ្លូវ បណ្តាលឱ្យរថយន្តខូចខាតផ្នែកខាងស្តាំតែសំណាងល្អលោកស្រី និងប្តីមិនរងរបួសធ្ងន់ធ្ងរនោះទេ។ អ្នកស្រីឱ្យដឹងថា ជនបង្កស្លៀកពាក់ឯកសណ្ឋានអង្គរក្សបិទមុខបានទុកឡានចោល ហើយរត់ចូលឡានបក្ខពួកម៉ាកព្រុសពណ៌ស ដែលចតនៅក្បែរនោះចាំជួយរំដោះ និងបន្ទាប់មកក៏បើកឡានរត់គេចខ្លួនបាត់ ខណៈពលរដ្ឋនៅទីនោះប្រាប់អ្នកស្រីថា ជនបង្កអង្គុយចាំក្នុងឡានមួយសន្ទុះមកហើយមុនពេលកើតហេតុនោះ។
អ្នកស្រី ធី សុខា៖ «បើសិនជីវិតខ្ញុំអត់ថ្លៃទេ ខ្ញុំអត់មានឱកាសនិយាយឡាយ(Live)ជូនប្រជាពលរដ្ឋ ខ្ញុំដូចជាតក់ស្លុតចំពោះរូបភាពគំរាមកំហែងជីវិត ពីព្រោះជីវិតខ្ញុំថ្លៃហើយ ដោយសារខ្ញុំអត់ដែលបានធ្វើបាបគេ ហើយស្រាប់តែមានបញ្ហានេះចេះសំណាងត្រូវនឹងឡាន បើសិនមិនប៉ះកន្លែងកង់ឡានទេ ខ្ញុំគ្មានឱកាសបាននិយាយគ្នាទេ គ្មានឱកាសបន្តសកម្មភាពជាមួយគណបក្សភ្លើងទៀនទៀតទេ»។
វីដេអូដែលអ្នកស្រី ធី សុខា ហៅ ប៉ីប៉ីលី ផ្សាយផ្ទាល់ក្រោយហេតុការណ៍បុករថយន្តអ្នកស្រី៖
ហេតុការណ៍នេះបានកើតឡើងនៅម៉ោងជាង៨យប់ ថ្ងៃទី២១ ខែមេសា ខណៈពេលសកម្មជនរូបនេះ និងគ្រួសារកំពុងធ្វើដំណើរលើផ្លូវលេខ១០៤ ផ្តុំបុរីពិភពថ្មីរង្វង់មូលកួរស្រូវ នៅភូមិក្រពើទ្រោម សង្កាត់រលួស ខណ្ឌដង្កោ រាជធានីភ្នំពេញ។ ក្រោយកើតហេតុសមត្ថកិច្ចបានចុះទៅសួរនាំ និងវាស់វែងដឹករថយន្តទៅរក្សាទុករង់ចាំដោះស្រាយ នៅអធិការដ្ឋាននគរបាលខណ្ឌដង្កោ។ ទោះយ៉ាងណានៅល្ងាចថ្ងៃទី២២ ខែមេសា នេះ អ្នកស្រី ធី សុខា បានទៅដាក់ពាក្យបណ្តឹងនៅអធិការខណ្ឌដង្កោ តាមនីតិវិធីរួចហើយ។
អ្នកស្រី ធី សុខា ហៅក្រៅថា ប៉ីប៉ីលី គឺជាអតីតយុវជនគាំទ្រគណបក្សគណបក្សសង្គ្រោះជាតិ ហើយបច្ចុប្បន្នអ្នកស្រីជាសមាជិកក្រុមការងារគណបក្សភ្លើងទៀនចុះជួយខេត្តកំពង់ស្ពឺ ដែលមហាជនទូទៅមើលឃើញថា អ្នកស្រីតែងតែសកម្មក្នុងការចុះផ្សព្វផ្សាយអំពីសកម្មភាព គោលនយោបាយរបស់គណបក្សភ្លើងទៀននៅតាមមូលដ្ឋាន។ ក្រៅពីនេះអ្នកស្រីតែងបញ្ចេញមតិរិះគន់ភាពអសកម្មរបស់រដ្ឋាភិបាលលោក ហ៊ុន សែន និងអំពើអយុត្តិធម៌ក្នុងសង្គមនៅលើបណ្តេញសង្គមហ្វេសប៊ុកជាហូរហែ។ ទោះយ៉ាងណាអ្នកស្រីនៅតែរក្សាជំហរចូលរួមសកម្មភាពជួយសង្គមដោយមិនតក់ស្លុតឡើយ ទោះបីត្រូវបានគេគំរាមកំហែងក៏ដោយ។
វិទ្យុអាស៊ីសេរីមិនអាចទាក់ទងអ្នកនាំពាក្យស្នងការដ្ឋាននគរបាលរាជធានីភ្នំពេញលោក សាន សុខសីហា និងអធិការរងនគរបាលខណ្ឌដង្កោ និងនាយប៉ុស្តិ៍រដ្ឋបាលសង្កាត់រលួសលោក ចាប ណុច ដើម្បីឆ្លើយតបជុំវិញរឿងនេះបានទេ នៅថ្ងៃទី២២ ខែមេសា។
ទោះយ៉ាងណាក្ដីកន្លងមក ជនរងគ្រោះមួយចំនួន ដែលជាសកម្មជនសង្គម និងនយោបាយ តែងដាក់បណ្ដឹង ទៅអាជ្ញាធរមានសមត្ថកិច្ចដែរ ប៉ុន្តែមកទល់ពេលនេះ គ្មានករណីណាមួយ ដែលត្រូវបានអាជ្ញាធរបំបែក ឬបង្ហាញលទ្ធផលស៊ើបអង្កេតគួរឲ្យទុកចិត្តបាននោះទេ។
ជុំវិញរឿងនេះ អ្នកនាំពាក្យសមាគមការពារសិទ្ធិមនុស្សអាដហុក (Adhoc) លោក ស៊ឹង សែនករុណា មានប្រសាសន៍ថា មនុស្សមួយចំនួនយល់ថា បញ្ហាគ្រោះថ្នាក់ចរាចរណ៍នៅលើដងផ្លូវតែងតែកើតឡើងជាធម្មតា ប៉ុន្តែលោកកត់សម្គាល់ថា ករណីគ្រោះថ្នាក់ចរាចរណ៍លើសកម្មជនបក្សប្រឆាំង កន្លងមកមានភាពមិនប្រក្រតីជាច្រើនករណី ជាពិសេសជនបង្កហាក់មានចេតនាប្រព្រឹត្តលើជនរងគ្រោះ។ លោកយល់ថា រឿងគ្រោះចរាចរណ៍ចំពោះអ្នកស្រី ប៉ីប៉ីលី ស្របពេលអ្នកស្រីកំពុងធ្វើសកម្មភាពដ៏លេចធ្លោ ជាមួយគណបក្សប្រឆាំងគឺជៀសមិនផុតពីការសង្ស័យជាប់ទាក់ទងការធ្វើទុក្ខបុកម្នេញផ្នែកនយោបាយឡើយ។ ប៉ុន្តែលោកថា រឿងដែលសំខាន់នោះ គឺសមត្ថកិច្ចត្រូវបើកការស៊ើបអង្កេតដោយឯករាជ្យ និងយុត្តិធម៌ស្វែងរកជនបង្កយកមកអនុវត្តច្បាប់ឱ្យបានត្រឹមត្រូវទើបអាចបញ្ចៀសការរិះគន់ពីសហគមន៍ជាតិនិងអន្តរជាតិបាន។
លោក ស៊ឹង សែនករុណា៖ «ដើម្បីជៀសវាងការចោទប្រកាន់នេះវាលុះត្រាតែសមត្ថកិច្ចអនុវត្តច្បាប់ដោយចាប់ជនប្រព្រឹត្តមកផ្ដន្ទាទោសទៅ ហើយបញ្ជាក់អំពីគោលបំណងឱ្យបានច្បាស់លាស់នោះអាចរួចផុតពីការចោទប្រកាន់ថាការធ្វើទុក្ខបុកម្នេញផ្នែកនយោបាយ ដោយឡែកបើសិនកើត ១ករណី ២ករណី ៣ករណី ៤ករណី ឬករណីចុងក្រោយរបស់អ្នកស្រី ប៉ីប៉ីលី មិនបានចាប់ជនប្រព្រឹត្តយកមកទទួលទោសទណ្ឌតាមច្បាប់ អាហ្នឹងជៀសមិនផុតទេថាវាជាការធ្វើទុក្ខបុកម្នេញផ្នែកនយោបាយ»។
ការបោះឆ្នោតជ្រើសតាំងតំណាងរាស្ត្រ នីតិកាលទី៧ កាន់តែខិតជិតចូលមកដល់នេះ ថ្នាក់ដឹកនាំ និងសកម្មជនបក្សភ្លើងទៀន មួយចំនួនកំពុងរងការចាប់ខ្លួន ការប្តឹងផ្តល់តាមផ្លូវតុលាការ ការគំរាមកំហែងដល់ជីវិត វាយធ្វើបាប គប់ដុំថ្មចូលផ្ទះ និងជិះម៉ូតូ ឬឡានដេញបុកពីជនមិនស្គាល់មុខ ហើយអ្នកខ្លះទៀតបានស្លាប់ក្នុងហេតុការណ៍គ្រោះថ្នាក់ចរាចរណ៍ ក្រោយពីពួកគាត់បានបង្កើនសកម្មភាពនយោបាយជាមួយគណបក្សប្រឆាំង។ រូបភាពបែបនេះ បានកើតឡើងក្រោយពីលោកនាយករដ្ឋមន្ត្រី ហ៊ុន សែន គំរាមជាសាធារណៈកាលពីពេលថ្មីៗនេះ ថា លោក អាចប្រើមនុស្សរបស់លោក ឲ្យទៅដេញវាយមន្ត្រីគណបក្សភ្លើងទៀនដល់ទីស្នាក់ការ ឬទៅវាយដល់ផ្ទះរបស់ពួកគេ។ លោក ហ៊ុន សែន បានប្រដូចគណបក្សភ្លើងទៀន ជាត្រីក្នុងកន្ត្រក លោកចាប់ច្របាច់កពេលណាក៏បាន។ លោក ហ៊ុន សែន ថែមទាំងនិយាយខាំធ្មេញថា លោកមានអំណាចហិង្សាពេញដៃ។
ថ្មីៗនេះ សមាជិកគណបក្សភ្លើងទៀន ២នាក់ទៀត រួមមានលោក គាត សុខចាន់ និងលោក ថន ចន្ថា ជាដើម ក៏ត្រូវបានជនមិនស្គាល់មុខទាំងហ្វូង បានប្រើដែករលាស់ដេញវាយលោក បណ្តាលឲ្យរបួសធ្ងន់ធ្ងរដែរ ប៉ុន្តែសមត្ថកិច្ច នៅមិនទាន់ចាប់ជនដៃដល់ណាម្នាក់មកផ្ដន្ទាទោសនៅឡើយ។ សកម្មជនបក្សភ្លើងទៀនមួយចំនួន ក៏ទទួលរងការវាយដំក្នុងទម្រង់ប្រហាក់ប្រហែលគ្នាដែរ ប៉ុន្តែពួកគេ មិនបង្ហាញជាសាធារណៈដើម្បីកុំឲ្យសកម្មជនដទៃទៀត បាក់ស្មារតី និងភ័យខ្លាចចូលរួមសកម្មភាពនយោបាយ។ សកម្មជនទាំងនេះ គឺជាជនរងគ្រោះនៃអំពើលួចវាយប្រហារចុងក្រោយគេក្នុងចំណោមសកម្មជនសង្គម និងគណបក្សនយោបាយប្រមាណ ៥០នាក់ទៀត។ ករណីទាំងនេះ អាជ្ញាធរមិនបានចាប់ខ្លួនជនដៃដល់យកមកផ្ដន្ទាទោសនោះទេ។ដោយសារតែជនល្មើសនៅក្រៅសំណាញ់ច្បាប់ ទើបករណីហិង្សាលើសកម្មជនបក្សប្រឆាំងបន្តកើតឡើងជាហូរហែ។
គណបក្សភ្លើងទៀន ប្រកាសប្រឆាំងដាច់ខាត ចំពោះការគាបសង្កត់ ការគំរាមកំហែង និងការធ្វើទុក្ខបុកម្នេញផ្នែកនយោបាយគ្រប់រូបភាព។ គណបក្សនេះទាមទារឲ្យបញ្ឈប់ជាបន្ទាន់ ដើម្បីរុញការបោះឆ្នោតនៅខែកក្កដាខាងមុននេះ ប្រព្រឹត្តទៅដោយសេរី ត្រឹមត្រូវ និងយុត្តិធម៌។ លើសពីនេះ គណបក្សភ្លើងទៀន អំពាវនាវឲ្យប្រទេសហត្ថលេខីនៃកិច្ចព្រមព្រៀងសន្តិភាពទីក្រុងប៉ារីសទាំងអស់ ឲ្យបំពេញកាតព្វកិច្ចរបស់ខ្លួន ដើម្បីជំរុញឲ្យរដ្ឋាភិបាលកម្ពុជាគោរពសិទ្ធិមនុស្ស និងការអនុវត្តលទ្ធិប្រជាធិបតេយ្យសេរីពហុបក្សឲ្យបានត្រឹមត្រូវ៕
ទស្សនាវីដេអូបទសម្ភាសន៍បន្ថែមទៀតជាមួយអ្នកស្រី ធី សុខា ហៅក្រៅថា ប៉ីប៉ីលី
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។