មន្ត្រីគណបក្សភ្លើងទៀនខេត្តប៉ៃលិនថ្កោលទោសគណៈកម្មាធិការរៀបចំបោះឆ្នោតខេត្តនេះហៅកាត់ថា ប៉ិច ដែលបានដកហូតសិទ្ធិឈរឈ្មោះបោះឆ្នោតរយៈពេល១០ឆ្នាំនិងពិន័យជាប្រាក់ចំនួនពី ១០លានទៅ ១៥លានរៀល ដោយអយុត្តិធម៌។ មន្ត្រីសង្គមស៊ីវិល លើកឡើងថា វិធានការរបស់ប៉ិចនេះជាការរឹតត្បិតសិទ្ធិ សេរីភាពរបស់ពលរដ្ឋ និងជាការធ្វើឱ្យកម្ពុជាកាន់តែដើរចាកឆ្ងាយពីគន្លងប្រជាធិបតេយ្យ។
មន្ត្រីគណបក្សប្រឆាំងខេត្តប៉ៃលិនអះអាងថា ពួកគេមិនបានប្រព្រឹត្តខុសច្បាប់ដូចការចោទប្រកាន់របស់គណៈកម្មាធិការរៀបចំបោះឆ្នោតខេត្តប៉ៃលិនឡើយ។
ប្រធានប្រតិបត្តិគណបក្សភ្លើងទៀន ខេត្តប៉ៃលិន លោក ខឹម មុន្នីកុសល ប្រាប់វិទ្យុអាស៊ីសេរីនៅថ្ងៃទី១៨កក្កដាថា គណៈកម្មាធិការរៀបចំការបោះឆ្នោតខេត្តប៉ៃលិនមិនគួរចាត់វិធានមកលើរូបលោកយ៉ាងតក់ក្រហល់ ដោយគ្រាន់តែលោកណែនាំឱ្យពលរដ្ឋប្រើសិទ្ធិអំណាចរបស់ខ្លួនក្នុងពេលបោះឆ្នោតនោះទេ។ លោក ចាត់ទុកវិធានការរបស់ប៉ិចនេះថា ជាការអនុវត្តតាមបញ្ជារបស់អាជ្ញាធរគណបក្សកាន់អំណាចដើម្បីរារាំងមិនឱ្យពួកលោកចូលរួមឈរឈ្មោះឱ្យពលរដ្ឋបោះឆ្នោតលើកក្រោយទៀត។
លោក ខឹម មុន្នីកុសល៖ «សេរីភាពនៃការធ្វើនយោបាយនេះគឺគណបក្សប្រឆាំងគឺចង្អៀតមែនទែនមិនអាចធ្វើអីបាន។បញ្ចេញមតិបន្តិចបន្តួចត្រូវគេចាប់គេចង អីចឹងផ្ទុយពីគណបក្សប្រជាជនធ្វើអីក៏បានសម្រេចតែចិត្ត។អីចឹងផលប៉ះពាល់គឺមានធំធេងណាស់ ទៅថ្ងៃមុខទៅអ្វីដែលខ្ញុំសង្កេតឃើញហ្នឹងគឺវាលែងមានលំហប្រជាធិបតេយ្យទៀតហើយ វាក្លាយទៅជារបរផ្ដាច់ការកុំមុយនិស ចំតួដូចសម័យខ្មែរក្រហមវិញហើយ » ។
ប្រតិកម្មរបស់មន្ត្រីគណបក្សប្រឆាំងធ្វើឡើង បន្ទាប់ពីប៉ិចខេត្តប៉ៃលិន បានយកលិខិតចំនួន ២ច្បាប់ ទៅបិទនៅទីស្នាក់ការគណបក្សភ្លើងទៀនខេត្តប៉ៃលិន ដកហូតសិទ្ធិឈរឈ្មោះបោះឆ្នោតរបស់លោក ខឹម មុន្នីកុសល និងមន្ត្រីជាន់ខ្ពស់គណបក្សខេត្តនេះម្នាក់ទៀត គឺកញ្ញា ស៊ុន សុភា មិនឱ្យឈរឈ្មោះឱ្យគេបោះឆ្នោតរយៈពេល ១០ឆ្នាំ និងពិន័យជាប្រាក់ម្នាក់ពី ១០ ទៅ ១៥លានរៀល(១៥.០០០.០០០)។ ប្រធានគណៈកម្មាធិការរៀបចំការបោះឆ្នោតខេត្តប៉ៃលិន លោក ចេន ញ៉ាន់ បញ្ជាក់ក្នុងលិខិតចុះថ្ងៃទី១៧កក្កដាថា សេចក្ដីសម្រេចនេះធ្វើឡើងតាមបណ្ដឹងរបស់លោក ហ៊ាន រចនា ដែលជាមន្ត្រីគណបក្សប្រជាជនកម្ពុជា បានប្ដឹងមកប៉ិចកាលពីថ្ងៃទី១៤ កក្កដា ទុកជាការត្រឹមត្រូវតាមច្បាប់។
វិទ្យុអាស៊ីសេរីមិនអាចសុំការឆ្លើយតបបញ្ហានេះពីប្រធានប៉ិចខេត្តប៉ៃលិន លោក ចេន ញ៉ាន់ បានទេនៅថ្ងៃទី១៨ កក្កដា ដោយលោកចុចបិទទូរស័ព្ទ នៅពេលប្រាប់ថា វិទ្យុអាស៊ីសេរី។
ទោះជាយ៉ាងណាក្ដី វិធាននេះធ្វើឡើងបន្ទាប់ពីថ្មីៗ នេះ ព្រះមហាក្សត្រ នរោត្ដម សីហមុនី បានឡាយព្រះហស្តលេខាប្រកាសឱ្យប្រើប្រាស់វិសោធនកម្មច្បាប់បោះឆ្នោតថ្មីតាមការចង់បានរបស់លោកនាយករដ្ឋមន្ត្រី ហ៊ុន សែន បន្ទាប់ពីសភាឯកបក្សបានអនុម័តយ៉ាងតក់ក្រហល់។
ទោះជាយ៉ាងណា អ្នកនាំពាក្យសមាគមការពារសិទ្ធិមនុស្សអាដហុក(Adhoc) លោក ស៊ឹង សែនករុណា មានប្រសាសន៍ថា ការយកច្បាប់នេះមកប្រើប្រាស់ក្នុងស្ថានការណ៍បែបនេះកាន់តែធ្វើឱ្យកម្ពុជាដើរចាកឆ្ងាយពីគន្លងប្រជាធិបតេយ្យ។
លោក ស៊ឹង សែនករុណា៖ «ការបោះឆ្នោតមកដល់ម្ដងៗសម្ពាធនយោបាយគឺមានភាពធ្លាក់ចុះ ហើយមានសភាពតានតឹងឡើងវាដដែល។ ហើយបញ្ហានេះវាអាចជះឥទ្ធិពលនៃដំណើរនៃលទ្ធិប្រជាធិបតេយ្យ រួមទាំងការបោះឆ្នោតមួយ ដែល មានជំនឿ ឬការជឿទុកចិត្តពីសហគមន៍អន្តរជាតិនានាដែរ ព្រោះអាហ្នឹងប្រសិនបើមិនមានការរៀបចំមួយដោយមានភាពសេរីត្រឹមត្រូវនឹងយុត្តិធម៌ ប្រកបដោយបរិយាកាសមួយ ដែលមានការចូលរួមសកម្មពីគ្រប់ភាគី អាហ្នឹងវានឹងរងការរិះគន់ពីសហគមន៍អន្តរជាតិនានាបន្តទៅទៀតហើយ » ។
កាលពីថ្ងៃទី១៧កក្កដា គណៈកម្មាធិការរៀបចំការបោះឆ្នោតរាជធានីភ្នំពេញ ក៏បានចាត់វិធានការទៅថ្នាក់ដឹកនាំគណបក្សសង្គ្រោះជាតិចំនួន១៦នាក់ដែរ មានជាអាទិ៍ លោក សម រង្ស៊ី អ្នកស្រី មួរ សុខហួរ លោក អេង ឆៃអ៊ាង លោក ឡុង រី និងមនុស្សមួយចំនួនទៀត ត្រូវបានលុបឈ្មោះចេញពីបញ្ជីឈ្មោះ និងដកសិទ្ធិឈរឈ្មោះឱ្យគេបោះឆ្នោតរយៈពេលពី២០ទៅ២៥ឆ្នាំ។ វិធានការនេះធ្វើឡើងស្របពេលដែលមន្ត្រីគណបក្សប្រឆាំងធ្វើយុទ្ធនាការគួសខ្វែងសន្លឹកឆ្នោតចោល។ក្រៅពីនេះមន្ត្រីគណបក្សប្រឆាំងនិងពលរដ្ឋខ្មែរនៅក្រៅប្រទេសបានរួមគ្នាធ្វើបាតុកម្មប្រឆាំងនឹងការបោះឆ្នោតជាតិនៅថ្ងៃទី២៣កក្កដាខាងមុខ ដោយបានធ្វើរូបទីងមោងរូបលោក ហ៊ុន សែន ដាក់ក្នុងមឈូស ដង្ហែនៅទីកន្លែងដែលពួកគេធ្វើបាតុកម្មនោះរៀងៗ ខ្លួនថែមទៀតផង។
មន្ត្រីសង្គមស៊ីវិលមើលឃើញថា ចំណាត់ការនេះជាការធ្វើទុក្ខបុកម្នេញផ្នែកនយោបាយ ដើម្បីរាំងខ្ទប់ដល់អ្នកដែលមានមតិផ្ទុយពីរដ្ឋាភិបាលនិងមន្ត្រីគណបក្សប្រឆាំងមិនឱ្យចូលរួមប្រកួតប្រជែងការបោះឆ្នោតលើកក្រោយទៀត៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។