ជំទប់ទី២ជាប់ឆ្នោតគណបក្សភ្លើងទៀនស្រុករុក្ខគិរី ខេត្តបាត់ដំបងស្នើឱ្យតុលាការទម្លាក់ចោលការចោទប្រកាន់ពីបទញុះញង់ពាក់ព័ន្ធនឹងការបង្ហោះសាររិះគន់អាជ្ញាធរមូលដ្ឋានដើម្បីឱ្យលោកមានឱកាសបម្រើពលរដ្ឋឱ្យបានពេញលេញ។ សំណើរបស់មន្ត្រីបក្សប្រឆាំងនេះធ្វើឡើងបន្ទាប់ពីតុលាការកោះហៅឱ្យចូលខ្លួនបំភ្លឺនៅថ្ងៃទី២២ កញ្ញា។
មន្ត្រីគណបក្សភ្លើងទៀនស្រុករុក្ខគិរី នៅតែអះអាងថា លោកជាមនុស្សស្អាតស្អំនិងមិនបានប្រព្រឹត្តខុសច្បាប់អ្វីឡើយ ដូច្នេះតុលាការគួរតែទម្លាក់បទចោទមកលើរូបលោក។
ជំទប់ទី២ឃុំព្រែកជីក ស្រុករុក្ខគិរី លោក សំ បូរី ប្រាប់វិទ្យុអាស៊ីសេរី នៅថ្ងៃទី២១ កញ្ញា ថា តាំងពីឡើងកាន់តំណែងជំទប់ទី២មក លោកបំពេញការងារជួយពលរដ្ឋមិនបានពេញដៃពេញជើងនោះទេដោយសាររវល់ដំណើរការក្ដីក្ដាំនៅតុលាការ។ លោកស្នើឱ្យតុលាការទម្លាក់បទចោទលើរូបលោកដើម្បីមានឱកាសបម្រើពលរដ្ឋឱ្យបានពេញលេញដោយពុំមានការភ័យខ្លាច។
លោក សំ បូរី ៖ «សព្វថ្ងៃខ្ញុំទទួលបន្ទុកខាងដោះស្រាយទំនាស់ហ្នឹងក៏ប្រជាពលរដ្ឋលោកទាក់ទងមកស្ទើរតែប្រចាំថ្ងៃទៅហើយ។ ដោយសារគាត់គិតថា មានគណបក្សប្រឆាំងអីចឹងទៅកុំឱ្យមានតែមួយអីចឹងទៅគាត់មកជួបមកសួរពិភាក្សាអីចឹងទៅ។ ហើយដល់ពេលខ្ញុំមិនសូវបានទៅបំពេញការងារអីពេញលេញទេ បើរវល់តែតុលាការហៅខ្ញុំត្រូវការទៅរកមេធាវី។ មេធាវីថា គាត់រវល់ត្រូវខ្ញុំសុំពន្យារពេលរត់ទៅរត់មក ឡើងចុះគឺចំណាយអស់ថវិកាច្រើនអីចឹងមានការលំបាកទាំងចិត្តលំបាកទាំងផ្នែកសេដ្ឋកិច្ច»។
សំណើរបស់មន្ត្រីគណបក្សប្រឆាំងនេះបន្ទាប់ពីព្រះរាជអាជ្ញា រងអមសាលាដំបូងខេត្តបាត់ដំបងលោក ដួង សារ៉ន បានកោះហៅលោក សំ បូរី ឱ្យចូលខ្លួនបំភ្លឺនៅសាលាដំបូងខេត្តនេះ នៅថ្ងៃទី២១ កញ្ញា ប៉ុន្តែត្រូវបានមេធាវីការពារក្ដីឱ្យលោក សំ បូរី សុំពន្យារពេលចូលបំភ្លឺនៅរសៀលថ្ងៃទី២២ កញ្ញា វិញ។ តុលាការបានចោទប្រកាន់លោក សំ បូរី ពីបទបរិហារកេរ្តិ៍ជាសាធារណៈនិងញុះញង់ឱ្យមានការរើសអើងពាក់ព័ន្ធនឹងការបង្ហោះសារតាមបណ្ដាញសង្គមហ្វេសប៊ុក រិះគន់អាជ្ញាធរថាចុះឈ្មោះពលរដ្ឋក្រីក្រទទួលប្រាក់ឧបត្ថម្ភពីរដ្ឋាភិបាលគ្មានតម្លាភាព។
ជុំវិញរឿងនេះមន្ត្រីសម្របសម្រួលសមាគមការពារសិទ្ធិមនុស្សអាដហុក (Adhoc) ខេត្តបាត់ដំបង និងខេត្តប៉ៃលិនលោក យិន ម៉េងលី ដែលបានចុះស្រាវជ្រាវដល់ទីកន្លែងរកឃើញថា សំណុំរឿងនេះពុំមែនជាទង្វើខុសច្បាប់នោះទេ ពីព្រោះជារឿងពិតជាក់ស្ដែង។ លោកបញ្ជាក់ថា លោក សំ បូរី បង្ហោះសារតាមបណ្ដាញសង្គមរិះគន់អាជ្ញាធរជាសិទ្ធិសេរីភាពសម្ដែងមតិរបស់ពលរដ្ឋស្របតាមរដ្ឋធម្មនុញ្ញ។
លោក យិន ម៉េងលី៖ «ខ្ញុំក៏សំណូមពរសុំឱ្យខាងព្រះរាជអាជ្ញាតម្កល់រឿងទុកឥតចាត់ការទៅ ព្រោះរឿងនេះវានៅក្នុងដំណាក់កាលនៃព្រះរាជអាជ្ញានៅឡើយទេ អត់ទាន់បានធ្វើការចោទប្រកាន់នៅឡើយទេ។ ហើយខ្ញុំសង្ឃឹមថា ក្រោយពីធ្វើការសាកសួរលោកព្រះរាជអាជ្ញាលោកនឹងតម្កល់រឿងនេះទុកចោលឥតចាត់ការទៅតាមតួនាទីទៅតាមនីតិវិធីរបស់លោកព្រះរាជអាជ្ញា ដើម្បីឱ្យស្ថានភាពនៃសេរីភាពក្នុងការបញ្ចេញមតិរបស់យើងមានភាពកាន់តែប្រសើរឡើងបាទ»។
កាលពីខែកក្កដាឆ្នាំ២០២០ជំទប់ទី២គណបក្សភ្លើងទៀនលោក សំ បូរី ត្រូវបានអាជ្ញាធរមូលដ្ឋានកោះហៅចូលបំភ្លឺចំនួន២ លើករួចមកហើយ ដោយលើកដំបូងនៅសាលាឃុំព្រែកជីក និងលើកទី២ បំភ្លឺនៅអធិការដ្ឋាននគរបាលស្រុករុក្ខគិរី។ មេឃុំព្រែកជីកបានចោទប្រកាន់លោកថា បានបង្ហោះសារមួលបង្កាច់អាជ្ញាធរខុសពីការពិត។ ការចោទប្រកាន់បែបនេះ បន្ទាប់ពីលោក សំ បូរី បានបង្ហោះសារនៅលើហ្វេសប៊ុករបស់លោកថា មានពលរដ្ឋក្រីក្រមួយគ្រួសារនៅឃុំព្រែកជីក មានជីវភាពក្រីក្ររកព្រឹកខ្វះល្ងាច ប៉ុន្តែអាជ្ញាធរមិនបានដាក់ឈ្មោះពលរដ្ឋរូបនេះក្នុងបញ្ជីជនក្រីក្រដើម្បីទទួលប្រាក់ឧបត្ថម្ភពីរដ្ឋាភិបាលនោះឡើយ។
នៅស្រុករុក្ខគិរីមានមន្ត្រីគណបក្សភ្លើងទៀនចំនួន២នាក់គឺ លោក សំ បូរី និងលោក សុខ សឿម ត្រូវបានតុលាការចោទប្រកាន់ពីបទញុះញង់ ។ ក្នុងនោះលោក សុខ សឿម បានរត់ភៀសខ្លួនទៅក្រៅប្រទេស កាលពីខែកក្កដា ឆ្នាំ២០២៣ បន្ទាប់ពីត្រូវបានតុលាការផ្ដន្ទាទោសដាក់ពន្ធនាគារ១ឆ្នាំកន្លះ។
មន្ត្រីសង្គមស៊ីវិលចាត់ទុករឿងក្ដីក្ដាំទាំងនេះថា ជាការធ្វើទុក្ខបុកម្នេញផ្នែកនយោបាយដោយសារតែពួកគេជាមន្ត្រីគណបក្សប្រឆាំងដែលមានពលរដ្ឋគាំទ្រច្រើននៅក្នុងមូលដ្ឋាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។