សកម្មជនគណបក្សប្រឆាំងម្នាក់រស់នៅសង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ ត្រូវជនមិនស្គាល់មុខពីរនាក់ជិះម៉ូតូពីក្រោយលួចវាយនឹងដំបងបណ្ដាលឱ្យរងរបួសបែកក្បាលនៅថ្ងៃទី២០ ខែមករានេះ។ សង្គមស៊ីវិល និងមន្ត្រីបក្សប្រឆាំងស្នើទៅសមត្ថកិច្ចស្រាវជ្រាវករណីនេះ ដោយកុំប្រកាន់និន្នាការនយោបាយ។
សកម្មជនគណបក្សសង្គ្រោះជាតិ លោក ខៀវ ឌីន ដែលត្រូវជនមិនស្គាល់មុខវាយធ្វើបាបនោះកំពុងសម្រាកព្យាបាលដោយរបួសលោកត្រូវដេរអស់ចំនួន ១០ថ្នេរ។ ក្រោយកើតមានបញ្ហានេះលោកក៏បានដាក់ពាក្យប្ដឹងទៅសមត្ថកិច្ចមូលដ្ឋាន ដើម្បីស្វែងរកដៃដល់ដែរ។
ភរិយា លោក ខៀវ ឌីន ឲ្យអាស៊ីសេរីដឹងថា ជនសង្ស័យបានវាយចំក្បាលប្តីលោកស្រី ដែល បណ្ដាលឲ្យគាត់រងរបួសធ្ងន់។ លោកស្រីឲ្យដឹងថា មុនកើតហេតុប្តីលោកស្រីមិនដែលមានជម្លោះជាមួយអ្នកទេ។ លោកស្រីព្រួយបារម្ភថា រឿងនេះជាប់ពាក់ព័ន្ធនឹងនយោបាយព្រោះស្វាមីលោកស្រីធ្លាប់ជាសកម្មជនគណបក្សសង្គ្រោះជាតិ។ លោកស្រីបន្តទៀត កាលពីគណបក្ស នេះមិនទាន់ត្រូវបានរំលាយ ធ្លាប់មានមន្ត្រីបក្សកាន់អំណាចមកចរចាឲ្យប្តីលោកស្រីទៅធ្វើការជាមួយគេ ប៉ុន្តែគាត់បានបដិសេធ៖ « គាត់ ( លោក ខៀវ ឌីន ) និយាយអត់ទាន់កើតផងគាត់ហ៊ឹងត្រចៀក ហើយវិលមុខ ដេរដប់ថ្នេរអូន ត្រូវរបួសពីរកន្លែងពេទ្យគេនៅខាងមុខហ្នឹងផុង»។
លោក ខៀវ ឌីន គឺជាបេក្ខភាពសមាជិកក្រុមប្រឹក្សាគណបក្សសង្គ្រោះជាតិនៅខណ្ឌពោធិ៍សែនជ័យ រាជធានីភ្នំពេញ។ ភរិយា លោក ខៀវ ឌីន ប្រាប់ថា ក្រោយគណបក្សសង្គ្រោះជាតិត្រូវរបបក្រុងភ្នំពេញរំលាយ លោក ខៀវ ឌីន មិនបានធ្វើសកម្មភាពនយោបាយអ្វីទៀតទេ។
អធិការនគរបាលខណ្ឌពោធិ៍សែនជ័យ លោក ម៉ន វុទ្ធី ឲ្យអាស៊ីសេរីដឹងនៅល្ងាចថ្ងៃទី២០ ខែមករា ថា ជំហានដំបូងសមត្ថកិច្ចបានឆែកកាមារ៉ាសុវត្ថិភាពឃើញថា ជនសង្ស័យមានគ្នាពីរនាក់ធ្វើលួចវាយជនរងគ្រោះពីក្រោយ។ លោកបន្តថា ម៉ូតូជនសង្ស័យជិះធ្វើសកម្មភាពនោះគ្មានស្លាកលេខទេ។ ទោះយ៉ាងណាសមត្ថកិច្ចរូបនេះអះអាងថា លោកនឹងខិតខំស្រាវជ្រាវករណីនេះ ដើម្បីយកជនល្មើសមកផ្ដន្ទាទោស៖ «មើលទៅមិនទាន់អាចនិយាយកំណត់ ឬមិនកំណត់ទេ ប៉ុន្តែយើងនឹងតាមដាន ស្អែកខ្ញុំចុះទៅផ្ទាល់ទៅផ្ទះជនរងគ្រោះនាំជំនាញទៅ ដើម្បីសួរនាំគាត់ឲ្យបានច្បាស់លាស់ជាងហ្នឹង ដើម្បីបន្តឈានរកជនសង្ស័យដែលបង្កហ្នឹង»។
រាល់ពេលមានករណីលួចវាយធ្វើបាបសកម្មជនគណបក្សសង្គ្រោះជាតិ អ្នកនាំពាក្យអគ្គស្នងការនគរបាលជាតិលោក ឆាយ គឹមខឿន តែងអះអាងថា សមត្ថកិច្ចនឹងនាំជនប្រព្រឹត្តយកមកផ្ដន្ទាទោស ប៉ុន្តែមកដល់ពេលនេះមិនទាន់មានសំណុំរឿងមួយណាទាក់ ទងនឹងការធ្វើវាយធ្វើបាបសកម្មជនគណបក្សប្រឆាំង ដែលសមត្ថកិច្ច ចាប់ខ្លួនជនដៃដល់បាននៅឡើយទេ។
ប្រធានគណៈកម្មាធិការប្រតិបត្តិគណបក្សសង្គ្រោះជាតិ រាជធានីភ្នំពេញ លោក ម៉ន ផល្លា ចាត់ទុកករណីហិង្សានេះជាការគំរាមកំហែងផ្នែកនយោបាយលើមន្ត្រីគណបក្សសង្គ្រោះជាតិ។ លោកចោទប្រកាន់ថា គឺគណបក្សប្រជាជនកម្ពុជាជាអ្នកប្រព្រឹត្ត ព្រោះកន្លងមកអ្នកនាំពាក្យបក្សកាន់អំណាច លោក សុខ ឥសាន ធ្លាប់និយាយថា គណបក្សនេះបានចិញ្ចឹមឆ្កែសម្រាប់ខាំក្បាលក្រុមចោរ និងក្រុមឧទ្ទាមក្រៅច្បាប់ដែលតែងតែមកយាយីបំផ្លាញប្រទេសជាតិខ្មែរ៖ «នេះជាការគំរាមកំហែងបំភិតបំភ័យផ្នែកនយោបាយយ៉ាងធ្ងន់ធ្ងរ»។
អ្នកនាំពាក្យសមាគម អាដហុក (ADHOC) លោក ស៊ឹង សែនករុណា ជំរុញទៅសមត្ថកិច្ចស្រាវជ្រាវ និងចាប់ខ្លួនជនប្រព្រឹត្តយកមកផ្ដន្ទាទោស ដើម្បីជៀសវាងការចោទប្រកាន់ និងសង្ស័យថា ជាប់ពាក់ព័ន្ធរឿងនយោបាយ។ លោកបន្តថា នៅក្នុងសង្គមប្រជាធិបតេយ្យ និងប្រទេសមានសន្តិសុខ សុវត្ថិភាព មិនគួរកើតមានបញ្ហាដដែលៗ បែបនេះទេ៖ «បើសិនជាការប្រើហិង្សាក្នុងន័យរើសអើងនិន្នាការនយោបាយ ចំពោះសកម្មជន ដែលគាំទ្រគណបក្សជំទាស់ហ្នឹង ជារូបមួយអាក្រក់ទីមួយខុសច្បាប់ប្រទេសកម្ពុជា។ ទី២ បង្ហាញសង្គមកម្ពុជាយើងធ្វើឲ្យមានការរើសគ្នាទៅវិញទៅមកកាន់តែអាក្រក់ទៅៗ » ។
នៅរយៈពេលចុងក្រោយនេះ សកម្មជនគណបក្សសង្គ្រោះជាតិជាច្រើនរូបនៅរាជធានីភ្នំពេញ បានរងអំពើហិង្សា និងការតាមធ្វើបាបជាហូរហែ។ លោក ម៉ន ផល្លា ឱ្យដឹងថា នេះជាករណីទី១៤ ហើយ ដែលសកម្មជនគណបក្សសង្រ្គោះជាតិត្រូវជនមិនស្គាល់មុខវាយធ្វើបាប ហើយមិនទាន់មានសំណុំរឿងមួយណា ត្រូវសមត្ថកិច្ចបំបែកបាននៅឡើយទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។