មន្ត្រីបក្សប្រឆាំង និងមន្ត្រីសង្គមស៊ីវិលទទូចឱ្យអាជ្ញាធរពន្លឿននីតិវិធីស្វែងរកជនល្មើសដែលលបស្ទាក់វាយសកម្មជននយោបាយ និងយុវជនសង្គមឱ្យបានឆាប់រហ័ស ដើម្បីបញ្ចប់ការសង្ស័យរបស់ប្រជាពលរដ្ឋ។ ការស្នើសុំបែបនេះ បន្ទាប់ពីពេលថ្មីៗនេះ សកម្មជន នយោបាយមួយចំនួន ត្រូវជនមិនស្គាល់មុខលបស្ទាក់វាយជាបន្តបន្ទាប់ ហើយមន្ត្រីអាជ្ញាធរមិនទាន់អាចវែកមុខជនល្មើសយកមកផ្ដន្ទាទោសបាននៅឡើយទេ។
អតីតតំណាងរាស្ត្រគណបក្សសង្គ្រោះជាតិ មណ្ឌលសៀមរាប លោក អ៊ុំ សំអាន ឱ្យដឹងថា លោកគ្មានជំនឿលើអាជ្ញាធរកម្ពុជាក្នុងការវែកមុខជនដៃដល់មកអនុវត្តទោសបាននោះទេ ដោយសារលោកយល់ថា នេះជារៀបចំជាប្រព័ន្ធរបស់អាជ្ញាធរកម្ពុជា។ លោកបន្តថា សកម្មភាពនៃការវាយឆ្មក់ជាប្រព័ន្ធនេះ គឺដើម្បីគំរាមកំហែង បំបាក់ស្មារតីយុវជនដែលហ៊ានឈឺឆ្អាលក្នុងសង្គម បញ្ឈប់សកម្មភាពរបស់ខ្លួន។ លោកស្នើឱ្យរដ្ឋាភិបាលកម្ពុជាបញ្ឈប់ការធ្វើទុក្ខបុកម្នេញលើសកម្មជនគណបក្សសង្គ្រោះជាតិ និងយុវជនសង្គម ហើយងាកមករកការគោរពសិទ្ធិមនុស្ស និងគោរពលទ្ធិប្រជាធិបតេយ្យ៖ «ខ្ញុំអត់មានជំនឿទៅលើអាជ្ញាធរ និងតុលាការតេឡេរបស់របបក្រុងភ្នំពេញថា អាចវែកមុខដើម្បីចាប់ជនល្មើសទាំងនោះ ដើម្បីមកផ្ដន្ទាទោសនោះទេ ព្រោះយើងដឹងហើយថា ការលួចវាយប្រហារនេះគឺរៀបចំដោយរបបក្រុងភ្នំពេញ ដូច្នេះរឿងអីគេត្រូវចាប់គ្នាគេហ្នឹងយកមកដាក់គុក ឬក៏មកផ្ដន្ទាទោស ទៅតាមផ្លូវច្បាប់»។
អំពើហិង្សា លបវាយសកម្មជនបក្សប្រឆាំង និងសង្គមស៊ីវិល កើតឡើងជាហូរហែ បណ្ដាលឱ្យសកម្មជន ជាច្រើនរងរបួសធ្ងន់ស្រាល។ អ្នករងរបួសពីអំពើហិង្សាទាំងអស់ មិនទាន់ទទួលបានយុត្តិធម៌ទេ ខណៈជនរងគ្រោះខ្លះ ស្លាប់បាត់ទៅហើយ ឯជនរងគ្រោះខ្លះ ត្រូវជាប់ពន្ធនាគារពីបទញុះញង់ និងខ្លះទៀត ធ្លាក់ខ្លួន ជាជនពិការក៏មាន។
លោក គង់ រ៉ៃយ៉ា កាលពីសប្ដាហ៍មុន ត្រូវជនមិនស្គាល់មុខ២នាក់ បានជិះម៉ូតូស្ទាក់វាយដោយប្រើដែកតាន់បំណងវាយក្បាលឱ្យរបួស ប៉ុន្តែរអិលត្រូវស្មា និងធាក់ផ្ដួលម៉ូតូលោក បំណងបង្កឱ្យមានគ្រោះថ្នាក់ចរាចរណ៍ នៅចំណុចផ្លូវ២០១១ ជិតផ្សារឈូកមាស រាជធានីភ្នំពេញ ខណៈលោកកំពុងដឹកទឹកឃ្មុំយកទៅលក់។
ចំណែក សមាជិកក្រុមប្រឹក្សាសង្កាត់ជាប់ឆ្នោតច្បារអំពៅទី២ រាជធានីភ្នំពេញ លោក ជឿន សារឹម កាលពីថ្ងៃទី១២ ធ្នូ កន្លងទៅ ក៍ត្រូវជនដៃដល់ស្ទាក់វាយដោយដំបង បណ្ដាលឱ្យរងរបួសយ៉ាងដំណំ។ សកម្មជនបក្សប្រឆាំង អស់ជំនឿនឹងសមត្ថភាពរបស់សមត្ថកិច្ច និងតុលាការខ្មែរ ហើយងាកទៅស្វែងរកអង្គការសិទ្ធិមនុស្សជួយអន្តរាគមន៍ដើម្បីផ្ដល់ការការពារសុវត្ថិភាព។
សកម្មជនមូលដ្ឋានរបស់គណបក្សសង្គ្រោះជាតិជា អតីតអ្នកទោសនយោបាយមួយចំនួន បាននាំគ្នាដាក់ពាក្យប្តឹងទៅការិយាល័យឧត្តមស្នងការ អង្គការ សហប្រជាជាតិទទួលបន្ទុកសិទ្ធិមនុស្សនៅកម្ពុជា ឱ្យជួយអន្តរាគមន៍ រឿងសុវត្ថិភាពរបស់ពួកគាត់ ក្រោយរងការគំរាមកំហែងពីជនមិនស្គាល់មុខ និងការយាយីពីសំណាក់អាជ្ញាធរមូលដ្ឋាន កាលពីថ្ងៃទី២០ ខែធ្នូ។
ប្រធានផ្នែកសិទ្ធិមនុស្សនៃសមាគមការពារសិទ្ធិមនុស្សអាដហុក (Adhoc) លោក នី សុខា មានប្រសាសន៍ថា ប្រសិនបើសមត្ថកិច្ចមិនអាចវែកមុខរកជនល្មើសមកបានផ្ដន្ទាទោសបានទេ នោះនឹងបង្កើតការសង្ស័យដល់ប្រជាពលរដ្ឋថា ករណីហិង្សាបង្ករបួសនេះជារឿងនយោបាយ និងធ្វើឱ្យពួកគេអស់ជំនឿលើរដ្ឋាភិបាល។ លោកបន្តថា ការស៊ើបអង្កេតយឺតយ៉ាវ នឹងបង្កជាក្តីបារម្ភដល់សកម្មជននយោបាយ យុវជនសង្គម និងសកម្មជនសិទ្ធិមនុស្សដទៃទៀត ដោយបង្ហាញពីអសន្តិសុខសង្គមនៅក្នុងប្រទេសកម្ពុជា និងភាពអយុត្តិធម៌ដល់ជនរងគ្រោះផងដែរ។ លោកស្នើឱ្យអាជ្ញាធរ គួរពន្លឿនការស៊ើបអង្កេត និងចាប់យកជនដៃដល់មកផ្ដន្ទាទោសឱ្យបានឆាប់ ដើម្បីរកយុត្តិធម៌ជូនជនរងគ្រោះ និងបញ្ចប់ការសង្ស័យដល់ប្រជាពលរដ្ឋ៖ «រឿងសំខាន់បំផុតនោះ ដើម្បីកុំឱ្យមានការចោទប្រកាន់ថា រឿងហ្នឹងជារឿងនយោបាយ ឬក៏ជារឿងមានអ្នកនៅពីក្រោយ អ្នកមាននៅពីស្អីហ្នឹង ខ្ញុំគិតថា មានតែសមត្ថកិច្ចទេ ដែលខិតខំរកជនល្មើសឱ្យឃើញមក ជនដៃដល់ឱ្យឃើញមក ហើយយកមកផ្ដន្ទាទោសតាមច្បាប់ទៅ នោះវានឹងធ្វើឱ្យមហាជនគេអស់មន្ទិលសង្ស័យ ហើយក៏គេមានជំនឿទៅលើសមត្ថកិច្ចដែរ ប៉ុន្តែបើសិនជារឿងហ្នឹងមិនអាចរកឃើញទេ អាហ្នឹងគេហាក់បីដូចជាអស់ហើយ អស់ជំនឿហើយ។ មួយដំណាក់កាលទៅៗ ធ្វើឱ្យពលរដ្ឋកាន់តែអស់ជំនឿទៅលើសមត្ថកិច្ចក្នុងការរក្សាបាននូវសន្តិសុខសម្រាប់ពលរដ្ឋទូទៅ»។
អ្នកនាំពាក្យនៃស្នងការដ្ឋាននគរបាលរាជធានីភ្នំពេញ លោកវរសេនីយ៍ឯក សាន សុខសីហា បញ្ជាក់ថា សមត្ថកិច្ចកំពុងស៊ើបអង្កេតករណីលួចវ៉ៃសកម្មបក្សប្រឆាំង និងយុវជន ដោយមិនទុកករណីនេះចោលនោះទេ៖ «ខណៈហ្នឹង គឺថាសមត្ថកិច្ចកំពុងធ្វើការបន្តហើយ ជំនាញកំពុងធ្វើការ អ៊ីចឹងខ្ញុំឃើញថា គាត់សួរមកដដែលៗទាក់ទងបញ្ហាហ្នឹង។ ខ្ញុំបានបញ្ជាក់ហើយថា សមត្ថកិច្ចជំនាញគឺធ្វើការតាមជំនាញ ចុះស្រាវជ្រាវជាក់ស្ដែង ហើយក៏យើងមិនដែលបានទុកចោលទេកិច្ចការនេះដែរ»។
គិតមកដល់ពេលនេះ មានសកម្មជនគណបក្សសង្គ្រោះជាតិជាង ២០នាក់ហើយ ដែលត្រូវជនមិនស្គាល់មុខលួចវាយឱ្យរងរបួសរហូតអ្នកខ្លះធ្លាក់ខ្លួនពិការ។ ករណីភាគច្រើនកើតឡើងនៅរាជធានីភ្នំពេញ ហើយរហូតមកដល់ពេលនេះគ្មានជនប្រព្រឹត្តណាម្នាក់ត្រូវបានអាជ្ញាធររកឃើញ ឬក៏ចាប់ខ្លួនឱ្យមកទទួលទោសនោះទេ។ ករណីហិង្សាលើមន្ត្រីគណបក្សសង្គ្រោះជាតិ ច្រើនមានលក្ខណៈប្រហាក់ប្រហែលគ្នា គឺជនដៃដល់ជិះម៉ូតូពាក់មួកសុវត្ថិភាព លួចវាយជនរងគ្រោះពីក្រោយខ្នង ហើយប្រើដំបងដែកវាយសំដៅក្បាលរបស់ជនរងគ្រោះ។ ទោះជាអាជ្ញាធរអះអាងបែបនេះក្តី ប៉ុន្តែរហូតមកដល់ពេលនេះ អាជ្ញាធរមិនទាន់បង្ហាញមុខជនដៃដល់ណាម្នាក់ដែលបង្កហិង្សាឱ្យរបួសលើសកម្មជននយោបាយមកផ្ដន្ទាទោសតាមច្បាប់បាននៅឡើយទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។