មន្ត្រីជាន់ខ្ពស់គណបក្សសង្គ្រោះជាតិលើកឡើងថា នៅថ្ងៃទី២២ ខែមីនាខាងមុខ នឹងរៀបចំសមាជមហាជននៅទីក្រុងប៉ារីស៍ ប្រទេសបារាំង ដើម្បីលើកកម្ពស់ការរួបរួមសាមគ្គីគ្នានៃអ្នកគាំទ្រមកពីបណ្ដាប្រទេសទូទាំងពិភពលោក ដើម្បីឆ្ពោះទៅរកការផ្លាស់ប្ដូរមេដឹកនាំផ្ដាច់ការត្រកូល ហ៊ុន និង ស្ដារប្រជាធិបតេយ្យនៅកម្ពុជាឡើងវិញ។ រីឯអ្នកនាំពាក្យគណបក្សកាន់អំណាចថា គ្មានអ្វី ដែលរដ្ឋាភិបាលចាប់អារម្មណ៍ និងភ័យខ្លាច ចំពោះសកម្មភាពនៅក្រៅប្រទេស របស់គណបក្សប្រឆាំង នោះទេ ព្រោះលោកថា នេះគ្រាន់តែដើម្បីល្អមើលប៉ុណ្ណោះ។
ប្រធានស្ដីទីគណបក្សសង្គ្រោះជាតិ លោក សម រង្សី នៅថ្ងៃទី២៧ កុម្ភៈ បានបង្ហោះសារនៅលើទំព័រហ្វេសប៊ុក (Facebook) របស់លោក អំពាវនាវឱ្យអ្នកស្រឡាញ់ប្រជាធិបតេយ្យ និងសមាជិកអ្នកគាំទ្រ គណបក្សសង្គ្រោះជាតិទាំងអស់នៅក្រៅប្រទេស ដែលគិតគូរពីជោគវាសនាប្រទេសជាតិ ឱ្យចូលរួម សមាជមហាជន ដែលនឹងធ្វើឡើងនៅទីក្រុងប៉ារីស៍ប្រទេសបារាំង។ លោកបញ្ជាក់ថា គណបក្សនេះ នៅតែរស់រវើកក្នុងបេះដូងកូនខ្មែរគ្រប់រូប ដូចនេះ មិនថា អ្នកគាំទ្រចលនាជាតិតស៊ូ និងអ្នកតាមដានកម្លាំងផ្ការីក នៅកម្ពុជា ត្រូវតែចូលរួមឱ្យបានច្រើន។
តំណាងរាស្ត្រគណបក្សសង្គ្រោះជាតិ លោក អ៊ុំ សំអាន ប្រាប់វិទ្យុអាស៊ីសេរី នៅថ្ងៃទី២៨ កុម្ភៈថា សមាជមហាជនរបស់គណបក្សសង្គ្រោះជាតិ ដែលនឹងធ្វើឡើងទៅប្រទេសបារាំងនេះ រំពឹងថា នឹងមានអ្នកចូលរួមប្រមាណជាង ៣០០នាក់ មកពីតំបន់អឺរ៉ុប ដូចជា សហរដ្ឋអាមេរិក អូស្ត្រាលី កាណាដា និងប្រទេសអាល្លឺម៉ង់ជាដើម។ លោកថា កម្មវិធីនេះ ធ្វើឡើងដើម្បីជួបជុំអ្នកប្រជាធិបតេយ្យ និងតំណាងអ្នកគាំទ្រគណបក្សសង្គ្រោះជាតិទាំងអស់ នៅលើពិភពលោក ដើម្បីរៀបចំយុទ្ធសាស្ត្រថ្មី និងលើកកម្ពស់ការចូលរួមសាមគ្គីគ្នា ឆ្ពោះទៅរកការផ្លាស់ប្ដូរមេដឹកនាំផ្ដាច់ការត្រកូល ហ៊ុន និងស្ដារប្រជាធិបតេយ្យនៅកម្ពុជា តាមរយៈការបោះឆ្នោតដោយសេរី និងយុត្តិធម៌ត្រឹមត្រូវ នៅពេលខាងមុន។
លោក អ៊ុំ សំអាន៖«បន្ទាប់ពីសមាជហើយ យើងនឹងធ្វើអីទៀត សម្រាប់គណបក្សសង្គ្រោះជាតិ ដើម្បីឈានទៅដល់ការផ្លាស់ប្ដូរជាវិជ្ជមាននៅកម្ពុជា។ តើយើងដាក់គោលដៅយើងយ៉ាងណាឱ្យមានមានការផ្លាស់ប្ដូរជាវិជ្ជមាន ជាពិសេស ស្ដារប្រជាធិបតេយ្យ ប្ដូររបបផ្ដាច់ការនៅកម្ពុជាចេញ។ ជាពិសេស ប្ដូរត្រកូល ហ៊ុន ចេញពីអំណាចទើបកម្ពុជាទទួលបាន នូវសិទ្ធិសេរីភាព និងប្រជាធិបតេយ្យ»។
បន្ថែមពីនោះ តំណាងរាស្ត្ររូបនេះលើកឡើងថា បើទោះជាបច្ចុប្បន្ន មេដឹកនាំបក្សកាន់អំណាច គឺប្រធានគណបក្សប្រជាជនកម្ពុជាលោក ហ៊ុន សែន ហាក់មិនញញើតដៃ ក្នុងការបង្ក្រាបចាប់ចង បំបែក និងសម្លាប់អ្នកនយោបាយបក្សប្រឆាំង និងអ្នកស្នេហាជាតិក្ដី ប៉ុន្តែ អ្នកនយោបាយ ដែលស្រឡាញ់ជាតិ នៅតែបន្តបេសកកម្មរឹងមាំ តស៊ូ ដើម្បីផ្លាស់ប្ដូរមេដឹកនាំផ្ដាច់ការនៅកម្ពុជា។ លោកបន្តថា សព្វថ្ងៃពលរដ្ឋនៅក្នុងស្រុកភាគច្រើន ស្អប់ការដឹកនាំរបស់លោក ហ៊ុន សែន ដែលបង្កើតនូវអំពើអយុត្តិធម៌ ប្លន់យកដីធ្លីពលរដ្ឋ និងអសមត្ថភាពដោះស្រាយបញ្ហាសេដ្ឋកិច្ចជូនពលរដ្ឋ ដែលធ្វើឱ្យពួកគាត់ក្លាយជាទាសករ នៃបំណុល។
ជុំវិញរឿងនេះ អ្នកនាំពាក្យគណបក្សប្រជាជនកម្ពុជា លោក សុខ ឥសាន្ត ប្រាប់វិទ្យុអាស៊ីសេរី នៅថ្ងៃទី២៨ ខែកុម្ភៈថា សមាជមហាជន របស់គណបក្សសង្គ្រោះជាតិនៅក្រៅប្រទេសនេះ រដ្ឋាភិបាលគ្មានចាប់អារម្មណ៍ និងភ័យខ្លាចនោះទេ ព្រោះលោកថា បច្ចុប្បន្នបក្សប្រឆាំងទាំងនោះ បានត្រឹមតែស្រែក ដើម្បីកុំឱ្យស្ងាត់ប៉ុណ្ណោះ។ លោកថា បក្សកាន់អំណាចពុំដែលភ័យខ្លាចក្នុង ការប្រកួតប្រជែងបោះឆ្នោត ដោយសេរី និងយុត្តិធម៌ត្រឹមត្រូវឡើយ។
លោក សុខ ឥសាន្ត៖«រឿងនេះវាគ្មានអ្វីពីការលើកឡើង ទី១ កុំឱ្យគេថាអត់ការងារធ្វើ។ ទី២ ដើម្បីលៃលកពេលវេលា រៃអង្គាសលុយតែប៉ុណ្ណោះ។ ប្រហែលជាគាត់អស់លុយចាយហើយ តាមមើល។ អ៊ីចឹងគាត់បែកគំនិត ដើម្បីលើកឡើងបញ្ហាសារថ្មីម្ដងទៀត ដើម្បីរៃលុយពីបងប្អូនខ្មែរ នៅក្រៅប្រទេស»។
ទោះជាយ៉ាងណាក្ដី កាលពីថ្ងៃទី២៦ កុម្ភៈ អង្គការ Freedom House បានរកឃើញថា សេរីភាពជាមូលដ្ឋាននៅកម្ពុជា នៅតែបន្តធ្លាក់យ៉ាងខ្លាំង គួរឱ្យព្រួយបារម្ភ ខណៈដែលបច្ចុប្បន្នកម្ពុជាទទួលបានពិន្ទុសេរីភាពត្រឹមតែ ២៣ ក្នុងចំណោមពិន្ទុ ១០០។ ករណីនេះ ដោយសារតែគេរកឃើញថា នៅប្រទេសកម្ពុជា សេរីភាពក្នុងការចូលរួមបោះឆ្នោតដោយសេរី និងយុត្តិធម៌ត្រឹមត្រូវ របស់គណបក្សប្រឆាំង រងការគាបសង្កត់ និងរឹតត្បិតធ្ងន់ធ្ងរ ហើយមន្ត្រីបក្សប្រឆាំងភាគច្រើនបន្ត រងការគំរាមកំហែងគ្រប់ រូបភាពពីសំណាក់អាជ្ញាធរកម្ពុជា។ ក្នុងនោះ សារព័ត៌មានឯករាជ្យក៏ត្រូវបានបណ្ដេញចេញពីប្រទេស និងក្រុមបាតុករភាគច្រើនរងកាត់ទោសឱ្យជាប់ពន្ធនាគារក្រោមហេតុផលនយោបាយ ដែលបម្រើមហិច្ឆតាបក្សប្រជាជនកម្ពុជា។
អ្នកជំនាញផ្នែកច្បាប់ និងអភិបាលកិច្ចតាមបែបប្រជាធិបតេយ្យ លោក វ៉ន់ ចាន់ឡូត យល់ថា ការរៀបចំសមាជមហាជនរបស់គណបក្សសង្គ្រោះជាតិឡើងវិញនេះ គឺជារឿងល្អ ដើម្បីជំរុញ និងលើកទឹកចិត្តដល់អ្នកគាំទ្រគណបក្សសង្គ្រោះជាតិ ទាំងក្នុងប្រទេស និងក្រៅប្រទេស ដើម្បីសាមគ្គីគ្នាឡើងវិញ។ លោករំលឹកថា ចាប់តាំងពីឆ្នាំ២០១៣ ដល់ឆ្នាំ២០១៧ មក គណបក្សប្រឆាំងដ៏ធំ ដែលអាចឆក់យកបេះដូងប្រជាពលរដ្ឋរាប់បានលាននាក់ គឺក្រោមឈ្មោះថា គណបក្សសង្គ្រោះជាតិ ដូច្នេះ មិនគួរទុកឱ្យឈ្មោះនេះ ស្ងប់ស្ងាត់នោះទេ។ លោកបន្តថា ដើម្បីបន្តបេសកកម្មឆ្ពោះទៅមុនរឹងមាំ មេដឹកនាំបក្សគួរតែរៀបចំយុទ្ធសាស្ត្រថ្មី និងបន្តធ្វើសកម្មភាពឱ្យបានទៀងទាត់នៅមូលដ្ឋាន ក្រោមរូបភាពគណបក្សសង្គ្រោះ ដើម្បីឱ្យសហគមន៍អន្តរជាតិ និងពលរដ្ឋ ងាយស្រួល ក្នុងការតាមដាន។
លោក វ៉ន់ ចាន់ឡូត៖«រៀបចំព្យាបាលឡើងវិញនូវអ្វីដែលបាក់បែក បន្ទាប់ពីមានការរំលាយកាលពីចុងឆ្នាំ២០១៧ ហ្នឹង។ គណបក្សសង្គ្រោះជាតិ ត្រូវព្យាបាលបាក់បែក ឬការបែកខ្ញែកគ្នា ការប្រេះស្រាំ គឺត្រូវព្យាបាលឡើងវិញ ហើយត្រូវរៀបចំដាក់ចេញនូវយុទ្ធសាស្ត្រឱ្យជាក់លាក់។ សំខាន់ជំរុញឱ្យមាននូវសកម្មភាពទៀងទាត់ និងឱ្យបានសកម្ម»។
តុលាការកំពូលនៃរបបក្រុងភ្នំពេញបានប្រកាសរំលាយគណបក្សសង្គ្រោះជាតិ កាលពីថ្ងៃទី១៦ ខែវិច្ឆិកា ឆ្នាំ២០១៧ តាមបំណងរបស់ អតីតនាយករដ្ឋមន្ត្រី និងជាប្រធានព្រឹទ្ធសភា លោក ហ៊ុន សែន ដោយចោទប្រធានគណបក្សប្រឆាំងនេះ គឺលោក កឹម សុខា ថា ក្បត់ជាតិ។ តុលាការកំពូលក៏បានហាមឃាត់សិទ្ធិថ្នាក់ដឹកនាំគណបក្សសង្គ្រោះជាតិចំនួន ១១៨នាក់ មិនឱ្យធ្វើនយោបាយរយៈពេល ៥ឆ្នាំ។ បច្ចុប្បន្ន លោក កឹម សុខា កំពុងជាប់ឃុំនៅក្នុងផ្ទះរបស់លោក ក្រោយពីតុលាការបានផ្ដន្ទាទោស ឱ្យជាប់ពន្ធនាគារ ២៧ឆ្នាំ និងដកហូតសិទ្ធិធ្វើនយោបាយអស់មួយជីវិត កាលពីខែមីនា ឆ្នាំ២០២៣៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។