ថ្នាក់ដឹកនាំគណបក្សសង្គ្រោះជាតិសម្រេចលើកពេលនៃការធ្វើមាតុភូមិនិវត្តន៍ជាលើកទី២ ពីថ្ងៃទី៤ ទៅថ្ងៃទី១៥ មករា វិញ ដើម្បីរកជើងយន្តហោះថ្មី ខណៈជើងយន្តគ្រោងមកថ្ងៃទី៤ មករា ខាងមុខត្រូវក្រុមហ៊ុនផ្អាកដោយបញ្ហាជំងឺកូវីដ-១៩។ អ្នកនាំពាក្យគណបក្សកាន់អំណាចចំអកថា ថ្នាក់ដឹកនាំគណបក្សមិនហ៊ានចូលស្រុកតាមការសន្យាឡើយ ទើបបានលើកពេលម្ដងហើយម្ដងទៀត។
សេចក្តីប្រកាសព័ត៌មានរបស់គណបក្សសង្គ្រោះជាតិចេញនៅថ្ងៃទី២ ខែមករា ឱ្យដឹងថា ការផ្អាកធ្វើមាតុភូមិនិវត្តន៍នៅថ្ងៃទី៤ នេះ ដោយសារក្រុមហ៊ុនអាកាសចរណ៍ អ៊ីវ៉ា អ៊ែវ៉េ (EVA Airways) ផ្អាកការហោះហើរ។ ទោះបីជាយ៉ាងណា ថ្នាក់ដឹកនាំគណបក្សសង្គ្រោះជាតិដឹកនាំដោយ អ្នកស្រី មូរ សុខហួរ អនុប្រធានគណបក្សសង្គ្រោះជាតិ នឹងធ្វើមាតុភូមិនិវត្តន៍ទៅកម្ពុជា នៅថ្ងៃទី១៥ ខែមករាវិញ តាមក្រុមហ៊ុនអាកាសចរណ៍សិង្ហបុរី (Singapore Airline) ហើយបើគ្មានការប្រែប្រួលទេថ្នាក់ដឹកនាំគណបក្សសង្គ្រោះជាតិនឹងទៅដល់ទីលានយន្តហោះអន្តរជាតិភ្នំពេញនៅល្ងាចថ្ងៃទី១៧ ខែមករា វេលាម៉ោង ៥កន្លះល្ងាច។
អ្នកស្រី មូរ សុខហួរ ដែលដឹកនាំការធ្វើមាតុភូមិនិវត្តន៍លើកទី២នេះ ឱ្យអាស៊ីសេរីដឹងថា ក្រុមហ៊ុនអាកាសចរ អ៊ីវ៉ា អ៊ែវ៉េ ផ្ដល់ដំណឹងដល់អ្នកស្រីថា ក្រុមហ៊ុននេះត្រូវផ្អាកការហោះហើរពេញមួយខែដោយសារបញ្ហាជំងឺកូវីដ១៩។ អ្នកស្រីឱ្យដឹងទៀតថា មូលហេតុដែលអ្នកស្រីជ្រើសរើសជើងយន្តហោះ អ៊ីវ៉ា អ៊ែវ៉េ ព្រោះជើងយន្តហោះនេះពេលទៅដល់ប្រទេសកម្ពុជាក្នុងពេលថ្ងៃ ឬពេលព្រឹកដែលអ្នកស្រីយល់ថា ជាពេលវេលាល្អសម្រាប់អ្នកស្រី ចំណែកជើងហោះហើរផ្សេងទៀតទៅដល់កម្ពុជាក្នុងពេលយប់៖ «មានជើងហោះហើរតិចណាស់ចូលកម្ពុជាក្នុងពេលមានកូវីដ១៩ ខ្ញុំនឹងរកគ្រប់លទ្ធភាពទាំងអស់ដែលនាំខ្ញុំដល់ប្រទេសកម្ពុជា»។
នេះជាលើកទី២ហើយដែលថ្នាក់ដឹកនាំគណបក្សសង្គ្រោះជាតិមិនទាន់អាចចូលស្រុកតាមការសន្យា។ កាលពីថ្ងៃទី៩ ខែវិច្ឆិកា ឆ្នាំ២០១៩ ថ្នាក់ដឹកនាំគណបក្សនេះមិនអាចចូលស្រុកបាន ដោយកាលនោះរដ្ឋាភិបាលបានហាមមិនឱ្យក្រុមហ៊ុនអាកាសចរណ៍ដឹកពួកគេចូលកម្ពុជា និងហាមប្រទេសជិតកម្ពុជាមិនឱ្យពួកគេឆ្លងកាត់។
អ្នកនាំពាក្យគណបក្សប្រជាជនកម្ពុជា លោក សុខ ឥសាន ចំអកថា ការមិនវិលចូលស្រុកលើកនេះប្រហែលជាមន្ត្រីបក្សប្រឆាំងប្រមូលលុយទិញសំបុត្រយន្តហោះមិនបាន។ លោកបន្តទៀតថា ការលើកពេលរបស់គណបក្សនេះម្ដងហើយម្ដងទៀតធ្វើឱ្យមហាជនយល់ថា ថ្នាក់ដឹកនាំគណបក្សនេះមិនហ៊ានចូលស្រុកនោះទេ៖ «និយាយហើយថា អត់មានមកទេ ហើយខ្ញុំក៏និយាយដែរ ថា មកស្រុកខ្មែរនៅក្នុងអារម្មណ៍ដូចជាលោកប្រធានគាត់និយាយអ៊ីចឹងថា ជោគជ័យៗគ្រប់ពេលទាំងអស់តែមែនទែនទៅជោគជ័យនៅក្នុងអារម្មណ៍»។
ថ្នាក់ដឹកនាំគណបក្សសង្គ្រោះជាតិដឹកនាំដោយអ្នកស្រី មូរ សុខហួរ កំណត់យកថ្ងៃទី៤ មករាខាងមុខធ្វើជាថ្ងៃមាតុភូមិនិវត្តន៍លើកទី២ ដើម្បីតតាំងក្ដីនៅតុលាការ និងដើម្បីឱ្យមានដំណោះស្រាយនយោបាយឡើងវិញ។
ថ្នាក់ដឹកនាំគណបក្សនេះជាច្រើននាក់ ត្រូវតុលាការក្រុងភ្នំពេញចោទប្រកាន់លើសំណុំរឿង "ឧបឃាត" បទ "រួមគំនិតក្បត់" និងបទ "ញុះញង់" ដែលតុលាការគ្រោងនឹងជំនុំជម្រះនៅខែមករា និងខែមីនា ឆ្នាំ២០២១ខាងមុខ។
ទាក់ទងបញ្ហានេះ អ្នកជំនាញខាងវិទ្យាសាស្ត្រនយោបាយ លោក ឯម សុណ្ណារ៉ា យល់ថា ករណីដែលថ្នាក់ដឹកនាំគណបក្សប្រឆាំងមិនអាចធ្វើតាមការសន្យារបស់ខ្លួនធ្វើឱ្យតម្លៃនយោបាយ ឬប្រជាប្រិយភាពគណបក្សនេះធ្លាក់ចុះ។ លោក ឯម សុណ្ណារ៉ា លើកឡើងថា ថ្នាក់ដឹកនាំគណបក្សនេះនៅតែមិនអាចចូលស្រុកវិញបានដដែលនៅថ្ងៃទី១៥ មករាខាងមុខ៖ «ខ្ញុំគិតថា ទោះគាត់ ( អ្នកស្រី មូរ សុខហួរ ) ទិញសំបុត្រយន្តហោះថ្ងៃទី១៥ មករា ខាងមុខក៏ទៅអត់រួចដែរ ករណីគាត់ធ្វើទៅបានលុះត្រាតែគាត់សុំទិដ្ឋាការអ្នកដែលមានលិខិតឆ្លងដែនពីរ»។
លោក ឯម សុណ្ណារ៉ា យល់ថា បើថ្នាក់ដឹកនាំគណបក្សសង្គ្រោះជាតិ មានឆន្ទៈក្នុងការវិលចូលស្រុកមែននោះ ពួកគេនឹងស្វែងរកគ្រប់មធ្យោបាយដើម្បីអាចចូលស្រុកវិញបាន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។