មហាបាតុកម្មដែលដឹកនាំដោយគណបក្សសង្គ្រោះជាតិ បានចាប់ផ្ដើមដូចការរំពឹងទុកនៅព្រឹក ថ្ងៃទី១៥ ខែកញ្ញា នេះ នៅទីលានប្រជាធិបតេយ្យ។ ពលរដ្ឋជាអ្នកគាំទ្រគណបក្សសង្គ្រោះជាតិ ប្រមាណ ១០ម៉ឺននាក់ បានធ្វើដំណើរមកពីគ្រប់ទិសទីក្នុងរាជធានីភ្នំពេញ និងតាមបណ្ដាខេត្តដើម្បីចូលរួមមហាបាតុកម្មនេះ។
ចាប់តាំងពីព្រឹកព្រលឹម មេដឹកនាំគណបក្សសង្គ្រោះជាតិ គឺលោក សម រង្ស៊ី និងលោក កឹម សុខា បានដឹកនាំអ្នកគាំទ្រជាច្រើនពាន់នាក់ដើរចេញពីទីកន្លែងផ្សេងគ្នាទៅកាន់ទីលានប្រជាធិបតេយ្យ។
សូមស្ដាប់សេចក្ដីរាយការណ៍របស់អ្នកនាង ទេព សុរ៉ាវី ពីទីលានប្រជាធិបតេយ្យ៖
នៅក្នុងពេលហែក្បួនបាតុកម្មនៅព្រឹកនេះដែរ ក្រុមបាតុករដែលដឹកនាំដោយលោក សម រង្ស៊ី ប្រធានគណបក្សសង្គ្រោះជាតិ បានជួបការរារាំងមួយនៅគល់ស្ពានអាកាសក្បាលថ្នល់។ នៅទីនោះកម្លាំងកងរាជអាវុធហត្ថបានដាក់រនាំងលួសបន្លាជាច្រើនជាន់មិនអនុញ្ញាតអោយអ្នកណាម្នាក់បានឆ្លងកាត់ស្ពានអាកាស ឬឆ្លងចូលក្នុងមហាវិថីព្រះនរោត្ដម។ ក្រុមបាតុករបានងាកទៅដើរតាមផ្លូវព្រះមុនីវង្សវិញ។ ចំណែកក្បួនដែលដឹកនាំដោយលោក កឹម សុខា ពុំមានការរារាំងទេ។ យ៉ាងណានៅតាមដងផ្លូវ លោក កឹម សុខា បានទៅជួបសួរសុខទុក្ខកម្លាំងសមត្ថកិច្ចដែលការពារសុវត្ថិភាព។
ពេលទៅដល់ទីលានប្រជាធិបតេយ្យ មេដឹកនាំគណបក្សសង្គ្រោះជាតិ បានថ្លែងអំណរគុណអ្នកគាំទ្ររបស់ខ្លួន និងបានលើកទឹកចិត្តពួកគេអោយមានភាពក្លាហានក្នុងការស្វែងរកភាពយុត្តិធម៌ក្នុងការបោះឆ្នោត។ អ្នកទាំងពីរនៅតែប្រកាសមិនចូលរួមក្នុងការចរចាបែងចែកអំណាចជាមួយគណបក្សប្រជាជនកម្ពុជា ឡើយ គឺចង់បានការស៊ើបអង្កេតរកយុត្តិធម៌អោយម្ចាស់ឆ្នោត។
លោក កឹម សុខា អនុប្រធានគណបក្សសង្គ្រោះជាតិ ប្រកាសនៅក្នុងមហាបាតុកម្មនេះថា បើសិនជាការប្រជុំនៅព្រឹកថ្ងៃច័ន្ទ ទី១៦ កញ្ញា ជាមួយគណបក្សប្រជាជនកម្ពុជា មិនមានដំណោះស្រាយសមរម្យនោះទេ ក្រុមបាតុករនឹងបន្តស្នាក់នៅទីលានប្រជាធិបតេយ្យ តវ៉ាទាំងយប់ទាំងថ្ងៃបន្តទៅទៀត។ ប្រសិនបើ ការតវ៉ារយៈពេល ៣ថ្ងៃហើយនៅតែពុំមានដំណោះស្រាយ នោះមហាបាតុកម្មនឹងផ្ទុះឡើងទូទាំងប្រទេស។
លោកបញ្ជាក់ថា ការធ្វើមហាបាតុកម្មទូទាំងប្រទេសនោះ គឺធ្វើជារបៀបពហិការ រួមមាន អ្នកលក់ទំនិញនៅតាមទីផ្សារផ្អាកលក់ដូរ មន្ត្រីរាជការ កងកម្លាំងប្រដាប់អាវុធ ផ្អាកធ្វើការ គ្រូបង្រៀន ផ្អាកបង្រៀន ហើយបាតុករនឹងនាំគ្នាចាប់ផ្ដើមឈប់ទិញទំនិញ ឬប្រើប្រាស់ផលិតផលរបស់អ្នកគាំទ្រអ្នកលួចសន្លឹកឆ្នោត (គណបក្សប្រជាជនកម្ពុជា)។
លោក កឹម សុខា ក៏បានអនុញ្ញាតឲ្យបេក្ខជនតំណាងរាស្ត្រគណបក្សសង្គ្រោះជាតិ ទាំងអស់សម្រេចចិត្ត ថាតើទៅចូលរួមប្រជុំសភានៅថ្ងៃទី២៣ ខែកញ្ញា ឬអត់? លោកថា បើសិនជាតំណាងរាស្ត្រណាម្នាក់សម្រេចចិត្តចូលរួមប្រជុំ អ្នកតំណាងរាស្ត្រនោះនឹងត្រូវទទួលខុសត្រូវចំពោះម្ចាស់ឆ្នោតដោយខ្លួនឯង។
នៅក្នុងមហាបាតុកម្មនៅព្រឹកនេះដែរ មានតំណាងរាស្ត្រជាច្រើនបានឡើងប្រកាសប្ដេជ្ញាចិត្តមិនចូលរួមប្រជុំសភានៅថ្ងៃទី២៣ ខែកញ្ញា តាមការកោះអញ្ជើញរបស់ព្រះមហាក្សត្រនោះទេ។
ក្នុងឱកាសថ្លែងសុន្ទរកថាទៅកាន់ក្រុមបាតុករនៅទីលានប្រជាធិបតេយ្យ លោក សម រង្ស៊ី បានអំពាវនាវឲ្យប្រជាពលរដ្ឋដែលមានធនធាននៅរាជធានីភ្នំពេញ ជួយចូលរួមឧបត្ថម្ភម្ហូបអាហារ ទឹក មកដល់ក្រុមបាតុករក្នុងអំឡុងពេលបាតុកម្ម ៣ថ្ងៃ ដែលក្រុមបាតុករទាំងនោះនឹងស្នាក់នៅទីលានប្រជាធិបតេយ្យនេះផ្ទាល់តែម្ដង។
សូមស្ដាប់សេចក្ដីរាយការណ៍របស់អ្នកស្រី សុ ជីវី៖
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។