គណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា ហៅកាត់ថា ខុមហ្វ្រែល (COMFREL) រកឃើញថា ក្នុងឆ្នាំទី២ រដ្ឋាភិបាលនៃរដ្ឋសភានីតិកាលទី៥ បានសម្រេចការអនុវត្តគោលនយោបាយចំនួន ៦ចំណុច ហើយ ៧ចំណុចទៀត សម្រេចបានខ្លះ ក្នុងចំណោមគោលនយោបាយទាំង ៣៣ចំណុច។
អង្គការខុមហ្វ្រែល បានវាយតម្លៃលើការអនុវត្តរបស់រដ្ឋាភិបាល ផ្អែកទៅលើការដាក់ពិន្ទុរបស់ប្រជាពលរដ្ឋចំនួន ៧៩៧នាក់ ក្នុង ២៤រាជធានី ខេត្ត ដែលបានចូលរួមក្នុងវេទិកាម្ចាស់ឆ្នោត ព្រមទាំងផ្អែកទៅលើការវិភាគព័ត៌មានដែលបានមកពីរបាយការណ៍របស់ប្រព័ន្ធផ្សព្វផ្សាយ សង្គមស៊ីវិល និងរដ្ឋាភិបាល។
ជារួម ខុមហ្វ្រែល បង្ហាញថា ប្រជាពលរដ្ឋដែលបានចូលរួមផ្តល់ពិន្ទុ មានប្រមាណ ២៦ភាគរយពេញចិត្ត ប្រមាណ ៦២ភាគរយ ពេញចិត្តខ្លះ និង ១២ភាគរយ មិនពេញចិត្តនូវការអនុវត្តគោលនយោបាយរបស់រដ្ឋាភិបាល។
របាយការណ៍របស់ខុមហ្វ្រែល រដ្ឋាភិបាលបានសម្រេចនូវការអនុវត្តគោលនយោបាយការបញ្ឈប់ការផ្ដល់ដីសម្បទានសេដ្ឋកិច្ច ការបង្កើតគោលនយោបាយស្ដីពីមុខរបរ និងការងារ កំណើនសេដ្ឋកិច្ច ៧ភាគរយក្នុងមួយឆ្នាំ ការរៀបចំគោលនយោបាយដឹកជញ្ជូនទីក្រុង គោលដៅនៃចំនួនទេសចរណ៍ពីក្រៅប្រទេស និងការកាត់បន្ថយភាពក្រីក្រក្នុងអត្រា ១ភាគរយក្នុងមួយឆ្នាំ។
ចំណែកគោលនយោបាយដែលបានអនុវត្ត ឬសម្រេចបានខ្លះ រួមមានការនាំចេញអង្ករឲ្យបាន ១លានតោននៅឆ្នាំ២០១៥ ការចុះបញ្ជីដីធ្លី ការបង្កើតគោលនយោបាយជាតិស្តីពីសិទ្ធិលំនៅឋាន ការផ្ដល់សេវាទឹកស្អាតដល់ប្រជាជន ការពង្រីក ការផ្គត់ផ្គង់អគ្គីសនីពីបណ្តាញជាតិឲ្យដល់ភូមិ ការបន្តកសាងអនុវិទ្យាល័យឲ្យបានគ្រប់ឃុំ និងការរក្សាផ្ទៃនេសាទទឹកសាប។
លទ្ធផលនៃការអង្កេតរបស់ខុមហ្វ្រែល បញ្ជាក់ថា គោលនយោបាយចំនួន៣ ដែលរដ្ឋាភិបាលបានអនុវត្ត តែមិនអាចសម្រេចបានមានដូចជា ការរក្សាផ្ទៃដីដែលគ្របដណ្តប់ដោយព្រៃឈើ ការដាក់ដំណើរការរបបប្រាក់សោធននិវត្តន៍សម្រាប់កម្មករ និយោជិតក្នុងវិស័យឯកជន និងការកែលម្អផ្លូវលំជនបទ។
នាយកប្រតិបត្តិនៃអង្គការខុមហ្វ្រែល លោក គល់ បញ្ញា ថ្លែងថា នៅក្នុងរបាយការណ៍មិនបានបង្ហាញពីមូលហេតុនៃការអនុវត្តមិនបានសម្រេចគោលនយោបាយរបស់រដ្ឋាភិបាល។ លោកឆ្ងល់ថា រដ្ឋាភិបាលនៅឆ្នាំ២០១៥ មានខ្ទង់ចំណាយសម្រាប់គ្រប់វិស័យ ក៏ប៉ុន្តែ មិនអាចសម្រេចបានតាមផែនការចំណាយ៖ «(មូលហេតុ) សម្រេចបានខ្លះៗ មិនពេញ។ (ការអនុវត្តគោលនយោបាយ) ខ្ញុំមិនអាចពន្យល់បាន។ ក៏ប៉ុន្តែថវិកាជាតិ ដូចជាមានទេ ទៅក្នុងវិស័យដែលរដ្ឋាភិបាលមិនអាចអនុវត្តបាន ក៏ប៉ុន្តែមិនដឹងមូលហេតុអ្វីនៅក្រោយហ្នឹង»។
គម្រោងថវិកាជាតិឆ្នាំ២០១៥ មានចំនួនជិត ៤ពាន់ (៣.៧៥៨) លានដុល្លារសហរដ្ឋអាមេរិក។ ក្នុងថវិកាជាតិសរុប រដ្ឋាភិបាលគ្រោងចំណាយលើវិស័យសង្គមកិច្ចចំនួន ២៧,៨២ភាគរយ ចំណាយលើវិស័យការពារជាតិ សន្តិសុខ និងសណ្តាប់ធ្នាប់សាធារណៈ ចំនួន ១៦,២៤ភាគរយ ចំណាយលើវិស័យរដ្ឋបាលទូទៅចំនួន ១១,១៨ភាគរយ។
កម្មវិធីគោលនយោបាយរបស់រដ្ឋាភិបាលនីតិកាលទី៥ ផ្តោតលើវិស័យ ៤សំខាន់ៗ មានគោលនយោបាយការការពារជាតិសន្តិសុខ និងសណ្តាប់ធ្នាប់សាធារណៈ គោលនយោបាយការពង្រឹងរដ្ឋបាលសាធារណៈ វិមជ្ឈការ និងវិសហមជ្ឈការ ការពង្រឹងផ្នែកច្បាប់ និងប្រព័ន្ធយុត្តិធម៌ និងការប្រឆាំងអំពើពុករលួយ ការអភិវឌ្ឍសេដ្ឋកិច្ច និងគោលនយោបាយការអភិវឌ្ឍវិស័យអប់រំ សុខាភិបាល ការងារ វប្បធម៌ និងសង្គមកិច្ច។
អ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន មានមោទនភាពចំពោះការសម្រេចនូវការធ្វើកំណែទម្រង់ប្រព័ន្ធអប់រំ ការប្រមូលពន្ធ ការកាត់បន្ថយប្រព័ន្ធការិយាធិបតេយ្យ ជាដើម។
ឆ្លើយតបនឹងភាពបរាជ័យនៃការអនុវត្តគោលនយោបាយមួយចំនួន លោក ផៃ ស៊ីផាន បញ្ជាក់ថា គ្មានរដ្ឋាភិបាលណាមួយដែលអាចសម្រេចបានទាំងស្រុងទេ៖ «គ្មានរដ្ឋាភិបាលណាមួយក្នុងលោកអាចធ្វើបាន ១០០ភាគរយនោះទេ។ ក៏ប៉ុន្តែ ជាទូទៅ យើងធ្វើបាន ៧០ ទៅ ៨០ភាគរយ នៃអ្វីដែលបានគ្រោងនៅក្នុងគោលនយោបាយចតុកោណ។ យើងស្ថិតនៅក្នុងអ្វីដែលជាកំណែទម្រង់»។
យ៉ាងណាក៏ដោយ លោក ផៃ ស៊ីផាន មានប្រសាសន៍ថា រដ្ឋាភិបាលមិនទាន់មានរបាយការណ៍ស្តីពីការវាយតម្លៃលើការអនុវត្តគោលនយោបាយនៅឡើយទេ។ លោកថា ការវាយតម្លៃនេះ នឹងធ្វើនៅឆ្នាំទីបី នៃនីតិកាលទី៥៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖
ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។