ប្រព័ន្ធផ្សព្វផ្សាយអូស្ត្រាលី បន្តលាតត្រដាងទ្រព្យសម្បត្តិមហាសាល របស់គ្រួសារត្រកូលហ៊ុន និង មន្ត្រីរបបលោក ហ៊ុន សែន នៅប្រទេសអូស្ត្រាលី ដែលរងការសង្ស័យថា បានមកពីការលាងលុយកង្វក់ និងអំពើពុករលួយ។ ប៉ុន្តែ មន្ត្រីរបបលោក ហ៊ុន សែន អះអាងថា លោកមិនចាប់អារម្មណ៍ នឹងការចុះផ្សាយបែបនេះ នោះទេ ព្រោះលោកសម្អាងថា ជារឿងគ្រាន់តែសង្ស័យប៉ុណ្ណោះ។
ប្រព័ន្ធផ្សព្វផ្សាយអូស្ត្រាលី ABC បន្តចុះផ្សាយព័ត៌មាន កាលពីថ្ងៃទី២៥ ខែតុលា ដោយរាយនាមកូនប្រសារលោក ហ៊ុន សែន គឺលោក ឌី វិជ្ជា ដែលជាអគ្គស្នងការរងនគរបាលជាតិ ដែលមានផ្ទះតម្លៃប្រហែល ១.៥ លានដុល្លារ ហើយក្រុមហ៊ុនរបស់លោក ឌី វិជ្ជា ទើបតែលក់ឃ្លាំងមួយមានតម្លៃជាង ៥លានដុល្លារ (៥.០៨លានដុល្លារ) កាលពីខែឧសភា។
លោក ឌី វិជ្ជា ជាកូនប្រុសរបស់អតីតអគ្គស្នងការនគរបាលជាតិលោក ហុក ឡងឌី ដែលបានស្លាប់ក្នុងគ្រោះថ្នាក់ ធ្លាក់ឧទ្ធម្ភាគចក្រកាលពីឆ្នាំ២០០៨។ លោកបានរៀបការជាមួយកូនស្រីរបស់លោក ហ៊ុន សែន គឺអ្នកស្រី ហ៊ុន ម៉ាណា។
ពាក់ព័ន្ធនឹងទ្រព្យសម្បត្តិមហាសាល របស់គ្រួសារត្រកូលហ៊ុននេះ សារព័ត៌មានដដែល បានរកឃើញថា ក្មួយលោក ហ៊ុន សែន គឺលោក ហ៊ុន តូ ទិញផ្ទះតម្លៃប្រហែល ១.៣ លានដុល្លារ នៅអូស្ត្រាលីដែរ។ ប្រពន្ធរបស់លោក ហ៊ុន តូ មានទ្រព្យមួយកន្លែងទៀតតម្លៃជាង ៦សែនដុល្លារ (៦៥០.០០០) ដែលទើបផ្ទេរកម្មសិទ្ធិ ឲ្យបងប្អូនបង្កើតរបស់គាត់គ្រប់គ្រងវិញ។
ចំណែកឯមន្ត្រីរបបលោក ហ៊ុន សែន ដែលជាប្រធានអគ្គនាយកដ្ឋានពន្ធដារ គឺលោក គង់ វិបុល មានភាគហ៊ុន ក្នុងដីមួយកន្លែង ដែលលក់កាលពីខែមីនា ឆ្នាំ២០០៧ ក្នុងទឹកប្រាក់ ជាង ២១ លានដុល្លារ (២១.៤ លានដុល្លារ)។ សារព័ត៌មានអូស្ត្រាលី ABC រកឃើញថា លោក គង់ វិបុល មានទ្រព្យជាច្រើនកន្លែងទៀតនៅអូស្ត្រាលី រួមទាំងផ្ទះតម្លៃ ៦សែនដុល្លារផង។
ពលរដ្ឋខ្មែរនៅអូស្ត្រាលី និងតំណាងរាស្ត្រអូស្ត្រាលីផង សុទ្ធតែសម្ដែងការព្រួយបារម្ភ អំពីការលាងលុយកង្វក់ និងអំពើពុករលួយ ដែលអាចកើតចេញពីការកកើនទ្រព្យដ៏សម្បើមនេះ។ ពួកគាត់ ទាមទារឲ្យរដ្ឋាភិបាលអូស្ត្រាលី បើកការស៊ើបអង្កេត ក្នុងករណីនេះ។
មិនតែប៉ុណ្ណោះ តំណាងពលរដ្ឋខ្មែរនៅសហគមន៍អូស្ត្រាលី ជាពិសេសក្នុងទីក្រុង ដែនដឺណុង (Dandenong) កាន់តែព្រួយបារម្ភខ្លាំង អំពីសកម្មភាពរបស់មន្ត្រីរបបលោក ហ៊ុន សែន និង ក្រុមគ្រួសារត្រកូលហ៊ុននៅអូស្ត្រាលី ដែលបង្កការគំរាមកំហែង ដល់សេចក្តីសុខសាន្ត របស់ពួកគាត់។
តំណាងសហគមន៍ខ្មែរមួយរូប និង ជាបេក្ខជនតំណាងរាស្ត្រ របស់គណបក្សពលករ លោក តាក់ ម៉េងហ៊ាង បានប្រាប់សារព័ត៌មាន ABC ថា តាំងពីលោកមករស់នៅអូស្ត្រាលីអស់រយៈពេល ២២ ឆ្នាំមកនេះ ទើបតែពេលថ្មីៗនេះប៉ុណ្ណោះ លោកកត់សម្គាល់ឃើញសកម្មភាពបំភិតបំភ័យ និង គំរាមកំហែងជាច្រើន ដោយសារតែវត្តមានរបស់មន្ត្រីទាំងនោះ នៅក្នុងសហគមន៍ខ្មែរ។
ទោះជាយ៉ាងនេះក្តី មន្ត្រីនាំពាក្យរបបលោក ហ៊ុន សែន លោក ផៃ ស៊ីផាន ច្រានចោលការផ្សាយ របស់សារព័ត៌មាន ABC និងចាត់ទុកថាជាការផ្សាយអំពីភាពសង្ស័យប៉ុណ្ណោះ ពាក់ព័ន្ធនឹងទ្រព្យសម្បត្តិមហាសាល របស់មនុស្សទាំងនោះ។ ប៉ុន្តែ លោក ផៃ ស៊ីផាន មិនឆ្ងល់រឿងទ្រព្យសម្បត្តិឯកជន របស់មន្ត្រីរបបលោក ហ៊ុន សែន និងក្រុមគ្រួសារត្រកូលហ៊ុនទាំងនោះទេ ព្រោះអះអាងថា ទ្រព្យទាំងនោះ បានមកដោយអំពើសុចរិត។ លោកបន្តថា បើទ្រព្យនោះជាទ្រព្យមិនស្មោះត្រង់ ម្ល៉េះសមសមត្ថកិច្ចអូស្ត្រាលី ចាត់ការយូរណាស់បាត់ទៅហើយ៖ «អ្វីដែលជាព័ត៌មានតាមកាសែត យើងមិនចាត់ទុកថាជាផ្លូវការទេ។ ការបណ្ដាក់ទុន ឬ លុយ ជាអំណាច ឬដែនសមត្ថកិច្ចរបស់អូស្ត្រាលី មិនមែនជារដ្ឋាភិបាលសេពគប់ ឬ គាំទ្រនូវការលាងលុយ ឬ ការធ្វើអ្វីនោះទេ គឺគេមានប្រព័ន្ធរបស់គេ។ អូស្ត្រាលីមានតំណាងក្នុងទូតរបស់គេដែរ ហើយគេប្រយ័ត្នប្រយែង និងកិច្ចប្រឆាំងនិងការលាងលុយ និងរត់ពន្ធជាដើម»។
លោក ផៃ ស៊ីផាន អះអាងបន្ថែមថា ទោះបីមន្ត្រីរបបលោក ហ៊ុន សែន មានប្រាក់ខែមិនច្រើនក្តី ក៏ពួកគេអាចមានទ្រព្យរហូតដល់លានដុល្លារបានដែរ ដោយសារតែការរកស៊ីលក់ដីធ្លីជាដើម។
ជុំវិញការលើកឡើងពីការព្រួយបារម្ភ អំពីការគំរាមកំហែងរបស់មន្ត្រីរបបលោក ហ៊ុន សែន ទៅលើពលរដ្ឋខ្មែរនៅក្រៅប្រទេសនោះវិញ លោក ផៃ ស៊ីផាន ថា នោះគ្រាន់តែជាការភ័យខ្លាច ដែលជាលេស ដើម្បីធ្វើនយោបាយបង្ខូចកេរឈ្មោះរបបលោក ហ៊ុន សែន ប៉ុណ្ណោះ។
កន្លងមកតំណាងសហគមន៍ខ្មែរ នៅអូស្ត្រាលីរួមមានលោក ហុង លីម លោក ជា យូហ៊ន និង ភរិយាលោកបណ្ឌិត កែម ឡី គឺអ្នកស្រី ប៊ូ រចនា ផង ធ្លាប់ទទួលបានសារគំរាមកំហែងដល់អាយុជីវិត ដោយសារតែភាពឈានមុខក្នុងការតវ៉ាទាមទារយុត្តិធម៌ និងប្រជាធិបតេយ្យ។ លោក ហ៊ុន សែន មុនធ្វើដំណើរទស្សនកិច្ចទៅអូស្ត្រាលី កាលពីខែមីនា ក៏បានគំរាមតាមវាយពលរដ្ឋខ្មែរដល់ផ្ទះ ឲ្យតែហ៊ានដុតរូបទីងមោងរបស់គាត់។
តំណាងរាស្ត្រអូស្ត្រាលីគឺលោក Julian Hill កាលពីថ្ងៃទី២២ ខែ តុលា បានស្នើឲ្យរដ្ឋាភិបាលអូស្ត្រាលី ចាត់វិធានការស៊ើបអង្កេត ទ្រព្យសម្បត្តិរបស់មន្ត្រីរបបលោក ហ៊ុន សែន និងក្រុមគ្រួសារត្រកូលហ៊ុន។
អាស៊ីសេរី មិនអាចសុំការបំភ្លឺពីបុគ្គល ដែលមានរាយនាមទាំងអស់នេះ បាននៅឡើយទេ នៅពេលនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។