សាលាឧទ្ធរណ៍ច្រានចោលបណ្តឹងជំទាស់របស់ស្ថាបនិកគណបក្សបេះដូងជាតិ និងមន្ត្រីគណបក្សភ្លើងទៀនបីរូបទៀត ដោយតម្កល់សេចក្ដីសម្រេចរបស់សាលាដំបូងរាជធានីភ្នំពេញ ទុកជាបានការដដែល ក្នុងសំណុំរឿងប្រមូលស្នាមមេដៃបង្កើតគណបក្សបេះដូងជាតិ។ មេធាវី និងសាច់ញាតិអ្នកជាប់ឃុំ ខកចិត្តលើការសម្រេចរបស់តុលាការជាន់ខ្ពស់មួយនេះ និងត្រៀមប្ដឹងសាទុក្ខទៅតុលាការកំពូលជាបន្តទៀត។
សាលាឧទ្ធរណ៍ភ្នំពេញ ប្រើពេលពេញមួយថ្ងៃទី៣០ ខែវិច្ឆិកា ដើម្បីសាកសួរស្ថាបនិកគណបក្សបេះដូងជាតិ លោក សៀម ភ្លុក ពាក់ព័ន្ធការប្រមូលស្នាមមេដៃ ដើម្បីបង្កើតគណបក្សបេះដូងជាតិ។ ដោយឡែក មន្ត្រីជាន់ខ្ពស់គណបក្សភ្លើងទៀនពីររូប ដែលរងការចោទប្រកាន់ក្នុងសំណុំរឿងនេះ គឺលោក ខឿន វីរ៉ាត់ និងអ្នកស្រី នូ សុទ្ធារី រក្សាសិទ្ធិមិនឆ្លើយសំណួរតុលាការទេ។ ចំណែកប្រធានប្រតិបត្តិគណបក្សភ្លើងទៀនប្រចាំខេត្តកំពង់ចាម លោក តូច ថឹង សមត្ថកិច្ចមិនបានបញ្ជូនទៅតុលាការ ដើម្បីសាកសួរក្នុងសំណុំរឿងនេះទេ ដោយសារលោកមានបញ្ហាសុខភាព។
ស្ថាបនិកគណបក្សបេះដូងជាតិ លោក សៀម ភ្លុក ទោះបីជាលោកស្រកសាច់បន្តិច តែលោកនៅតែមានទឹកមុខមុតមាំ ពេលឆ្លើយសំណួររបស់តុលាការ។ ស្ថាបនិកគណបក្សបេះដូងជាតិរូបនេះ បំភ្លឺជូនតុលាការថា លោកមិនដឹងថា ស្នាមមេដៃ ដែលក្រុមការងាររបស់លោកប្រមូលមកនោះមានបញ្ហានោះទេ ព្រោះលោកគ្មានបច្ចេកទេសអាចពិនិត្យមើលដឹងថា ស្នាមមេដៃទាំងនោះ មានបញ្ហាឡើយ។ លោក សៀម ភ្លុក ប្រាប់ទៅតុលាការទៀតថា បើទោះជាស្នាមមេដៃមួយចំនួនតូចមានបញ្ហាក្ដី តែស្នាមមេដៃនៅសេសសល់ជាង ៤ពាន់ទៀត នៅតែគ្រប់គ្រាន់អាចស្នើសុំបង្កើតគណបក្សបេះដូងជាតិបានដដែល។ លោកបន្តទៀតថា ការយកបទចោទព្រហ្មទណ្ឌ មកចោទប្រកាន់លើរូប ដែលធ្វើសកម្មភាពបង្កើតគណបក្សនយោបាយ គឺមិនត្រឹមត្រូវទេ ព្រោះច្បាប់ស្ដីពីគណបក្សនយោបាយ មិនបានចែងដាក់ទោស ក្នុងដំណាក់កាលនៃការស្នើបង្កើតគណបក្សនយោបាយឡើយ។ បើទោះជាលោក សៀម ភ្លុក ព្យាយាមបំភ្លឺជូនតុលាការបែបនេះក្ដី ប៉ុន្តែ សាលាឧទ្ធរណ៍បានសម្រេចច្រានចោលបណ្ដឹងជំទាស់របស់លោក សៀម ភ្លុក និងមន្ត្រីគណបក្សភ្លើងទៀន ដោយតម្កល់សេចក្ដីសម្រេចសាលាដំបូងរាជធានីភ្នំពេញ ទុកជាបានការដដែល។
មេធាវីការពារក្ដីរបស់លោក សៀម ភ្លុក និងមន្ត្រីគណបក្សភ្លើងទៀនបីរូបទៀត គឺលោកមេធាវី សំ សុគង់ ឱ្យវិទ្យុអាស៊ីសេរីដឹងថា ក្រុមមេធាវី និងកូនក្ដីរបស់លោកមិនអាចទទួលយកការសម្រេចនេះទេ ព្រោះតុលាការសម្រេចមិនបានពិនិត្យលើអង្គហេតុឱ្យបានត្រឹមត្រូវនោះទេ។ លោកបន្តថា ការសម្រេចបែបនេះ ធ្វើឱ្យប៉ះពាល់សិទ្ធិសេរីភាព និងសិទ្ធិនយោបាយរបស់កូនក្ដីលោកយ៉ាងធ្ងន់ធ្ងរ។
ស្រដៀងគ្នានេះដែរ ប្រពន្ធមន្ត្រីគណបក្សភ្លើងទៀន លោក ខឿន វីរ៉ាត់ គឺលោកស្រី ថាច់ ចន្ធូ សោកស្ដាយ ចំពោះការសម្រេចរបស់សាលាឧទ្ធរណ៍នៅពេលនេះ។
សមត្ថកិច្ចបានឃុំខ្លួនស្ថាបនិកគណបក្សបេះដូងជាតិ លោក សៀម ភ្លុក ដាក់ពន្ធនាគារព្រៃស (ម១) កាលពីថ្ងៃទី២៧ ខែមេសា ឆ្នាំ២០២២ ទាក់ទងបទចោទក្លែងបន្លំ និងប្រើប្រាស់លិខិតក្លែង តាមបណ្ដឹងក្រសួងមហាផ្ទៃ ពាក់ព័ន្ធនឹងការស្នើសុំបង្កើតគណបក្សបេះដូងជាតិ។ សមត្ថកិច្ចក៏បានចាប់ខ្លួនមន្ត្រីគណបក្សភ្លើងទៀនបីនាក់ កាលពីថ្ងៃទី២៤ ខែមីនា ឆ្នាំ២០២៣ ដែលធ្វើឡើងប្រមាណ ៤ម៉ោង មុនពេលសាលាដំបូងរាជធានីភ្នំពេញ ប្រកាសសាលក្រមផ្ដន្ទាទោសពួកគេលើសំណុំរឿងនេះ។ តុលាការសម្រេចឱ្យលោក សៀម ភ្លុក ជាប់ពន្ធនាគាររយៈពេល ២ឆ្នាំ ៦ខែ ចំណែកមន្ត្រីគណបក្សភ្លើងទៀនបីរូបផ្សេងទៀត ត្រូវជាប់ពន្ធនាគាររយៈពេល ២ឆ្នាំ។
ជុំវិញរឿងនេះដែរ នាយកទទួលបន្ទុកកិច្ចការទូទៅនៃអង្គការលីកាដូ លោក អំ សំអាត លើកឡើងថា ការបង្កើតគណបក្សនយោបាយ គឺក្នុងគោលបំណងធ្វើសកម្មភាពនយោបាយ មិនមែនប្រមូលស្នាមមេដៃ ទៅផ្ដួលរំលំរដ្ឋាភិបាលនោះទេ។ លោកបន្តថា កន្លងមកគេកម្រឃើញតុលាការទម្លាក់ចោលការប្រកាន់លើសំណុំរឿងបែបនេះណាស់ បើគ្មានដំណោះស្រាយនយោបាយ ឬក៏អ្នកជាប់ឃុំមិនបានធ្វើលិខិតសុំទោសលោក ហ៊ុន សែន ឬសុំទោសរដ្ឋាភិបាល។
លោក មេធាវី សំ សុគង់ ឱ្យដឹងថា លោកបានពិភាក្សាជាមួយកូនក្ដីរបស់លោករួចហើយ គឺក្រុមមេធាវីនឹងរៀបចំប្ដឹងសាទុក្ខទៅតុលាការកំពូលជាបន្តទៀត ប្រឆាំងការសម្រេចរបស់សាលាឧទ្ធរណ៍។ មន្ត្រីសង្គមស៊ីវិលធ្វើការងារផ្នែកបោះឆ្នោត លើកឡើងថា ការចោទប្រកាន់ លើលោក សៀម ភ្លុក និងអ្នកផ្សេង គឺមិនត្រឹមត្រូវតាមច្បាប់ស្ដីពីគណបក្សនយោបាយឡើយ ព្រោះក្នុងករណីឯកសារនៃការស្នើសុំបង្កើតគណបក្សនយោបាយមានបញ្ហា ក៏ច្បាប់នេះ មិនតម្រូវឱ្យក្រសួងមហាផ្ទៃប្ដឹងតំណាងគណបក្សនយោបាយទៅតុលាការទេ គឺត្រឹមក្រសួងបដិសេធមិនចុះបញ្ជីឱ្យបង្កើតគណបក្សនោះ គឺគ្រប់គ្រាន់ហើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។