មន្ត្រីជាន់ខ្ពស់គណបក្សកាន់អំណាច យកកម្មវិធីហូបនំបញ្ចុក នៅថ្ងៃទី០៩ ខែមិថុនា ដើម្បីបញ្ចេញសារនយោបាយ និងវាយប្រហារដៃគូនយោបាយ ខណៈក្រុមសមាជិកគណបក្សប្រឆាំងបន្តការឃ្លាំមើល ពីសមត្ថកិច្ចក្នុងពេលជួបជុំគ្នាហូបនំបញ្ចុក ធ្វើឱ្យពួកគេមិនហ៊ានបញ្ចេញសារនយោបាយទេ។ អ្នកឃ្លាំមើលផ្នែកសិទ្ធិមនុស្ស ចាត់ទុកថា សកម្មភាពឃ្លាំមើលសកម្មជនបក្សប្រឆាំងជួបជុំគ្នាហូបនំបញ្ចុក ជារូបភាពគំរាមកំហែង មិនស្មើភាពគ្នា រវាងបក្សកាន់អំណាច និងបក្សប្រឆាំង។
សមាជិកក្រុមប្រឹក្សាជាប់ឆ្នោតខេត្តកំពង់ធំ លោក ថៃ ធីម ប្រាប់ថា សមត្ថកិច្ចនៅតែបន្តឃ្លាំមើល និងយករបាយការណ៍ចំនួនអ្នកចូលរួមក្នុងកម្មវិធីជួបជុំគ្នាហូបនំបញ្ចុករបស់សកម្មជនគណបក្សសង្គ្រោះជាតិនៅស្រុកស្ទោង។ លោក ថៃ ធីម បន្តថា ត្បិតការជួបជុំគ្នាលើកនេះ មិនមានការគំរាមកំហែងដោយផ្ទាល់ ប៉ុន្តែសកម្មភាពឃ្លាំមើលបែបនេះ ធ្វើឱ្យសកម្មជនបក្សប្រឆាំងមិនហ៊ានបញ្ចេញសារនយោបាយទេ បានត្រឹមបញ្ចេញមតិស្នើសុំឱ្យឆាប់មានដំណោះស្រាយនយោបាយតាមរយៈការជួបជុំគ្នាហូបនំបញ្ចុក៖ «អត់ទេ គឺយើងមានតែសំណូមពរឱ្យអ្នកនយោបាយទាំងពីរវិលមកតុចរចាវិញ»។
គណបក្សកាន់អំណាច បានជ្រើសយកថ្ងៃទី៩ មិថុនា តាមគម្រោងរបស់សមាគមនំបញ្ចុកខ្មែរនៅប្រទេសបារាំង និងអ្នកគាំទ្រគណបក្សប្រឆាំង ដើម្បីជួបជុំសមាជិក និងពលរដ្ឋទូទៅ ទាំងក្នុងនិងក្រៅប្រទេស ហូបនំបញ្ចុករួមគ្នា នៅតាមមូលដ្ឋាន។ ប្រព័ន្ធឃោសនាស្និទ្ធរបបក្រុងភ្នំពេញ(Freshnews) និងគេហទំព័រហ្វេសប៊ុក (Facebook) របស់លោក ហ៊ុន សែន មេដឹកនាំរបបក្រុងភ្នំពេញ បានចុះផ្សាយថា មន្ត្រីពង្រឹងមូលដ្ឋានរបស់គណបក្សប្រជាជនកម្ពុជា បាន នាំគ្នាចុះតាមមូលដ្ឋានរៀងៗខ្លួន ដើម្បីធ្វើពិធីហូបនំបញ្ចុកជាមួយពលរដ្ឋ និងអ្នកគាំទ្រ។
ក្នុងកម្មវិធីហូបនំបញ្ចុកនោះ ក្រុមការងារគណបក្សកាន់អំណាច ដែលបានរៀបចំដូចគ្នាដែរនោះ បានប្រកាសថា ជានំបញ្ចុកសាមគ្គីជាតិ នំបញ្ចុកតេជោសន្តិភាព ជាដើម។ ចំណែក លោក ហ៊ុន សែន វិញ លើកឡើងថា ការរៀបចំនំបញ្ចុកហូបរួមគ្នា នៅថ្ងៃទី០៩ មិថុនានេះ គឺមិនប្រកាន់ក្រុម ជំនឿ សាសនា ឬ និន្នាការនយោបាយអ្វីឡើយ។ លោក ហ៊ុន សែន ចាត់ទុកថា អ្នកហូបនំបញ្ចុកថ្ងៃទី៩ មិថុនា គឺបានបង្ហាញពីមិត្តភាព សាមគ្គីភាព ការស្រឡាញ់រាប់អាន និងឯកភាពជាតិ។
អាស៊ីសេរី មិនអាចសុំការបញ្ជាក់បន្ថែមពីអ្នកនាំពាក្យគណបក្សប្រជាជនកម្ពុជា លោក សុខ ឥសាន និង អ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន បានទេ នៅថ្ងៃទី០៩ មិថុនា ដោយសារមិនទទួលទូរស័ព្ទ។ ប៉ុន្តែប្រព័ន្ធឃោសនាស្និទ្ធរបបក្រុងភ្នំពេញចុះផ្សាយថា យ៉ាងហោចណាស់ ពលរដ្ឋហូបនំបញ្ចុកអស់ជាង ២តោន សម្រាប់មួយស្រុកស្អាងភ្នំ ខេត្តកណ្ដាល។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា ថា មិនចាប់អារម្មណ៍កម្មវិធីហូបនំបញ្ចុករបស់គណបក្សនយោបាយទាំង២ទេ ព្រោះគ្មានចំណេញអ្វីដល់ជាតិ គឺគ្រាន់តែជាសកម្មភាពផ្ចាញ់ផ្ចាលគ្នាប៉ុណ្ណោះ។ តែយ៉ាងណា លោក ស៊ឹង សែនករុណា សង្កេតឃើញថា គ្មានសមភាពក្នុងការប្រកួតប្រជែងគ្នាទេ សម្រាប់បក្សកាន់អំណាច និងបក្សប្រឆាំង សូម្បីសកម្មភាពហូបនំបញ្ចុក ព្រោះបក្សកាន់អំណាច មានឥទ្ធិពល និងអំណាច អាចធ្វើអ្វីស្រេចតែចិត្តបាន៖ «ការអនុវត្តច្បាប់យើងថា ស្តង់ដារ២ហើយ ចំណែកសកម្មភាពនយោបាយក៏ដូចគ្នាដែរ គឺស្តង់ដារ២ មានន័យថា អ្នកដែលគាត់មានឥទ្ធិពល មានអំណាច ឬក៏បក្សដែលមានឥទ្ធិពល មានអំណាចអ្វីហ្នឹង គឺអាចធ្វើអ្វីបានទៅតាមចិត្តខ្លួនឯង ចង់ធ្វើអ៊ីចឹងទៅ។ ចំណែកបក្សណាប្រជែងអ៊ីចឹងទៅ មានការរឹតត្បិតអ្វីអ៊ីចឹងទៅ។ វាជារឿងមួយ ដែលអត់មើលឃើញនូវភាពសមភាព ស្មើភាពអ្វីទេ ក្នុងការប្រកួតប្រជែងផ្នែកនយោបាយនៅក្នុងប្រទេសកម្ពុជា»។
សមាជិកក្រុមប្រឹក្សាជាប់ឆ្នោតខេត្តកំពង់ធំ លោក ថៃ ធីម ប្រាប់ថា សកម្មជនគណបក្សសង្គ្រោះជាតិខេត្តកំពង់ធំ នឹងបន្តហូបនំបញ្ចុកបន្តទៀត រៀងរាល់ចុងសប្ដាហ៍ បើទោះរងការឃ្លាំមើលក៏ដោយ។
ទោះយ៉ាងណា អនុប្រធានគណបក្សសង្គ្រេះជាតិ លោក អេង ឆៃអ៊ាង សង្ឃឹមថា លោក ហ៊ុន សែន និង លោក សម រង្ស៊ី អាចមានពេលអង្គុយហូបនំបញ្ចុកជាមួយគ្នា ដើម្បីផ្សះផ្សា និងបង្រួបបង្រួមជាតិ។ តែ លោក ហ៊ុន សែន ប្រាប់ថា ការហូបនំបញ្ចុកមិនអាចឈានដល់ការចរចានយោបាយឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។