ក្រុមគ្រួសាររបស់អ្នកទោសមនសិការ និងអ្នកតវ៉ាមួយចំនួនចូលជួបឯកអគ្គរដ្ឋទូតសហរដ្ឋអាមេរិក ប្រាប់ពីការចាប់ខ្លួនការប្រើហិង្សានិងការបង្ក្រាបក្រុមអ្នកតវ៉ាថ្ងៃសុក្រ។ អ្នកសិទ្ធិមនុស្ស ថាជំនួបនេះ បង្ហាញថា សហរដ្ឋអាមេរិកកំពុងយកចិត្តទុកដាក់ពីកង្វល់របស់គ្រួសារអ្នកកំពុងជាប់ឃុំ។
ក្រុមគ្រួសាររបស់អ្នកជាប់ឃុំ ដែលចូលជួបអគ្គរដ្ឋទូតសហរដ្ឋអាមេរិក នៅថ្ងៃទី២៣ ធ្នូ មានដូចជាតំណាងក្រុមស្ត្រី តវ៉ាថ្ងៃសុក្រ លោកស្រី ព្រំ ចន្ថា ក្មួយប្រុសលោក រ៉ុង ឈុន លោក រ៉ុង វិជ្ជា ប្រពន្ធរបស់លោក ហ៊ូ វ៉ាន់ ឪពុករបស់តារាចម្រៀងរ៉ែប (RAP) លោក គា សុគន្ធ និង ប្រពន្ធរបស់សកម្មជនបរិស្ថាន លោក ថុន រដ្ឋា ជាដើម។
តំណាងក្រុមស្ត្រីតវ៉ាថ្ងៃសុក្រ និងជាភរិយារបស់លោក កាក់ កុម្ភារ គឺលោកស្រី ព្រំ ចន្ថា ប្រាប់ថា ឯកអគ្គរដ្ឋទូត សហរដ្ឋអាមេរិក លោក ប៉ាទ្រីក ម័រហ្វី (Patrick Murphy) បានសន្យាក្នុងជំនួបនោះថា លោកនឹងតាមដានដោយយកចិត្តទុកដាក់ចំពោះបញ្ហាទាំងឡាយរបស់ក្រុមគ្រួសារ និងក្ដីបារម្ភរបស់អ្នកកំពុងជាប់ឃុំពាក់ព័ន្ធនឹងរឿងនយោបាយទាំងអស់។ លោកស្រីអះអាងថា លោកអគ្គរដ្ឋទូត ផ្ដោតសំខាន់ករណីលោកស្រីជាងគេ ដោយសារកូនប្រុសរបស់លោកស្រី ត្រូវរងអំពើហិង្សា និងលោកស្រី គឺជាតំណាងរបស់ក្រុមស្ត្រីតវ៉ាថ្ងៃសុក្រ។
លោកស្រី ឱ្យដឹងទៀតថា លោក ប៉ាទ្រីក ម័រហ្វី ក៏បានបង្ហាញក្ដីបារម្ភចំពោះសុវត្ថិភាពក្រុមគ្រួសារនៃអ្នកជាប់ឃុំទាំងអស់ ដោយសារមានព្រឹត្តិការណ៍ហិង្សាកើតឡើងជាបន្តបន្ទាប់លើពួកគេ៖ « គាត់យល់ថា អាហ្នឹងវារងអំពើអយុត្តិធម៌ខ្លាំងណាស់ ដោយសារអ្វី កាលដែលសកម្មជនជាប់ពន្ធនាគារទាំងអស់ ហើយនឹងធ្វើទុក្ខបុកម្នេញពីមន្ត្រីគណបក្សកាន់អំណាច។ ចង់និយាយអ៊ីចឹងណា។ ជាប់គុក ដោយឥតមានកំហុសសោះ បិទសន្តិភាពគាត់ហើយ ធ្វើបាបកូនរបស់យើងខ្ញុំដែលអត់មានកំហុសទៀត។ គាត់នឹងធ្វើការរឿងហ្នឹង ឱ្យមានដំណោះស្រាយឡើងវិញ»។
ក្រោយបានជួបឯកអគ្គរដ្ឋទូតអាមេរិកប្រចាំកម្ពុជារួច លោកស្រី ព្រំ ចន្ថា បានទៅពន្ធនាគារព្រៃសដើម្បីប្រាប់រឿងនេះ ទៅប្ដីរបស់ខ្លួនដែលកំពុងជាប់ឃុំពីបទជេរប្រមាថ និងញុះញង់ឱ្យប្រព្រឹត្តបទល្មើសឧក្រិដ្ឋជាអាទិ៍ធ្វើឡើងកាលពីខែតុលា ឆ្នាំ២០១៩។ លោកស្រី ព្រំ ចន្ថា បន្តថា ស្ថានភាពលោក កាក់ កុម្ភារ ក្នុងពន្ធនាគារមានសុខភាពទ្រុឌទ្រោមជាងមុនខ្លាំង។
ចំណែកស្ថានទូតសហរដ្ឋអាមេរិក បានសរសេរលើហ្វេសប៊ុក(facebook) ថា លោកឯកអគ្គរដ្ឋទូត W. Patrick Murphy មានកិត្តិយស និងមានក្តីរំភើប ដែលបានជួបជាមួយសាច់ញាតិអ្នកជាប់ឃុំ ដោយសារតែការនិយាយស្ដីសកម្មភាពសិល្បៈ ភាពជាសកម្មជន ឬការតវ៉ាដោយសន្តិភាពរបស់គេ។ ស្ថានទូតគូសបញ្ជាក់ថា ក្នុងនាមជាមិត្តរបស់កម្ពុជា សហរដ្ឋអាមេរិកតែងតែគាំទ្រយ៉ាងខ្លាំង ចំពោះសិទ្ធិមនុស្សជាសាកល ដែលមានចែងនៅក្នុងរដ្ឋធម្មនុញ្ញនៃប្រទេសកម្ពុជា។
ជុំវិញជំនួបគ្រួសាររបស់អ្នកជាប់ឃុំពាក់ព័ន្ធរឿងនយោបាយនេះ អាស៊ីសេរី មិនអាចសុំការបញ្ជាក់ពីខាងអ្នកនាំពាក្យរដ្ឋាភិបាល លោក ផៃ ស៊ីផាន បានទេ នៅថ្ងៃទី២៣ ធ្នូ។ តែយ៉ាងណា លោក ផៃ ស៊ីផាន និងមន្ត្រីនាំពាក្យរដ្ឋាភិបាល ផ្សេងទៀត ធ្លាប់អះអាងថា បរទេស មិនមានសិទ្ធិលូកលាន់កិច្ចការផ្ទៃក្នុងរបស់កម្ពុជាបានទេ។
នាយករងអង្គការលីកាដូ (Licadho) ទទួលបន្ទុកផ្នែកសិទ្ធិមនុស្សលោក អំ សំអាត យល់ថា ជំនួបបែបនេះ បញ្ជាក់ឱ្យឃើញថា ស្ថានទូតអាមេរិកកំពុងបង្ហាញពីការយកចិត្តទុកដាក់ លើករណីសកម្មជនបក្សប្រឆាំង ដែលកំពុងជាប់ឃុំ៖ «ជាធម្មតា បើយើងមើលជាការណ៍ដែលយល់ព្រមឱ្យមានចំនួបនេះ ពីឯកឧត្ដមអគ្គទូតសហរដ្ឋអាមេរិកវាជាការយកចិត្តទុកដាក់មួយហើយ ក៏ប៉ុន្តែវិធានការទូត ឬក៏ផ្លូវទូតណាមួយ របស់ទូតសហរដ្ឋអាមេរិកសម្រាប់ការជួយទៅលើពួកគាត់យ៉ាងណានោះ វាជាកាតព្វកិច្ចរបស់ស្ថានទូត»។
គិតចាប់តាំងពីដើមឆ្នាំ២០២០មក អាជ្ញាធរ បានចាប់ខ្លួនសកម្មជនបក្សប្រឆាំង សកម្មជនសង្គម អ្នកសារព័ត៌មាន អ្នកឃ្លាំមើលព្រំដែន អ្នកចម្រៀងរិះគន់សង្គមជិតហាសិប (៥០)នាក់ដាក់ពន្ធនាគារ។ តុលាការបានចោទថា ពួកគេជេរប្រមាថរដ្ឋាភិបាល រួមគំនិតក្បត់ និងញុះញង់ឱ្យមានភាពវឹកវរធ្ងន់ធ្ងរដល់សង្គម។
ប៉ុន្តែ ក្រុមអ្នកការពារសិទ្ធិមនុស្សក្នុងស្រុក និងអង្គការអន្តរជាតិ រួមទាំងទីភ្នាក់ងារអង្គការសហប្រជាជាតិផង បានចាត់ទុកករណីទាំងនេះថា ជារឿងនយោបាយ និងជាការបង្ក្រាបលើសិទ្ធិសេរីភាពជាមូលដ្ឋានរបស់ពលរដ្ឋ។ ពួកគេទាមទារឱ្យរដ្ឋាភិបាលកម្ពុជាបញ្ឈប់ការយាយី និងការចោទប្រកាន់ទាំងបំពានច្បាប់ លើអ្នកការពារសិទ្ធិមនុស្ស អ្នករិះគន់ អ្នកនយោបាយ ហើយត្រូវដោះលែងអ្នកកំពុងជាប់ឃុំដោយការចោទប្រកាន់ទាំងបំពាន ឬតាមទំនើងចិត្តទាំងឡាយឱ្យមានសេរីភាពមកវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។