ប្រធានាធិបតីទីម័រខាងកើត លោកបណ្ឌិត ចូហ្សេ រ៉ាមូស អរតា (Jose Ramos-Horta) កំពុងបំពេញទស្សនកិច្ចផ្លូវរដ្ឋរយៈពេល៣ថ្ងៃ ចាប់ពីថ្ងៃទី១៩ ដល់ថ្ងៃទី២១ ខែតុលា ដើម្បីពង្រឹងទំនាក់ទំនង និងសហប្រតិបត្តិការក្នុងវិស័យពាណិជ្ជកម្ម និងសេដ្ឋកិច្ចនៃប្រទេសទាំងពីរ។ ដំណើរទស្សនកិច្ចធ្វើឡើង តាមការអញ្ជើញរបស់ព្រះករុណា ព្រះបាទសម្តេច នរោត្តម សីហមុនី។
គេហទំព័រហ្វេសប៊ុករបស់លោក ហ៊ុន សែន នៅថ្ងៃទី២០ ខែតុលា ឲ្យដឹងថា ក្នុងជំនួបទ្វេភាគីជាមួយលោក នាយករដ្ឋមន្ត្រីហ៊ុន សែន នៅរសៀលថ្ងៃទី ២០ ខែតុលានេះ លោកបណ្ឌិត ចូហ្សេ រ៉ាមូស អរតា ក៏បានចូលរួមជាអធិបតីក្នុងពិធីចុះហត្ថលេខាលើអនុស្សរណៈយោគយល់គ្នា (MoU) ស្ដីពីសេវាដឹកជញ្ជូនផ្លូវអាកាស និងពាណិជ្ជកម្មអង្ករ រវាងរដ្ឋាភិបាលនៃប្រទេសទាំងពីរ។
លោកបណ្ឌិត ចូហ្សេ រ៉ាមូស អរតា លើកឡើងថា ប្រទេសទីម័រខាងកើត នឹងអាចក្លាយជាសមាជិកសមាគមប្រជាជាតិអាស៊ីអាគ្នេយ៍ (ASEAN) នាពេលឆាប់ៗខាងមុខ ហើយលោកក៏បានអរគុណដល់រដ្ឋាភិបាលកម្ពុជាដែលបានគាំទ្រសមាជិកភាពរបស់រដ្ឋាភិបាលលោក។ លោកបញ្ជាក់ថា ប្រទេសទីម័រខាងកើត នឹងខិតខំពង្រីកទំនាក់ទំនង និងកិច្ចសហប្រតិបត្តិការជាមួយប្រទេសសមាជិកអាស៊ានទាំងអស់ ព្រមទាំងលើកកម្ពស់ការថែរក្សាសន្តិភាព និងស្ថិរភាពនៅក្នុងតំបន់ ប្រកបដោយវិបុលភាព និងចីរភាព។
នៅរសៀលថ្ងៃដដែលនេះ លោកបណ្ឌិត ចូហ្សេ រ៉ាមូស អរតា ក៏បានជួបពិភាក្សាការងារជាមួយលោកប្រធានព្រឹទ្ធសភា លោក សាយ ឈុំ។ លោកបន្តថា ប្រទេសកម្ពុជាអាចនាំអង្ករ និងផលិតផលកសិកម្មផ្សេងៗ ហើយលោក ក៏រំពឹងថា នឹងមានសហគ្រិនកម្ពុជាទៅវិនិយោគនៅប្រទេសទីម័រខាងកើតផងដែរ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។