លោក សម រង្ស៊ី ថា បក្សកាន់អំណាចមិនធ្វើពិធីជួបជុំអបអរថ្ងៃ ៧ មករា ឆ្នាំនេះ ព្រោះបក្សនេះមានទំនាស់ផ្ទៃក្នុងបក្ស។ ប្រធានស្ដីទីគណបក្សសង្គ្រោះជាតិរូបនេះបន្តថា លោក ហ៊ុន សែន ចង់ឲ្យកូនប្រុសដែលគ្រោងបន្តតំណែងរបស់ខ្លួន គឺលោក ហ៊ុន ម៉ាណែត ធ្វើចេញមុខក្នុងឱកាសនេះ ប៉ុន្តែមន្ត្រីបក្សនេះមិនព្រមព្រោះលោក ហ៊ុន ម៉ាណែត គ្មានស្នាដៃអ្វីក្នុងថ្ងៃ ៧ មករានោះទេ។ ទោះយ៉ាងណាក្ដី អ្នកនាំពាក្យកាន់អំណាចអះអាងដដែលថា ការមិនធ្វើពិធីជួបជុំទ្រង់ទ្រាយធំ ក្នុងថ្ងៃ ៧ មករា ឆ្នាំនេះ ព្រោះដើម្បីបង្ការជំងឺកូវីដ១៩។
លោក សម រង្ស៊ី ប្រធានស្ដីទីគណបក្សសង្គ្រោះជាតិ លើកឡើងថា ថ្ងៃ ៧ មករា ឆ្នាំនេះ មានភាពស្ងាត់ស្ងៀមដោយសារតែមានការខ្វែងគំនិតគ្នា ក្នុងជួរគណបក្សប្រជាជនកម្ពុជា មិនមែនដោយសារជំងឺកូវីដ១៩ ឬដោយសារលោក ហ៊ុន សែន ធ្វើដំណើរទៅប្រទេសភូមានោះទេ។ លោកបន្តថា លោក ហ៊ុន សែន បានជ្រើសរើសថ្ងៃធ្វើដំណើរនេះ ដើម្បីគេចផុតពីពិធីដែលត្រូវប្រារព្ធ នៅទីក្រុងភ្នំពេញ ថ្ងៃ ៧ មករានេះតែម្ដង។ លោកបន្តទៀតថា លោក ហ៊ុន សែន ចង់ឲ្យលោក ហ៊ុន ម៉ាណែត ដែលទើបតែគណបក្សតែងតាំងឲ្យធ្វើជាអ្នកបន្តវេនពីលោក ចេញមុខចេញមាត់ក្នុងឱកាសនេះ ក្នុងចំណោមថ្នាក់ដឹកនាំគណបក្សប្រជាជនកម្ពុជា ប៉ុន្តែ មន្ត្រីគ្រាក់ៗក្នុងជួរបក្សមិនយល់ព្រមតាមសំណើលោក ហ៊ុន សែន ទេ ដោយសំអាងថា លោក ហ៊ុន ម៉ាណែត គ្មានស្នាដៃអ្វី កាលពីថ្ងៃទី៧ ខែមករា ឆ្នាំ១៩៧៩ ឡើយ។
លោកនាយករដ្ឋមន្ត្រី ហ៊ុន សែន នៅថ្ងៃ ៧ មករានេះ បានសរសេរលើហ្វេសប៊ុកថា អបអរសាទរខួបអនុស្សាវរីយ៍លើកទី៤៣ នៃថ្ងៃជ័យជម្នះ៧មករា ប៉ុន្តែលោកមិនបញ្ជាក់ពីមូលហេតុ ដែលមិនបានធ្វើពិធីជួបជុំសម្រាប់ពិធីនេះ។
ជុំវិញការមិនរៀបចំពិធីជួបជុំធំដុំក្នុងឆ្នាំនេះ អ្នកនាំពាក្យគណបក្សប្រជាជនកម្ពុជា លោក សុខ ឥសាន ឲ្យវិទ្យុអាស៊ីសេរីដឹងថា ដើម្បីបង្ការកុំឲ្យមានការរីករាលដាលជំងឺកូវីដ១៩។ ទោះយ៉ាងណាក្ដី លោកទោះគណបក្សមិនបានធ្វើពិធីជួបជុំទ្រង់ទ្រាយធំនៅទីស្នាក់ការកណ្ដាលក្ដី ប៉ុន្តែមានការរៀបចំ នៅតាមមូលដ្ឋាន ហើយថ្នាក់ដឹកនាំបក្សបានចេញសារដើម្បីអបអរថ្ងៃ ៧ មករា។ លោកបញ្ជាក់ថា គ្មានការបែកបាក់ផ្ទៃក្នុងបក្ស ហើយក៏មិនចាំបាច់ត្រូវប្រកាសពីតួនាទីលោក ហ៊ុន ម៉ាណែត ក្នុងថ្ងៃ ៧ មករា នេះដែរ ព្រោះគណបក្សបានបោះឆ្នោតលោក ហ៊ុន ម៉ាណែត ធ្វើជាបេក្ខជននាយករដ្ឋមន្ត្រីបម្រុងរួចហើយដែរ៖ « នេះគ្រាន់តែនិយាយបំផ្លើសខុសការពិតទី១ ហើយទី២ចង់បំបែកបំបាក់ផ្ទៃក្នុងគណបក្សប្រជាជនកម្ពុជាក៏ប៉ុន្តែយើងដឹងហើយថា មហិច្ឆតា ល្បិចកលពិសពុលចង់បំបែកបំបាក់ផ្ទៃក្នុងគណបក្សប្រជាជនកម្ពុជានេះមានជាង ៤០ឆ្នាំហើយ ហើយជាពិសេសអ្នកដែលចង់បំបែកបំបាក់ផ្ទៃក្នុងគណបក្សប្រជាជនកម្ពុជាមួយចំនួនបានស្លាប់ចែកឋានបាត់ទៅហើយក៏គណបក្សប្រជាជនកម្ពុជានៅតែរឹងមាំមានសាមគ្គីភាពផ្ទៃក្នុងរឹងមាំដដែលទេបាទ » ។
ដោយឡែកអ្នកសិក្សាការភិវឌ្ឍសង្គមបណ្ឌិត សេង សារី មិនស្របទៅនឹងការលើកឡើងរបស់អ្នកនាំពាក្យគណបក្សប្រជាជនកម្ពុជាថា ការមិនធ្វើពិធីជួបជុំថ្ងៃ០៧មករាឆ្នាំនេះព្រោះជំងឺកូវីដ១៩ នោះទេ។ លោកកត់សម្គាល់ថា ពេលនេះរដ្ឋាភិបាលបានប្រកាសបើកប្រទេសឡើងវិញជាធម្មតាហើយ។ លោកបន្តទៀតថា ថ្មីៗ នេះមានការជួបជុំទ្រង់ទ្រាយធំជាច្រើនកម្មវិធី ដូចជា ពិធីសម្ពោធដាក់ឲ្យប្រើប្រាស់វិមានកីឡាដ្ឋាន នៃពហុកីឡដ្ឋានជាតិ មរតកតេជោ និងសន្និបាតគណៈកម្មាធិការកណ្ដាលរបស់គណបក្សគណបក្សប្រជាជន ដែលមានមនុស្សរាប់ពាន់នាក់ចូលរួម។ លោកយល់ថា ការមិនធ្វើពិធីជួបជុំទ្រង់ទ្រាយធំ អាចមានហេតុផលផ្សេង ឬជាការបង្ហាញថា គណបក្សប្រជាជនកម្ពុជា កំពុងងាកចេញពីវៀតណាម ដែលប្រទេសជិតខាងមួយនេះបានជួយគណបក្សប្រជាជានកម្ពុជារហូតបង្កើតបានថ្ងៃទី ៧ មករា ឆ្នាំ១៩៧៩៖ « យើងឃើញថា ហេតុផលគណបក្សប្រជាជនកម្ពុជាលើកឡើងគឺមិនសមហេតុផលទេ ប៉ុន្តែយើងមិនដឹងមូលហេតុអីឲ្យពិតប្រាកដ ក៏ប៉ុន្តែខ្ញុំមានសម្មតិកម្មមួយថា សារ៧មករា ឬក៏អរគុណកំណើតទី២វាហាក់ដូចលែងមានប្រសិទ្ធភាពក្នុងសង្គមខ្មែរបច្ចុប្បន្នដែលសំបូរដោយយុវជនណា ហើយជាពិសេសសុភាសិតដែលចេញមកអរគុណសន្តិភាព ថ្ងៃ៧មករាជាកំណើតទី២ រាងសាប » ។
គណបក្សប្រជាជន បានចាត់ទុកថ្ងៃ ៧ មករា ជាថ្ងៃសំខាន់របស់ខ្លួន និងបានហៅថ្ងៃនេះថា ជាថ្ងៃកំណើតទី២ ដែលប្រទេសកម្ពុជាត្រូវបានសង្គ្រោះ និងរំដោះចេញផុតពីរបបកម្ពុជាប្រជាធិបតេយ្យដែលដឹកនាំដោយ ប៉ុល ពត។
គណបក្សនេះតែងតែរៀបចំប្រារព្ធពិធីមីទីងអបអររំលឹកខួបថ្ងៃទី៧ មករា ជាទ្រង់ទ្រាយធំដោយមានអ្នកចូលរួមរាប់ម៉ឺននាក់ នៅទីស្នាក់ការកណ្ដាលរបស់ខ្លួនឬហៅថា មន្ទីរ "គ៨៥" ប៉ុន្តែ ពីរឆ្នាំចុងក្រោយនេះគណបក្សនេះធ្វើការប្រារព្ធអបអរតូចៗ នៅមូលដ្ឋាន ដោយបញ្ហាជំងឺកូវីដ១៩។ ទោះយ៉ាងណា ថ្ងៃ០៧មករាឆ្នាំ២០២២ នេះ ទោះរដ្ឋាភិបាលប្រកាសថា បើកប្រទេសវិញ ហើយស្ថានការណ៍ជំងឺកូវីដ បានធូរស្រាល និងបានបិទបញ្ចប់ព្រឹត្តិការណ៍ឆ្លងជំងឺកូវីដ១៩ ជាលក្ខណៈទ្រង់ទ្រាយធំហើយក្ដី ប៉ុន្តែគណបក្សប្រជាជនកម្ពុជា មិនបានធ្វើការជួបជុំទ្រង់ទ្រាយ ដើម្បីអបអរថ្ងៃ ៧ មករា ទៅវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។