ប្រពន្ធសកម្មជនគណបក្សប្រឆាំងដែលកំពុងជាប់ឃុំនៅពន្ធនាគារស្នើឱ្យតុលាការទម្លាក់ការចោទប្រកាន់និងដោះលែងប្ដីរបស់ពួកគាត់ឱ្យមានសេរីភាពវិញ ដូចសកម្មជនសង្គម បរិស្ថាន និងសិទ្ធិមនុស្សដែរ។ ពួកគាត់នៅតែអះអាងថា ប្ដីរបស់គាត់ជាប់ពន្ធនាគារដោយអយុត្តិធម៌រយៈពេលជាង១ឆ្នាំមកនេះធ្វើឱ្យពួកគាត់ឈឺចាប់មិនអាចបំភ្លេចបានឡើយ។
ក្រុមគ្រួសារសាច់ញាតិរបស់សកម្មជនបក្សសង្គ្រោះជាតិដែលកំពុងជាប់ឃុំនៅពន្ធនាគារព្រៃស នៅតែអះអាងថា ប្ដីរបស់ពួកគាត់មិនមានកំហុសដូចការចោទប្រកាន់របស់តុលាការឡើយ។
ប្រពន្ធជនជាប់ជាប់លោកស្រី អ៊ុក ចន្ធី ប្រាប់វិទ្យុអាស៊ីសេរីនៅថ្ងៃទី១៤ វិច្ឆិកាថា តុលាការបានចាប់ប្ដីរបស់លោកស្រី គឺ លោក យឹម សារ៉េត ដាក់ជាប់ពន្ធនាគាររយៈពេលជិត២ឆ្នាំហើយ គឺមិនទាន់ជំនុំជម្រះក្ដីនៅឡើយទេ។ លោកស្រីបន្តថា ប្ដីរបស់គាត់ជាមនុស្សស្លូតត្រង់ និងពុំបានប្រព្រឹត្តិខុសច្បាប់អ្វីឡើយ។ លោកស្រីស្នើឱ្យតុលាការដោះលែងប្ដីលោកស្រីឱ្យមានសេរីភាពឱ្យបានឆាប់ ដើម្បីជួយធ្វើការងាររកប្រាក់ចំណូលដោះស្រាយជីវភាពគ្រួសារឡើងវិញ។ ស្ត្រីវ័យ៥០ឆ្នាំរូបនេះ ព្រួយបារម្ភពីសុខភាពប្ដីនៅក្នុងពន្ធនាគារ ពីព្រោះប្ដីគាត់មានវ័យកាន់ចាស់ និងមានជំងឺប្រចាំកាយជាច្រើនមុខ៖ «ក្ដុកក្ដួលណាស់ពេលទៅទទួលគាត់អីចឹងខ្ញុំទឹកភ្នែករលីងរលោងដោយសារ ទៅឃើញតែគេចេញមក។ ដោយឡែកក្រុមគ្រួសារខ្ញុំវិញមិនដឹងថាថ្ងៃណា
។ គាត់ថាកុំឱ្យប្រាប់ថា ខ្ញុំនឹងខ្វល់ខ្វាយពីគាត់ក៏គាត់ចេះតែលាក់ខ្ញុំ ខ្ញុំសួរពីបញ្ហាសុខភាពអីចឹងគាត់ថា មិនអីទេ គ្រាន់ថាឈឺភ្នែក គាត់ថាមួយរយៈមុនឈឺខ្លាំងណាស់ តែឥឡូវបានធូរតែវាងងឹតមើលអីមើលអីមិនឃើញ។ ឮគាត់និយាយអីចឹងព្រួយមែនទែន មិនដឹងគាត់ចេញមករកស៊ីធ្វើការអីកើត»។
ស្រដៀងគ្នានេះដែរ ប្រពន្ធប្រធានគណបក្សសង្គ្រោះជាតិខេត្តកំពង់ឆ្នាំង លោក កែវ ថៃ គឺលោកស្រី សំ ចិន្តា ថ្លែងថា លោកស្រីមានអារម្មណ៍ក្ដុកក្ដួលនៅពេលដែលឃើញតុលាការដោះលែងសកម្មជនបរិស្ថាន និងសកម្មជនសង្គមជាច្រើននាក់ ប៉ុន្តែជនជាប់ឃុំនយោបាយដែលមានឈ្មោះល្បីៗ ដូចជាប្ដីរបស់លោកស្រីជាដើមតុលាការមិនបានដោះលែងនោះទេ។ លោកស្រីយល់ថា ការធ្វើបែបនេះជារឿងអយុត្តិធម៌ និងជាការធ្វើឱ្យពួកលោកស្រីឈឺចាប់កាន់តែខ្លាំង៖ «តាំងពីគេចាប់ប្ដីខ្ញុំទៅឥឡូវរឹងតែមានការឈឺចាប់កាន់តែខ្លាំងជាងមុន ព្រោះអយុត្តិធម៌ គេមកចាប់ប្ដីខ្ញុំទាំងងងឹតមកបើកទ្វារចូលមកចាប់អីចឹងគឺឃោរឃៅបំផុត ខ្ញុំមិនអាចទទួលយកបានទេ។ អ្នកលក់គ្រឿងញៀន គេលក់ដីលក់ព្រៃអត់ចាប់គេ ចំណែកអ្នកធ្វើល្អមិនចេះលក់ដីលក់ព្រៃ ជំនួញគ្រឿងញៀនផងមកចាប់គាត់ដាក់គុកគឺអយុត្តិធម៌បំផុត»។
ទាក់ទងនឹងបញ្ហានេះប្រធានសាលាដំបូងរាជធានីភ្នំពេញលោក តាំង ស៊ុនឡាយ ប្រាប់វិទ្យុអាស៊ីសេរីយ៉ាងខ្លីថា លោកសុំមិនបកស្រាយជុំវិញការស្នើសុំរបស់សាច់ញាតិជនជាប់ឃុំនេះទេ ដោយលោករុញឱ្យសួរទៅអ្នកនាំពាក្យតុលាការក្រុងភ្នំពេញជំនួសវិញ៖ «លោកជួបអ្នកនាំពាក្យវិញក្រែងលោកគេទទួលបានព័ត៌មានពេញលេញជាងខ្ញុំ ដោយសារខាងខ្ញុំអត់ដឹងដែរទេ ។ លោកសួរទៅខាងគាត់ទៅ ដើម្បីគាត់មានព័ត៌មានហ្នឹងច្បាស់លាស់ជាងខ្ញុំដោយសារគាត់មានការជជែកជាមួយក្រុមការងាររបស់គាត់»។
វិទ្យុអាស៊ីសេរីមិនអាចទាក់ទងអ្នកពាក្យសាលាដំបូងក្រុងភ្នំពេញលោក អ៊ី រិន្ទ ដើម្បីសុំឆ្លងតបជុំវិញបញ្ហានេះបានទេនៅថ្ងៃទី១៤ វិច្ឆិកា ដោយទូរស័ព្ទពុំមានអ្នកទទួល។
កាលពីថ្ងៃទី១១ វិច្ឆិកា ព្រះរាជអាជ្ញារងអមសាលាសាលាដំបូងក្រុងភ្នំពេញ លោក សេង ហៀង បានចេញលិខិតអញ្ជើញមេធាវីការពារក្ដីជនជាប់ឃុំដែលជាសកម្មជនបក្សប្រឆាំងឱ្យចូលស្ដាប់សវនាការលើពាក្យបណ្តឹងសុំនៅក្រៅឃុំរបស់សកម្មជនបក្សប្រឆាំងនៅថ្ងៃទី១៧ ខែវិច្ឆិកាខាងមុខ។ ការអញ្ជើញនេះ ធ្វើឡើងក្រោយពេលមេធាវីការពារក្ដីឱ្យសកម្មជនគណបក្សប្រឆាំងគឺលោក សំ សុគង់ បានដាក់ពាក្យស្នើសុំឱ្យតុលាការដោះលែងកូនក្ដីរបស់លោកដែលកំពុងជាប់ឃុំនៅពន្ធនាគារព្រៃសទាំងអស់នៅក្រៅឃុំបណ្ដោះអាសន្ន ដោយសារពួកគាត់មានបញ្ហាសុខភាព និងបានជាប់ឃុំដោយអយុត្តិធម៌អស់រយៈពេលជាច្រើនខែមកហើយ។
ទោះជាយ៉ាងណា អ្នកនាំពាក្យសមាគមការពារសិទ្ធិមនុស្សអាដហុក (Adhoc) លោក សឹង សែនករុណា យល់ថា តុលាការគួរតែទម្លាក់ចោលការចោទប្រកាន់លើជនជាប់ឃុំនយោបាយទាំងនោះ និងដោះលែងពួកគាត់ឱ្យមានសេរីភាពវិញដោយឥតលក្ខខណ្ឌ ដើម្បីស្ដារមុខកម្ពុជាលើឆាកអន្តរជាតិឡើងវិញ។ លោកយល់ថា ប្រសិនបើតុលាការបន្តឃុំខ្លួនសកម្មជនទាំងនោះ នឹងធ្វើឱ្យកម្ពុជាមានកេរ្តិ៍ឈ្មោះកាន់តែអាក្រក់នៅលើឆាកអន្តរជាតិ ហើយអាចនឹងរងទណ្ឌកម្មពីប្រទេសប្រជាធិបតេយ្យសេរីជាមិនខាន៖ «បើសិនជាបរិយាកាសហ្នឹងអត់ទាន់មានការដោះលែងបន្ធូរបន្ថយទេ មានន័យថា ការដោះលែងទាំងអស់ហ្នឹងមិនអាចបញ្ជាក់ឱ្យទៅសហគមន៍ជាតិហ្នឹងគេយល់ថា កម្ពុជាកំពុងតែបើកឱ្យមានសេរីភាពនយោបាយការគោរពសិទ្ធិមនុស្ស ឬក៏លទ្ធិប្រជាធិបតេយ្យហ្នឹងអត់ទាន់ល្អប្រសើរនៅឡើយទេ។ ពីព្រោះនៅមានបញ្ហាជាច្រើនទៀតដែល គេអាចវាយតម្លៃថា បញ្ហាប្រជាធិបតេយ្យ ឬក៏ការគោរពសិទ្ធិមនុស្សរបស់កម្ពុជានៅតែមានការធ្លាក់ចុះដដែល»។
មួយរយៈនេះតុលាការរបបក្រុងភ្នំពេញបានដោះលែងសកម្មជនបរិស្ថាន សកម្មជនសង្គម និងសកម្មជននយោបាយសរុបចំនួន៣៥ ពីពន្ធនាគារជាបន្តបន្ទាប់។ ការដោះលែងនេះ ដោយអ្នកខ្លះបានអនុវត្តទោសគ្រប់ចំនួននិងខ្លះទៀត មានភ្ជាប់លក្ខខណ្ឌ ដូចជាជូនដំណឹងដល់ព្រះរាជអាជ្ញា ប្រសិនបើចង់ចេញក្រៅប្រទេសផ្លាស់ប្ដូរទីលំនៅឋាន និងត្រូវបង្ហាញមុខសមត្ថកិច្ចជារៀងរាល់ខែជាដើម។
គិតត្រឹមថ្ងៃទី១៤វិច្ឆិកា មានសកម្មជនគណបក្សប្រឆាំង និងសកម្មជនសង្គមសរុបជិត៦០នាក់ទៀតកំពុងជាប់ឃុំនៅពន្ធនាគារ ក្នុងនោះ មានអ្នកខ្លះជាប់ឃុំជិត ២ឆ្នាំ និងជិត៥ឆ្នាំក៏មានដែរ។ ពួកគេត្រូវបានតុលាការចោទប្រកាន់ពីបទរួមគំនិតក្បត់ និងញុះញង់ពាក់ព័ន្ធនឹងការបង្ហោះសារចូលរួមសកម្មភាពនយោបាយជាមួយថ្នាក់ដឹកនាំគណបក្សសង្គ្រោះជាតិ។
ក្រុមអង្គការជាតិ-អន្តរជាតិ និងក្រុមប្រទេសប្រជាធិបតេយ្យ ព្រមទាំងអ្នកជំនាញសិទ្ធិមនុស្សរបស់អង្គការសហប្រជាជាតិ បានចាត់ទុកថា ការចាប់ខ្លួន និងចោទប្រកាន់សកម្មជនទាំងនោះគឺជារឿងអយុត្តិធម៌ និងគ្មានមូលដ្ឋានច្បាប់៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។