សាច់ញាតិសកម្មជនបក្សប្រឆាំង លោក ប៉ែន ច័ន្ទសង្គ្រាម ទាមទារឱ្យអាជ្ញាធរដោះលែងរូបលោកឱ្យមានសេរីភាពវិញ ព្រោះសកម្មជនរូបនេះមិនបានប្រព្រឹត្តបទល្មើសអ្វីឡើយ។ អាជ្ញាធរបានចាប់ខ្លួនលោក ប៉ែន ច័ន្ទសង្គ្រាម កាលពីថ្ងៃទី២៣ ធ្នូ តាមដីកាតុលាការ ដែលចោទលោកពីបទញុះញង់។
គ្រួសារសកម្មជនបក្សប្រឆាំងលោក ប៉ែន ច័ន្ទសង្គ្រាម ចាត់ទុកការចាប់ខ្លួនលោក ប៉ែន ច័ន្ទសង្គ្រាម ថា ជាការធ្វើទុក្ខបុកម្នេញ និងគំរាមកំហែងសិទ្ធិសេរីភាពបញ្ចេញមតិរបស់ពលរដ្ឋ។
ប្អូនប្រុសរបស់លោក ប៉ែន ច័ន្ទសង្គ្រាម គឺលោក ប៉ែន ពុទ្ធសភា ដែលកំពុងរស់នៅប្រទេសកាណាដា ថ្លែងថា បងប្រុសរបស់លោក មិនបានប្រព្រឹត្តកំហុសដូចការចោទប្រកាន់នោះទេ។ លោកថា រយៈពេលជាង ៤ខែចុងក្រោយនេះ បងប្រុសរបស់លោកបានសំងំលាក់ខ្លួននៅខេត្តជាប់ព្រំដែនថៃ ដើម្បីគេចពីតាមចាប់ខ្លួន របស់សមត្ថកិច្ចរបបក្រុងភ្នំពេញ៖ «យើងគិតថា នេះជាការបំបិទសិទ្ធិសេរីភាពចំពោះពលរដ្ឋ និងសកម្មជន ( សកម្មជនបក្សប្រឆាំង ) ដែលហ៊ានចេញមុខនិយាយជាសាធារណៈ សម្ដែងមតិមិនពេញចិត្តរដ្ឋាភិបាលលោក ហ៊ុន សែន ហើយវាជាការគំរាមកំហែងលើសិទ្ធិបញ្ចេញមតិ ក៏ប៉ុន្តែយើងឃើញហើយ របៀបហ្នឹងគឺវាមិនមានប្រសិទ្ធភាពទេ ផ្ទុយមកវិញធ្វើឱ្យពលរដ្ឋមានកំហឹង និងផ្ទុះការតវ៉ាកាន់តែខ្លាំង»។
តុលាការក្រុងភ្នំពេញបានចោទប្រកាន់ លោក ប៉ែន ច័ន្ទសង្គ្រាម ពីបទញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម និងបានចេញដីកាបញ្ជាឱ្យចាប់ខ្លួនលោក កាលពីចុងខែសីហា។ ក្ដីក្ដាំប្រឆាំងនឹងសកម្មជនគណបក្សសង្គ្រោះជាតិរូបនេះ កើតមានឡើងក្រោយពីលោកបានចូលរួមតវ៉ា ទាមទារឱ្យតុលាការដោះលែងមេសហជីពលោក រ៉ុង ឈុន សកម្មជនគណបក្សប្រឆាំង និងសកម្មជនព្រំដែន ចេញពីពន្ធនាគារ។
អ្នកនាំពាក្យអគ្គស្នងការដ្ឋាននគរបាលជាតិ លោក ឆាយ គឹមខឿន ប្រាប់អាស៊ីសេរីថា សមត្ថកិច្ចបានចាប់ខ្លួន លោក ប៉ែន ច័ន្ទសង្គ្រាម នៅខេត្តឧត្តរមានជ័យ កាលពីថ្ងៃទី២៣ ធ្នូ តាមដីកាបញ្ជាឱ្យនាំខ្លួន របស់តំណាងអយ្យការអមសាលាដំបូងរាជធានីភ្នំពេញ។ លោកថា មកទល់ពេលនេះ សកម្មជនគណបក្សប្រឆាំងរូបនេះ កំពុងជាប់ឃុំក្នុងពន្ធនាគារព្រៃស៖ «បានបញ្ជូនទៅតុលាការតាំងពីម្សិលមិញ ហើយឮថា តុលាការបានចេញដីកាឃុំខ្លួនហើយ។ យើងចាប់អនុវត្តតាមដីការបស់តុលាការ»។
លោក ប៉ែន ច័ន្ទសង្គ្រាម គឺជាសកម្មជនគណបក្សសង្គ្រោះជាតិរាជធានីភ្នំពេញ។ លោកធ្លាប់ត្រូវបានមេកងសន្តិសុខខណ្ឌដូនពេញ ឈ្មោះ គឹម វុត្ថា ទះកំភ្លៀងយ៉ាងកម្រោល កាលពីចុងខែមីនា ឆ្នាំ២០១៨ នៅពេលលោកចូលរួមតាមដានសវនាការសុំនៅក្រៅឃុំរបស់លោក កឹម សុខា នៅសាលាឧទ្ធរណ៍។
នាយករងទទួលបន្ទុកផ្នែកឃ្លាំមើលសិទ្ធិមនុស្ស នៃអង្គការសិទ្ធិមនុស្សលីកាដូ (Licadho) លោក អំ សំអាត ថ្លែងថា ការចាប់ខ្លួនលោក ប៉ែន ច័ន្ទសង្គ្រាម នេះ នឹងធ្វើឱ្យសហគមន៍ជាតិ និងអន្តរជាតិ រិះគន់កាន់តែខ្លាំងចំពោះការរំលោភសិទ្ធិសេរីភាពជាមូលដ្ឋានរបស់ពលរដ្ឋ៖ «ករណីនេះមិនខុសគ្នាដូចករណីលោក រ៉ុង ឈុន និងយុវជនមួយចំនួនហើយគាត់ធ្វើការតវ៉ានៅមុខតុលាការនោះទេ។ ករណីទាំងអស់ហ្នឹងរងការរិះគន់កាន់តែខ្លាំង ពីសហគមន៍អន្តរជាតិ និងអង្គការសហប្រជាជាតិថា វារំលោភបំពានលើសិទ្ធិសេរីភាពជាមូលដ្ឋានរបស់ពលរដ្ឋ ហើយការចាប់ខ្លួនទាំងអស់ហ្នឹង ក៏គេថាវាជាប់ពាក់ព័ន្ធនឹងស្ថានភាពនយោបាយផងដែរ»។
ចាប់តាំងពីខែមករា រហូតដល់ចុងខែធ្នូ ឆ្នាំ២០២០ នេះ អាជ្ញាធររបបលោក ហ៊ុន សែន បានចាប់ខ្លួនសកម្មជនបក្សប្រឆាំង មន្ត្រីសង្គមស៊ីវិល មេសហជីព អ្នកការពារបរិស្ថាន និងយុវជនរិះគន់សង្គម ដាក់ពន្ធនាគារជិត៥០ នាក់ហើយ ក្រោមបទចោទ ញុះញង់ និងរួមគំនិតក្បត់។ សហគមន៍ជាតិ និងអន្តរជាតិបានថ្កោលទោសការចាប់ខ្លួនទាំងនេះ និងទាមទារឱ្យរបបលោក ហ៊ុន សែន ដោះលែងអ្នកជាប់ឃុំទាំងនោះឱ្យមានសេរីភាពវិញ ព្រោះពួកគេមិនបានប្រព្រឹត្តបទល្មើសដូចការចោទប្រកាន់ឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។