យុវតីជាអ្នកគាំទ្រគណបក្សសង្គ្រោះជាតិឈ្មោះ អៀង ម៉ារីណា ហៅក្រៅថា ស្រីមាស ត្រូវជនមិនស្គាល់មុខលួចវាយអោយរបួសក្បាលកាលពីល្ងាចថ្ងៃ ទី១១ ខែឧសភាម្សិលម៉ិញ នៅខាងមុខផ្ទះជួលនៅក្នុងម្ដុំសំណង់១២។
ស្រីមាស ប្រាប់អាស៊ីសេរីថា នាងសង្ស័យថានេះ អាចជាការប៉ុនប៉ងធ្វើបាបរូបនាង ដែលតែងហ៊ានចេញវីដេអូរិះគន់ ការដឹកនាំរបស់លោកនាយករដ្ឋមន្ត្រី ហ៊ុន សែន តាមគណនីហ្វេសប៊ុក របស់នាង ដែលមានឈ្មោះថា ណាណា ( Na Na)។ នាងថា នៅក្រោយពេលនាងបង្ហោះវីដេអូខ្លីៗ ទាំងនោះ តែងមានគណនីហ្វេសប៊ុកមួយចំនួន គឺមានទាំងជនស៊ីវិល ប៉ូលិស និងប៉េអិមផងគំរាមធ្វើបាបនាង ឬចាប់ខ្លួននាង។ នាងថា អ្នកដែលលួចវាយនាងនោះជាមនុស្សប្រុស ប៉ុន្តែមិនអាចមើលមុខឃើញដោយសារបុរសនោះពាក់មួកការពារសុវត្ថិភាព ហើយមានពាក់របាំងមុខ ឬម៉ាស់ថែមទៀត។
« ដំបូងវាវាយខ្ញុំម៉ាដុំថ្មម៉ាប ខ្ញុំវិលមុខរកដួល ហើយវាយម៉ាដុំថ្មទៀត ហើយវាចង្អុលមុខខ្ញុំគំរាមអោយប្រយ័ត្នខ្លួន។ ខ្ញុំអត់ដឹងថា ពីណាគេឱ្យប្រាកដទេ។ ពេលហ្នុងខ្ញុំទៅផ្សាររកទិញម្ហូប។ ម្ដុំផ្ទះខ្ញុំហ្នឹង គឺស្ងាត់ខ្លាំងមិនថា ថ្ងៃមិនថាយប់»។
ស្រីមាសថានាងមិនហ៊ានប្ដឹងករណីនេះទៅអាជ្ញាធរឡើយដោយខ្លាចត្រូវអាជ្ញាធរចាប់ខ្លួន ដ្បិតនាងធ្លាប់ត្រូវអាជ្ញាធរឃាត់ខ្លួនសាកសួរម្ដងរួចហើយកាលពីពេលថ្មីៗនេះ។ ស្រីមាស បន្តថា នាងនឹងទៅរកអង្គការសិទ្ធិមនុស្សអោយជួយឃ្លាំមើលសុវត្ថិភាពរបស់នាង។
បើទោះជារងរបួសយុវតីវ័យ ២២ឆ្នាំ និងជាក្មេងកំព្រាឪពុកម្ដាយរូបនេះអះអាងថា នឹងមិនបញ្ឈប់ការបញ្ចេញមតិតាមបណ្ដាញសង្គមហ្វេសប៊ុកនោះទេ ដ្បិតនាងចង់បានអ្នកដឹកនាំប្រទេសតាមបែបប្រជាធិបតេយ្យពិតប្រាកដ។
កន្លងទៅនេះមានសកម្មជនគណបក្សសង្គ្រោះជាតិចំនួន ១៥នាក់ផ្សេងទៀត ក៏ត្រូវជនមិនស្គាល់មុខលួចវាយអោយរបួស ហើយរហូតមកដល់ពេលនេះគ្មានជនប្រព្រឹត្តណាម្នាក់ត្រូវបានអាជ្ញាធររកឃើញ ឬក៏ចាប់ខ្លួនអោយមកទទួលទោសនោះទេ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។