អតីតអគ្គលេខាធិការ និងជាអ្នកនាំពាក្យ ដែលត្រូវបណ្ដេញចេញពីគណបក្សហ្វ៊ុនស៊ិនប៉ិចរូបនេះ ប្រាប់អាស៊ីសេរី ថា លោកមិនទាន់ទទួលបានដំណឹងថា គណបក្សហ្វ៊ុនស៊ិនប៉ិច មានបំណងចង់លក់ស្នាក់ការបក្សតាមខេត្តទេ។ តែយ៉ាងណា លោកជំទាស់ដាច់ខាត ចំពោះផែនការនេះ ព្រោះស្នាក់ការទាំងនោះ ជាកេរមរតក ដែលសមាជិកជំនាន់មុនបន្សល់ទុកឲ្យគណបក្សហ្វ៊ុនស៊ិនប៉ិច។
លោក ញ៉េប ប៊ុនជិន ឲ្យដឹងថា ស្នាក់ការគណបក្សហ្វ៊ុនស៊ិនប៉ិច តាមខេត្តទាំងអស់ បានកើតឡើងតាមរយៈមូលនិធិគណបក្សតាំងពី ជំនាន់បោះឆ្នោតអាណត្តិទី១ ហើយភាគច្រើនជាស្នាដៃបង្កើតរបស់អភិបាលខេត្ត មកពីគោលការណ៍គណបក្សហ្វ៊ុនស៊ិនប៉ិច ដែលឈ្នះឆ្នោត នៅឆ្នាំ១៩៩៣។
កាសែតភ្នំពេញប៉ុស្តិ៍ ចុះផ្សាយថា មន្ត្រីគណបក្សហ្វ៊ុនស៊ិនប៉ិចម្នាក់ សុំមិនបញ្ចេញឈ្មោះ ថ្លែងថា ស្នាក់ការគណបក្ស ហ៊្វុនស៊ិនប៉ិច ទាំង ២ខេត្ត ត្រូវបានដាក់លក់ក្នុងតម្លៃប្រហែល ៩០ម៉ឺនដុល្លារសហរដ្ឋអាមេរិក គឺស្នាក់ការបក្សនៅខេត្តមណ្ឌលគិរី លក់ក្នុងតម្លៃប្រហែល ៤០ម៉ឺនដុល្លារ និងស្នាក់ការបក្សនៅខេត្តកំពង់ឆ្នាំង លក់តម្លៃប្រហែល៥០ម៉ឺនដុល្លារ។ ស្នាក់ការបក្សនៅខេត្តទាំង២ នេះ ត្រូវបានដាក់លក់ក្រោមហេតុផលប្រមូលថវិកាថ្វាយប្រធានគណបក្ស ហ្វ៊ុនស៊ិនប៉ិច សម្តេចក្រុមព្រះ នរោត្តម រណឫទ្ធិ ដើម្បីព្យាបាលជំងឺរបស់ព្រះអង្គ នៅប្រទេសថៃ។
អាស៊ីសេរី បានព្យាយាមសុំការបញ្ជាក់បន្ថែមរឿងនេះពីអ្នកនាំពាក្យគណបក្ស ហ្វ៊ុនស៊ិនប៉ិច លោក ណុប សុធារិទ្ធិ ច្រើនដងតាមទូរស័ព្ទ នៅថ្ងៃទី៥ សីហា ប៉ុន្តែអ្នកលើកទូរស័ព្ទប្រាប់ថា ខ្លួនជាជំនួយការ ចំណែកឯអ្នកនាំពាក្យបក្សជាប់រវល់ប្រជុំ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។