សមត្ថកិច្ចអះអាងថា ស្ថាបនិកបក្សបេះដូងជាតិលោក សៀម ភ្លុក នឹងចេញពីពន្ធនាគារនៅថ្ងៃទី២៧ ខែតុលា ចុងសប្ដាហ៍នេះ ក្រោយលោកអនុវត្តទោសគ្រប់ចំនួន នៅក្នុងសំណុំរឿងក្លែងឯកសារ បង្កើតគណបក្សបេះដូងជាតិកន្លងទៅ។ ប៉ុន្តែគ្រួសារ និងមន្ត្រីសិទ្ធិមនុស្ស នៅតែចាត់ទុកការផ្ដន្ទាទោសសមាជិកបក្សជំទាស់ទាំងនោះឱ្យជាប់ឃុំចប់រយៈពេល២ឆ្នាំ៦ខែថាជារឿងមិនត្រឹមត្រូវ និងជាការធ្វើទុក្ខបុកម្នេញផ្នែកនយោបាយ។
អ្នកនាំពាក្យអគ្គនាយកដ្ឋានពន្ធនាគារនៃក្រសួងមហាផ្ទៃ និងជាប្រធានពន្ធនាគារព្រៃស លោក នុត សវនា ប្រាប់វិទ្យុអាស៊ីសេរីនៅថ្ងៃទី២២ ខែតុលាថា បច្ចុប្បន្នលោក សៀម ភ្លុក កំពុងជាប់ឃុំនៅមណ្ឌលអប់រំកែប្រែទី១ រាជធានីភ្នំពេញ។ លោកបញ្ជាក់ថា សមត្ថកិច្ចនឹងដោះលែងលោក សៀម ភ្លុក ចេញពីពន្ធនាគារ នៅថ្ងៃអាទិត្យ ទី២៧ ខែតុលាខាងមុខ ក្រោយការអនុវត្តទោសរបស់គាត់បញ្ចប់។
លោក នុត សវនា៖ «លោក សៀម ភ្លុក នេះនឹងត្រូវធ្វើការដោះលែង នៅថ្ងៃទី២៧ ខែតុលា ឆ្នាំ២០២៤ នេះ។ បច្ចុប្បន្ននេះ គាត់នៅមណ្ឌលអប់រំកែប្រែទី១»។
កាលពីថ្ងៃទី២៧ ខែមេសា ឆ្នាំ២០២២ សមត្ថកិច្ចបានចាប់ខ្លួនស្ថាបនិកគណបក្សបេះដូងជាតិលោក សៀម ភ្លុក។ សាលាដំបូងរាជធានីភ្នំពេញរហូតដល់សាលាឧទ្ធរណ៍ និងតុលាការកំពូលបានសម្រេចក្ដីដូចគ្នា ដោយផ្ដន្ទាទោសឱ្យលោក សៀម ភ្លុក ជាប់ពន្ធនាគាររយៈពេល ២ឆ្នាំ៦ខែ។ ចំណែកលោក ខឿន វីរ៉ាត់ លោក តូច ថឹង និងអ្នកស្រី នូ សុទ្ធារី ត្រូវជាប់ពន្ធនាគាររយៈពេល២ឆ្នាំ អំពីបទ «ក្លែងបន្លំឯកសារ» ពាក់ព័ន្ធការប្រមូលស្នាមមេដៃពីពលរដ្ឋ ដើម្បីបង្កើតគណបក្សបេះដូងជាតិ។ ប៉ុន្តែពួកគាត់ច្រានចោលការចោទប្រកាន់នោះ។
ជុំវិញរឿងនេះ ប្រពន្ធរបស់លោក សៀម ភ្លុក គឺលោកស្រី ឆៃ តុលា ប្រាប់វិទ្យុអាស៊ីសេរីថា ប្ដីលោកស្រីជាប់ឃុំនៅក្នុងពន្ធនាគារព្រៃស២ឆ្នាំ៦ខែទាំងអយុត្តិធម៌។ ប៉ុន្តែលោកស្រីកោតសរសើរពីចិត្តប្តីដែលលះបង់សេរីភាព តស៊ូ ដើម្បីបុព្វហេតុជាតិ។ លោកស្រីរំពឹងថាអាជ្ញាធរនឹងដោះលែងប្ដីឲ្យមានសេរីភាពបន្ទាប់ពីគាត់អនុវត្តទោសគ្រប់ចំនួន។
លោកស្រី ឆៃ តុលា៖ «ក្រោយប្ដីខ្ញុំជាប់ពន្ធនាគារ ជាធម្មតាខ្ញុំពិបាកដូចជាយើងមានដៃពីរនៅតែដៃតែមួយអ៊ីចឹង ណាមួយប្ដីខ្ញុំអត់នៅ ខ្ញុំមានជំងឺទៀត គឺគាបសរសៃឆ្អឹងខ្នងអត់អាចធ្វើការងារអ្វីកើតទេ ការលះបង់របស់គាត់(ប្ដីរបស់លោកស្រី)គឺអ្នកដទៃមិនអាចធ្វើបានទេ»។
ចំណែកប្រពន្ធមន្ត្រីគណបក្សភ្លើងទៀន លោក តូច ថឹង គឺលោកស្រី ហាញ់ សុវណ្ណា ថ្លែងថា រយៈពេល ៥ខែទៀត ទើបប្ដីលោកស្រីអនុវត្តទោសគ្រប់ចំនួន ២ឆ្នាំដែលតុលាការកំណត់ទោស។ លោកស្រីបញ្ជាក់ថា ប្ដីរបស់លោកស្រីមិនបានក្លែងឯកសារបង្កើតគណបក្សនយោបាយដូចការចោទប្រកាន់ឡើយ ដូច្នេះលោកស្រីស្នើឱ្យស្ថាប័នពាក់ព័ន្ធ ជាពិសេសរដ្ឋាភិបាលដោះលែងប្តីលោកស្រីឱ្យមានសេរីភាពមុនពេលកំណត់ ខណៈគាត់មានវ័យកាន់តែចាស់ និងមានជំងឺនៅក្នុងពន្ធនាគារ។
លោកស្រី ហាញ់ សុវណ្ណា៖ «ខ្ញុំទទូចហើយទទូចទៀត សូមឱ្យតុលាការ សូមឱ្យព្រះមហាក្សត្រ និយាយទៅនាយករដ្ឋមន្ត្រីដោះលែងប្ដីរបស់ខ្ញុំមក ពីព្រោះគាត់អត់មានកំហុសទេ គាត់ជាប់ពន្ធនាគារជិតគ្រប់ហើយសល់តែ ៥ខែទៀតទេ ខ្ញុំស្នើដោះលែងប្ដីរបស់ខ្ញុំមុនកំណត់មក បើគាត់(លោក ហ៊ុន សែន)ទៅធ្វើបុណ្យកឋិនទាននៅកម្ពុជាក្រោម ហើយគាត់អត់ដោះលែងខ្មែរក្រោមដូចវាអត់ន័យ»។
វិទ្យុអាស៊ីសេរីមិនអាចទាក់ទងអ្នកនាំពាក្យរដ្ឋាភិបាល លោក ប៉ែន បូណា និងអ្នកនាំពាក្យក្រសួងយុត្តិធម៌លោក ជិន ម៉ាលីន ដើម្បីសុំការឆ្លើយតបជុំវិញរឿងនេះបានទេ នៅថ្ងៃទី២២ ខែតុលា។
ទោះជាយ៉ាងណាក្ដី មន្ត្រីសិទ្ធិមនុស្សលើកឡើងថា តាមច្បាប់ស្ដីពីគណបក្សនយោបាយ បើឯកសារស្នើសុំបង្កើតគណបក្សមានភាពមិនប្រក្រតី រដ្ឋាភិបាលត្រូវបញ្ជូនឯកសារទាំងនោះ ឱ្យតំណាងបក្សកែតម្រូវឡើងវិញ ដោយអាជ្ញាធរមិនគួរចាប់ខ្លួន និងចោទប្រកាន់ដាក់ពន្ធនាគារនោះទេ។
មន្ត្រីជាន់ខ្ពស់នៃសមាគមការពារសិទ្ធិមនុស្សអាដហុកលោក យី សុខសាន្ត ដែលបានឃ្លាំមើលសំណុំរឿងនេះមានប្រសាសន៍ថា ចំណាត់ការលើលោក សៀម ភ្លុក និងអ្នកពាក់ព័ន្ធឱ្យជាប់ពន្ធនាគារកន្លងទៅ គឺធ្វើឡើងមិនត្រឹមត្រូវតាមច្បាប់ស្ដីពីគណបក្សនយោបាយ។ លោកបារម្ភថាបញ្ហានេះធ្វើឱ្យការប៉ះពាល់ដល់ការអនុវត្តសិទ្ធិរបស់ពលរដ្ឋក្នុងការបង្កើតគណបក្សនយោបាយសម្រាប់ចូលរួមប្រកួតប្រជែងការបោះឆ្នោត។ លោក យី សុខសាន្ត មើលឃើញថា ក្រៅពីពួកគាត់បដិសេធចំពោះការចោទប្រកាន់ នៅសវនាការរបស់តុលាការគ្រប់ថ្នាក់ហើយ ពួកគាត់នៅបន្តរក្សាជំហររឹងមាំដោយមិនទទួលកំហុស ឬសារភាព ហើយសុខចិត្តជាប់ពន្ធនាគារមកទល់ពេលនេះដើម្បីបង្ហាញឆន្ទៈ ឬភាពស្អាតស្អំ។
លោក យី សុខសាន្ត៖ «ខ្ញុំជឿថាប្រទេសមួយចំនួន គឺគេនៅគាំទ្រពួកគាត់ ដោយគេចាត់ទុកថា ពួកគាត់មិនបានប្រព្រឹត្តខុសច្បាប់ទេ ហើយយើងស្នើសុំចាប់ពីពេលនេះទៅ រដ្ឋាភិបាលគួរតែបើកលំហសេរីភាពទាំងអង្គការសង្គមស៊ីវិល ក៏ដូចគណបក្សនយោបាយឱ្យបានចូលរួមប្រកួតប្រជែងតាមស្មារតីនៃកិច្ចព្រមព្រៀងទីក្រុងប៉ារីស ២៣ តុលា ១៩៩១»។
មន្រ្តីសង្គមស៊ីវិល រួមជាមួយសហគមន៍អន្តរជាតិមើលឃើញថា ការផ្ដន្ទាទោសលើលោក សៀម ភ្លុក និងអ្នកពាក់ព័ន្ធផ្សេងទៀតជារឿងនយោបាយ មិនមែនជាការអនុវត្តច្បាប់នោះទេ ហើយទាមទារឱ្យរដ្ឋាភិបាលលោក ហ៊ុន ម៉ាណែត ដោះលែងអ្នកទោសមនសិការទាំងអស់ឱ្យត្រឡប់មកធ្វើសកម្មភាពនយោបាយ ព្រមទាំងស្តារប្រជាធិបតេយ្យ និងការគោរពសិទ្ធិមនុស្សនៅកម្ពុជាឱ្យប្រសើរឡើងវិញ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។