កូនប្រុសច្បងរបស់លោក ហ៊ុន សែន គឺលោក ហ៊ុន ម៉ាណែត ថ្លែងសារវាយប្រហារថ្នាក់ដឹកនាំគណបក្សសង្គ្រោះជាតិថា ជាអ្នកនយោបាយគ្មានគុណធម៌ និងកំពុងធ្វើសកម្មភាពដុតបំផ្លាញឆ្នាំងបាយប្រជាពលរដ្ឋខ្លួនឯង។ មន្ត្រីបក្សប្រឆាំងនៅមូលដ្ឋាន និងអ្នកឃ្លាំមើលសង្គមយល់ថា រឿងហេតុនៅកម្ពុជាដើរដល់ដំណាក់កាលនេះ គឺដោយសារតែមហិច្ឆតាអំណាចរបស់លោក ហ៊ុន សែន មិនមែនជាកំហុសរបស់ក្រុមអ្នកនយោបាយបក្សប្រឆាំងនោះឡើយ។
អគ្គមេបញ្ជាការកងទ័ពជើងគោក លោក ហ៊ុន ម៉ាណែត បាននិយាយដោយមិនចំឈ្មោះថា អ្នកនយោបាយមួយចំនួនគិតតែដើរស្រែកជេររដ្ឋាភិបាល បន្លាចពលរដ្ឋនៅក្រៅប្រទេស និងដើរអង្វរឱ្យសហភាពអឺរ៉ុបដាក់ទណ្ឌកម្មសេដ្ឋកិច្ចលើកម្ពុជា ដោយមិនគិតពីឆ្នាំបាយរបស់ពលរដ្ឋ។ លោកបន្តថា អ្នកខ្លះទៀតខំប្រឹងអំពាវនាវឱ្យកងកម្លាំងប្រដាប់អាវុធងើបបះបោរ និងបញ្ឆេះកំហឹងពលរដ្ឋ ដើម្បីតែមហិច្ឆតានយោបាយរបស់ខ្លួន។ លោកបានហៅអ្នកនយោបាយប្រភេទនេះ ថាជាមនុស្សគ្មានគុណធម៌។
ឧត្ដមសេនីយ៍ផ្កាយ៣ រូបនេះ ថ្លែងបែបនេះនៅក្នុងពិធីសម្ពោធអាគារសិក្សាមួយកន្លែងនៅក្នុងខេត្តតាកែវ កាលពីថ្ងៃទី២៩ មិថុនា និងត្រូវបានស្រង់សម្ដីដោយសារព័ត៌មានស្និទ្ធនឹងរបបក្រុងភ្នំពេញនៅថ្ងៃទី៣០ មិថុនា។
ទោះជាលោក ហ៊ុន ម៉ាណែត មិនបញ្ចេញឈ្មោះអ្នកនយោបាយរូបនោះក៏ដោយ ក៏គេអាចយល់បានថា លោកនិយាយសំដៅទៅលើក្រុមអ្នកនយោបាយបក្សប្រឆាំងដែរ ពីព្រោះរបបឪពុកលោកតែងតែចោទប្រកាន់ថ្នាក់ដឹកនាំគណបក្សសង្គ្រោះជាតិអំពីរឿងបែបនេះដូចគ្នា។ ម្យ៉ាងវិញទៀត មិនមានអ្នកនយោបាយណាផ្សេង ក្រៅពីថ្នាក់ដឹកនាំគណបក្សសង្គ្រោះជាតិទេ ដែលកំពុងធ្វើសកម្មភាពនៅក្រៅប្រទេស ដើម្បីតស៊ូប្រឆាំងនឹងការដឹកនាំបែបផ្ដាច់ការរបស់ឪពុកលោក។
ទន្ទឹមនឹងការបន្តុះបង្អាប់ក្រុមអ្នកនយោបាយបក្សប្រឆាំងបែបនេះ លោក ហ៊ុន ម៉ាណែត ក៏បានលើកសរសើរពីគុណសម្បត្តិនៃការដឹកនាំរបស់លោក ហ៊ុន សែន ដែលជាឪពុកផងដែរ។ លោកបានលើកឡើងថា ឪពុករបស់លោកដឹកនាំប្រទេសប្រកបដោយគុណធម៌ និងធ្វើឱ្យពលរដ្ឋមានសេចក្តីសុខសប្បាយ ដោយមិនប្រកាន់បក្សនយោបាយឡើយ។ លោកបានអំពាវនាវឱ្យប្រជាពលរដ្ឋបន្តគាំទ្រការដឹកនាំរបស់ឪពុកលោកតទៅទៀត។
ទោះជាយ៉ាងណា អ្នកនយោបាយបក្សប្រឆាំងនៅមូលដ្ឋាន និងអ្នកឃ្លាំមើលសង្គម ច្រានចោលប្រសាសន៍របស់លោក ហ៊ុន ម៉ាណែត នេះ។
អតីតចៅសង្កាត់ជាប់ឆ្នោតគណបក្សសង្គ្រោះជាតិនៅសង្កាត់នគរធំ ក្រុងសៀមរាប លោក សៀក ចំណាប់ ថ្លែងថា ដើម្បីបង្ហាញថា បក្សកាន់អំណាច ឬបក្សប្រឆាំង មួយណាមានគុណធម៌ក្នុងចិត្តពលរដ្ឋនោះ លោកស្នើឱ្យរបបក្រុងភ្នំពេញ បើកឱ្យមានការបោះឆ្នោតឡើងវិញ ដោយមានវត្តមានរបស់គណបក្សសង្គ្រោះជាតិ។ លោកថា ដរាបណាមិនមានដំណោះស្រាយនយោបាយទេ ការអួតអាងអំពីការស្រឡាញ់ជាតិរបស់ក្រុមអ្នកកាន់អំណាចនោះ នឹងមិនមែនជាការពិតឡើយ។ លោកបន្ថែមថា ដំណោះស្រាយបញ្ហាជាតិទាំងអស់ គឺស្ថិតក្នុងកណ្ដាប់ដៃរបបក្រុងភ្នំពេញ មិនមែនស្ថិតលើគណបក្សសង្គ្រោះជាតិនោះឡើយ៖ «ក្នុងនាមជាអាជ្ញាធរដឹកនាំជាតិ យើងគួរតែយល់ហើយថា តើអ្នកដែលវាយបំបែកឆ្នាំងបាយពលរដ្ឋខ្លួនឯងហ្នឹង គឺជាអ្នកណា។ អ៊ីចឹងកូនសោ គឺនៅលើដៃរបបក្រុងភ្នំពេញហ្នឹងទេ។ បើគាត់មានចេតនាមិនចង់ឱ្យគេកាត់ ឬក៏ព្យួរ EBA អាហ្នឹងគាត់អាចធ្វើបានយ៉ាងងាយស្រួល ពីព្រោះកូនសោមិនមែននៅជាមួយថ្នាក់ដឹកនាំគណបក្សសង្គ្រោះជាតិទេ។ ពេលនេះគណបក្សសង្គ្រោះជាតិត្រូវបានរំលាយ អ៊ីចឹងមិនមែនកូនសោនៅគណបក្សសង្គ្រោះជាតិទេ។ កូនសោនៅលើគណបក្សដឹកនាំប្រទេស ហើយមេសោនៅលើសហភាពអឺរ៉ុប អ៊ីចឹងបើគាត់យកកូនសោហ្នឹងទៅចាក់ឱ្យត្រូវចំណុចដែលសហភាពអឺរ៉ុបចង់បាន នោះសោនឹងរបើកហើយ ផ្លូវនយោបាយនឹងមានដំណោះស្រាយហើយ»។
របបលោក ហ៊ុន សែន បានចាប់ប្រធានគណបក្សសង្គ្រោះជាតិលោក កឹម សុខា ដាក់ពន្ធនាគារ ដោយចោទប្រកាន់មិនសមហេតុផល និងកង្វះភស្តុតាងពីបទក្បត់ជាតិ។ ក្រៅពីនេះ របបនេះបានរំលាយគណបក្សសង្គ្រោះជាតិ ព្រមទាំងយកអាសនៈសភា និងក្រុមប្រឹក្សាឃុំសង្កាត់របស់បក្សនេះ យកទៅចែកគ្នាកាន់កាប់ ហើយបានហាមប្រាមអ្នកនយោបាយបក្សប្រឆាំងជាង ១០០នាក់ មិនឱ្យធ្វើសកម្មភាពនយោបាយរយៈពេល ៥ឆ្នាំថែមទៀត។ សំខាន់ជាងនេះទៅទៀត របបនេះបានរៀបចំការបោះឆ្នោតបែបបង្គ្រប់កិច្ច នៅខែកក្កដា ឆ្នាំ២០១៨ កន្លងទៅ រួចប្រមូលយកអាសនៈសភាទាំងអស់មកក្ដោបក្ដាប់តែម្នាក់ឯង ធ្វើឱ្យកម្ពុជាក្លាយជារដ្ឋឯកបក្សថ្មីមួយនៅលើពិភពលោក ក្នុងសតវត្សទី២១នេះ។
ទន្ទឹមនឹងការកម្ទេចដៃគូប្រជែងដ៏ធំរបស់ខ្លួននេះ របបលោក ហ៊ុន សែន ក៏បានវាយបង្ក្រាបឥតស្រាកស្រាន្តទៅលើក្រុមអង្គការសង្គមស៊ីវិល សហជីព និងស្ថាប័នព័ត៌មានឯករាជ្យផងដែរ ជាពិសេសរបបនេះបានរឹតត្បិតសិទ្ធិសេរីភាពជាមូលដ្ឋានរបស់ពលរដ្ឋ ទាំងនៅក្នុងសង្គម និងនៅលើប្រព័ន្ធអ៊ីនធឺណិត។
ចំណាត់ការទាំងនេះ ត្រូវបានសហគមន៍អន្តរជាតិនិយមប្រជាធិបតេយ្យ វាយតម្លៃថា ជាការរំលោភសិទ្ធិមនុស្សធ្ងន់ធ្ងរ និងជាគាស់រំលើងគ្រឹះប្រជាធិបតេយ្យនៅកម្ពុជា។ បញ្ហានេះហើយដែលធ្វើឱ្យសហភាពអឺរ៉ុបចាប់ផ្ដើមសើរើមើលឡើងវិញនូវទំនាក់ទំនងផ្នែកពាណិជ្ជកម្មជាមួយកម្ពុជា និងព្រមានពីការដកហូតប្រព័ន្ធអនុគ្រោះពន្ធក្រោមកម្មវិធី “ទំនិញគ្រប់មុខលើកលែងគ្រឿងសព្វាវុធ ឬ EBA” ពីកម្ពុជា។
អគ្គលេខាធិការសហព័ន្ធនិស្សិតបញ្ញវន្តកម្ពុជា លោក គៀន ពន្លក ថ្លែងថា វិបត្តិ EBA នេះ ផ្តើមចេញពីការរំលោភសិទ្ធិមនុស្ស និងការបំផ្លាញប្រជាធិបតេយ្យនៅកម្ពុជាដោយក្រុមអ្នកកាន់អំណាច។ លោកបន្តថា បើទោះជាបក្សប្រឆាំងមិនលើករឿងនេះមកនិយាយ ក៏សហភាពអឺរ៉ុបគង់តែដាក់សម្ពាធលើរដ្ឋាភិបាលកម្ពុជាដែរ ព្រោះប្រព័ន្ធអនុគ្រោះពន្ធនេះត្រូវបានផ្ដល់ឱ្យដោយភ្ជាប់នូវលក្ខខណ្ឌគោរពសិទ្ធិមនុស្ស និងសិទ្ធិការងារនេះឯង។ លោកយល់ថា សកម្មភាពរបស់ក្រុមអ្នកនយោបាយបក្សប្រឆាំងដើម្បីស្ដារស្ថានការណ៍ស្រុកទេសឡើងវិញនោះ មិនអាចហៅថាជា រឿងគ្មានគុណធម៌ឡើយ។ លោកថា ការប្រើអំណាចតុលាការដើម្បីរំលាយបក្សសង្គ្រោះជាតិដែលមានអ្នកគាំទ្រជិតកន្លះប្រទេសនោះទៅវិញទេ ទើបជារឿងគ្មានគុណធម៌របស់អ្នកនយោបាយ៖ «អ្វីទាំងអស់នេះ មិនមែនជាមហិច្ឆតារបស់គណបក្សសង្គ្រោះជាតិទេ គឺជាការថែរក្សាអំណាចរបស់ប្រមុខរដ្ឋាភិបាលកម្ពុជា គឺសម្ដេចនាយករដ្ឋមន្ត្រីហ្នឹងឯង ព្រោះមកដល់ពេលនេះ មិនមែនគណបក្សប្រឆាំងមានសិទ្ធិក្នុងការឱ្យសហភាពអឺរ៉ុប ឬក៏សហរដ្ឋអាមេរិកដាក់សម្ពាធលើរដ្ឋាភិបាលទេ។ អ្វីទាំងអស់ គឺកើតចេញពីកំហុសខ្លួនឯងរបស់រដ្ឋាភិបាល គឺការរំលាយគណបក្សប្រឆាំងដែលធំជាងគេ ដែលប្រជាពលរដ្ឋគាំទ្រជាងកន្លះនគរ។ ហើយបើមើលទៅ គណបក្សប្រឆាំងមិនមានសម្ពាធអ្វីដែលឱ្យអន្តរជាតិមកដាក់សម្ពាធលើប្រទេសកម្ពុជាទេ រួមទាំងការផ្ដាច់ប្រព័ន្ធអនុគ្រោះពន្ធ EBA និង GSP របស់សហរដ្ឋអាមេរិកជាដើម»។
អ្នកឃ្លាំមើលសង្គមរូបនេះ សង្កត់ធ្ងន់ថា ក្នុងនាមជាបញ្ញវន្ត និងជាអ្នកស្នងមរតកអំណាចពីឪពុក លោក ហ៊ុន ម៉ាណែត គួរតែលើករឿងទាំងនេះទៅជជែកជាមួយលោក ហ៊ុន សែន ដើម្បីរកដំណោះស្រាយបញ្ហានយោបាយ និងហានិភ័យដែលជាតិកំពុងប្រឈម ជាជាងការខំនិយាយបិទបាំងអំពីកំហុសឆ្គងក្រោមការដឹកនាំរបស់ឪពុកលោក៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។