លោក ហ៊ុន ណេង ដែលជាបងប្រុសរបស់លោកនាយករដ្ឋមន្រ្តី ហ៊ុន សែន បានទទួលមរណភាពដោយជំងឺបេះដូងកាលពីរសៀលថ្ងៃទី៥ ខែឧសភា នេះក្នុងអាយុ ៧៣ឆ្នាំ។
នេះបើតាមការអះអាងរបស់ក្មួយប្រុសលោក ហ៊ុន ណេង គឺលោក ហ៊ុន ជា ប្រាប់សារព័ត៌មានក្នុងស្រុកនៅថ្ងៃទី៥ខែឧសភា នេះ។
លោក ហ៊ុន ណេង បច្ចុប្បន្នជាប្រធានគណៈប្រតិភូគណៈកម្មការមហាផ្ទៃ ការពារជាតិ និងមុខងារសាធារណៈនៃរដ្ឋសភា ជាអតីតតំណាងរាស្ត្រមណ្ឌលកំពង់ចាម នៃគណបក្សប្រជាជនកម្ពុជានិងជាអតីតអភិបាលខេត្តកំពង់ចាម។
លោក ហ៊ុន ណេង បច្ចុប្បន្នជាសមាជិកអចិន្ត្រៃយ៍រដ្ឋសភាជាអ្នកតំណាងរាស្ត្រមណ្ឌលកំពង់ចាមនៃគណបក្សប្រជាជនកម្ពុជានិងជាអតីតអភិបាលខេត្តកំពង់ចាម។
លិខិតមរណភាពរបស់ភរិយាលោក ហ៊ុន ណេង គឺលោកស្រី លាង វួចឆេង ឲ្យដឹងថា សពរបស់លោក ហ៊ុន ណេង នឹងត្រូវតម្កល់ធ្វើបុណ្យនៅគេហដ្ឋាន ស្ថិតនៅភូមិទី៧ សង្កាត់កំពង់ចាម ក្រុងកំពង់ចាម រួចដង្ហែរយកទៅបញ្ចុះនៅវត្តសុវណ្ណគិរីរតនៈភ្នំប្រុស ស្ថិតនៅភូមិត្រពាំងចារ ឃុំក្រឡា ស្រុកកំពង់សៀម ខេត្តកំពង់ចាម នៅថ្ងៃទី៩ ខែឧសភា៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។