មេដឹកនាំរបបក្រុងភ្នំពេញ លោក ហ៊ុន សែន នឹងដឹកនាំគណៈប្រតិភូទៅចូលរួមក្នុង “វេទិកាខ្សែក្រវាត់ និងផ្លូវលើកទី២ សម្រាប់កិច្ចសហប្រតិបត្តិការអន្តរជាតិ” នៅទីក្រុងប៉េកាំង ប្រទេសចិន ចាប់ពីថ្ងៃទី២៥ ដល់ទី២៩ មេសា ខាងមុខ។
សេចក្ដីប្រកាសព័ត៌មានរបស់ក្រសួងការបរទេស និងសហប្រតិបត្តិការអន្តរជាតិនៅថ្ងៃទី២២ មេសា ឱ្យដឹងថា អំឡុងពេលស្នាក់នៅប្រទេសចិននេះ លោក ហ៊ុន សែន នឹងមានជំនួបទ្វេភាគីជាមួយថ្នាក់ដឹកនាំកំពូលរបស់ចិន មានជាអាទិ លោកប្រធានាធិបតី ស៊ី ជីនពីង (Xi Jinping) លោកនាយករដ្ឋមន្ត្រី លី ឃឺឈាង (Li Keqiang) និងលោក វ៉ាង ហ៊ុននីង (Wang Huning) សមាជិកការិយាល័យនយោបាយ និងជាលេខានៃលេខាធិការដ្ឋានបក្សកុម្មុយនិស្តចិន។ ក្រៅពីនេះ លោកក៏នឹងទទួលជួបជាមួយតំណាងក្រុមហ៊ុនចិនមួយចំនួនផងដែរ។
មន្ត្រីជាន់ខ្ពស់ដែលនឹងអមដំណើរលោក ហ៊ុន សែន រួមមាន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ លោក ប្រាក់ សុខុន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លោក អូន ព័ន្ធមុនីរ័ត្ន រដ្ឋមន្ត្រីក្រសួងសាធារណការ និងដឹកជញ្ជូន លោក ស៊ុន ចាន់ថុល និងមន្ត្រីគ្រាក់ៗ មួយចំនួននៃរបបក្រុងភ្នំពេញ ព្រមទាំងថ្នាក់ដឹកនាំនៃសភាពាណិជ្ជកម្មកម្ពុជាផងដែរ។
ថ្នាក់ដឹកនាំរបបក្រុងភ្នំពេញរំពឹងថា ដំណើរទស្សនកិច្ចនេះនឹងមានការចុះហត្ថលេខាលើឯកសារមួយចំនួនស្តីពីជំនួយរបស់ចិន និងគម្រោងកិច្ចសហប្រតិបត្តិការនានា។
នេះជាដំណើរទស្សនកិច្ចលើកទីពីរហើយក្នុងឆ្នាំ២០១៩ នេះ របស់ថ្នាក់ដឹកនាំរបបក្រុងភ្នំពេញទៅប្រទេសចិន។ ក្នុងអំឡុងទស្សនកិច្ចផ្លូវការ កាលពីចុងខែមករាកន្លងទៅ លោក ហ៊ុន សែន បានថ្លែងកោតសរសើរប្រទេសចិន ដែលបានគាំទ្រ និងផ្ដល់ជំនួយដល់របបរបស់លោកជាបន្តបន្ទាប់ ហើយជាលទ្ធផលភាគីចិនបានសន្យាផ្ដល់ជំនួយឥតសំណងជិត ៦០០លានដុល្លារអាមេរិកបន្ថែមទៀត ដល់របបនេះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។