អតីតនាយករដ្ឋមន្ត្រី លោក ហ៊ុន សែន នៅព្រឹកថ្ងៃទី៩ មករា បានធ្វើដំណើរចាកចេញពីប្រទេសកម្ពុជាទៅកាន់ប្រទេសជប៉ុនដើម្បីផលិតកែវភ្នែកសិប្បនិម្មិតនៅទីនោះ។ អមដំណើរលោក ហ៊ុន សែន គេឃើញមានកូនប្រុសស្រីបង្កើត និងកូនប្រសា ព្រមទាំងចៅៗមួយចំនួន។
លោក ហ៊ុន សែន សរសេរនៅលើទំព័រហ្វេសហ៊ុក (Facebook) ថា លោកធ្វើដំណើរទៅប្រទេសជប៉ុន ដើម្បីផលិតកែវភ្នែកសិប្បនិម្មិត ដែលលោកបានប្រើប្រាស់អស់រយៈពេល៣៤ឆ្នាំមកហើយ។ លោក ហ៊ុន សែន ក៏បានអរគុណរដ្ឋាភិបាល និងគ្រូពេទ្យជប៉ុន ដែលជួយមើលថែទាំភ្នែករបស់លោកកន្លងមក។
សកម្មជនចលនាមាតាធម្មជាតិ លោក លី ចាន់ដារ៉ាវុត កត់សម្គាល់ឃើញថា មន្ត្រីជាន់ខ្ពស់របស់រដ្ឋាភិបាល និងថ្នាក់នាំរដ្ឋគួរតែពិនិត្យ និងព្យាបាលជំងឺនៅក្នុងប្រទេសខ្លួន ដើម្បីស្វែងយល់ពីភាពខ្វះខាតដែលប្រព័ន្ធសុខាភិបាលកំពុងជួបប្រទះ។ លោក លី ចាន់ដារ៉ាវុត ថា ពលរដ្ឋខ្មែរនៅមិនពេញចិត្តចំពោះសេវាសុខាភិបាល កង្វះខាតសម្ភារៈ ហើយពលរដ្ឋចង់ឃើញរដ្ឋាភិបាលដោះស្រាយបញ្ហានេះ។
លោក លី ចាន់ដារ៉ាវុត៖«កាលណាយើងមិនប្រើប្រាស់ប្រព័ន្ធសុខាភិបាលក្នុងស្រុក វាហាក់បីដូចជាបង្ហាញអំពីសង្គមដែរ ពីព្រោះប្រព័ន្ធសុខាភិបាលយើងធ្វើឡើងមកគុណភាពនៅមានកម្រិត ហើយវាធ្វើហាក់បីដូចជា អ្នកមិនមានជម្រើសទៅព្យាបាលនៅក្រៅ.ប៉ុន្តែ សម្រាប់អ្នកមានលុយមានអំណាច គេអាចទៅព្យាបាលនៅក្រៅប្រទេសបាន ហេតុនេះគេអត់សូវខ្វល់អំពីការវិវឌ្ឍរបស់ប្រព័ន្ធសុខាភិបាលនៅក្នុងស្រុកទេ»។
កាលពីថ្ងៃទី១១ ខែធ្នូ ឆ្នាំ២០១៩ លោក ហ៊ុន សែន បានអះអាងថា លោកនឹងមិនធ្វើដំណើរទៅក្រៅប្រទេសដើម្បីពិនិត្យ និងព្យាបាលជំងឺ ទៀតនោះទេ នៅពេលដែលអាគារមន្ទីរពេទ្យកាល់ម៉ែតថ្មី សាងសង់ និងបំពាក់ឧបករណ៍បច្ចេកទេសទំនើបរួចរាល់។
ទោះជាយ៉ាងណា គេសង្កេតឃើញថា លោក ហ៊ុន សែន និងមន្ត្រីជាន់ខ្ពស់រដ្ឋាភិបាលមួយចំនួនរត់ទៅទទួលសេវាព្យាបាលនិងថែទាំសុខភាពនៅក្រៅប្រទេស។ ជាក់ស្ដែង កាលពីពាក់កណ្ដាលឆ្នាំ២០២២ អតីតរដ្ឋមន្ត្រីក្រសួងមហាផ្ទៃលោក ស ខេង បានធ្វើដំណើរទៅពិនិត្យសុខភាព និងព្យាបាលជំងឺនៅប្រទេសបារាំង ចំណែកលោក ហ៊ុន សែន ក៏តែងទៅទទួលការព្យាបាលជំងឺនៅបរទេសដូចគ្នាដែរ។ ជាក់ស្ដែង កាលពីខែឧសភាឆ្នាំ២០២៣ លោក ហ៊ុន សែន បានទម្លាយថា លោកបានលួចទៅវះកាត់ចង្កេះនៅមន្ទីរពេទ្យនៅក្នុងប្រទេសសិង្ហបុរីកាលពី ៧ឆ្នាំមុន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។