មេដឹកនាំរបបក្រុងភ្នំពេញ បញ្ជាឲ្យបញ្ចេញកងទ័ព និងអាវុធ ដើម្បីបង្ក្រាបក្រុមអ្នកគាំទ្រគណបក្សសង្គ្រោះជាតិទាំងក្នុងប្រទេស និងកំពុងរត់ភៀសខ្លួននៅក្រៅប្រទេស ដែលបានប្រកាស គាំទ្រដំណើរវិលត្រឡប់របស់លោក សម រង្ស៊ី នៅដើមខែក្រោយនេះ។ សកម្មជនបក្សប្រឆាំង លើកឡើងថា របបលោក ហ៊ុន សែន មិនដែលឲ្យគណបក្សប្រឆាំងបានសុខតាំងដើមមក ដូច្នេះ ពួកគេគ្មានការភ័យខ្លាចក្នុងការរួមដំណើរជាមួយថ្នាក់ដឹកនាំគណបក្សសង្គ្រោះជាតិ វិលទៅកម្ពុជានោះទេ។
មេដឹកនាំរបបក្រុងភ្នំពេញ លោក ហ៊ុន សែន បង្កើនវោហារសាស្ត្រគំរាមកំហែងកាន់តែខ្លាំង ទៅលើមេដឹកនាំ និងសកម្មជនបក្សប្រឆាំង ខណៈនៅសល់តែ ១ខែទៀតប៉ុណ្ណោះដល់ថ្ងៃដែលប្រធាន ស្ដីទីគណបក្សប្រឆាំងប្រកាសវិលចូលប្រទេសកម្ពុជាវិញ។
ថ្លែងនៅចំពោះមុខក្រុមសិស្សប្រឡងជាប់និន្ទេស A នៅវិមានសន្តិភាព នៅថ្ងៃទី៧ ខែតុលា លោក ហ៊ុន សែន បានបង្ហាញទឹកមុខមាំ អមដោយកាយវិការ និងប្រើប្រាស់ភាសាអសុរោះជេរប្រមាថ និងគំរាមកំហែងទៅលើលោក សម រង្ស៊ី និងអ្នកគាំទ្រគណបក្សប្រឆាំង។ លោក បានចាត់ទុក ដំណើរវិលត្រឡប់របស់លោក សម រង្ស៊ី ថា មានគោលដៅផ្ដួលរំលំរដ្ឋាភិបាលឯកបក្សរបស់លោក។ លោក បញ្ជាឲ្យរដ្ឋមន្ត្រីក្រសួងការពារជាតិលោក ទៀ បាញ់ បញ្ចេញកម្លាំងកងទ័ព និងសព្វាវុធគ្រប់ធុន ត្រៀមទប់ស្កាត់ និងបង្ក្រាបកុំឲ្យផែនការវិលត្រឡប់របស់លោក សម រង្ស៊ី ជោគជ័យ៖ «ឃើញត្រង់ណាវ៉ៃត្រង់ហ្នឹង ខ្ញុំផ្ដល់សិទ្ធិឱ្យកងទ័ពចេញធ្វើសកម្មភាព ពង្រាយទ័ព ប្រើអាហ្នឹងឃើញត្រង់ណាវ៉ៃត្រង់ហ្នឹង មិនចាំបាច់មានដីកាចាប់ខ្លួនទេ មិនចាប់ខ្លួនទេ អានេះឃើញត្រង់ណាវ៉ៃត្រង់ហ្នឹងតែម្ដង។ ផ្ដល់ឱកាសឱ្យកម្លាំងប្រដាប់អាវុធ រួមទាំងកងទ័ពចេញធ្វើសកម្មភាពទៅ កងទ័ពត្រូវដឹងតួនាទីនៅពេលសភាពការណ៍ធម្មតាទ័ព អត់ចេញទេ។ ចេញតែប៉ូលិស និងកងរាជអាវុធហត្ថទេ ហើយនគរបាលយុត្តិធម៌ តែបើប្រកាសទ័ពបែបនេះហើយបានន័យថា ទ័ពត្រូវពង្រាយហើយ ហើយប្រើអាវុធគ្រប់ធុន ព្រោះអានេះមិនមែន ជាបាតុកម្មទាមទារឯណា អានេះចូលដល់ប្រដាប់អាវុធ។ ហើយអ្នកគាំទ្រទាំងប៉ុន្មានអត់ចាំបាច់និយាយទេ ឃើញចាប់ៗ ខ្ញុំមិនចាំបាច់និយាយទេ ព្រោះអានេះ ភារកិច្ចបានប្រគល់ដោយច្បាប់រួចទៅហើយ»។
មេដឹកនាំដែលកាន់អំណាចជិត ៤០ឆ្នាំរូបនេះ ព្រមានទៀតថា បើប្រជាពលរដ្ឋណា ដែលមិនគិតធ្វើ ស្រែចម្ការ ហើយបែរជាបង្ហោះសារគាំទ្រផែនការវិលត្រឡប់របស់លោក សម រង្ស៊ី នឹងត្រូវចាប់ខ្លួនទាំងអស់ ទោះបីជាខំរត់ភៀសខ្លួនដល់ក្រៅប្រទេសក៏ដោយ។ លោកប្រកាសថា អ្នកដែលប្រឆាំងនឹងលោក គឺលោកមិនឲ្យបានសុខ និងមានសុវត្ថិភាពនោះទេ៖ «ប្រឹងធ្វើស្រែធ្វើចម្ការ កុំបង្ខំទៅងាប់នៅឯណា ? អារត់ទៅត្បូងឃ្មុំ អារត់ពីកំពង់ចាមថ្ងៃមុន ក៏ចាប់បាននៅប៉ោយប៉ែត។ កុំភ្លេចថា សំណាញ់គេញឹកញាស់។ អាអ្នកនៅបាងកក មិនប្រាកដថា អ្នកឯងមានសុវត្ថិភាពទេ ។អញតាមយកមកពីហ្នុងវិញទាំងអស់ និយាយត្រង់អ៊ីចឹងតាហ្មង » ។
ការចេញបទបញ្ជាជាសាធារណៈនេះ បន្ទាប់ពីប្រធានស្ដីទីគណបក្សសង្គ្រោះជាតិ លោក សម រង្ស៊ី ប្រកាសអំពីគម្រោងវិលត្រឡប់មកកាន់ប្រទេសកម្ពុជាវិញនៅថ្ងៃទី៩ ខែវិច្ឆិកា និងអំពាវនាវជាបន្ត បន្ទាប់ដល់កងកម្លាំងប្រដាប់អាវុធ អ្នកគាំទ្ររបស់លោក និងប្រជាពលរដ្ឋទូទៅឲ្យរួមគ្នាជាធ្លុងមួយ ដើម្បីតវ៉ាទាមទារឲ្យលោក ហ៊ុន សែន ចុះចេញពីអំណាច ហើយស្ដារប្រទេសកម្ពុជាឲ្យមានប្រជាធិបតេយ្យ និងការគោរពសិទ្ធិមនុស្សពេញ។
ប្រធានប្រតិបត្តិរបស់គណបក្សសង្គ្រោះជាតិរាជធានីភ្នំពេញលោក ម៉ន ផល្លា ដែលបង្ខំចិត្តនិរទេសខ្លួននៅក្រៅប្រទេសរយៈពេលជាង ២ឆ្នាំ ដើម្បីគេចពីការតាមចាប់ខ្លួនរបស់អាជ្ញាធររបបក្រុងភ្នំពេញឆ្លើយតបថា លោក ហ៊ុន សែន គឺជាមេដឹកនាំផ្ដាច់ការ កំពុងតែរំលោភច្បាប់ និងរំលោភសិទ្ធិមនុស្ស ធ្ងន់ធ្ងរបំផុត ដែលសហគមន៍អន្តរជាតិមិនត្រូវមើលរំលងនោះទេ។ លោកបន្តថា លោក ហ៊ុន សែន តែងតែមានទម្លាប់គំរាមកំហែង និងធ្វើបាបប្រជាជនស្លូតត្រង់ ជាពិសេស សកម្មជនបក្សប្រឆាំង។ លោកចោទប្រកាន់ទៀតថា ថ្មីៗ នេះ របបលោក ហ៊ុន សែន បានប្រើកម្លាំងបង្កប់ ប្រើហិង្សាលើសកម្មជនបក្សប្រឆាំងជាង ១០នាក់ នៅក្រុងភ្នំពេញ ថែមទាំងបានប្រើប្រាស់ប្រព័ន្ធតុលាការចាប់ខ្លួន និងកោះហៅសកម្មជនបក្ស ប្រឆាំងដោយគ្មានមូលហេតុរាប់សិបនាក់។ មន្ត្រីបក្សប្រឆាំងរូបនេះ អះអាងថា សកម្មជនបក្ស ប្រឆាំង គ្មានការខ្លាចរអានោះទេ ហើយបានត្រៀមខ្លួនរួចជាស្រេចទាំងក្នុងប្រទេស និងក្រៅប្រទេស ដើម្បីស្វាគមន៍ និងអមដំណើរវិលត្រឡប់របស់លោក សម រង្ស៊ី ទៅកម្ពុជាវិញ៖ «ខ្ញុំតស៊ូមតិ ដើម្បីបុព្វហេតុប្រជាធិបតេយ្យ តាមគោលការណ៍ប្រជាធិបតេយ្យ អត់មានប្រើហិង្សា ដូច្នេះ យើងអត់មានខ្លាចញញើតទេ។ ប្រជាពលរដ្ឋចង់ឲ្យមានការផ្លាស់ប្ដូរជាវិជ្ជមានដោយសន្តិវិធី ដូច្នេះ ពួកខ្ញុំត្រូវតែចូលរួមអមដំណើរនិវត្តន៍លោកប្រធានស្ដីទី សម រង្ស៊ី ដើម្បីធ្វើការផ្លាស់ប្ដូរឲ្យបាន»។
អង្គការសង្គមស៊ីវិល បារម្ភអំពីវិបត្តិនយោបាយក្នុងប្រទេសកម្ពុជា ដែលកាន់តែផុងជ្រៅទៅៗ នៅពេលដែលមេដឹកនាំនយោបាយ បន្តឌឺដងពាក្យសម្ដីបែបហិង្សាដាក់គ្នាដោយលែងខ្វល់ពីរឿងច្បាប់ និងសិទ្ធិមនុស្សបែបនេះ។
អ្នកនាំពាក្យសមាគម អាដហុក (ADHOC) លោក ស៊ឹង សែនករុណា ស្នើសុំឲ្យមេដឹកនាំបក្សកាន់អំណាច និង មេដឹកនាំបក្សប្រឆាំង បន្ទន់ឥរិយាបថដាក់គ្នា បញ្ឈប់ប្រើភាសាហិង្សានាំឲ្យពលរដ្ឋភ័យខ្លាច ហើយវិលទៅរកតុចរចាបញ្ចប់វិបត្តិនយោបាយ។ លោកបន្តថា ការបង្កើនវោហារសាស្ត្រហិង្សាបែបនេះ គ្មានភាពចំណេញអ្វីនោះទេ មានតែធ្វើឲ្យជាតិបែកបាក់ ពលរដ្ឋឈឺចាប់ និងប្រទេសជាតិចុះខ្សោយថែមទៀត៖ «កម្ពុជា រងគ្រោះដោយសារសង្គ្រាមនេះរាប់ទសវត្សមកហើយ យើងមិនចង់ឃើញមានអំពើហិង្សាណាមួយកើតឡើងដោយសារតែរឿងនយោបាយនេះទេ ហើយយើងចង់ឃើញបំផុតនោះ គឺដំណោះស្រាយនយោបាយដោយសន្តិវិធី ចង់ឃើញអ្នកនយោបាយរបស់ប្រទេសយើងមានភាពចាស់ទុំ នៅក្នុងរឿងសង្គមនយោបាយនៅក្នុងសង្គមលទ្ធិប្រជាធិបតេយ្យ»។
រហូតមកទល់ពេលនេះ របបក្រុងភ្នំពេញ បានចាប់ឃុំខ្លួនសកម្មជនបក្សប្រឆាំងចំនួន ៣១នាក់ហើយ ព្រមទាំងចេញដីកាតាមចាប់ខ្លួន និងកោះហៅឱ្យទៅបំភ្លឺជាង ១៧០នាក់ហើយ។ ជាមួយគ្នានេះ សកម្មជនបក្សប្រឆាំងជាង ១០នាក់ទៀត នៅរាជធានីភ្នំពេញ ត្រូវបានជនមិនស្គាល់មុខលួចវាយប្រហារបណ្ដាលឱ្យរងរបួសធ្ងន់ ស្របពេលសកម្មជន បក្សប្រឆាំងមួយចំនួនទៀត បាននាំគ្នារត់គេចខ្លួនទៅក្រៅប្រទេសជាបន្តបន្ទាប់ ដើម្បីគេចពីការធ្វើទុក្ខបុកម្នេញពីសំណាក់អាជ្ញាធររបបក្រុងភ្នំពេញ។
ទោះយ៉ាងណា មេបក្សប្រឆាំង និងសកម្មជន ប្តេជ្ញាវិលចូលកម្ពុជាវិញជាមួយគ្នានៅថ្ងៃទី៩ វិច្ឆិកា ខាងមុខ។ពួកគេ ជឿជាក់ថា វត្តមានរបស់លោក សម រង្ស៊ី នឹងធ្វើឱ្យកម្ពុជាមានការផ្លាស់ប្ដូរ មានប្រជាធិបតេយ្យនិងការគោរពសិទ្ធិមនុស្សឡើងវិញព្រមទាំងដោះស្រាយបញ្ហាប្រឈមទាំងឡាយរបស់ជាតិដែលរបបលោក ហ៊ុន សែនមិនអាចដោះស្រាយបានជាពិសេសគឺជួយកុំឱ្យមានការដកប្រព័ន្ធអនុគ្រោះពន្ធ EBA៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។